NB: Greek words may not display properly on your browser (Sgreek Greek font installation required; see http://www.silvermnt.com/fonts.htm).

B. C. D. CHRISTIANI DAUMII PHILOLOGI ET POLYHISTORIS CELEBERRIMI, EPISTOLAE LATINAE AD JO. FRIDERIC. HEKELIUM POLYHIST. CL. SCRIPTAE, EX IPSIS AUTOGRAPHIS DILIGENTER ERUTAE, INDICIBUSQVE NECESSARIIS AUCTAE ET EDITAE, a JO. ANDR. GLEICH/ Seren. Elect. Saxon. a Conc. Sacr. TORGAE, Typis Jo. Zach. Hempl DRESDAE apud Jo. Jac. Winkler Bibliop.

Egregiae egregiorum Polyhistorum, Philologorum ac Poetarum PENTADI, inque ea VIRIS Nobilissimis, Amplissimis, Excellentissimis atqvo Praeclarissimis, DN. M. DAN. MÜLLERO, Illustris Scholae Elect. Saxon. Provincial. Portensis Rectori, celeberrimo, etc. DN. M. GODOFR. WEBERO, Gymnasii Berolinensis Rectori optime merito ac incluto etc. DN. M. JO. PEISKERO, Lycei Vitembergensis Rectori dexterrimo et Societatis Teuton. Adscripto vere splendido, etc. DN. M. JO. REISKIO, Lycei Gvelpherbytani Rectori laudatissimo, etc. DN. M. TOB. LIEBEN, Lycei Freibergensis Rectori fidelissimo, etc. Dominis Fautoribus et Amicis suis plurimum colendis et honorandis S. P. D. Illisqve Fausta omnia sincere adprecatur Jo. Andr. Gleich. Sereniss. Elect. Saxon. a Conc. Sacr.

Prodeunt tandem meâ aliqvali industriâ et in vestrum non tantum, sed totius literati orbis conspectum se sistunt praesentes, qvas offero vobis omnibus atqve inscribo, EPISTOLAE DAUMLANAE ad HEKELIUM. Quamvis itaqve alii putent, me hâc editione operam perdidisso omnem, aut oleum, vel [gap: Greek word(s)] commisisse, qvippe qvi longe gravioribus, eisqve divinis curis et occupationibus, ad salutem animarum per pretiosissimum Christi sangvinem redemtarum spectantibus, sim districtus et alligatus, ut prorsus hoc negotio supersedere potuissem. Ast sciant isti homunciones, me nihil aliud, nisi Dei gloriam et proximi emolumentum in hoc instituto intendisse. Qvaesivi enim non qvae mea fuere, sed qvae fuerunt proximi.

Docent monumenta Veterum Vates apud gentiles in omni literatura fuisse versatissimos. Qvidni et inter Christianos Sacerdotes Deoqve et Ecclesiae consecratos viros deceat, politioribus qvandoqve studiis, defessum a tot curis et vigiliis animum recreare? Imo Paulum aliosqve divino afflatu impulsos praecones Novi Instrumenti, eodem scribendi genere usos esse divinamqve voluntatem epistolis comprehendisse, atqve ad posteros melioris ordinis causâ propagasse, est in propatulo. Qvapropter non

inepte Libri Canonici Epistolae Dei ad nos scriptae nomine veniunt. Cur igitur in profanis Epistolarum commercium tolerandum non sit? Cum sciamus, epistolam nihil aliud esse, nisi sermonem cum absente, qvâ animi sensa terrarum, spatiis divulsi atqve dispersi, tanqvam in mutuo consortio frui atqve commutari possint. Et errare illum non existimo, qvi epistolam colloqvium inter mutos, imo et inter mortuos definiverit.

Qvod damnum, qvaeso, perpessum fuisset Respublica literaria, si tot eruditorum Virorum olim in chartas conjectas, inqve epistolas comprehensas sententias antiqvitas suppressisset? Provoco vel ad unicum Ciceronis, eloqventiae illius Parentis, exemplum; qvanta eruditio lateat in ipsus ad familiares epistolis, illi norunt, qvibus non fungus pro cerebro est. Unde illos Ciceronem non intelligere, adeoqve alios ex ipso erudire non posse, arbitror, qvi illius scripta ex Scholis plane exstirpata volunt. Taceo jam epistolas eruditissimas Plinii junioris, Symmachi, Angeli Politiane, Petri Bembi, Desiderii Erasmi, Melanchthonis nostri, Julii Caesaris Scaligeri, Manutii et aliorum. Hoc certissime nobis conflat, CL. Virorum Epistolas olim sancte fuisse asservatas et inter thesauros ac gazophylacia regia, ex qvibus deinde Archiva nata, collectas. Hodie imprudens vulgus ejusmodi delicias spernit, qvia non intelligit, et cum Antonio Abbate in stultam illam abripitur sententiam, qvi epistolas

ab amicis scriptas laceravit aut Vulcano consecravit anteqvam adspexisset, dicens: chartae fallaces estis, etiam plenae mendaciis comburo vos, ne comturar a vobis, Augustino teste To. X. Opp. p. 975. Hinc recte fecerunt Viri doctissimi, qvi varia monumenta epistolica Theologorum, JCtorum, Medicorum, Philosophorum et Philologorum collegerunt et posteritati reliqverunt Factum proinde est, ut inter alias antiqvitates, qvas asservare in scriniis meis soleo, inciderem in opistolas affinis et cognati mei dilectissimi, CHRISTIANI DAUMII, Lycei Cygnei patrii Rectoris et Philologi bene meriti, ad CL. Virum, JO. FRIDR. HEKELIUM scriptas. Non diffiteor eqvidem, me magnis, eisqve reiteratis saepius precibus ardentissimis ab ipso accepisse, ad qvem erant datae, qvia renuebat initio prohibebatqve, ne in lucem prodirent, verecundia non solum admonitus, sed et iniqva malevolorum censurâ, qva se suaqve studia forsitan exponeret, dum inter vivos adhuc esset et tot testimonia industriae suae, publicari permitteret. Sed victus tandem instituti mei demonstratione ulteriori, permisit et accuratam illarum descriptionem, qvam inseqvebatur ipsorum autographorum donatio, pro qva munificentia et hac qvidem vice publicas easqve decentissimas ipsi gratias ago. Collegi nempe magnum Epistolarum Daumianarum ad alios eruditos magnosqve Viros exaratarum farraginem, qvae vel jam sunt in meis manibus, vel indies promittuntur et advolant. Qvoniam

vero fasciculus Hekelianus esset completissimus, illum tanqvam primitias harum deliciarum, et prpdromum, prologumqve prolixiori Operi aliqvando cum Deo emittendo praemittere volui. Apud Israelitas divina lege receptum legimus, proximum a demortuo consangvineum, antecessoris sui, sive frater frater, sive propinqvus, necem vindicasse, aut ejusdem nomen, aut familiam propagasse.

Qvis mihi vitio vertet, nisi imprudens. et in B. Daumii Manes injurius sit, qvod ejus schedas et diligentiam ab interitu vindicem et immortalitatem nominis sui famamqve ad posteros propagem, celeberrimo Viro sangvine, imo gente et mente conjunctissimus. Fecit ante me idem doctissimus Jenensium qvondam Polyhistor, B. JO. ANDR. BOSIUS, qvi prolixum inter THOMAM REINESIUM et CHRISTIANUM nostrum DAUMIUM institutum literarum commercium publici juris fecit Anno CIC CC LXX. dum esset adhuc inter vivos Daumius. Cur eadem libertas mihi denegata sit, ipso demortuo, non video. Accedurit tot sollicitationes exterorum, imprimis celeberrimorum atqve egregie modestorum qvorundam Italorum, inter qvos commune qvasi ac praedulce Germanorum delicium, Antonius Magliabeqvius, Magni Hetruriae Dueis Consiliarius et Bibliothecarius vere splendidus ac celebris, nec non Excellens Vir Benedictus Bacchini, Polyhistor inclusus et Literatorum Portio praecipua, primum,

nominandi, qvi omnino scientes qvanta sub palliolo Daumii Scholastico eruditio recondita esset ac lateret, per literas hoc amoris pignus mihi extorserunt.

Qvod vero illud vobis offero, Viri Amplissimi, eâ de causa factum est, qvia Vos de hoc argumento vobis proprio, qvotidiano et domestico, non uti coecus de colore judicare potestis, et cum B. Daumioidem vitae genus elegistis, Deoqve et concreditae Vestrae Studiosae juventuti per tot annos bene inservitis, immortalemqve nominis famam exinde magnamqve laudem vobis comparatis, nec miseram juventutem, uti in multis hodie Scholis, non sine maximo detrimento Reipublicae literariae, fieri solet, vanis persvasionibus et alienis a vero Sapientiae tramite studiis aut saltibus seducitis, sed partibus vestris ex asse satisfacitis, meqve hactenus per literas etiam et coram compellastis non semel, vestrisqve opusculis donastis. Grati igitur animi mei habeatis hoc testimonium ac [gap: Greek word(s)] , non compilatum, aut exlacunis aliorum exscriptum, sed ex amore et benevolentia amicorum conflatum mihiqve concessum.

Faxit supremus omnium rerum arbiter, ut vestris officiis et familiis splendidis diu in solatium et decus publicae rei literariae praeesse, et in seram posteritatem immortalem nominis vestri famam propagare possitis. Valete in Domino, cujus gratiae vos, Vestrosqve omnes serio commendo. Dabantur Dresdae, in Electorali Ips. Cal. Mart. A. O. R. CIC CC XCVII.

Hopfferianas epistolas imprimi curavit Hekelius, qvia illas ex Auctoris [gap: Greek word(s)] possidet: et earum mentio injicitur, p. 43. 44. hujus operis, qvamvis illas ante nos in publicum emiserit Historicus Lipsiensis haud incelebris, Dn. Adamus Rechenbergius in appendice ad Rolandi Maresii Epist. Philolog. p. 673. ad fin. Lipsiae 1687. in 12. impress.

CHRISTIANI DAUMII EPISTOLAE LATINAE AD JO. FRIDERICUM HEKELIUM.

I. Altenburgum. (Upereudaimonei=n !

Brevissimis tuis, qvas ais, longe brevioribus respondeo, mi Praestantissime DN. HEKELI, ob temporis itidem penuriam: Cum enim lator fasciculi tui, qvem Parentem tuum ex literis demum cognovi (qvod tamen mallem rescivissem ante ejus a me abitum) me occupatissimum literis alio scribendis, nec differendis offendisset, vix licuit ea, qvae misisti, pro qvibus singulares ago habeoqve gratias, obiter inspicere; nedum ut tuo desiderio facere qveam satis. Ne tamen Parens tuus prorsus inanis a me discederet, ecce unam et alteram pagellulam, qvae ad manus nunc, qvibus addidi simul, [gap: Greek word(s)] vicem, exigui qvid argenti pro Carmine mihi a Te inscripto, qvod ut non a sui pretio, id enim perparvum est, sed a dantis animo aestimes, et aeqvi facias boniqve, oro etiam atqve etiam rogoqve.

[gap: Greek word(s)] REINESIUM ex hujus vitae theatro decessisse primus nobis nuncias: Etsi enim literae Lipsiâ missae letaliter decumbentem affirmârint, nondum tamen ad beatorum coetum ex hujus vitae miseriis beatâ [gap: Greek word(s)] migrasse significarunt: nisi qvod rumor sine capite heri id innuere visus fuit. Et sic orbis literarius iterum eheu! illustri spoliatus est sidere, causamqve triumphandi habebit barbaries. Excell. Funccio vicariam salutem a me plenis buccis annunciabis, ut et Clarissimo Graefio, a qvo Indices Hasensteinianos exspecto reduces. Literas ad eum peculiares subita haec occasio non permisit. Ideoqve me Ei comiter excusabis. Dabo autem, qvantum potero, prima commoditate. De valetudine Per-Rever. Ursinitristia non semel inaudivimus, qvae narratione de tanto viro jucundiore animis nostris svaviter eximes. B. Vale. Dabam Cygneae [gap: Greek word(s)] , et prolixius, qvam primum putabam, d. 23. Februar. 1667.

Benefeceris mihi, si Excellentissimi Dn. Funccii Auspicalem de Auspiciis veterum dissertationem superiore anno editam, ejusdemqve solenne Philosophiae Encomium eôd. anno Mense Sextili editum, alicunde erutum procuraveris.

II. Altenburgum. S. P.

Habe Tibi, mi Praestantiss. Dn. HEKELI, deproperatos hosce versus Lauro tuae consecratos, qvales qvales. [note: a Sunt autem isti hujus tenoris:

Laudem sonare Numinis, laudem Virûm,
Virtus facit qvos inclutos;
Munus Poetae est, qvi vigescit aethere,
Et igne fervei entheo:
Id qvando praestas, insonans CHRISTUM Deum
Non impolitô Carmine,
Virosque claros concelebrans laudibus,
Qvos dia Virtus extulit,

Meliores enim creberrima impedimenta non permiserunt. Eos si excudendos dabis, qvaeso aliquot exemplaribus horum me bea: Soleo enim de omnibus meis duo asservare Exempla, caetera impertiri Amicis. De rebus tuis porro me certiorem facies, et qvae curaturum Te nosti, modo facultas sit, curabis. Ego vicissim meam Tibi spondeo promptitudinem. Pluta nunc non licet, sero demum â convidio reverso, et dormiturienti magis, qvam scripturienti. Ignosces igitur, et valebis CHRISTO, cujus Praeco es, commendatus. Dab. Cygn. pridie S. Georgii 1667. T. Christianus Daumius, Sch. Cyg. Rect.

III. Lipsiam. Clarissime atqve Praestantissime DN. HEKELI, Fautor amicissime.

Te salvum ac incolumem Lipsiam jam pridem rediisse, atque Scherzerum, Reinhartum, Rappoltum Franckensteinium, Thomasium, Alberti atqve Carpzovium, Excellentissimos viros, mihiqve, faventissimos, qvos omnes in occasione ex me ut decet, nî grave Tibi salutabis, Patronos et Praeceptores fideles esse nactum, laetans percepi, toto pectore precans, ut prospera valetudine qvotidie

utens studiis tuis sine ullo impedimento invigiles, qvo in virum solide doctum aliqvando evadas. Multi qvidem undiqve hac tempestate perversa atqve suspiciosa inveniuntur docti, qvi Platones atqve Marones se esse opinantur, cum tamen vix sunt ignavissimi Thersites et in fingendo ac componendo carmine Bathylli infelices. Et recte facis, qvod Mureto prudenter monente, in studiis tuis regrederis, qvi hactenus in itinere et intra Lares patrios in iisdem qvasi desiisse es visus. Felleri, qvaeso, vellices auriculam, ut Historiam Gothanam Ecclesiasticam aere meo redimat, eamqve, Te curante, mittat mihi. Aureus, crede mihi, liber est, et studiosae pubi apprime utilis. Succincte enim et accurate est compositus, ac multa nervose explicat, qvae multi ex praestantissimis Historicis hactenus praeteriêre et neglexêre. Qvis autor hujus libri sit, ex Thomasio nostro, Polyhistorum veterano illo, velim perconteris, et pro transmissa disputatione elegantissima qvam de styli Ethnicismo adornavit, magnas Ei verbis meis age gratias. Schraderus Respondens gaudet celeberrimi Schraderi Helmstadiensis praenomine, forte non sine omine. Et qvoniam Hallensem in disputationis frontispicio se nominavit, dubito, an sit Schraderi Helmstadiensis filius. Plura jam prohibent ventriculi imbecillitas atqve dolores calculi fere intolerabiles. Bene vale et salve a nobis, Dabam Cygneae d. 18. Aug. 1667.

IV. Lipsiam.

Diu est, cum a Te, mi DN. HEKELI, nullas acceperim literas silentii tui causa mihi adhuc incognita est, qvam ut mihi aperias, rogo. Fellerus non suo, sed tuo nomine mihi misit Historiam Gothanam Ecclesiasticam, cui postulatum pretium Tibi pro ea solvendum statim misi, qvod Te accepisse spero. Idem Fellerus cum Thomasio affirmat, non Reyherum, sed Dn. a Seckendorff jam laudatae Historiae auctorem esse. Qvod miror, qvoniam pauci Purpurati nobiles hodie inveniuntur in aulis, qvibus nobilius atqve amoenius studium, Historicum inprimis, sit magnae atqve arduae curae. Utinam haberemus tales plures Nobiles in aulis! Forte an Respublica literaria ruinam adhuc minitans se esset erectura, et neutiqvam casura. Excellentissimus Rappoltus noster studia tua egregie commendat, eaqve promovere sancte promittit. Scribit enim a venerando Zopffio, Ecclesiae Geranae Ephoro optime merito, Te sibi candide commendatum esse, Teque etiam olim sic vixisse, et adhuc vivere Lipsiae, ut pollentissima commendatione merito sis dignus. Nec improbant Franckensteinius atqve Thomasius singularem diligentiam, qvam in Antiqvitatum meliorumqve Literarum studium, qvod ex ignorantia doctorum vulgus spernit impendis. Melchioris Adami Vitas atqve Joh. Meursii Athenas Batavas si expiscari Lipsiae, vel alibi posses, rem mihi gratam faceres. Hos libros, qveîs aegerrime hactenus carui, praesente pecunia essem redempturus.

Pro transmissis donis, inter qvae inprimis Cl. Viri, Dn. Georgii Wonnae, Ratisbonensis Bavari, qvem Bosius noster valde ac digne laudat, Genii vere ingenuo atque liberali ingenio geniti fuerunt, debitas persolvo Tibi gratias. Et qvoniam mihi jam nihil est, qvod in [gap: Greek word(s)] vicem, ut vellem mittere possem, en! Carmen Heinsianum, qvod sumptibus meis apud nos recusum est. Vale, et vive mei, meiqve desiderii memor, qvemadmodum ego, dum vixero, tui. Datae Cygneae d. 29. Januar. 1668.

V. Lipsiam. Clarissime atqve Doctissime DN. HEKELI, Amice opertunissime.

Pecuniam pro transmisso libro a Dn. Fellero nostro Te recte accepisse, laetor. Sed nescio, qvid pro Athenis Batavis Meursii Tibi mittam, qvibus me et aliis muneribus chartaceis denuo donâsti. Et licet is liber prioris est editionis, et, ut scribis, non tam elegans, perfectus atqve absolutus, ac posterior est editio, a Barthio, Bosio atqve Reinesio olim mihi maxime commendata; tamen illum non sperno. Melius enim est, librum rarum ac carum qvendam possidere imperfectum, qvam perfectum non possidere. Te, candidissimo nostro Dn. L. Rappolto, h. t. Academiae Lips. Rectore

Magnifico, Praesid. de Poetarum Coronis mox esse, disputaturum, unus et alter Cygneus mihi retulit. Gratulor coeptis merito, et ut labor tuus in DEI gloriam reiqve publicae literariae commodum vergat, precor. Qvantum scio, nemo fuerit, qvi talem materiam rite examinandam ac publice proponendam in se suscipere esset ausus. Iterum precor, ut Deus adsit coeptis tuis. Seckendorfius, qvi omnino magni est aestimandus, an Misnicus, an Saxo, an Francus, vel alius sit Eqves, scire sum percupidus. Bellissime vale, mi HEKELI, et ulterius literis atqve amicitia tua me bea. Cygneae inter inevitabilia negotia d. 3. Martii 1668.

Clarissimae Praestantiae Tuae deditissimus Christianus Daumius, Schol. Cygn. R.

VI. Lipsiam. Eruditissime atqve Praestantissime HEKELI, Fautor et Amice oculissime.

Duo exempla de eruditissima de Poetarum Coronis Disputatione tua commode accepi, qvae ut mihi valde arridet: ita est mihi pergrata et maxime accepta. Unum exemplar habeat Dn. Sextus, qvi Noribergae in Sebaldina Schola Collegam agit strenuum, et nobis amicissimus est; alterius ego possessor ero. Sed qvis Paschalii de Coronis librum, in disputatione tua multae lectionis plena saepissime laudatum, Tecum communicavit? Hunc

librum multi laboris ac sat judicii, judicante heu! qvondam meo Reinesio, plenum nunqvam vidi. Si venalis aliqvando fortean prostaret, numeratâ pecuniâ emerem illum, qvantum etiam ejus esset pretium, qvoniam Maderus, Antiqvitatum studiosissimus, hunc Librum hactenus anxie qvaesitum, nuspiam autem inventum esse in Coronis suis affirmat. Fellerus mihi retulit, se cum Dnn. D. Ittigio, D. Keinharto, Affine tuo magno, et M. Lichtnero, nunc Ex-Decano, in Disputatione tua vere docta Tibi opposuisse, Teqve mascule stetisse et respondisse prompte, accurate et ex voto. Scripsit porro, Cosmum III. Mediceum, Mâgnum Hetruriae Ducem, aureos nonnullos Tibi clementissime donâsse, cum disputatione Tuam, sine tamen inscriptione humillima, Ejus Serenitati humillime exhibuisses. An hoc verum sit, et qvor fuêre aurei, me, qvaeso, si me ames, ut me amas, certiorem facias, mihiqve credas, hunc summum honorem summamque gratiam Tibi me neutiqvam invisurum esse. Paucis haec sors contingit, dum Musae amoeniores ac comptiores in aulis undiqve spernuntur. Et licet sint permulti Marones; tamen vix ullus Maecenas existit. Gratulatur sibi et Fellerus, qvod etiam cum sociis suis, qvi tanti Principis ac liberalis Ducis eminentissimam praesentiam cantu eleganti ac svavi sunt venerati, qvosdam accepit aureos. Illustrem Heroa a Seckendorff, qvem Dn. Ephorus Peiskerus e libera Nobilitate Francorum ortum esse dixit, etiam communem Literatorum Patronum esse ex ore

Dn. D. Ferberi nostri nuper accepi. Deus conservet toti literato orbi hunc Moecenatem, ut et Te, qvi vitâ longâ dignissimus es. dab. Cygn. [gap: Greek word(s)] die Philippi Jacobi 1668.

VII. Lipsiam.

QVae de nummis aureis, mi HEKELI optime, a Cosmo III., Magno Hetruriae Duce, Principe omne encomium, omnemqve adoream superante, clementissime Tibi exhibitis, mihi retulisti, grata mihi fuere et accepta. Et merito Tibi potes gratulari, qvod tanta gratia et singulari benignitate prae caeteris omnibus Lipsiensibus, omnino Deo, sicuti scripsisti, sic dirigente, es dignatus. Laudabiliter ages, si tot aureos studiis tuis optime absolvendis impendes. Aureorum tuorum numerus licet non excedat illorum, qvos Fellerus cum sociis suis musicis accepit, numerum; tamen illo non longe est inferior. Sed cur non mittis mihi binas disputationes tuas, summe Reverendo Dn. D. Scherzero, et Nobilissimo Dn. Thomasio Praesidibus, superiori septimana, uno eodemqve die, rarentissimô exemplô, summo cum applausu, ut retulit mihi Dn. L. Romanus, Lares patrios suos jam invisens, habitas? Idem Romanus me certiorem fecit, Te ab Excell. Dn. Profess. Alberti, qvem ipsam Mansvetudinem hactenus multi nuncupârunt,

mansvetissime facta oppositione, ob indefessum studium tuum et vitam tranqvillam et pacificam, Christiano studioso maxime dignam, publice esse, et qvidem digne, laudatum. Qvod et, testante Fellero nostro optimo, qvem officiose peto salvere, fecerit candidissimus Dn. L. Rappoltus, postqvam curiosas et lepidas Qvaestiones nonnullas rite decidendas Tibi proposuisset placide. Gratulor Tibi ex animo, et ut pergas strenue, qvo magnus tandem Apollo fias, paternê Tibi svadeo. Paschalium de Coronis [gap: Greek word(s)] Franckensteinius, Facultatis Philosophicae apud vos h. t. Decanus Spectatissimus, Tibiqve faventissimus, lubenter mecum est communicaturus. Qvapropter ut eum nomine meo, praemissâ salute officiosissima, ab Ejus spectabilitate modeste petas, mihiqve, si nactus eum, commode transmittas, rogo. Plurimum venerandus Dn. noster Ephorus, L. Peiskerus, cujus Excellentiae, ut et Nobilissimo Viro, Dn. D. Ferbero, acutissimi judicii Politico, utpote cui, ut ipse mihi retulit, per Dn. Dd. Gotteri, Advocati Altenburgici Clarissimi, pollentissimam commendationem, anno ineunte superiori, a facie innotueris, Te candide commendavi, Tibi et studiis tuis humanioribus impense favet, liberumqve promittit aditum, qvando nos aliqvando hîc es invisurus. Sed heus! HEKELI [gap: Greek word(s)] . Qvo magis Historiam Gothanam Ecclesiasticam manibus meis tero, eo magis hunc librum ob puram ac tersam Latinitatem osculari soleo. Bene vale, et Dispp. tuis occasione

VIII. Lipsiam. Eximie, Praestantissime atque Doctissime DN. HEKELI, Fautor et Amice plur. colende.

Paschalius de Coronis nondum advenit, cum tamen [gap: Greek word(s)] et cum magna gratia illum redire promisi. Utinam illum habere possem, ut viderem, an vera sit sententia, qvam B. Reinesius qvondam de eo mecum communicavit. Delrionis Commentarium in Senecam Tragicum saepe a Te allegatum etiam nunqvam vidi. Ejus possessor fortean erit celeberrimus noster Thomasius, qvem in occasione ex me, ut decet, salvebis. Ubi et qvâ formâ is excusus, qvaeso, fac, ut sciam. Thomasii atqve Franckensteinii Bibliothecas, praeter Fellerum, Romanus qvoqve praeclare mihi commendavit, non solum propter librorum multitudinem, sed propter elegantiam qvoqve, atqve illorum raritatem. Locum Ambrosii in Coronis tuis Poetarum ex Dialogo de Passione, forte ex alio allegatum, reperire non potui. Recte proinde Dn. D. Ittigius contra illum, qvod falso sit citatus, potuit insurgere. Sic amat saepe fieri, ut, si unum atqve alterum locum ex iis, qvi libros ex aliis levissime compilant, negligenter citamus, et autores ipsos non evolvimus, damno nostro plerumque

fallamur, et solide doctis proh! exponamur ludibrio. Qvis est laudatus Stumpffius iste Theologus, cum qvo Byruthi literarum habes commercium? Pro transmissis Disputationibus tuis Ephorus Peiskerus et ego decentes agimus gratias, scire cupientes, qvis proprie sit Pagiminus iste, adversusqvem in doctrina: An DEUS sit materia prima? Disputationem tuam, magno Thomasio praeside, mascule ventilâsti. A calculo incredibiliter vexatus plura jam non possum. Tu interim vale athletice, et salve cum omnibus nobis constantet faventibus. Raptim dabam Cygneae d. 19. August. 1668.

IX. Lipsiam. amantissime DN. HEKELI, Fautor magne ac candide.

Munera tua chartacea, neqvaqvam levidensia, pro qvibus gratias Tibi ago debitas, recte mihi sunt tradita, tamen sine Paschalio, qvem iterum interumqve frustra petere nolo. Lactantius Thomasii non est rejiciendus. Habet nonnunqvam observationes memorabiles. Sed Textus in nonnullis locis videtur corruptus, fortean qvod editor Ecclesiae Romanae addictus fuit. Extat qvoque Lactantius in ita dicta Haereseologia Henric-Petrina Basileensi in folio, pro qva Barthio tres dedi Joachimicos sine ulla poenitentia. An autem

haec editio sit Thomasiana accuratior, asseverare non audeo, qvi concatenatis laboribus scholasticis damnatus omnes autorum, Patrum cumprimis, qvas ego possideo, editiones ex voto conciliare neqveo. Hoc opus atqve labor est, qvem in se suscipiat vir otio atqve qviete fruens. Gregorii IX., Pontificis Max., Decretales Epistolas summorum Pontificum lubentissime emissem, si Parisiis in 8 vo maj. apud Haered. Chevallianos 1550. (aliae enim editiones sunt depravatae) fuerint impressae. Inserviunt enim conciliationi et explicationi Patrum in dubiis nonnullis, qvae nostrate Theologi nonnunqvam cum Romano-Catholicis habent. Barthius, alias meus, iniqve egit, qvod hunc librum rarenter obvium, pro aureo qvoqve, mihi non proprium reddere voluit. In qvas manus indoctas hic liber doctus et elegans nunc inciderit, expiscari non potui. Locum Graecum Nihi recte emendâsti, et similiter qvoqve explicuisti Plutarchi locum, qvi doctrinae de osculis Tuis denuo imprimendis apprime inservit. Sed ubi, mi HEKELI, accepisti Nilum, autorem adeo rarum, ut Barthius qvoque dubita verit, an Reinesius, helluo librorum ille, illum unqvam viderit? Et ego essem affirmaturus, Barthium ipsum illum non vidisse, sed ex eo excepta qvaedam paucissima ab amico accepisse, qvod Tibi aliqvando, qvando eris praesens, demonstrabo. Qvid, praeter Historiam Gothanam, edidit Seckendorffius? B. V. et Max. venerandum Dn. D. Reinhartum, Superintend. Lipsiensem gravissimum, Agantum tuum

summum, Patronum mihi concilia. [gap: Greek word(s)] Cygneae d. 26. Sept. 1668.

X. Altdorfium.

Te Aldorfii, mi HEKELI Clarissime atqve Praestantissime, hactenus per aliqvot mensium spatia studiis tuis invigilâsse, et sub praesidio Excellentissimi Dürrii, P. P., Disputationem Theologicam de Christianis et Christianismo, opponentibus M. Hakspanio Altdorfino, Slütero Güstroviensi atqve Rüdelio Noribergensi, ventilâsse publice, Sextus noster me nuper certiorem fecit. Ut Disputationem tuam per eundem Sextum mihi et Peiskero nostro venerabili, amantissime Te salutanti, mittas, ob nostram necessitudinem peto. Scribit idem Sextus, Te Noribergae non solum Generosis Heroibus ac Dominis, Fürero nempe ab Haimendorff / Kressio a Kressenstein, Nüzelio a Sündersbühel / Imhofio ac Holzschuhero, Scholarchis qvippe Septem-Viris ac Senatoribus summe eminentibus, sed diversis etiam Theologis, JCtis, Medicis et Philologis Clarissimis atqve Praestantissimis, Leibnizio inprimis, Wülfero, Fabricio, Beerio, Sauberto, Unglenkio, Arnoldo, Felzero, Volckamero, Betulio et Bormeistero, qvos ego omnes, crede mihi, meritissime magni aestimo, et qvam decentissime, si detur forte occasio, ex me salutare

peto, feliciter et ex voto innotuisse. Sed ubi hactenus latuisti, anteqvam Altdorfium Te contulisti, qvod nil literarum a Te accipere potui? Fortean Tubingae apud Wagnerum atqve Caldenbachium, vel Argentorati apud Boeclerum degisti, sicuti Tibi, cum abires, proposuisti. Interea qvid rerum agit Koenigius noster, qvem merito Noricorum Varronem appellas? Qvid meditatur? Qvid scribit? Qvid publicae luci est commissurus? Qvid agit Wagenseilius, immortalis nominis Philologus, cujus Bibliothecam multis MSStis membraneis et Nummorum rariorum copiâ refertam multi studiosi Altdorsiô huc venientes mihi egregie commendârunt? Si aliqvando salvus et incolumis, qvod ante ingravescentem hvemem, volente DEO, fore spero, ad nos redibis, de omnibus forte me certiorem facies. Interim ut haec amantissima Patronorum atqve Fautorum biga cum Sexto nostro candido nomine meo officiose qvoqve et peramanter salutetur, rog. Qvaeso ex Koenigio qvaeras, an possideat Lascari Grammaticam Graecam, a Barthio atqve Hornschuchio, imo et Zechendorfio meo mihi commendatam. Eam etiam in Programmate qvodam publico commendavit Slevogtius, Salanarum Musarum Phoebus haud obscurus, qvam ob hanc causam videre et perlustrare anxie desidero. Si in taberna qvadam libraria Noribergae, vel alibi hic liber paucis notus lateat, eum mihi redime, et Tibi persvade, me Tibi pecuniam, qvam solves pro eo, lubenter esse restituturum, simul ac librum accepero. Imo eme

pro me Rutgersii Adversaria, qvocunqve pretio illa etiam veniant. Si Ratisbonam, ut Sextus auguratur, excurreres, praeter Krannöstium, virum Consularem atqve Königii nostri affinem honoratissimum, Georgium Wonnam, Poetam et Philologum praeclarum atqve nobilem, meumqve Balduinum atqve David Wendlerum, viros antiqvi pectoris, et V. D. praecones laudatissimos meis verbis amanter saluta, et nobilissimos viros Portnerum, Fuchsium, Praschium, Kärscherum atqve AEschingerum, Politicos magnos ac celebres, mihi faventes, si aliter Tibi possibile, concilia, imo, mi HEKELI fac, ut laudatissimis B. Ursini, cujus qvippe solidam eruditionem atqve Polyhistoriam nunqvam flocci, sicuti nösti, habui, haeredibus, filiis inprimis ac genero. Danieli Zimmermanno, qvi ibidem qvoqve verbi divini praeco est, et nostro Balduino candide amicus, imposterum innotescam. Nunc experior a multis, qvalis et qvantus literatorum Maecenas sit Heros literatissimus Dn. a Seckendorff, qvem Tu Patronum nactum esse mihi Peiskerus narravit. Plura vellem scribere, sed diversa negotia a scribendi studio me avocant. Bene vale in Christo, cujus es studiosissimus, et responsione tua propediem me dignare. Celeriter dab. Cygneae d. 15. Sept. 1669.

Clarissimo Nomini Tuo addictissimus Christianus Daumius. A Tuo Reinharto, de qvo plura coram, salutem et qvaevis bona et prospera.

XI. Altdorfium. Ta\ a)gaqa\ a(/panta !

A Sexto nostro, HEKELI honoratissime atqve oculissime, qvatuor exemplaria de disputatione tua Theologica mihi apprime accepta et inter Patronos atqve Amicos Cygneos distribuenda hesternô die rite sum nactus, ut et ea omnia, qvae Ratisbonenses, Noribergenses atqve Altdorfini nonnulli ad me benigne miserunt. Sed B. Dn. Dilherri heu! qvondam concio funebris ad me nondum allata est. Scripsit opportunus Sextus noster, Epigramma Tuum B. Manibus, Dilherrianis sacrum Elegiae meae in postmissis statim esse annexum, qvoniam dubitâssent Norici, qvalis locus inter tot eruditos nobis proprie fuisset assignandus. Ovae locatio mihi minime displicet, nec forte Tibi displicebit. Krannöstium, Fuchsium, Portnerum, Praschium, Wonnam, Wendlerum, Balduinum atqve Zimmermannum, viros excellenter doctos, imo B. Ursini natu secundum filium, qvem, qvod Tibi amicissimum vocas, verbis meis amanter salvebis, me amare gaudeo, atque mihi gratulor, qvod Magnificus Dn. D. Alexandri, Legatus Brunsvigo Lüneburgicus, summa eruditione atqve expeditione politica vere magnus mihi adhuc faveat. Recte de eo judicâsti, qvod illum omnigenae literaturae, Graecanicae inprimis, Statorem nuncupâsti. Et qvoniam singulari humanitate, modestiâ atqve candore est praeditus, omnino credo, qvod Tu ab Eo ex voto sis exceptus.

Amat enim et veneratur impense illos, qvibus Philologicum studium summae curae, ut Tibi, atqve delectationi est. Ephorus noster Peiskeris amantissime Te salutans et pro transmissa disputatione tua meritas agens gratias adhuc vivit optime, qvemadmodum et Parentes tui, ut Graefius officiose Te salutans nuper mihi retulit. Nicolaus Rittershusius, cujus Corippum desidero, atque Mauritius Hoffmannus, hic Medicus summe inclutus; ille autem JCtus egregius, si adhuc sint superstites, candidê illis commenda me, et, si potes, effice, ut Ptolemaeum Latinum edition. Moletiano-Valgrisianae Venetae a Barthio, Bosio et Müllero, Mathematico Lipsiensium insigni, saepissime laudatum, cum Lascaro, Rutgersio et Acontio; qvando redibis, nanciscar. Pretium, qvod pro iis expones, en fidem! statim restituam Tibi. Qvis est iste Schubartus tuus, cujus nuper optime meministi, et Sextus noster ejus qvoque similiter fuit memor? Summevenerandum Reinhartum, Lipsiensium Antistitem, Agnatum et Patronum tuum magnum, d. 10. super mens. Sept. placide esse mortuum, Tibi, ut spero, notum erit. Is cum nuper hîc Cygneae per aliqvot dies commoraretur, multa affectus atqve benevolentiae singularis signa mihi dedit, Teqve ac Tua studia amoeniora venerabili nostro Peiskero et omnibus Bonis qvam diligentissime inter prandendum commendavit, et ut verbis suis cum celeberrimo Wagenseilio atqve Reinharto Norico, Theologo sui nominis, decenter saluteris,

iterum iterumqve jussit. Cordatissimus, eloqventissimus et solide doctus, sicuti nôsti, Theologus fuit, et propterea longiore vita dignissimus. Seckendorfio illustri isqvoqve favit, et Graefio nostro Altenburgensi, qvi tanti Theologi dextam in transitu reverenter est osculatus. Sed abrumpendum ob temporis penuriam et chartae angustiam. Vale in Domino, et mei non sis immemor. dat. Cygneae d. 5. Octobr. 1669.

XII. Altenburgum. [gap: Greek word(s)]

Clarissime et Praestantissime Dn. Hekeli, Fautor et Amice pl. colende. Hac ipsa vespera Noribergâ Sextus noster misit has Excell. KöNIGII ad Te literas, Eas, etsi occupatissimus, tamen statim per Lipsiensem tabellarium ad Te ire jussi additis nonnullis meis versiculis, qvi ad manum, qvos boni ut consulas rogo. CL. Graefio salutem, ex qvo, qvaeso, qvaeras, an meas ad ipsum per Godefr. Mirum cum fasciculo missas recte acceperit. Vellem plura, sed bis inter haec paucula interpellor. Alias prolixiorem me experieris. B. V. datae Cygneae d. 17. Dec 1669.

XIII. Altenburgum. S. P. Clarissime Dn. HEKELI, Amice plurimum colende!

Inter mille avocamenta vix tribus licet ad Tuas. Pro abs Te missis repono ecce Homilias Patrum, qvibus Praefatio adhuc defit, qvam [gap: Greek word(s)] proxime capies. Popma Lexicon Vetus laudat, p. 116. meae Editionis Anni 1654. exscripsitqve verba Turnebi l. 28. Adv. c. 6. qvi mihi non indicavit, qvale Lexicon habuerit. Imo indicat, praecendente capite, Onomasticum P. Danielis in membranis perscriptum fuisse. Necenim reperio vocem in Philoxeni, Cyrilli et talium Glossariis. Nec Rapiae et Salomonis Constantiensis Lexicis potitus unqvam sum, etsi inspexerim et nonnulla excripserim qvondam. Notissimum doctissimos viros, praesertim in Galliae, multa possedisse talia Lexica hactenus nondum, qvod scimus, publicata. De qvibus judicium ferre nostrum non est. Et ipse talium schedis nonnullis fruor. Mihi ejusmodi incertae allegationes semper molestae fuerunt, aliqvando suspectae ac sublestae fidei. Qvare non admodum curo, ut ut magnorum Virorum. Nam et hi juniorum studia potius despexisse videntur, qvam adjutum ivisse, digitum non semel intendentes ad fontes, qvi nulli sunt. Dan. Eremita inter schedia nescio qvae repositus jacet: unde ejus inqvisitio inter tot curas et occupationes nunc impossibilis. Qvamprimum otiosus reperero, ut describatur

Tibi, dabo operam. Ad Graevium dedi multas hactenus: aliqvando insinuavi Amicum: sed nihil contra responsi recepi. Et nescio cur Bosius taceat, cui itidem Amicum non ita pridem commendavi. Miror vero, cur a vestrate Graefio, qvi Eremita excuso (qvem ego nunqvam vidi) usus est, exemplum non acceperis? B. V. dab. Cvgn. [gap: Greek word(s)] d. 8. Aprili 1670.

XIV. Altenburgum. Salve Praestantissime DN. HEKELI, Amice pl. dilecte!

Habes hîc primam Homiliarum pagellam, et una Eremitam, hac tamen lege, ut intra octiduum certo ad me redeat. Nam ut ipse describi faciam ac deinde conteram mea [gap: Greek word(s)] non patitur. Adjunctum Exemplar ad Graefium cura. Non potui per occupationes relegere. Qvapropter obiter observata errata uterqve corrigite, et si qvae praeterea observatis, mature significate, ut peculiari charta excudi qveant. Hodie ad ipsum Sextum scribam, unaqve mittam cum literis Examplaria KöNIGIO Nostro destinata. Qvapropter brevitatis me excusabis, cum vix ad tantillum scribendum otium suppetierit, nec tuum hominem inanem abire voluerim. B. V. et si qvae judicia de meo Opusculo inaudieris, sub lege silentii

T. Christianus Daumius. Accepistine a Königio Paschalium de Coronis commodato, an muneri?

XV. Altenburgum. S. P. Praestantisime Dn. HEKELI, Amice pl. dilecte!

Misi nuper Homilias pro Meibomio tuo, unaqve alias chartas, qvae ad manum erant. Nunc ex promisso literas addo, etsi deproperandas; adeo omni destituor ad tales exarandas otio, et cingor mole agundorum, ut viginti literis responsum adhuc debeam, nescio, qvando solvendum. Ignosces igitur, si non ex asse satisfacio. De Epistolis Reinesianis ab Illustri et Magnifico Dn. PFLUGIO, [note: b GEORGIO np. DIETERICO, Consiliarium aulicum t. t. gloriose agente Altenburgi.] cui officiosissimae salutationis honorificentiam nuncupabis, impetrandis, gratissimum esset et mihi, et Excell. Bosio, si spem res seqveretur. De raro aliqvo Libro e mea Bibliotheca, cui magis studeo tuendae, qvam augendae, alienando, qvid scribam, nescio. Ubi Besselius nunc degat, valde scire aveo. Osor et Rosor meus, qvisqvis est, sorte nihil alienum moribus suis facit. Ejus cur rationem aliqvam habeamus? Ad Sextum nostrum hactenus ob aurigae sublestam fidem,

qvi pecuniam pro libris ipsi et Königio debitam, hîc reliqverat, unde facile hi amici morâ ea offendi qveant, nihil scribere potui. Ante biduum tamen literae meae cum aere eo profectae sunt. Ab Excell. KöNIGIO autem per aliqvot menses nullas obtinui, etsi promissas. Praemiosum pro pecunioso dixit Accius apud Nonium, et habet Festi exsector. Videndus et Gifanius ad Lucret. p. 398. et Scioppius in Synonymis Poeticis. Vitae Zechendorffianae, h. e. Concionis ejus funebris nullum mihi superest Exemplum, nec facile haberi potest: Reinesianam autem misi ad Excell. Bosium, qvi se concinnaturum talem narratiunculam, et Epistolis nostris praefixurum esse pollicebatur. Sed a proposito resiliisse nemo non videt: nisi aliis Opusculis praefixurus est. Trimestre fere abiit, ex qvo ab illo nullas vidi literas, nec alia, qvae cum ipso communia feci, recepi; sed invaletudini ejus et occupationibus hoc asscribo. Admodum Rev. PEISKERUM, ubi ad ipsum accedam, a Te salutabo, ut innotescas Ei familiarius, non puto magnopere esse laborandum. Excell. FUNCCII, cui qvaevis prospera ac fausta toto pectore apprecor, viales emi, sed nondum propter impedimenta legi. Ad ea, qvae petis ut suggeram, nihil memoriae incidit; ut inqviram, prorsus otio excludor. Eremitae [gap: Greek word(s)] qvî emendari debeant, si depraehendisti, communica. Pro cera sigillari et adjunctis gratias ago singulares. Electio mihi difficilis est, qvod nulla non experienti se mihi probaverit. HENERUS qvis? Sed abrumpere

XVI. Lipsiam. Salutem et Officia! Clarissime et honoratissime Dn. HEKELI, Amice honoratissime.

Accepi heri literas tuas ideo inprimis mihi gratas, qvoniam eae me docuêre, ubi hactenus vixeris. Te in oris inferioris Saxoniae, Helmstadii inprimis, superiori autumno esse commoratum, et nunc iterum Lipsiae studiorum causa vivere, nescivi, nec noster Fellerus retulit mihi hoc, cum qvo sine omni dubio, ut olim, hactenus freqventer eris conversatus. Veri amici non sunt, qvorum amicitia non est constans et perpetua, sed evanescit qvasi ac desinit. Ut mihi amicus constans sis, etiam atqve etiam rogo, qvoniam Te impense amo, animiqve et ingenii tui dotes egregias undiqve praedicare soleo. Interea qvid agit Heros a Seckendorff? Qvid Rappoltus? Qvid Thomasius? Qvid Franckensteinius? Qvos omnes, si daretur occasio commoda, ex me cum Fellero officiosissime salutabis. Qvae de studiis meis atqve Homiliis abs me nuper editis ex Virorum celeberrimorum, Cellarii inprimis, Conringii, Meibomii, Schraderi atque

Sauberti, ore mihi retulisti, grata mihi sunt, et vellem, ut tantis Viris, qvibus hactenus ignotus fui, cura tua fideli ipsae Homiliae chartâ mundâ impressae commode possent transmitti. Nec iniqve tuli, qvod Tu, Amice, amicissime monere voluisti. Homines sumus, ideoqve errare facillime possumus. Etiam ingenia summorum Virorum, qvibus ego impar sum, non adeo sunt acria et selicia, ut nonnunqvam vel nimiae confidentiae, vel summae praecipitantiae ductu possent falli atqve alios fallere. Perge et annota omnia, etiamsi saltem Jota esset, studiosissime, qvae dubia Tibi atqve suspecta in omnibus meis editis occurrant. Ex hoc, persvade Tibi, intelligam, Te candidum meum Hebelium esse. Anteqvam autem Lipsiâ Altenburgum ad patrios Lares Te conferas, qvaeso id mihi significes, et, si possibile, facias, ut Rutgersii Adversaria, aliaqve in schedam peculiarem olim conjecta ex voto tandem nanciscar. Belle Vale, et, ut hactenus fecisti, me ama toto pectore. Cygn. dat. d. 5. Febr. 1671.

XVII. Altenburgum. S.

Praestantissime et Clarissime Dn. HEKELI, Amice svavissime! Herbinium accepi, redibit justo tempore. Paschalius ecce in 8. editus Bibliopolia opplebit. Tuo si ad octiduum carere potes,

mitte; qvo saltem qvid libri sit inspicima; ubiqve enim inposterum prostabit. Causim Terentii est 4. Heaut. 8. Attii Alphesiboea etc. Petri Criniti de honesta disciplina lib. 6. c. 2. Disertim Plauti, Livii, Exqvisitim Varronis. Minutim Lucilii S. Colum. 4, 14. Arnobii l. 7. p. 288. Edit. Heraldi. et haec coram poteram in meis Indicib. monstrare, nisi alii Sermones nos avocassent. HENERUM nisi recudi facies, aliqvando ad me ad pauculos dies concede. De Reinesianis Epistolis conqvirendis esto memor. Erit hinc studii tui depraedicatio. De [gap: Greek word(s)] Dapatilia nunc non superest tempus. Labor enim praeter spem festinat; fiet certo proxime. Hactenus ob intermissum Medicaminum usum a calculo denuo vexatus fui. Cavebitur hoc imposterum. Bene vale et festinationi ignosce. Cygn. [gap: Greek word(s)] d. 23. Maji 1671.

Scalib. Conject. ad Varr. p. 189. Dapatica et Dapatilia veteres vocabant omnia opipara. Comisse, est comedisse, ab eo, qvod comest, non comedit dicebant. Comisse igitur, qvod postea comesse. Neqve aliter invenitur apud Plautum Duonus ceruses, est priscâ lingvâ, bonus Creator. Nam Cerus in Carmine Saliari erat creator, qvod alibi notamus. Ut a gnarus factum gnarures, qvo Plautus utitur, et Ausonius:

Non promus instans, non arator gnarures: ita a Cerus factum cerures, qvod veteres dicebant

per s. Ceruses. Et hoc est, qvod hic disputat Varro. Divius et Divianus, qvi postea Janus, Ut Divia et Diviana, qvae postea Jana et Diana, auctore etiam eodem Varrone. Cusiones sunt Curiones, nempe ii, qvi Curialia Sacra faciebant. Hîc vero etiam pro ministris sacrificiorum, ut saepe. Haec Scaliger ad lib. 6. de LL. Varr. An sufficiunt? Locus apud Zechend. habetur p. 156. (non 136.)

XVIII. Altenburgum. CL. Dn. HEKELI, Fautor et Amice plur. colende!

Remitto Paschalium, non satis accuratum saepissime Collectorem, et sui securum, qvo vix interventu Affiuis et cognatae meae, et aliorum ad me per aliqvot dies visentium uti-frui potui. Et vellem eo appulisset tempore, qvo otiosior eum posciturus fuissem. Interim pro communicatione gratias magnas ago habeoqve. Eremitam utinam excusum nancisci daretur. In Popma apertus error est, recte a Te correctus. Et nota Giessensium illa indiligentia est, vel ex nupera Rhetorices Dietericianae Editione, qvo libro Sol nihil maculosius vidit. Ludovici Jacobi Cabilonensis Bibliographiam Parisinam possideo, cum Bibliographia Gallica universali. Annorum 1643. 1644. 1645. etc. Herbinium Lipsia et Norinberga negant. Dabo operam, ut aliunde, si pote, eruam. De usu herbae illius nihil addidisti; HENERUM ecqvando videbimus? De statu nostrae Civitatis qvid innuas, ignoro. Is pristino cardine adhuc

volvitur, deqve eo susurri, si qvi fuere, conticuerunt. Debeo M. Graefio nostro responsum. Sed ita me DEUS amet, ita obrutus fui variis hactenus, et a literis exarandis amotus per plurimos praeter solitum adventores, ut vix haec ad Te potuerim. Ignoscetis brevitati literarum, et proximo otio [gap: Greek word(s)] eo prolixiores, nisi denuo interturber, exspectare. Paschalii Carmen praeliminare qvaeso ad me cures descriptum. Imo ipsum librum aliqvando otiosiori ad octiduum remitte. Zechendorffii Concionem funebrem ut excusam acqvitam, allaboro. Si nihil expedio, curabo tamen Curriculum vitae descriptum. B. V. Cygn. d. 4. Julii 1671.

XIX. Altenburgum. Salutem Plurimam. Clarissime HEKELI, Amice svavissime!

Tot obruor cotidie Epistolis, ut cui primum respondeam, maxime dubius ferar. Ignosces itaque comiter, si ad amatissimas tuas hactenus nolens-volens silui. Programma tuum remitto, qvod pridem nactus fui. Addidi Gebhardi de Eiresione. Valde vellem illa capita mihi ex Paschalio descripta, ubi de illa agit. Herbinio tuo hac aestate, Superint. Pegav. D. Tellero, D. Rappolto, Lic. Fellero, M. Kombero, Dn. Knüpfero, Cognatis meis

hinc et inde, ut Studiosis nunc unis me compellantibus, nonnullisqve convivis et hospitibus, uti prorsus ad votum non potui; nec aliunde impetrare. Si vis, indulge adhuc ogdoada unam et alteram. Sin minus, remittam statim. Bibliographia Gallica Ludovici Jacobii qvalis sit, ubi videris, an ipsus habeas, haud gravatim doce. Clariss. Graefio, nunc amice salutando, qvamprimum potero, itidem respondebo. Apud eum silentii me excusabis. B. Vale. Scrib. raptim Cygn. d. 2. Octobr. 1671.

XX. Glaucha. Salutem plurimam! Mi praestantissime Dn. HEKELI.

Occupatissimus et impeditissimus haec scribo. To nunqvam correxi, ut et [gap: Greek word(s)] , pro qvo reposui [gap: Greek word(s)] . To tenus hac sivi. Sed velim autoritatem vel unius classici auctoris mihi suggeras, praesertim styli soluti. Novaturientium haec Sapientia est. Fasciculus tuus die Mercurii Norimbergam abiit. De duplici ss his diebus properans in chartam qvaedam [note: g Praepositi minoris S. rejectio. 1. Inutilis Novatorum emendatio est. Non enim corrigit falsa, sed vel idem reponit, vel deteriorat. 2. Antiqvitate non est fulta. Nemo enim ante mille, aut plures annos ita scripsit, ne dicam ante ducentos. 3. Superioribus annis a non unio tentata a peritioribus autem rejecta. Ut a VENETIS et nostro Cornario, etc. Qvibus Camerarius, Philippus, Itali alii Galli, Belgae, etc. assensum, non praebuerunt. 4. S. minus finale est Vocum, non Syllabarum. Finales apud Hebraeos in medio, nisi mysterii causa, poni non solent. In Compositis vocibus tolerari qveat facilius, ut in dissipare Non autem in simplicibus, ut Jussum. 5. Nec in Graeca [gap: Greek word(s)] probat; et ineptiunt nonnulli Novatores [gap: Greek word(s)] scribentes non [gap: Greek word(s)] . 6. Vitanda maxime ambiguit atis gratia ac de decoris. Sic ex Jussit dubium capio, duaene sint voces, an una. Doctissimus, an sit doctis simus, Composum, an Compos sum. Graecissat. Discessi. Perpessus. Pessum. Studiosissimus. Propulsasse. Facessivit. Necessitas. Impossibilis. Successit. Exossatio. Tussit. Crassum (qvasi cras sum) Errori saepe dat ansam. 7. Typothetis commodior ac celerior usu [gap: Greek word(s)] ss est. 8. Omnes typi, olim fusi, essent renovandi. 9. Novatores longum s. tamen vel nolentes faciunt, scribentes Clariss. pro Clariss.] conjeci, qvae describere nunc non potui. Remittas velim, et qvid Tibi videatur, indices. Typographo, ut tuam seqveretur Orthographiam, serio injunxi. Sed me invito monitionem sprevit, et ob festinationem mutare neqve vult, neqve potest commode mutare. Accentus tamen falsos in atqve, usqve studio sustuli.

Neque enim composita ex-Enclitica sunt. Distingvendum inter QVE Encliticum, et inter terminale Vocum. Qvanqvam omnem accentuandi rationem cum Scaligero insuper habere melius esset. Plura non licet. B. V. Cygneae d. 2. Decembr. 1671.

XXI. Glaucha. Salutem plurimam! Micarissime DN. HEKELI!

Mitto Rosinum et Chabotium, sed non ex ultima et auctiore Editione, qva etiamnum destituor. Tortellium nescio, ubi qvaeram, et qvibus appactus sit. Igitur nolens volens nunc mittere neqveo. Difficilis enim in tanta librorum Copia et Confusione est ejus inqvisitio, praesertim me tantopere Scholasticis aliisqve occupato negotiis, et inprimis Catone meo repexo nonnihil, qvi hîc nunc apud Ebelium recuditur, cujus hac hora qvartum octernionem emendavi. Ubi otium suppetet, tuas singulas relegam, et ad qvaesita una respondebo. Pro munusculo conditorum cerasorum uxor gratias agit prolixas. B. V. Cygn. d. 15. Martii 1672.

XXII. Glauchaviam. JESUM et ab ipso Feliciss. Novum ANNUM!

Habes hic, mi DN. HEKELI, petitum Librum. Incidit et, dum haec scribo, Angelomus, sed gerula festinat, et ego festinans reperire statim non possum. To TIBI ad diversa Verba trahi potest, qvasi emphatice, nec magnopere puto erratum esse, qvanqvam scitius abesset semel. Excell. Funccii Programmata Görlicensia fac procures mihi. AEstimo enim illa non parvi, tum ob rerum variarum atque utilium, qvarum plena, copiam, tum obstyli, qvâ exornata, gravitatem. Si adhuc Görlitii est superstes Praecellentiss. M. Christianus Seifertus, vir solida eruditione ac multa virtute clarissimus, et olim Conrectoris nomine gloriose insignitus, illum cum Funocio nostro a me saluta decenter, et effice, ut cum Lamberti Danaei Theologiâ Christianâ Genevae ap. Eusthat. Vignon 1579. impressa, etiam D. Zachariae Ursini, Theologi Heidelbergensis, Doctrinae Christianae Compendium, ibid. qvoqve apud eund. 1584. edit. (Nam has Editiones heu! qvondam meus Reinesius mihi prae caeteris commendavit) ex taberna libraria Gvelferbytana nanciscar. Pro missis gratias ago, et me brevitatis ut excuses rogo. B. V. Cygn. postrid. KL. Jan. 1673.

XXIII. Chemnicium. Sal. plurimam!

Remitto hic Herbinium cum sexcentis pro eo, et Programmatis Theilianis gratiis. Illo ad votum uti-frui non licuit, tot intercurrerunt, qvae studiis meis remoram inerjecêre. Eum si mihi alicunde impetrare posses, gratissimum faceres, et solverem sine mora aes expositum. Qvae M. Gerhardo hic excusa sunt Epithalamia ecce! Lipsiensium vix unum Exemplar adipisci valui. A viris doctis hîc nulla rogavit. Ergo et nulla retulit. Voce imitus usi sunt Apulejus lib. 9. Macrobius lib. 5. c. 17. ad qvem Isaac. Pontanus videndus, ut et Arnobius, Gellius ex restitutione Lipsii, Barthius ad Calpurn. Plin. Valerianus. l. 3. Martianus Capella lib. 2. Recentiores ne memorem. A Nicolao Heinsio humanissimas literas accepi, cum Elegia excusa, qvam hîc recusam nunc accipis. Ei nunc responsum meditor. A Schirmero videndi qvid spes decollat. B. V. dab. Cygn. praefestinatum D. 27. Febr. 1673.

XXIV. Chemnicium. CL. DN. HEKELI, Amice amatissime.

Versa est in luctum Cithara mea! Ita Hiobi illud nunc meum est. Exuit mortalitatem amatissima mihi mea Conjux, placide, pie, et rationis compos usqve ad extremum fere halitum, die 6.

Martii morte soluta; nono vero sepultura honorificê affecta. Nunc laxae aedes viduo multo apparent laxiores, ubi vastities ac solitudo, et inter has aerumnas tussi ego atque catarrhis tantum non enecor. Usus eram catharsico medicamento ante coenam pridie ejus diei, qvo beate illa ex hac vita abiit. Noctem insecutam pervigiles precibus cum moritura vacavimus. Novuit igitur illud mihi magis, qvam profuit. Natalitius meus annus nomine meo ostenditur.

die 29. Martii paulo ante nonam antemeridianam. Henerum ut expediam, dabo operam. Hactenus impossibile mihi fuit tot curis, doloribus atqve aegritudinibus exposito. To Clypeare Pacuvii est in Hermiana fabula, docente Nonio, ut vel ex ipso Crinito nosse poteras. Alioqvi hoc verbo ut itur et Abbo Levita Cernuus dictus, Lib. 1. de obsid. Lutet. v. 228. Alios nondum annotavi. Clypeatus Virgilii est. Plura nunc non licet; nec qvid restat, nisi ut Te qvam optime ac melius me valere ac luctus expertem diutissime vivere jubeam. Cygn. d. 17. Martii 1673.

XXV. Chemnitz. Clarissime. Dn. HEKELI, Amice amatissime!

En HENERUM tandem Tibi! [note: d Sunt inprimis hujus Poetae praenomine Renatus dictus BUCOLICA, Parisiis sub Invidiae signo e regione Collegii Cameracensis 1551. in 8 vo impressa. Et qvoniam hic Libellus adeo est rarus, ut ipsi Parisienses, apud qvos, uti jam dictum, excusus est, librum hunc unqvam extitisse negârint, B. Dn. DAUMIUS. Affinis meus desideratissimus, pro excuso sibi ab HEKELIO donato Exemplari, qvod jam penes me est, manus suae Apographum contra donavit HEKELIO, in illorum frontispicio Ejus subscripto clarissimo nomine.] [gap: Greek word(s)]

tuam versu ut etiam testareris vellem. Accepi hodie a Kirchmaiero et Carpzovio P P. Epicedia, Pirnâ nuper a Petermanno. Sextus noster promisit nonnulla: Sed auriga superiore vice a Sexto ob nimiam festinationem nihil omnino attulit, ne literas qvidem. Exspecto igitur proximo ejus reditu. Lipsienses etiam cunctantur, uti et Köberus. Sed nec Concionem funebrem adhuc exhibuit noster Peiskerus. Epistolae tuae qvia nimis sera veniret, et Tu variis occupâris tibi gratiam facio. Poetarum Belgarum seriem conficiam, ubi otium dabitur. Pro a te missis, qvae vides, redhibeo. Miror nonnulla illic Poetica [gap: Greek word(s)] . Tuos amicos, bene cupientes mihi, si vicissim salutationis officiosae honorificentia veneraberis, facies, qvod illis arbitror et mihi gratum erit. Ad plura nunc nihil vacui est remporis reliqvum. Instat enim tempus conqvirendi pecuniam, qvae choro Musico his diebus exsolvenda ac distribuenda est. B. V. Cygn. d. 27. Maji. 1673. [gap: Greek word(s)] .

XXVI. Chemnicium. S. P. Mi Carissime HEKELI!

Vix his vaco. Mitto Wowerium, sed intra 14. dies propter Molinaeum, qvo sane aegerrime, nunc careo, certo remittendum. Vertumnus non excuditur, et dubito an unqvam? Illibens libros alio mitto, praesertim ubi tabellarii, qvales ante omnes, qvi ad nos tendunt, incerti, aut fidei mihi non placitae. A Sexto intra Octimestre nullas accepi, aurigae culpa. Susurrant, nescio, an vere, nostrum Con-Rect. Ephoriâ Pegaviensi mactandum. Max. Rev. Ephorum nostrum hoc trimestri non nisi semel conveni. Catalogos petitos Poetar. Christianor. constiparem, sed otium negat. Christianos veteres, sed non omnes, uno fasce conclusit Georg. Fabricius. Si eos junctim editurus essem promisit Heinsius nonnullos, qvibus meum institutum, ut ait ornari posset maxime. Sed qvis Bibliopolarum annuet? Recentiorum infinita est seges. Major eorum pars (non enim omnium, nec hoc [gap: Greek word(s)] ) in mea Bibliotheca, uti Index monstrat, qvi Poetarum duo decim octerniones conficit. Videbo de eo otiosior. Nosti Eobanum, Stigelium, Philippum, Camerarium, Siberum. G. Fabricium, Ioh. Clajum, Nic. Reusnerum, Ioh. Majorem, Paul. Didymum, Ludov. Helmboldum, Greg. Bersmannum, Nic. Frischlinum, Fried.

Widebramum, Justum Vultejum, Nath. Chytraeum, Georgium AEmilium, Barthol. Frencelium, Ioh. Oexlinum, Ioh. Lauterbachium, Wolfg. Ammonium, Val. Cremcovium, Georgium Gallum, Hier. Vidam, Sannazarium, Ioh. Calceatum, Bon. Mombritium, P. Rossetum, Scip. Capitium, Franc. Bonadum, Salm. Macrinum, Bapt. Mantuanum, Laur. Gambaram, Levinum Torremium, Seb. Artomedem. Sed desinendum est. B. Vale et ignosce festinationi. Dab. Cygn. 30. Maji 1673.

XXVII. Chemnitium. S. P. Mi Carissime Dn. HEKELI.

Et invaletudo et usus qvatriduanus medicamentorum, et insecutae occupationes responsum retardarunt. In tuo Epicedio To FIDES prima longa positum est, nec a me corrigi commode potest. Refinges igitur. De loco, qvem occupabis, dubius haereo. Nisi in appendicula qvadam. Lipsiensia, Dresdenfia, Witenbergensia, jam excusa sunt. Catalogum omnium Des. Erasmi Rot. Lucubrationum ab ipso autore cum Jac. Ziegleri, Landavi Bavari Libello pro Germania, ad versus Jac. Stunicae maledicentiam Basil. ap. Froben. 1523. in 8 vo. edit. praesente aere, etiamsi iniqvum atqve injustum pretium sit, lubens essem redempturus, si, Te curante feliciter, ut hactenus multa, illum nancisci possem. Qvanta doctrina Libro isti insit, norunt

illi, qvibus non fungus pro cerebro est, qviqve Erasmi Libros non obiter, sed mente et oculis simul, h. e. summa cum industria, evolvunt atqve perleguot. Ad caetera proxima occasione. Jam enim avocor. B. V. Cygn. d. 16. Sept. 1673.

XXIIX. Chemnitium. CL. mi Dn. HEKELI, Salve plurimum!

ACOLUTHUS, Vratisl. Eccles. Orthodox. Antistes, qvod scire desideras, SS. Theol. Doctor et, indicio Carminum gratulatoriorum, qvae accipere memini. Annum, qvo id factum, indicassem, sed semidiem in tui gratiam qvaerendo ea Carmina fregi, nondum tamen reperi, cum vix dimidiam eorum partem evolverim, nec otii qvid amplius supersit. Interim a me non falleris. Qvinam sunt illi Ratisbonenses, ad qvos Concionem funebrem mittis? Dic qvaeso. Plura nunc propter infinitas et interpellationes et avocationes non licet. Ignosces igitur, si non ad votum tuum prolixior sum. B. V. dab. Cygn. d. 14. Decembr. 1673.

P. S. Versus vitiosus a Te probe est emendatus. Caeterum in Carmine tuo To [gap: Hebrew words] non expressum est. Legitur enim [gap: Hebrew words] , in Meisneri sociae pro socia excusum. In Wolfrumii legendum v. 3. Libethriarum.

XXIX. Chemnitz. Mi HEKELI.

Ad tuas vix respondere licet, ita occupor. Verso jam ad unam et alteram hebdomada concessas Barthii in Belli Palaestini Scriptores Animad versiones, opus nescio, an unqvam proditurum. Responsum etiam meditor Graevio meo, qvi ex MSto. Belgico Iacunas mei Palponistae explevit, et caeterorum locorum Varias subministravit, ut auctor ille belle repecti possit. Locus Apollonii. l. 1. v. 313. extat. p. 34. Edit. Lugd. Bat. ex conversione Latina Jeremiae Hoelzlini 1641. 8. Bionis Idyll. 1. v. 46. p. 291. Edit. Commelini 1596. 8. Paulini in III. Nat. Felic. v. 37. p. 579. Edit. Rosweydi. Antv. 1622. 8. Jani Drusii Miscellanea edita sunt Franekerae 1586. 8. Zenobii Adagia Antverp. 1612. 4. Tertulliani Oratorem ignoro, qvis illum laudat? Ejus prior Rhenani Editio est imperfectissima et primus saltem operum Tomus. Auctiores et meliores ejus posterior Pamelii Franc. Junii, Lud. de la Cerda, Nic. Rigaltii, etc. Scripserunt in nonnulla ejus opuscula Wowerius, Salmasius, Jacobus Gothofredus, Rivinus, etc. Haec nunc potui, qvi nihil aeqve magis invitus facio, qvam literas scribo, et qvidem laboriosas. Accipis ecce Gerontica Barthii. Debeo etiam Spizelianis responsum, sed otio prius adepto opus erit.

Sexti nostri obitus et mihi maxime dolori est. B. V. Cygneae raptissime, d. 18. Martii 1674.

XXX. Chemnitium. P. S. Mi amatissime Dn. HEKELI.

Habes hîc, qvae rogas, descripta ex Achillis Tatii lib. 4. p. 236. Edit. Salmasii ex Interpretat. Annibalis Cruceij hoc modo: VENERIS procul dubio congressus et modum satietatem habet nec prorsus qvicqvam est, si basia eximas. Basium vero nulli fine terminatur, nulla satietate afficit: sed semper recens est. Tria profecto sunt, qvae ab ore praestantissima proficiscuntur, halitus, vox, svavium. Labra utiqve sunt, qvae sese in Osculis dandis mutuo contingunt: sed voluptas e fonte, qvi in animo situs est, manat. Verba Graeca p. 237. ita sonant: [gap: Greek word(s)] . Habes et Heinsii Carmen, et Scommata in C. E. Ubi autem haec impressa, cum ignarissimis scio. Epistola Hopferi cum Amico communis facta, nondum rediit. Ubi redierit, et eandem habebis. Pro mihi transmissis, inprimisqve pro Inscriptione Nomine meo, gratias ago longê uberrimas, relaturus

cum DEO et die. Generosum et Maxime Strenuum Dn. Abrahamum a Schönberg, Circuli Metallici apud Freibergenses Praefectum supremum summe gravem, literarum et literatorum, qvod ipse egregie literatus et propterea valde, ut probe scis, modestus et humanus Heros est, Patronum propenfissimum, meis verbis saluta in occasione observantissime, ut et Max. Rev. Freibergensium Ephorum, qvem Tuum semper vocas Röberum, cujus Svadam et Facundiam multi e nostratibus, qvi eum concionantem audiverunt, mirifice laudant et praedicant. Ubi et qvo anno Clemons Alexandrinus Heinsianae editionis, qvem Tibi Röberus hactenus per aliqvot hebdomatum spatia benigne commodavit, sit publicae luci expositus, avide scire desidero. B. V. et occupatissimo plurium gratiam facito. Cygn. d. 17. Aug. 1674.

XXXI. Chemnitium. Salve, mi amatissime!

Terentianus ille versus (in Andr. Act. IV. Sc. 1. v. 23.) sic construendus est, sive Interrogationis notam addas, sive demas. (Hoc) non videtur, s. visum est Tibi, (qvod) gaudium sit solidum hoc satis; sive (Hoc) non est visum Tibi, gaudium esse solidum hoc satis. HOC et QVOD omittuntur. Ergo qvia [gap: Greek word(s)] VIDETUR, dive VISUM EST, et Verbum Sensûs, seqvitur hinc Constructio Variata, h. e. Nominativus post Conjunctionem incipiens alterum

Comma, vertitur in Accusativum, et Coniunctivus in Infinitivum. Est Contructio talis duplex. E. g. apud eundem Terentium: (Hoc) fertur, (qvod) Chrysis habitavit in platea hac, sive: (Hoc) fertur, chrysidem habitasse in platea hac. Hopfferianam Epistolam, qvod doleo, non dum recepi, statim atque recepero, ad te ibit. De Reinesii memoriâ Te non intelligo, oblitus qvid promiserim. De Heinsii functione certa docere te non possum, neque illam in Inscriptione observo, vel exprimo. Seriem [note: Theologos tamen mitto, qvia horulae spatium praeter spem liberum nanciscebar.] Theologorum alio accipies tempore; nunc enim variis hinc inde irretitus negotiis vix mihi, vix Scholae vaco, et vitam omnem, qvae gratis aliis inservire cogitur, seqve consumit inde, odi qvam maxime. B. V. postridie qvam tuas accepi. Cygneae d. 24. Sept. 1674.

XXXII. Chemnitz. CL. et Amicissime DN. HEKELI.

Vitam Reinesianam Tibi descriptam ecce unaqve Hopfferianam Epistolam, [note: e Est Epistola illa; qvam B. Dn. Bened. Hopfferus, t. t. Serenissimae Würtembergicae Juventuris Ephorus, post in Academ. Tubing. Phil. Moralis P. P. laudatissimus, ad Matruelem suum Dn. Georg. Matth. Königium, in Univers. Altdorf. P. P. et bibliothecarium optime meritissimum, de Itinere suo cum concredis suis Principibus per diversa Regna feliciter peracto, amantissime scripsit; qvia autem cum continuatione valde est prolixior, commode hîc addi non potuit.] libello tamen incompacto adhuc exemptam, qvam tamen vellem remitteres, ne labor mihi multiplicaretur. Pro adjecto Libro gratias ago, relaturus ubi dabitur. To Zelare in Ecclesiasticis est, frustra apud Ethnicos, sive Classicos qvaerendum. Caeterorum Theologorum recensio uberioris otii res est, qvo

ego planissime destituor nunc. Uxor mea praeterito 30. Octobr. sub ips. hor. 2. meridianae initium filiolum Johannem-Christianum felici et veloci, DEO sit gratia, partu me beavit; qvi mecum ut vivat valeatqve apprecaberis! Adjunctas, qvaeso, Franckenaviam cura. Sed desino. Campana enim me in Scholam vocat. B. V. et Salve. Die 6. Novembr. 1674.

XXXIII. Chemnicium. Eu)dia/gein !

Epistolas tuas, mi amatissime Dn. HEKELI, tam scriptam, qvam excusam, pro qva novum me Tibi debitorem confecisti recte accepi. Proxima oportunitate videbo, ut redhostiam. Ad Parentem tuume et Ebelium scriptas statim curavi. Locus Homeri etiam emendatus est. Vossio vellem nominare supersedisses, cui procul dubio

prorsus ignotus sum. Junior Gronovius, hactenus Professor Pisanus in Italia, ante paucas hebdomadas Norinbergam pertransiit. Qvae causa eo adegerit Virum doctissimum scire averem. Fors proximis aliqvid monebit Königius. Scribit enim Junior Sextus, nisi Magno Danieli Omeissio Eloqventiae Professio jam data esset, Gronovium eam fuisse accepturam. Qvae res mira mihi obvenit. An Harzerus meas per te acceperit, anxie doceri laboro. Haec inter innumeras occupationes nunc potui. Corradendi enim sunt nummi, ut Choro Musico proximê satisfaciam, qvibus solvendum, qvod suum est. Novi nunc nihil, alioqvi et Te ejus participem fecissem, Saluta omnes mihi benevolentes. B. V. et festinanti ignosce. Dabam Cygn. d. 24. Nov. 1674.

XXXIV. Chemnicium. PaX et MVLta saLVs per Laeto DetVr ô anno!

Clarissime Dn. HEKELI, Amice faventissime. Heri demum tuum fasciculum cum literis ab auriga accepi. Tradidi igitur statim. Ebelio et tuas ad eum fasciculum Glaucham curandum. libros hodie ad Te pertinentes accepi, qvos aurigae tradidi, ut Tibi apportaret. Non reperi literas, sed in sacciperio omnia erant confusa qvae tum mihi, tum tibi erant missa. Uxor mea ipsas

geminas hebdomadas febri purpurata, qvam Medici vocant, decubuit satis qvidem periculose, necdum recte convaluit, utitur indies adhuc medicamentis. DEUS valetudinem ipsi resstituat integram. Filiolo nutrix qvaerenda aliunde fuit. Rerum mearum status sic admodum turbatus infelixqve est. Divina Charis adsit nobis. Reinesii illa retineas. Summe Generose et excellenter Erudito Dn. Abrahamo a Schönberg, et Max. Rev. atqve Excell. Dn. D. Holzmanno Salutem et [gap: Greek word(s)] ! M. Reiskius, qvi aliqvando literas non unas ad me dedit, estne Geranus? Resaluta eum, sive est, sive minus. Pluribus nunc non vaco, Domestica enim interturbant. B. V. dabam Cygneae, d. 7. Jan. 1675.

XXXV. Chemnitium. Ei)rh/nh kai\ plouqugi/eian !

Iterum musteo munusculo affectum in me Tuum declaras, meque Tibi amplius devincis, CL. et amicissime HEKELI! Qvo officii, qvo beneficii genere nomen meum ex tuis tabulis expungam? Sane praeter memorem animum, qvod referam, nunc nihil reperio, in qvem omnia adversa fata satis hactenus fuerunt debacchata. Sed forte renitescent melioris sidera coeli. Id qvod mecum vovebis. Et ut re ipsa me gratum praestem tum, operae non parcetur. KöNIGIUS superiori mense, ubi viveres, ex me qvaerebat. Respondi Te Chemnicii adhuc agere. Sed Programma, seu Testimonium Facultatis

Theologicae Lipsiense publicum, idqve elegans et nitidum discessum inde tuum qvasi intimat. Itane est? M. REISKII diu nihil vidi. Libellum tuum de OSCULIS novae Editionis evolvere integrum accurate per hos dies non licuit. Bis in funus prodeundum fuit. De compellatoribus ne qvid dicam, et domesticis remoris. Obiter dum percurro, miratus sum, cur omiseris, qvae ex Achille Tatio [note: z Vide locum in Epist. XXX.] Tibi exscripseram. Forte et alia omisisti studio. Auctoritatem [gap: Greek word(s)] TENUS-HAC, ut olim ita et nunc ex superiorum Seculorum Scriptoribus urgeo. Alioqvi satis placet opusculum. Et post Eruditissimorum Encomia repetere eadem supervacuum duco. Perge modo aliis talibus, imo et majoribus Operibus industriam et eruditionem tuam Orbi humaniori ostendere; non deerit Bonorum Doctorumqve favor, et laus operae tuae debita. B. V. et brevitatis festinatae me excusa. Uxor mea nondum ex voto convaluit. Dabam Cygn. d. 4. Martii. 1675.

XXXVI. Glaucham S. P.

Tuus adventus, mi HEKELI, mihi jucundus erit, sed cras nonnisi post vespertinas preces, sive post tertiam auditiam auditam: aut die solis a meridie. A Königio d. 3. Aprilis literae appulerunt. Reiskio respondi literis Lipsiam missis. Literis ad Magnific. CASP. ALEXANDRUM, qvem cum Venerabili

Daetrio ac Nobiliss. Schottelio, ut ex tuis intellexi, Gvelferbyti mox es invisurus, nunc dandis prorsus non vaco. Omnibus ac singulis, qvi Gvelferbytime norunt, Salus interea decentissima est annuncianda, ut et similiter iis, qvos fors Helmestadii in transitu salutabis, puto inprimis Conringium, Meibomium, Schraderum ac Heigelium, Viros celeberrimos atqve incomparabiles. Antonii Riccoboni Rhodigini Commentarius de Historia non est rejiciendus, si inprimis is Venetae Barilettanae sit Editionis, ab ipso auctore cum Scholiis ejus, ut et M. Porcii Catonis, Q. Claudii Qvadrigarii, L. Sisennae, C. Crispi Salustii et M. Ter. Varronis Fragmentis 1568. in 8 vo. publicae luci datus. Habet nonnunqvam breves licet, tamen insignes atqve memorabiles Animadversiones, diversos locos in Historia Romana apprime emendantes et corri gentes. De vocula TENUS-HAC non memini qvicqvam recepisse responsi, alioqvin non monuissem Te. Alia coram. Halae Saxonum D. Gottfredum et M. Job. Gottsr. Olearios, Parentem et Filium, mansvetissimos Theologos et Philologos, etiam ex me officiosiss. saluta, et fac, uti certo potes, ut ALEXANDRI, qvi hactenus non respondit, amor in me renovetur, B. V. Cygn. d. 7. Maji 1675.

XXXVII. Glaucham. Salutem et Officia! CL. atque Literatissime Dn. HEKELI.

Amicorum amicissime atqve constantissime, Te salvum ac felicem Gvelferbyto atqve Helmestadio, aliisqve ex locis Inferioris Saxoniae celebribus ad nos non ita pridem rediisse, testatae sunt amicissimae literae tuae, qvas cum accubis Alexandrinis prae nimio gaudio plus qvam sexcenties sum exosculatus. ALEXANDRUM nostrum mihi adhuc favere, meqve amare constanter, merito mihi gratulor. Et Tu potes etiam Tibi gratulari, qvod Alexandrum tam propensum Patronum ac Musagetam Ratisbonae jampridem Tibi conciliâsti. Egregie doctus atqve literatus est, et Literatorum studiosissimus. Ejus literas curâ tuâ ad me benigne datas ecce! et qvidem, qvod ita voluisti, manu mea exaratas. [note: h Sunt autem hujus tenoris: Amplissime Daumi. Saepe scribendi aliqvando et eundi ad Te induxi animum; tum maxime, cum Ratisbonae Legati munere fungerer, ac inde me ad Thermas Carolinas, instaurando causarto corpori, conferrem: Sed fata, curae, rerumpublicarum conantem hactenus morantur, ac ne nunc qvidem sinunt apud Te exponere, qvae constitueram. Ex HEKELIO autem nostro, qvo cum plura coram contuli, disces, qvae mihi cum Musis constantia, et qvam minime defecerim ab eo studiorum genere, qvod aut adolescens inieram, aut tecum juvenis excolueram; qvamlibet in hoc, ut Tu qvidem blandiris, evectus fastigium. Ipse HEKELIUS tibi de laboribus meis in N. 7. et de Hemerico Indice Latino praecipue refert. Ego vero grata mente agnosco, qvod de Sparta qvam ornandam suscepi, mihi gratularis; Deumqve veneror ac precor, ut Te cum filiolo, qvo auctus es, et mihi et Literis servet. Vale. Dabum Wolsenbiittel d. XV. Jun. CIC ICC LXXV.] Celeberrimo Meibomio ulterius ut innotescam, qvantum possum, laborabo. Ejus humanitarem atque mansvetudinem praedicant omnes illi, qvi nonnunqvam Helmestadio huc adveniunt et me invisunt. Olearios Halenses nostros et Schmidium tuum Qvedlinburgensem me adhuc amore proseqvi, lubens intellexi. Simul ac otium nactus ero, ad Olearium Fil. literas dabo prolixas. Illustris Seckendorfius ex Parente tuo nuper studiose qvaeri jussit, an Gvelpherbyto redieris. Ex qva causa, scio cum ignaris. Rabanus Maurus omnino fuit primum Abbas Fuldensis, et dein Moguntinus ille Episcopus, qvi edidit Commentaria in universam S. Scripturam. Fuit sui temporis, Dilherro heu! qvondam nostro judice, omnibus Italiae et Germaniae doctis viris superior, et, qvod ego addo, acrijudicio haud rarenter praeditus.

Vixit autem Seculo IX. circa A. C. 830. SS. Patres utriusqve Ecclesiae non sunt unius commatis atque calculi. Monachi enim audacter admodum falsarias manus intulerunt Scriptoribus Ecclesiasticis, et integras sententias paginasque totas obliterarunt imo integros terniones et libros exciderunt, atqve Auctores, ut Kimedonciu lib, 2. de S. A. c. 6. testis est, indigne castrarunt, imo et pro lubitu ea, qvae sibi videbantur adversa, immutarunt. Sed qvanti constat Theophylactus tuus? Illum tandem factum esse Schismaticum, patet ex ejusd. Commentar. in cap. III. Evangel. Ioh. ubi Latinos reprehendit Patres, Spiritum S. etiam a Filio procedere asserentes. Qvo docemur, neminem e Sanctis qvoque ab imbecillitate humana, eaqve gravi, unqvam fuisse et adhuc esse liberum. Pro tot donis missis chartaceis et nummo raro argenteo multas ago atqve magnas gratias, relaturus, si potero, cum DEO commodiore tempore. De caeteris plura coram. Inprimis multa de Bibliotheca Augusta Gvelpherbytana publica, qvam perlustrare aveo qvoqve. Vale optime, mi optime HEKELI, et salve cum tuis a nobis. Cygneae dat. 27. Octobr. 1675.

Amplissimo et Clarissimo Viro, Dn. CHRISTIANO DAUMIO, Philologo et Scholae Cygneae Rectori celeberrimo amico meo.

XXXIIX. Glaucham, Amicissime Dn. HEKELI!

Con-Rector noster prensurus Ephoriam Seydensem Dresdae jam haeret, unde labor Scholasticus mihi auctus brevitatem imperat. Habe hîc Franckensteinii literas ad Te. Ad Ludolpsium

rescripsi. Sed dolet in Titulo decorum me non observasse, neqve Magnificum appellasse, aut Nobilem. Valde scire vellem, an Altenburgum jam immigrarit. Misi ei petitam Hopferi Epistolam cum aliis. An responsurus sit, exspecto. Juva me in Titulo illi posthac tribuendo. Ego gravedine, et tussi, et prius dolore faucium tonsillarumqve ac dentium vexatus feriari a scriptionibus coactus fui. Nunc infinita me coarctant simul. Carmen pro Henero tuo nondum confeci. Habeo unam et alteram adhuc Lotichii Elegiam in toto ejus Opere non reperiundas. Eas si illi adjicere placeret, ornares magis libellum et ego carmen meum ad has una dirigerem. Docebis ergo, qvid placeat. Sic brevi confiet, qvod spospondi. Literas Königianas ab otiosiore exspectabis. Nobiliss. Dn. (Petro) Müllero a me pro Carmine elegantissimo misso gratias et officiosae salutationis honorificentiam, ubi dabitur, offeres. Libros meos indemnes ubi usus fueris, remittes. B. Vale et Salve. Dab. Cygn. 9. Nov. 1675. [gap: Greek word(s)]

XXXIX. Glauchaviam. S. P. Amicissime Dn. HEKELI,

Fasciculum Franckensteinii, uti et prius literas puto ad Te rectê pervenisse. Serius qvidem ob pluviam et lutosam tempestatem Tabellarius attulit. Sed magnus error in illo commissus est.

Adjunxisse se scribit hodie Franckensteinius Historiam Insubricam Puteani MS. Vratislaviâ acceptaro, de qva meum exqvisiturus erat judicium. Nunc ille librum Vratislaviam remittendum reposcit. Et ego eum non vidi. Omnino fac, ut ante diem Jovis a Te recipiam qvantum post, hac vice remittendum. Urget enim illud maxime. Culpâ meâ tibi gratificari festinantis, et alibi occupati, (omnis enim scholasticus labor, Conrectore apud nos nullo, in me recidit) factum, ut fascem illum non inspexerim, sed statim Gerulae tradi curarim. Tuum autem erat adjunctum, de qvo forte ne verbum ille fecit, remittere, aut per literas aliqvid monere. De Henero, gratificabor qvam primum otium gratificabitur et Fellerus. Nunc vix haec licet. B. V. salve et remitte omnino Puteanum. dab. Cygn. d. 21. Decembr. 1675.

XL. Glauchaviam. JESUM Sub anni felicissime a Te transigendi Exordio!

Vix otium est tuas legendi, vix prandendi, ita occuppr, ita omne tempus mihi perit, qvod Con-Rectore caremus, et domestica me urgent. Gratificaturus qvidem tibi sum, sed non-nisi otiosus. Mitto Taubmannum, sed invitissimus, qvia ipse utor, et Athenaeum et AElianum. Cerdae Tomus I. nondum compactus est et ut qvaeram inter incompacta,

vix integri diei res est. Cleophilum non vidi integrum, sed vix unum Carmen, desideratum saepius. Fellerus, qvi periculosissime decubuit febri maligna, an convaluerit, nescio; Speramus et vovemus id. Puteanum non potui inspicere otio exclusus, sed sine literis remisi. Qvae a me petis, qvamprimum licebit, gratificabor. Amanuenses, mihi desunt. Prostrena tua gratias agimus ingentissimas. Alexandri literas mecum communica. Ut Ludolsi habeas, curabo qvamprimum, B. V. 7. Jan. Cygn. 1676.

XLI. Glauchaviam, (Upereudaimonei=n ! Mi amatissime HEKELI!

Fliola Anna Rosina nata mihi, est facillimo (DEO sit gratia!) partu die 22. Jan. vesperi, vel noctu potius intra 11. et 12. horam, tertio qvadrante. Heri baptizata. Cui, ut et matri mecum vitam, valetudinem et prosperitatem apprecaberis. Gesnerum nunqvam habui. Maldonatus in Bibliotheca publica habetur, sed ab alio jam usurpatur. Bionem mitto. A Kettnero nihil vidi. Ejus N. T. Bezae adhuc mecum habeo, ubi absolvero, remittam ipsi. A Luodlfo, qvi nuper Bibliothecam meam et publicam visit, et me post convivam habuit; nec dum recepi Hopferi Epistolam. Retineat eam licet. Ludolfi ut descriptam habeas, otiosior certo, curabo. Vix credes,

XLII. Glaucham. Ta\ pa/nta ka/llista. CL. DN. HEKELI, Amice sincerrime.

Dionysii Alexandrini et Pompon. Melae sitûs Orbis descriptio cum Scholiis Eustathii in Dionysium apud Henr. Stephanum 1577. prodiit in 4 t. Sed Dionysii Afri de Situ Orbis Opus, Prisciano, aut Fannio Rhemnio interprete, cum Commentario Joh. Camertis Viennae 1512. etiam in 4. est impr. Hunc Dionysium vertit Andr. Papius Gaudensis carmine heroico cum ejus Notis. Additur et Prisciani Periegesis e Dionysio, cum Notis Papii Antverp. 1575. in 8. Prodiit. et Dionysii de Situ Orbis opus Graece. Item Latine a Rhemnio Grammatico translatum cum Annotat. Coelii Calcagnini Basil. 1522. in 8. Vertit et, sed liberius, Rufus Festus Avienus, qvi saepius excusus. De caeteris Editionibus aliisqve Auctoribus Geographicis aliô tempore plura. Nizolius Jacobi Cellarii Basil. per Euseb. Episcop. 1583. in fol. impress. omnium est absolutissimus, accuratissimus atque praestantissimus, qvem si vis, potes emere. AEgidius Wildius, Ephorus qvondam Plaviensis eruditione, autoritate ac vitâ honestâ undiqve conspicuus, non fuit Ratisponensis multo minus

Argentoratensis, sed Reichenbacensis Variscus, qvemadmodum ejus successor Heifelius, vir Graece et Latine doctus, [gap: Greek word(s)] nostri Rappolti affinis, et Felleri amicissimi intimus, miniqve ex voto amicus, qvi Tibi, ut spero, non erit ignotus. Jam mitto Athenaeum, et literas nostri Konigii, manu mea laboriosa descripta, in qvibus Tui honorifica mentio facta est. [note: q Priores literae (nam istarum biga est) ita sunt formatae: VIR Nobilissime et Excellentissime, Domine et Fautor pl. aestimande. Pro transmissis Tuis iterum ago gratias. Thymi scripta magis magisqve placent. Video hominem et judicio, libris, antiqvis et musteis, abunde instructum

Literas Alexandri statim describam. Descriptas statim remittam. Heri, qvo Lic. Felleri uxor in puerperio defuncta sepulta est, literas satis prolixas ab Heinsio accepi. Exspecto post aliqvot menses Parisiis pares cum libris ab Emerico Bigotio. Tabulas illas Logicas, qvarum nuper mentionem injecisti, non vidi. Qvomodo valent Dn. a Seckendorff et Dn. Mitternachtius? Si hanc Maecenatum magnorum bigam splendidam, ut retulisti, invises, illi pro more h. e. probe ac candide, me commendabis. Potes me hodie si possibile, convenire. B. V. Cygneae d. 3. April. 1676. Tuus omni affectu Christianus Daumius.

XLIII. Glauchaviam. Plurimam Salutem!

Habes hîc, mi amicissime Dn. HEKELI, Philologorum Ocelle, literas Barthianas, in qvibus Magnifici ALEXANDRI, Cancellarii Gvelpherbytani gravissimi, mentio, facta. [note: i

Memini Heroa beatum nostrum eo usum perqvam familiariter ad describenda in unum corpus ex Adversariis ineditis omnia capita, qvae Historiam Augustam post Casaubonum et Salmasium explicant, et illustrant; idqve volumen manu Alexandri ipsius scriptum meis tenui manibus, et poenitet non petiisse a vidua vel commodato. Nunc strangulabitur, nisi jam periit, inter ignorantium haeredum manus

unâ cum ipsis Adversariis. Ad caetera nunc occupatissimus nihil qveo. Fiet primo otio. B. V. Cyg. d. 13. Aprili 1676.

XLIV. Glauchaviam. Clariss. et Cariss. Dn. HEKELI.

In Catalogo Lipsiensi aegre est nomen meum Capitalibus apparere Literis. Epistolae Barthianae [note: k Est illa valde prolixa Epistola, qvae Caspar Barthius, Polyhistorum Phoebus, Jacobi Kelleri e Soc. Jesu et t. t. Rectoris Monachiani, Epistola de Papatu Catholico mascule opposuit. Hekelius autem ex Daumiana Bibliotheca cum Praefatione ad splendidioris Literaturae VI-VIROS luci primum fieri jussit publicae in 4t. Cygn. 1676.] et caeterarum descriptionem mea manu spondeo sed non nisi primo ad eam rem otio, qvod hactenus prorsus denegatum fuit. Adeo Schola me defatigat, et domesticae remorae, ut nihil supersit, qvod amoenitati dierum, qva valetudinem lapsabundam recreem, tribuatur. Scripsi his diebus Epicedion Köberianae: Debeo adhuc Fellerianae. Misi et geminas Vratislaviam, unaqve descriptas a me Heinsianas, qvod Heinsianae ad Gebhardum ad me contra missae fuerint. Scripsi et ad duos Olearios, ut et alios. Etiam Lic. Alberti miserat Compendium suum Juris naturae, cui respondendum. Caeteros nolo nec vacat memorare. Libros tuos remitto [gap: Greek word(s)] , etsi obiter saltem perlustratus, praeter Tomasini Bibliothecas Patavinam et Venetam, qvarum Excerpta Theologica Spizelius jam dedit. Caetera exigui sunt momenti, satis vitiose etiam editi, et vix a peregrinis, nisi Bibliothecis considerandis unice deditis, nedum a nostratibus admodum attendentur, et taedio fere est pretiosum tempus enotandis iis qvi pro me sunt, insumere. Videas ipse, si evolvas. Qvod si otium mihi meum redimere, et pro aere justo, aliter nolo eas in meum usum ac possessionem Iubens cedere ac transcribere velles, rem faceres oppido gratam et alibi demerendam. Pecunia certe, qvam statues, statim soluta erit. Recepi bona cum fortuna

ab amico, certe ex insperato, Bibliothecae meae nonnullos Indices, in qvibus Poetae Latini veteres et recentiores mei in folio, octavo, duodecimo, Patres in octavo, Poetae Graeci veteres in 8. Autores Latinae Lingvae in 8. Sunt 18. octerniones utiliores tibi futuri prae Patavinis et Venetis MS. qvorum nobis nulla unqvam spes fruendi dabitur. Eos sic facile a me obtinere, et praeterea alios Libros usui a me capere posses. Barthii [gap: Greek word(s)] itidem a me habebis. Festo Ascensionis Dominicae Doctorum Gotsiorum Mater sepelietur. Ei jussus Germanicum scribere Epicedium renui. In Teutonicis enim me vel de trivio qvis superet ob intermissum tamdiu exercitium. Mox nostri Ephori Onomasteria celebrare me oportebit. Vides qvam varie distringar! Epistolam Barthianam meâ fide interea ex tuo Exemplari excude: Seqvetur mea manus, qvantum potest cum praefixo meo Testimonio. Hodie adhuc et cras Dispositiones Declamationum Pentecostalium meis Discipulis praescribendae sunt, qvas ob dictas remoras differre meis et illorum ingratiis coactus fui. Spero postridie me vacui aliqvid temporis tandem nacturum. B. V. Amice svavissime et salve. Dabam Cygneae KL. Maij 1676.

XLV. Glauchaviam. Clarissime et Carissime DN. HEKELI!

Typographo absenti ubi die Jovis redierit, narrabo, qvaevis. M. Reiskio et salutem et gratias a me nunciabis, cui ipse scribam primo qvod dabitur otio. Catalogus Thomasini (in qvo majorem et meliorem Scriptorum talium cognitionem merito desidero) de qvibus Venetum nondum inspexi, remitto: sed valde rogans, ut post perlectionem mihi benevole remittas, sive pro meo aere qvod praescribes, meo cedere juri velis, sive ad alios transferre. Qvanqvam si transfers, in literas et Musas ipsas injurius es. Illi enim qvibus cedent, nunqvam tantum ex iis fructus sibi (praefiscine dico) capient et aliis comodabunt, qvam ego: Qvod vel praesenti Tibi demonstrabo. Documentum insigne ignorantiae talium dederunt, si alia taceam, in Vigelli (Nigelli scribere debebant) Editione; unde et Conringii cum stupore miratus sum talium inscitiam. Plura apud Patavinos sperassem aliorum MS. Forte Lipsiensis nostra melior est. Bene ergo mihi feceris, nec sine grato animo meo si potiores mihi indulseris partes. Catalogos meos nuper dictos etiam muneri et superpondio qvasi tibi addicam, de qvibus unum jam mitto octernionem,

et poterunt suppleri, qvae defiunt. Heinsii Epistolam mea manu descriptam jam accepisses, si latrix harum mea Ancilla horam unam adhuc commorata fuisset. Restabant enim adhuc paucula. Habebis cum caeteris, qvae his diebus describam, fidei meae liberandae. Poteris et longe plura accipere, sed si alterius manu utaris. Vix enim credes qvam moleste mihi in tanto senio et valetudine fracta perpetuae scriptiones sint. Literae tuae meis inclusae Altorfium hodie commearunt. Misit ad me heri Pellerus Orationem suam de Bibliotheca Paulina pellegendam. Qvapropter hos Thomasinos libenter retinuissem adhuc. Sed ne de fide mea secius qvid suspiceris, occasione commodâ oblatâ, malui concreditum remittere, qvam mecum sine consensu tuo diutius retinere, ut videas, qvam candide tecum agam; Longe candidius acturus, si virium et facultatum mearum esset. B. V. Cygn. d. 10. Maij 1676.

P. S. Qvia ancillam meam ob inevitabile negotium, qvod inter venit, diutius, qvam prius cogitabam, oportuit commorari, Epistolam Heinsianam describendo absolvi, qvam hîc habebis una cum Salute Peiskeriana amantissima. Epistola autem, qvam annectere placuit, ita est formata:

Voluptate me hercules ingenti totus perfundebar ante paucos dies, factâ copiâ mihi epistolae tuae, Decembri mense non ita pridem decurso exaratae, per qvam sum edoctus, binas mearum recte redditas tibi fuisse, Daumi Clarissime. Nam qvamqvam amissae in via utriusqve jactura pro facili fuerit omnino habenda, malo tamen curatam illibatamque officu mei constantiam tibi liqvido esse compertam. Ad Lucam Langermannum, caetera mihi conjunctissimum, diu est qvod litterarum nihil exaravi, revocantibus nos utrimqve a commercio litterario bellis funestissimis, per qvae necessitudinum etiam antiqvissimarum sacro sancta vincula labefactari ac convelli ab invitis agnoscas qvandoqve. Ita fit, ut ignorem prorsus, qvianam iis factum sit litteris, qvas ejus fidei ad te curandas proxime committebam. Qvando ad officium revertar epistolare, rem totam apud illum sedulus explorare enitar; si valet tamen ac aetatem etiamnum agit incolumis. Totus qvippe in moerore etiamnum ego, amissis nuper compluribus amicis, eo devent anxietatis calamitosae, ut nihilominer fere, nisi triste ac funestum de iis, qvi supersunt. In Italia certe perdidi spatio trimestris proximi Octavium Falconerium et Carolum Datum, amicorum principes. Ne qvid nunc dicam de Cardinali Etrusco Leopoldo Mediceo, principe bonarum artium in paucis longe amantissimo, qvi in suis numerare me haud gravabatur. Sed ut ab hisce funebribus ad laetiora transeamus, Emercus Bigotius fasciculum codicum nonnullorum jampridem jussit me expectare, in

qvo si Theodulphus Sirmondi, ut auguror, comparebit, libellum sine ulla procrastinatione ad te perferendum curabo eadem via, qva Avitum consecutus es, nisi si qvam tutiorem indicabis ipse. Jubet vir praestantissimus te plurimum salvere, operamque officiosam in aliis momenti majoris offert ac pollicetur. Interim qvod assiduus sit in evolvendis S. S. Patrum, praecipue Graecorum, lucubrationibus, collegit studiosum in modum cum editiones horum, qvotqvot prodiere, tum versiones antiqvas, qvibus plurimum delectatur. Qvapropter rogatum peramice te cupit, ut si incidas, qvandoqve in Rufinianam interpretationem orationum Nazianzeni Gregorii Lipsiae editam Anno CIC IC XXII, tum in eas ejusdem Scriptoris Orationes, qvas apud vos superiori saeculo cum sua versione publicavit Langenoethus. (scribendum Langvenvoithus) Vidit enim libelli utriusque mentionem publice a te factam esse. Praeterea doceri velit, qvis Langenoethus (scr. iterum Langvenvoithus) ipse fuerit. Sed luculentius virum humanissimum vix possis demereri, qvam si eruas e latebris qvibuscunqve Christophori Pelargi methodicam explicationem actorum Apostolicorum, cui accedit vita et peregrinatio D. Paulli ab Euthalio Diacono et Sophronio descripta. Editus est liber Francofurti ad Viadrum Anno CIC ICC II. Hujus exemplar et mihi conqvisitum velim. Bigotius certe cum scriptum codicem Euthatii sit nactus, eum cum vulgato commissum cupiat. Proxime scripturus ad illum rogabo, ut Gulielmum Apuliensem ante hoc saeculum Rothomagi editum tuos in usus circumspiciat. Nec deerit, sat scio, suis

partibus, ut est mirum in modum officiosus. Rerum Gallicarum scriptores a Du-Chesnio publicati raro apud nos venales occurrunt, nec nisi pretio prorsus insano, ipsis Gallis id opus magno studio conqvirentibus, unde fit, ut mea hactenus in Bibliotheca desideretur. Sed Regii Lutetiae typographi in eo jam dicuntur esse, ut novam hujus corporis editionem, du Chesniana locupletiorem moliantur. E libris, qvos designabas proxime atqve offerebas, Bernardum Geystensem tuum et Palponistam, tuum Cenomanensem, Hildebertum Rivini, videre nobis nondum contigit. Ne Reinesii qvidem ad Jo. Vorstium Epistolas, aut Rittershusii Corippum. Sed cum nonnulli ex typographis nostris ac bibliopolis ad Nundinas Francofurtenses soleant excurrere, horum opera fortassis libellos istos conseqvi dabitur. Etruscorum Politiani Poematum geminam possideo editionem, Aldinam alteram, alteram Mediolanensem, qvo exemplari cum sit usus Julius Caesar Scaliger, non potuit sibi temperare vir magnus, qvin libello elogio manu sua adscripto ornaret, qvo negat praestantius nihil (scr. qvicqvam) in Etrusca Poesi exstare. Odae Latinae Horatio Landini praefixae tale, qvantum recordor exordium est: Vates Threicio blandior Orpheo. Latet ea alicubi in Scriniis meis; nec tuo conspectu fraudabitur, cum sese mihi offeret. Nam Landini Horatium non possideo, possidebat Pater. Augusti Buchneri lucubrationes in lucem proferri intererat rei literariae cum maxime. Fuit enim vir perqvam elegantis ingenii, seu vincta, seu soluta oratione uteretur in scriptis. Plinii junioris Epistolas animadversionibus

Claudii Minois illustratas, ut et Jani Ulitii ad Gratium curas secundas munus, a me accipies, simul atqve bibliothecam dispersam excutere licebis, qvod aestata proximâ fiet, ut auguror. Nam hactenus sunt, qvae nolentem me morentur hac in aula, nec de studiis cogitare sinant. Theonem parentis mei, freqventer in auctionibus obvium, facile etiam indagavero. Utinam vero, Daumi optime, plures designares ex hisce, qvi studiis tuis emolumento sint futuri! Id certe ut facias qvamprimum, te obsecro atqve obtestor. Matthaei Vindocinensis editionem Lugdunensem me possidere opinor, Oporianam non vidi. Sed in membranis descriptus haud raro mihi est oblatus. Abdiae Babilonii historiae ex antiqvis membranis editae a Wolphgango Lazio Basileae praefixum est carmen Christiani Poetae antiqvum, qvod cur Parisini aliiqve, qvi eandem post expressere editionem, omiserint, causam excogitare nullam possum. Baptistiae Mantuani opera in tomos IV. digesta, ac Antverpiae edita penes me exstant. Mantuanam, qvam narras editionem, aegre invenias. Benedictini in Galliis novam meditantur Operum B. Augustim editionem, collatis eam in rem membranis vetustioribus magno numero, qvotqvot in priscis Bibliothecis delitescunt. Leonis Magni opera ibidem auctiora nuper prodierunt. Opera etiam Gregorii Magni e membranis castigata, et nunc in B. Ambrosio occupantur. Baluzius propediem dabit Capitularia Regum Gallorum in duos tomos digesta: tum opera Innocentii III. Patres primi saeculi jam te opinor vidisse. In Britanniis excuduntur Jamblichi omnia Graeco-Latina qvorum

pars magna lucem hactenus non viderat. Iidem Josephi spem faciunt, et Johannis Antiocheni Chronographi: apud nos praela typographica feriantur qvodammodo propter haec bella, qvibus utinam nos aliqvando Deus expediat! Vale, Vir praestantissime, et mihi studere, qvod facis hactenus, inposterum qvaeso perge. Hagae Comitum CIC ICC LXXVI. a. d. XII. Martii Gregor.

XLVI. Glaucham. CL. Dn. HEKELI.

Literulas tuas ipsi Ebelio exhibui, tertiâ vice sic ad eum inter occupationes spississimas visens. Nam primâ aberat, alterâ vidi Columnas duas (formas vocant) alterius Qvaternionis dissectas a Filio, ideoqve majori labore deinde reparatas, qvae productionis mora fuit. Heri absolutus est alter Qvaternio ille, sed madidum adhuc mittere non potuit. Jam in Tertio Qvaternione est, ut vidi. Sed verior, ne qvia poenitentialis dies cras indicta est, remora aliqva nolentibus volentibus nobis injiciatur denuo. Ubi hic absolvetur, seqvetur Epistola Barthii. [note: l Mentio hujus facta est praeced. Not. k ad Epistol. XLIV.] An aliter negotium confieri qveat, nescio. Adventum tuum expectavi, sed frustra. Me aliud ex alio impedit, in pollicitis statim stare, utut velim, neqveam. [gap: Greek word(s)] Barthii ecce! [note: m Hoc [gap: Greek word(s)] constitisse saltem VIII distichis, iisque ex ejusd. Lib. XIX. Soliloqv. XVII. a verbis: Qvantala res FATEOR --- usqve ad verba: --- dicere te FATEOR. depromptis, Hekelius, ipsum demonstrando [gap: Greek word(s)] locupletissimus testis erit.] De caeteris etiam cogitabo. Mich. Chr. Ludovici Orationes nuptiales et funebres Germanicas Altenburgicas, qvibus me donasti, hilari manu accepi. Placent optime et indicant svavissimi atqve consummatissimi Nominis Oratorem. Sed qvid Tibi, Amice, pro

his et tot aliis hactenus transmissis donis retribuam? B. V. KL. Junii, (1676.) [gap: Greek word(s)] . Prandio n. inhio satis dilato, et mox vespertinis precibus interfuturus.

XLVII. Glauchaviam. Clariss. et Carissime Dn HEKELI!

Gerulae tuae me serius convenienti tradidi Qvintilianum, Rosinum, Sidonium et Strozas, unaqve Ludolphi et Lotichii Epistolas a me descriptas. [note: n

Gyraldi hunc Librum non possideo, frustra aliqvoties qvaesitum. Tomasinus discipulo heri est traditus, ut pagellas aliqvot, qvae prae caeteris mihi arridebant, describat. Ab eo nocte jam ingruente, qva gerula tuis me absente meis traditis ad Typographum festinaverat, cras summo mane abitum festinatura, nunc repetere, cum et famulus jam cubitum iverit, non licuit. Epistola Barthiana excusa est. Sub prelo sudat Concio funebris M. Thymo habita qvam haeredes itidem urgent. A Königio nondum qvid accepi. Sextus hac hebdomade

ad ipsum profectus forte qvid afferet. Ad Kettnerum etiam fasciculus, statim atqve accepi, cum nummis tuis Tabellario traditis curatus est. Sed nihil responsi relatum est. Illud Laudo meos Francos extat Schediasm. innovat. lib. 3. Epigr. 6. Etiam in Melodaesia extat. Tam tenere amavit hanc suam Sobolem Taubmannus, ut bis diversis libris ediderit illud. Illud Tantae molis erat, etc. habetur. 1. AEn. v, 37. Semper honos etc. ibid. jacet v. 613. Qvosaeqvus amavit Jupiter, lib. 6. AEn. Virgilium de Ennii stercore aurum legisse, in Vita Virgilii a Donato scripta, nisi fallor, reperies. Barthii de Boissardo, jucundo et Docto Poeta, Melissi amicissimo, censuram proxime. Non enim Poemata ejus praesertim 2dae [abbr.: secundae] Editionis, qvam cum Barthio communem feceram, nunc reperio. Prima in 16. Editio multis locis naevos vix tolerabiles inspergit. Crepitare horrisono pede Tragoediae potius sit qvam Heroae Poeseos, qvae armisono malit. Haec nunc in somnum pronus potui. Pro munusculis gratias. B. V. Dab. Cygneae ocyter d. 4. Julii 1676.

XLVIII. Glaucham. Clariss. et Praestantissime Dn. HEKELI, Amice mellitissime.

Laetor, qvod Cellis, Hannovera, Hildesio, Goslaria, Brunsvigo, Gvelpherbyto, Helmstadio, Magdeburgo, Servesta, aliisqve ex locis Inserioris

Saxoniae salvus ac incolumis denuo redieris. Cellis Hildebrandum et Lundenium; Hildesii Hilpertum; Brunsvigi Schindlerum et Möringium; Gvelpherbyti Alexandrum, Daetrium atqve Schottelium; Helmstadii Calixtum, Meierum, Rixnerum, Eichelium, Eybenium Coringium, Meibomium, Heigelium ac Niemeierum; Magdeburgi Gverikium, Bakium, Brokium, Scriverium, Kindermannum atqve Göbelium; Servestae Dürrium; Qvedlinburgi Calvisium et Schmidium; Halis Olearios, Schubartum ac Praetorium optime fuisse mei memores, Jubentissime percepi. Et valde mihi grata fuere munera illa chartacea, qvae tantorum Virorum qvorundam nominibus omnino venerandis mihi fideliter transmisisti. Grata et jucunda lectu mihi etiam fuêre, qvae de celebratione Festi Jubilaei Academiae Juliae mihi referre tibi placuit. Ad nos si venies, omnia nobis prolixius enarrabis. Admodum Reverendus Ephorus expectat adventum tuum cupide. Qvemadmodum et ego. Et erit nobis haud ingratum, si apud nos per aliqvot hebdomadas in posterum, ut promisisti, sis hyematurus. Bibliothecae et publica, et mea Tibi pateant. Nec clausa erit Peiskeriana, rarissimis Commentariis in SS. sicuti nôsti egregie instructa. Sic posses excerpere commode, qvod studiis tuis in posterum esset commodum, qvia periculosum est, pretiosos ac raros libros per infideles ac parum prospicientes homines extra urbem mittere. Literae tuae permulta me docuêre

qvae hactenus fuerunt mihi incognita. Utinam et Gvelpherbytanam et Noribergensem imo et Donauerianam Ratisponensem publicas Bibliothecas ipsus perlustrare possem, multa in iis essem inventurus, qvibus meos Indices ex voto emendare atqve locupletari possem. Ex Franckensteinii nostri literis intellexi, Illustrem Heroa a Seckendorff cum Magnifico Alexandri nostro curâ tuâ optatam conflasse amicitiam. An ita res se habet, gestio scire propediem. Pro nummo et duobus Libris, qvibus me iterum iterumqve donare voluisti, magnas ago gratias, majores acturus et relaturus, simul ac me invises. Bene vale, mi Hekeli, et mox ad nos veni. Dab. Cygneae vexatus dolore calculi d. 19. Nov. 1676.

XLIX. Glaucham. Clarissime et Carissime Dn. HEKELI!

Qvo die tuas accipiebam, eo adeo langvebam ut hypocausto exire non potuerim, sed mature lectum petere coactus fuerim; et nauseabam ad omnia in periculo gravioris alicujus morbi. Nunc videor aliqva bellius habere, non tamen satis ex voto. Mitto Hieronymi Tibi promissi (exemplar) et aliud pro Nobiliss. Meibomio ut et CL. Hesso. D. Alexandri adjunctis literis ipsus mittam, vel per Te, vel per Franckensteinium curandis. Ab Oleariis Halis responsum expecto. Licentiatus Disput,

suae pro Licentia recusae et auctae misit pro me, Königio, et Köbero. Sed Norimbergam vix ante Lipsienses nundinas Literas curavero, aurigâ prius Hamburgum profecturo. Nec Weissenfelsiam qvid misi, aut Witebergam, nec nostratibus Exempla distribui, nisi perpaucis. Debeo Carmina nonnullis Amicis, sed vitiosa prorsus corporis mei constitutio ea non permittit. Tussis heri et hodie, item graveto molesta cum calculo me pene enecarunt. Proxime medicamentis utar. Si his nihil proficitur, proficiat omnem miseriam finiens beata Mors. Vide ut a CL. Hesso Gothâ pilulas Glassii si adhuc ibi probae habentur. (id prius explorandum erit) meô aere statim redimendas mihi procures. Ultimam qvam habebam harum [gap: Greek word(s)] fur nuper cum cistella mea abstulit. Lipsiae qvae pro Glassianis venduntur, spuriae sunt, nec descriptio usûs illarum cum veteri Gothae excusa convenit. Proxime plura si melius valeo et ad priores. B. V. et salve Cygn. d. 7. April. 1677.

L. Dresdam. Amicissime Dn. HEKELI.

En Tibi Librum tuum reducem. Pro cujus communicatione tam diuturna gratias ago prolixissimas. Me impediere infinita, unde perspeculari mihi integrum, mihi nondum licuit; nec res tanti est. Juyit aliqvo modo aliorum methodus inspicere.

Misi ad Patrem tuum fasciculum nescio a qvo ad me missum. Item M. Reiskii Programmata. Qvi scribit, se remittere meam Diatribam de Aor. 2. et una Logicam suam cum Rhetorica. Solam Rhetoricam accepi, caetera absunt. Addidit et Lic. Placcii ad me literas cum suis nonnullis Opusculis. Sed hactenus respondere non potui innumeris abreptus aliis. Statim ac expediere M. Olearii Terentios, ad M. Reiskii et L. Placcii ad me literas petitumqve me accingam. Occasionem autem per qvam meas ad illas curem nunc non video. Vin' scire, qvid ab Oleariis acceperim? Latini Latinii Opera Romae edita in fol. et Martini Kempii Bibliothecam Anglicam solutis utraqve foliis. De meo Libello raro qvid inaudio, praeter qvae tu mihi nota fecisti. Auriga noster Norinberga bis rediit absqve ullo responso. Causa est, qvod primum vix horam inibi permanserit; deinde servum pro se miserit. Si tertia vice nihil accepturus sum, nescio qvid suspicer. Musae me meae aliis obrutum adeo destituunt, ut Carmen pro Henero ab otiosiore me expectare opus habiturus sis. Anhelo otium nescio qvando impetrabile. Hübnerus Bibliopola vester promissis non stetit. An M. Seebischius, qvem salvere a me jubebis, meum Hieronymum acceperit, valde scire vellem. Adjunctum Exemplum M. Merbitzio cum P. S. offer. Qvod Tibi pro Doct. Zimmermanno dedi, vellem docere, an perlatum esset. Pellerus hactenus occupatissimus fuit. Vellicabo ei aures denuo. Nota: Pagi fiunt

Lycei M. T. Pastor Vihlaviae, aperit ibi Collegia. Omnia vertuntur, certo vertuntur Amores. At non tuus. B. V. Dabam Cygn. [gap: Greek word(s)] d. 16. Junii 1677.

LI. Dresdam. Praestantissime et Amicissime Dn. HEKELI.

Pilularum Glassianarum [gap: Greek word(s)] nonnullas accepi. Pro qvibus et Excell. Hesso, qvem a me officiose salutabis, et Tibi gratias ago ingentes. Usus iis nondum sum ob varia impedimenta. Fiet proxime. Plura ut imposterum Opera edam, vix tanti erit. Nam triplo, aut qvatruplo plus in ea impendendum est mihi, qvam exinde lucrer. Servabuntur ea Filio meo, aut peribunt. Ad Illustrem Alexandri nondum exaravi literas, uti nec ad Lic. Placcium, et M. Reiskium, qvem nondum vidi; nec de ejus Nuptiis Sponsave qvicqvam cognovi. Adeo variis dum diem ex die traho, abstrahor, qvi tamen singuli singulis fere momentis animo meo memoriaeqve obversantur. Hunc miror Spartam priorem mutare, si mutat. Fasciculus tuus ad Olearium missus est. Fellero aures vellicavi de Henero sed heri non respondit, absens ab urbe dictus. Hopferi Epistolam denuo mitto. Videbis autem, ut tibi retineas, aegre enim qvi describat invenio. De Hessi Epicedio Te minimê capio. Florentiâ ex magni Ducis Hetruriae Bibliotheca vitam Bernh. Geystentis

expecto, sed dubito, an brevi. Elzevirio tradidit jam Heinsius, qvem Bigotius ex Galliis misit concilia vitqve mihi Theodulphum Sirmondi. Is Elzevirius Amstelodamo ad (Frider. Bened.) Carpzovium scripsit, primâ occasione se ad eum curaturum. Nunc eum anxie praestolor. Hamburgo a Marq. Gudio per Axenium promissa alia itidem opperior MSta. Caeterum pergisne in Catalogis Thomasinis? aut toties promissos ipsos pro meo aere juri meo cedis? Henero si Lothichiana illa Carmina in Opere non exstantia accuderes, lubentius adjungerem Carmen meum. Hoc igitur fac et vives. Fasciculos Jenam et Weisenfelsiam curandos, aegre curare potero, qvi nullam eo mittendi occasionem et oportunitatem conspicor. Jenam ad Bielckium literas cum fasciculo post nundinas Lipsienses dedi Lipsiam missas. Sed responsi (etsi per studiosum qvendam illud sollicitarim) nec dum qvid tuli. Hanisius bis Dresdâ ad me scripsit. Agitne adhuc Dresdae apud Hübnerum? an Wolffenbüttelium reversus est? et qvid agit Dresdae? Sed sistendus est calamus: avocant alia. B. V. Dab. Cygn. d. 13. Aug. 1677.

P. S. In Libro tuo Qvodlibetico habetur Explicatio Symboli Apostolici a Dn. Ephoro M. Zopfio dictata. Eam velim describas mihi. Haerent et non haerent nonnulla ex ea in memoria, qvae placuêre. Salveant Amici mei ex me. Iterum vale.

LII. Dresdam. Clarissime Dn. HEKELI!

Literas tuas accepi. Thomasio debitas recte curabo. M. Merbitio respondebo proxime. Adjunctum Hieronymi Exemplum M. Egenolpho a me cum Sal. Plur. offeres, cujus gratulationibus non addidisti, qvas Collegae decinuerunt. Lotichiana Carmina cum meo accipies, sed ut mea manu, si maturandum negotium, describam, vix vacabit. Et qvia multi Argi sunt, ut scribis, me oportet etiam cautum esse. Nondum respondi Placcio, ita interturbor qvotidie, nondum Reiskio, qvem nec dum vidi. Cui bene erit, si qva sede sedet, sedebit. Novus Con-Rector Schneebergensis jam ut audio, contemnitur. Qvid fiat Rectori? Qvodlibeticum illum alterum librum tuum nunqvam usurpavi oculis. Memini qvidem te talia mihi pollicitum esse: sed hactenus nihil vidi. Pro descripto ago gratias. Fellerus per integrum mensem ad meas non respondit. Miror causam. Situi et ego proxime. Sed tamen exspectabam ab eo responsum necessarium. Sed frustra. Qvando ab Hubnero promissum Lexicon (nam de N. Testamento Syriaco video rem esse desperatam) videbo? M. Merbitio Sal. Rescribam proxime. Ad M. Sebischium jam scripsi, sed pauca. Dum haec scribo, affertur Hamburgo aliud MS. Ganfredi, et qvidem cum Commentario, qvod novos mihi labores pariet. B. V. Cygneae raptiss. 3. Sept. 1677.

Carpzovium et Schmidium, Theologos cordatos mihiqve faventissimos, ex me saluta officiose.

LIII. Dresdam. Se sIstat, toto et VIgeat paX InCLVta MVndo! Carissime HEKELI.

Conflictatus hactenus admodum cum acribus catarrhis, tussi, calculo et aliis malis longe pejoribus ego, et fere tota mea familia, ita, ut sacris etiam publicis ultra octiduum interesse non potuerim, ab omni scriptione coactus abstinui hactenus. Nunc acervi literarum me obruunt, ut fere qvem primum, qvem postremum literario affatu compellem ignarus sim. Mitto Hieronymum qvalem habui: nam munda Exempla omnia abierunt; paucissima ex sordida charta restant. Felleri Epithalamia, qvalia accepi (accepi autem vix tria Exempla. Scripserat enim perpauca sibi superesse) qvae mihi servaturus eram, addidi. A Magliabechio nostro, qvem mihi conciliasti amicum, Vitam Septimellensis [gap: Greek word(s)] descriptam accepi, sed lingva Hetrusca, et mirifico nonnullarum literarum ductu, qva scribere suas literas eum animadverto. Exspecto autem responsum ad meas adhuc, qvod procul dubio eodem Idiomate dabit, cui paria facere non potero. Circumstant me mille negotia, adeo ut Lotichiana illa Carmina conqvirere nondum valuerim, qvae famulo describenda dedissem. Estne Tibi notus vir doctissimus qvidam, Henricus Hilarius, Scholae Cellerfeldensis,

ante oppidi illius incendium, Rector. CCLL. VV. M. Seebischium, Egenolphum et Merbitzium Sal. Plur. et [gap: Greek word(s)] voto a me macta. Ad singulos hodie eram literas exaraturus, (erant enim publicae feriae) sed compellatio Adventantium vix haec permisit, et qvidem jam sera vespera. Ignoscetis igitur singuli. Sperabone residuum Tomasini? B. V. et hunc annum cum pluribus aliis sospes felixqve transige. Dabam Cygn. d. 17. Jan. 1678.

LIV. Dresdam. Salutem et Felicitatem a DEO! Clarissime atqve amantissime Dn. HEKELI, Fautor et Amice singularis!

Habe heic Auctorum, qvae scirecupis, partim praenomina, partim cognomina. Aetius cognomine venit Amidenus; Albricus autem, vel Albericus, Anglus, Aqvila Romanus. Arrianus, qvi de Venatione scripsit, nullum aliud obtinet; qvemadmodum et Aristophanes. Auratus praenomine dicitur Johannes; Bernartius Janus. Codri praenomen est Antonius; ejus cognomen, vel potius agnomen, Urceus. Demetrius Halicarnasseus ignotus mihi est: Dionysius Halicarnasseus notissimus, qvi Antiqvitates scripsit, et alia ad Rhetoricam pertinentia. Galeni praenomen est Claudius. Hesychius absolute sic dicitur. Lucianus cognomine Samosatenfis, Marcilius, in Persium Commentator,

praenomine venit Theodorus; Oiselius Antonius. Phurnutus vocatur et Cornutus; Pindarus non habet aliud, nisi addere velis Lyricus, ad differentiam Scriptoris de Bello Trojano. Porphyrii sunt diversi. Alius est Poeta Latinus, Publilius, uti nonnulli volunt, dictus; Alius Philosophus Pythagoricus, qvem tu, uti conjicio, putas. Datur et Optatianus Porphyrius. Strabo hoc nomine gaudet solum. Sqvarzaficus, s. Sqvarzafichus, uti extat exc. in vita ejus, Hieronymi insignitur praenomine. Waltherus ille, qvem citâsti, mihi est ignotus. Si tamen scirem, qvando illum edidisset librum, facilius possem consulere. Sciagraphia tua Theologorum Evangelicor. universalis Historiae illustri Heroi a Seckendorff, uti ex diversis eruditis hactenus audivi, optime placuit. Nec displicuit Noricis, ad qvos eam misi. Imo placebit omnibus, qvorum pectora omni livore inania sunt. Ut Seckendorfio, qvem maximi facio, maxime commendes me, iterum a Te peto. Jodocus Christoph. Kress a Kressenstein, Reipubl. Norib. VII Vir, qvem jampridem Patronum es nactus, omnino est iste Kressius, qvi Pacificationi Osnabrugensi et Monasteriensi summa cum laude interfuit. Carol. Gottlieb Harsdörfer qvem celeberrimi Harsdörferi filium esse opinor etiam solidissime doctus atqve literatus est, et literatis oppido favens. Nec dubium est, qvin Carolus Welserus a Neunhof, etiam Senator Noribergensis, ex Gente ista Welseriana Noribergensi, et non Augustana, ortus sit, qvam laudat non solum Germania, sed praedicat qvoqve India et aliae Gentes incogninae

nobis. Hunc Heroa arte et virtute clarissimum Bibliothecam rarissimis ac carissimis Libris atqve MSStis, multisqve cimeliis aliis pretiosis ac curiosis, iisqve Principibus non indignis, exornatam possidere, junior Sextus retulit mihi. Salutes, qvaeso, Carpzovium, Schmidium et Seebischium nostros, imo et Schuhmannum tuum, cujus carmina, puritatem vernaculae lingvae redolentia, mihi semper grata sunt. Qvinam sunt Beckeri isti, Augustus et Gottlobius nempe, qvos hactenus laudâsti, et alii ob candorem atqve fidelitatem laudarunt? Vellem ut commendatione tua illis innotescere possem. Sed cur non placuit, tam multâ spe, eam prae reliqvis adipiscendi, a diversis Magnatibus factâ, ambire Wittebergae Professionem Poeseos, cum ex Poeta Schurzfleischio, ut ajunt, nunc factus est Historicus. Fortean maluisses ipse Historiam, laboribus tuis commodam, qvam Poesin, hodie a plurimis contemptam ac spretam, profiteri. B. V. et ulterius me ama. Dat. Cygneae d. 27. Martii 1678.

LV. Clariss. HEKELI, Amice carissime!

Incredibiles occupationes tam diuturnum silentium mihi imperarunt, qvod tuae nunc interrumpere cogunt. Sed brevibus ut defungar necesse est. Placcii literas superiore anno et meas scriptas praeterito mense demum accepi. Ad eum multa haberem, nisi infinita alia non differenda me avocarent. Dabo tamen operam, qvantum

potero, ut ei et M. Reiskio tandem satisfaciam, AEgre est animo, cum cogito tarditatis meae culpam. Sed qvî aliter possum, qvi vix meus sum? Epistolas Buchneri apud vos praelo subdendas narrat et L. Fellerus; qvapropter, si Vobis id serio cordi est, habebis a me proxime (describendas enim dedi) octodecim ad me scriptas, binas vero ad Styrzelium, unam ad Hauschkonium, et ad Christophor. Colerum unam. Habeo et alias ad Heinsium, Salmasium et Boxhornium, sed qvas jam possidere vos arbitror. Rogavit olim eas a me Otho Praetorius [gap: Greek word(s)] , qvi et descriptas a me nactus est. Miror itaqve ad Vos non pervenisse. Ex Italia a Magliabechio, Viro claro ac modesto, qvinqve Libros Romae et Florentiae superiori et hoc anno editos, dono accepi: in qvibus et Bibliotheca volans Cinelli Italice scripta, in cujus Scanzia secunda, sive 2. pluteo, vel armario, Bernhardus meus Geystensis, non sine commendatione egregia mei, qvam non mereor, ponitur. In Tertia qvae brevi seqvetur, procul dubio Hieronymus visetur. Scribit Magliabechius noster, cujus tertiam Epistolam ad prolixas meas responsoriam brevi exspecto, omnia Italice; promisitqve Heinricum Septimellensem; cujus Vitam, sed Italice scriptam, ex MS. pridem ad me miserat. Multa narrat de Libris Romae, Veronae, Paduae ac Florentiae nuper editis edendisqve adhuc, it. de suis MS. nonnullis. Cogor nunc Italicam hactenus neglectam, repetere linguam. Marqv. Gudius tertias Membranas Ganfredi ad me jam misit, qvod cum

descripto meo his diebus contuli. Mirifice is variat, et videtur bis edidisse suum librum. Heinsius mittit Vellejum suum, et Septem Illustrium Poetarum Poemata dono. Sed literae libros praecesserunt, qvos brevi expecto. Graevius Ultrajectinus Professor, cujus Epistolas Cic. muneri pridem obtinui, Lipsiae apud Fratrem jam agit, forte et ad me visurus. Esaias Pufendorfius ante trimestre hoc qvadrihorium mecum hîc exegit integrum. Misit postea dono Gronovii Epistolas ad Livium, et ejusd. Expletionem lacunarum in AEnea Tactico, Dione, etc. Nunc alii rariores Scriptores ad me aliunde missi sunt, novo negotio me obruentes. Vides igitur, qvanta expeditionum mole obruar. Hinc ignosces eo facilius. Lotichianas Elegias dudum misissem descriptas, si inqvirendi in eas otio abundassem. Angustiae enim Musei, et memoria hoc senio deficiens obstaculo ei rei sunt non minimo. Qvod si casu in manus inciderit, statim dabo describendas puero ei rei apto. Amicis apud vos meis, qvibus responsum debeo, id exsolvam solutior tot laboribus. Interim salveant tecum. B. V. et incomptis hisce ac festinatis ignosce. Dabam Cygn. d. 5. Augusti 1678.

LVI. Dresdam. CL. VIRO JOH. FRID. HEKELIO.

Occasionem, commodam nactus octodecim illas Epistolas Buchneri, cum iis, qvae ad Styrzelium et Hauschckonium scriptae sunt, mitto. Nam ad Colerum illa excusa nondum a me reperiri potuit. Edidit et Michael Meisnerus unam ad se scriptam, Syntagmati ipsius de literarum Notis adjunctam, postea inter Epistolas Georgii Richteri in 4to. Norinb. editas relatam. Mitto tamen illas sub hac conditione, ut eas, qvae ad me scriptae sunt, recipiam cum illis ad Boxhornium etc. qvas fortasse jam dum habetis, sive apud vos excudantur, sive minus. Graevius jam seu Naumburgi, seu Jenae haeret, Dresdam etiam petiturus. Buchneri et literarum fragmenta hinc inde leguntur. Hubnerus spero (licet fere contra morem suum) promissis stabit. B. V. Dab. Cygn. [gap: Greek word(s)] d. XI. Aug. 1678.

LVII. Dresdam. Clarissime et Amatissime Dn. HEKELI!

Schedii, qvi altero die cum Excell. D. JACOBI, et Filio ejus Bibliothecam et meam, et publicam perlustrarunt, tuas recte exhibuerunt. Interfui conviviis cum Doct. Jacobi tam Ferberi, qvam Romani. Ipse D. Jacobi binâ vice mecum suit, qvi et Phaleg Bocharti muneri missurum et alia promisit, cui ego donabam Longi Pastoralia ex

Editione Jungermanni et Martialem Scriverii. Buchnerianas Epistolas, ubi descriptae fuerint, redexspecto. Et ex te qvaero, num pergatur in excudendis iis Epistolis, et qvousqve progressum fuerit. Hübnero gratias ago pro Ravio, et bina Exempla Epistolarum exspecto. Bibliotheca mea, ex qvo a me discessisti, multum aucta est, multisque ex auctionibus raris libris, et imprimis longe pluribus incompactis. Heinsius dono nunc misit Vellejum suum Paterculum, nuper editum, et Septem Illustrium Poetarum, in qvibus et Fürstenbergius, Poemata, et promittit alia: sed Marium Victorem Massiliensem jam olim donatum per Graevium repetivit, eo qvod Rutgersii avunculi sui, cujus et Effigiem donavit, (Exemplum de tribus unum dedi D. Jacobi, alterum Christoph Arnoldo) fuisset. Promisit autem Ejusd. Editionis aliud Exemplar, qvod habeat, contra missurum. Sed cum id per infelicia tempora tardius ad me forte perventurum sit, totum libellum describo exacte, idque eo, ut commodius Dan. Heinsii et Rutgersii Notas marginales locis suis apponere, et repraesentare qveam. Jacobus Gronovius Livianas suas Epistolas per Graevium compactas misit. Königius diu admodum nihil scripsit. Hoc mercatu habebimus ejus Syntagma Virorum Clarorum duobus florenis et qvadraginta qvinqve crucigeris Norinbergae venale. Lexicon Garthianum autem sub praelo adhuc sudat. A Magliabechio (cujus ad me missos libros Dn. D. Jacobi vidit,

et descripsit titulos) literas ad ultimas meas nondum accepi. In culpa est portorium, qvod grande est eo qvid nobis curaturis. Septimellensem citius mihi polliceor a Gudio, qvi et initium jam misit, et Graevius se apud ipsum institurum, ut et caetera mittat, promisit. Plura scripturum interpellatio abstrahit. Placcio Cinelli primum pluteum descriptum misi per Axenium, sed absqve literis, qvod otio adhuc caruerim. B. Vale et rerum tuarum statum expone ulterius. Occupatissimus adhuc sum. Dabam Cygn. Festo Michaelis properantissime 1678.

T. T. Christianus Daumius. P. S. Arnoldus ab incluto harsdörffero juniore nullas Buchneri potest exsculpere ad Parentem scriptas literas.

LVIII. Dresdam. Clarissime DN. HEKELI, Amice integerrime.

Epistolas Buchneri reperio in Catalogo, et sunt qvi Centuriam earundem nunc primam prodiisse affirmant, qvam tamen nondum conspicatus sum. Meministi Hubnerum duo Exemplaria earum per Te mihi pollicitum fuisse. Jam vero ne unum qvidem vidi. Sunt apud me Phil. Melanchthonis, Joach. Camerarii, Erasmi, Joh. Fabri Constantiensis, Salmasii, Bongarsii, Gruteri, Casaubeni, Heinrici Stephani, Dan. Heinsii, Conr. Rittershusii, Lingelsheimii, Georgii Remi, Eliae Putschii,

Henisii, Seberi, Hoeschelii, Rauscheri, Mich. Neandri, Lud. Helmboldi, Dav. Chytraei, Reinesii, Jos. Scaligeri, C. Barthii, Jo. Frid. Gronovii ad C. Barthium et Reinesium, Jani Cornarii, Greg. Haloandri, G. Pylandri, Frid. Taubmanni, et multorum aliorum, ex qvibus Centuria facile qveat conflari. Possem, sed otiosior, et hisce gratificari Sosiis talium cupidis et gratis. Epicedion Peiskerianum a Georgio Fritschio puto te accepisse. Mitto alterum exemplum. Restant enim apud me perpauca. Et carmen a me valetudine non commoda deproperatum est, ut me ejus pudeat pigeatqve. Plura inter avocamenta tot non licet. B. V. et salve

LIX. Dresdam Amicissime Dn. HEKELI.

Literae tuae recte ad me perlatae fuerunt. Pro adjunctis gratias ago. Qvod remittam contra, nihil paret. Undecim illa Carminum Volumina, etsi, ut auguror, major eorum pars penes me jam erit, vel in tui gratiam junctim retinebo ex Bibliotheca Bohemiana, si tribus Imperialibus obtinere possum. Sin minus; potero iis carere. Si placet; qvod mihi placet, poteris proxime mittere; vel omnia

Volumina, vel partem prius eorum. Solutio praestabitur, statim atqve accepero. Emi non ita pridem sex Volumina, atque crassissima ex Bibliotheca Melchioris Laubani Silesii, Dantisci Rectoris, singula qvatuor argenteis. Horum tria mera scripta continent tum prorsa, tum vorsa ab ipso Laubano composita. Reliqva sunt varia ab aliis Viris doctis ad ipsum missa Epithalamia, Epicedia, etc. cum eorum utplurimum [gap: Greek word(s)] , egregia sane. Popmae specimen ob auctarium satis placet. Nescio tamen an qvae Auctori desunt, caeteris paginis additurus sis. Exempla, qvae in his libris laudata, majorem, puto, partem ad suas Editiones accommodavit Popma. Edidit enim Fragmenta historicorum, edidit Ciceronem ad Attiticum, Catonem de Re rustica; Varronis Opera cum Fragmentis et suis Conjectaneis, Salustium, etc. Alii enim Critici aliter qvandoqve ea exempla laudant; et ingens aliqvando discrepantia est, qvod olim observare memini. Haec si conferres et diversitatem Lectionis annotares, egregium et magis utilem libellum conficeres. Exemplis alioqvi non tuto fidendum est. Prodiit Giessae nescio cujus [gap: Greek word(s)] superiore anno, qvam octo grossis venalem indicant. Eam non vidi. Videbis ipse, uter vestrûm plus praestiterit. Saluta omnes, qvos nosti mihi faventes, et M. Kühnium, V. D. Praeconem apud vos facundissimum, amicum mihi concilia. Hunc virum eruditum Bibliothecam insignem possidere, praeter te, et alii retulerunt mihi.

LX. Dresdam.

Hodie demum recepi amissas creditas geminas Magliabechii nostri literas, Pervenerunt illae Norinberga in Hassiam ad amicum, ut ipse profitetur tuum, Matthaeum Avenarium, Pastorem Steinbacensem, qvi fasciculum 6. Epistolarum, etsi apertis singulis (Arnoldus Italicos meo indultu aperuerat: Schmidii apertas ego ad Bürgerum miseram) suis incluserat. Huic doctissimo et candidissimo Viro nondum recte innotui. Velim igitur, si qvando ad ipsum literas das, ipsum meô nomine salutes, et ob fidem hanc et beneficium ad me curandi eas gratias agas qvam maximas, et omnia vicissim, qvae gratificari ipse qveam, promittas. De ejus persona etiam, et qvî tibi innotuerit, nonnulla haud gravatim referas. Puto per Plur. Reverend. Kettnerum ad me curatas fuisse. Laudat enim Virum a Te sibi exqvisite commendatum. Commodissime sane appulerunt. Mitto enim hisce diebus Noribergam literas, sic et potero respondere Magliabechio. At num Avenarius etiam super his aliqvid ad Te? Is enim scribit et petit anxie, ut ex Te exqvirerem, an Excellentiss. Dn. D. Neunesii, Inspectoris Smalcaldensis Evange., et Max. Rev. Dn. M. Wintheri, Superint Suhlensis, literas et sasciculos hactenus accepisses. De Metzschio

nondum qvid comperi. Etsi spes ereat a Carpzovio, Lipsiensi Senatore, qvid resciscendi, sed forte id fiet proxime. Virgilium in 12. sed absqve Animadversionibus Heinsii, cum aliis accepi. B. V. et rescribe, num Gebhardi Programma nuper missum acceperis. Dab. Cygn. d. 26. Maji 1679.

LXI. Dresdam. Salutem a Salutis fonte! CL. HEKELI.

Pro Epistola Amici Spirensis [note: c Heîc intelligitur prolixissima illa Epistola Latina, qvam Jo. Christoph Rumetschius, Polyhistor et Gymnasiarcha qvondam Spirensis celeberrimus, de Universali Theologor. Evangelicor. Historia ad amantissimum HEKELIUM nostrum Spirae Prid. Cal. April. eod. annô, qvô haec Epistola scripta, impensis Olffenianis ac typis Senatoriis in 4to. impressam dedit. Laudavit hanc Epistolam non solum inclutus M. Henning Wittenius, in Indice, eoqve Auctorum, qvibus in conficiendo Diario Biographico est usus, Tom. II. lit, (e) 1. fac. a. sed et D. Joannes Cinelli, vir nobilitate et famâ illustris, Scanz. VII. Biblioth. vol. suae Parmae 1692. in 8v. impr.] gratias ago gratissimas. Eam secum habet noster Ephorus Löscherus, Historiae Ecclesiasticae scrutator diligentissimus, et dubito, an brevi recepturus sim. Mitto exemplar Fabularum, non parum, ut puto, nec enim relegere potui, mendis inqvinatum. Vix qvatuor a Bibliopola obtinui. Et aere meo redimenda sunt, si qvibus pro amicis mihi opus erit. Fellerus, qvi jam nobiscum est et Te salutat, vix plura permittit. Reliqva cognosces e latore hoc, meo p. t. famulo. Reliqvias Bohemianorum Carminum, et Catalogi Tomasini residuum oblivioni non dabis. Plura alia occasione. Haec enim subita est. B. V. dab. Cygn. d. 27. Julii 1679.

LXII. Dresdam. Clarissime et Carissime Dn. HEKELI.

Catalogos (Bohemianos) hodie temittere non qveo. Vix enim ipsemet perlegere potui. Monstravi discipulis nonnullis, qvi excerpserunt paucos in scheda consignatos, qvos libros, ut mittas, rogamus. Pecuniam certe mox accepturus absqve pretii diminutione utut grande causentur portorium. Cum Collegis et Dn. Heidlero cras communicabo. Hodie enim ob ferias Scholasticas non convenimus. Avenarium ut honorifice datâ occasione a me salutes, iterum moneo rogoqve. Nuperas meas cum argento non dubito, qvin a Klopffero acceperis. Utor jam nonnullis membranis e Bibliotheca Paulina, qvarum descriptio partim, partim cum excusis collatio omne otium mihi eripit. An Königius Exemplar Lexici Garthiani

thiani missurus sit, resciscam, ubi post decendium noster auriga Norinbergâ redierit. D. P feifferus suam Epistolam itidem ad me misit. Meditandae et huic literae. Dresdenses Tabellarii parvo [gap: Greek word(s)] non acqviescunt. Nuperius enim pro Orationibus Buchnerianis, tres argentei fuerunt dandi. Qvorum [gap: Greek word(s)] multos deterret a librorum pretiosa emptura. Finiendum est. B. V. et Salve. Dab. Cygn. d. 3. Nov. 1679.

LXIII. Dresdam. Salve, mi HEKELI!

Memini, B. Dn. L. Peiskerum nostrum mihi aliqvando ostendisse Scriptum qvoddam nitidum B. Dn. D. Tod. Wagneri, Cancellarii Tubingensis olim gravissimi, in qvo et mei nominis mentionem fecit venerabilis ille Nestor ob Carmen Heinsianum, qvod imprimi hîc curavi, et a Te illi forte, insciô me, nomine meo missum est. Qvoniam autem mea tunc modestia non esset permissura, ut verba illa, qvae me inprimis concernebant, in Museo Peiskeriano describerem, vehementer a Te peto, ut titulum plenum Scripti istius denomines mihi, et verba, uti proprie sonant, fideliter describas, qvibus sum indigne laudatus. Retulit enim tunc Peiskerus mihi, se a Te scriptum illud saltem mutuasse, et mox curaturum esse, ut ad Dominum, qvod suum esset, recte rediret. Et est illud Scriptum, in qvo Tui qvoqve, si aliter

recte memini, sic optime fuit memor: Qvod Carmen (Heinsii np.) nobilissimi Dn. Dau mu, Polyhistoris clarissimi, mihiqve ab amantissimo atqve fidelissimo heu! qvondam meo Stirzelio singulariter persaepe commendati, nomine transmisit mihi [gap: Greek word(s)] meus Joh. Fridericus Hekelius, Vir-juvenis eximiae eruditionis et commendatae modestiae, cujus qvippe praesentiâ et propter mihi amice inscriptum Carmen elegans ac numerosum Academia nostra Tubingensis omnino est reddita celebrior, etc. Verba enim sic sonare conjicio saltem, eaque non pro veris habeo et propriis. Qvare ut vera etc genuina ex isto Libello lubenter mecum communices, iterumqve magnopere a Te peto. Soleo enim, ut nôsti, studiosê colligere omnia studitorum de persona mea judicia, non ut illis superbirem, sed in memoriam mei posteritati candidae relinqverem, sive illa candida sunt atqve aperta, sive adulationis ac falsitatis, sicuti plerumqve hac tempestate maxime insolenti, stultâ ac falsa saepissime confieri solet, plena. Qvid rerum agit illustris Heros a Seckendorff, a nemine experiri neqvivi. Forte qvid adornat erudito Orbi profuturum. Qvid spei de Poematis Buchneri? Heinsius d. 22. super. mens. Jan. ita ad me peramanter scripsit: Pro Buchneri Oratione gratias ingentes, uti par est, ago. Suspicio enim ac observo, qvicqvid a Genio viri illius proficiscitur: qvo laetor impensius, accepto nuntio, de Poematis qvoqve ejus prodituris in lucem. Sed jam abrumpendum. Literas prolixiores, et qvidem ad [gap: Greek word(s)] tua, ab otiosiore

expecta, qvas et expectat Königius, qvi cum nobiliss. Hammero nostro, JCto Graece et Latine excellenter docto, et, ut notum est, egregie pio ac sincero, ex voto valet et vivit. Valent modo simihi adhuc, ut spero, Altdorfii Saubertus, Wagenseilius, uterqve Hofmannus, Par. et Fil., Sturmius, Mollerus et Omeisius, qvos verbis tuis Königius noster sine omni dubio decenter salutabit. Dürrius autem interea tuus placide est mortuus. In cujus locum dignissime suffectus [reading uncertain: page damaged] est Johannes Fabricius, Johannis, Theologi Noribergensis mansueti illius, qvem Tibi, ut omnibus solide eruditis, candide faventem Sextus noster Senior saepe praedicavit ex asse filius, qvi muteri et officio suo, ut adventantes et me compellantes nonnulli Studiosi Norici hactenus affirmarunt, laudabiliter et gloriose praesit. B. Vale, et saluta ex me Carpzovium, Schmidium, Seebischium, Bosium, Kühnium et omnes, qvos nosti mihi fautores et amicos, imprimis tuum fratrem Christophorum, et dilectos meos cognatos, qvibus inclusas tradendas rogo literas. Dab. Cygneae d. 22. Febr. 1680.

LXIV. Dresdam. CL. HEKELI Salve!

En pauca ad tuas Qvaestiunculas! Themistii non contemnendus editor in 8v. et 4t. est Dionysius Petavius; Eunapii vero Hadrianus Junius in

8v. et Diodori Siculi Rhodomannus in fol. Aristaenetum Graecum primus edidit satis accurate Sambucus in 4t.; Mercerus autem similiter Graeco. Latinum Parisiis in 8v. Sic qvoqve Achilles Tatius Graeco-Latine apprime est editus a Claudio Salmasio in 12. Artemidorus a Rigaltio in 4t. et Apollonius Rhodius a Jeremia Hölzlino in 8v. Gennadii sunt diversi, de qvibus videnda Praefatio mea in Hieronymum de Trinitate. Ad alia tempore alio. Ab illustri Magliabechio nostro tandem Henricum Pauperem eum prolixis literis accepi: deest tamen finis, qvem proxime exspecto. Iterum scribit, se Dominico Mellani fasciculum obsignatum, cui sua manumeum nomen inscripserit, per Dn. Cenimisisse, qvod Dn. Schadio, Affini indicare posses. Jacobi Gretferi Librum de Cruce in 4t. exc. qvem Kühnius vester facundus aeqvissimo pretio nuper a Te obtinuit, lubenter etiam redimere potuissem, si hac emptione me certiorem fecisses. Haec enim editio longe est correctior typisqve magis munda editione nova in fol. CL. Peiskerum, Lycei Wittebergensis Rectorem meritissimum, eumqve ex me officiose salutandum, toto corde amo, et lubens lego carmina ejus. Vivat tecum in Nestoris annos, et valeat pancraticê cum Kirchmaiero atqve Schurtzfleischio. B. V. et festinanti ignosce. Dat. 9. Martii 1680.

LXV. Glaucham. JESUM fidelissimum animae et corporis Medicum!

Te, Clariss. atqve charissime DN. HEKELI, Amice singularis, ob diram pestis, plerumqve supremam famem excipientis, saevitiam Dresdâ qvoqve discessisse, et jam iterum apud dilectos Parentes Tuos, nomine nostro salutandos, subsistere gerula vestra communis nos certiorem fecit. Qvod lubens intellexi, hâc spe, Te nos mox invisurum, atqve expositurum omnia, qvae hactenus Dresdae gesta sunt. Sed qvomodo valent cum suis fautores et amici nostri Carpzovius, Schmidius, Seebischius, Bosius, Egenolphus, Merbitzius, tuus Frater et affinis meus Schadius, cui prolixe nuperrime scripsi, et prospera qvaevis atqve salutaria serio ei sum apprecatus. Recte fecisti, qvod fugam, qvanqvam sero arripuisti. Tutius enim est versari extra periculum, qvam in periculo, qvod qvis potuisset effugere, qvotidie inter spem et motum, et sic anxie vivere, et tandem in eodem volente DEO, perire. Interea ut Album tuum Viridarit Deorum mortalium nomine curiofe ac lepide insignitum una cum Monachiano atque Bohemiano Albis ad unam et alteram hebdomata mecum, ut promisisti, communices, ob nostram amicitiam, qvam hactenus inviolatam nôsti, peto. Describam enim, dum degis in vicinia, ex istis, qvicqvid placebit, inprimis virorum illustrium Symbola, qvae mihi adhuc ignota sunt. Te a Magliabechio

Florentiâ, Patino Paduâ, Bebelio Argentoratô, Franco Heidelbergâ, Hopffero atqve Caldenbachio Tubingâ, ac Fehrio Sen. Svinfurtô, literas benignissimas nuper accepisse, merito Tibi gratulor imo et mihi, qvoniam celeberrimis istis Viris, Magliabechio nostro excepto, qvem fautorem qvoqve mihi conciliasti, commendatione tuâ forte possum inposterum innotescere. Inprimis ambio nobilissimi Dn. D. Georgii Franci amicitiam, cujus solidam ac nitidam eruditionem, pergratam morum atqve virtutum svavitatem ac prorsus singulare velisicandi studium Zeisii nostri incredibiliter mihi commendarunt. An hic literatus vir, ut et illustris Fehrius, qvem inprimis humilitas commendat, a persona qvoqve Tibi sint noti, qvaeso me fac certiorem. Memini in Albo tuo, cum nomen meum vile isti olim petitu tuo inscriberem, magna cum delectatione legisse summa atqve incomparabilia Fratrum Spanheimiorum, utriusqve Fabricii, Böckelmanni, Danckelmanni [reading uncertain: print faded] , Miegii, Gerlachii, aliorumqve Heidelbergensium clarissimorum nomina, sed non offendisse Franci, qvi natione est Numburgensis Thuringus, et Graevii mei civis, nomen vere mihi amabile. Si rescribes nomine meo ei imperti salutem plurimam, et expiscare ex isto, an Henr. Pauper Septimellensis sit reperiendus in Bibliotheca Palatina publica. Fasciculos Veielio Ulmae, Unglenckio Noribergae ac Caldenbachio Tubingae, viris praeclarissimis atqve praestantissimis, manu

tua inscriptos ac probe obsignatos, statim cum adventarint, per notum aurigam (den Weitz-Bauer) recte curari jussi. Nec dubito, qvin Noribergae ulterius fideliter promovendos istos hospiti suo optime tradiderit. Bene vale, et mox nos invise. Osculari enim Te gestio, qvi per triennium, et qvod excurrit, aspectu tuo sum privatus. Inter sexcenta avocamenta Dab. Cygn. d. 12. Junii 1680.

LXVI. Glaucham P. S. Mi Carissime Dn. HEKELI.

Habes hîc literas ad Cl. Rosebergium Budissinam mittendas, qvibus adjunxi Exemplar Paulini, cum uno et altero carmine. Vide ut recte curentur. Magliabechius nuperrime scripsit ad Kirchmaierum, misitqve de Cometis nescio qvid. Curaverat Spizelius. Huic et ipse Augustam Paulini Exemplar cum literis mitterem, si daretur occasio. Fuit his diebus mecum Professor Witeberg. Dassovius in Thermas Carolinas profectus. Redux factus me denuo compellabit. B. V. [gap: Greek word(s)] Cygn. d. 25. Maji 1681.

Tuus Christianus Daumius. Wie weit des H. Mutter S. meiner Frauen mit Freundschafft verwandt/ möcht ich eigentlich gerne wissen.

LXVII. Reichenbachium Clarissime atqve Celeberrime Dn. HEKELI, Fautor et Amice certissime.

Laetor, qvod salvus ac incolumis Reichenbachium venisti, et labores tuos scholasticos cum DEO es aggressus. DEUS, qvi Te, ut probe novi, legitme vocavit, adsit Tibi gratia sua et spiritu, ut labores hosce plane ac plene Herculeos, eosqve oculti odii; summae invidiae, multi pulveris, insvavis foetoris, detestandae ingratitudinis, insulsi contemptus atqve magni taedii, ut ipse cum plurimis sortis nostrae viris hactenus sum expertus, et adhuc qvotidie proh dolor! experior, plenissimos non formides, sed mascule ac intrepide eos sustineas. Habebis non solum discipulos pios, probos, humiles, morigeros, fideles, gratos et dociles; sed et habebis impios, improbos, [gap: Greek word(s)] turgidos et longe Te et ipsis Scaligeris, ut opinabuntur atqve somniabunt, doctiores, et propterea immorigeros, infideles et Judae proditoris stigmate notatos, imo et ingratos ac stupidissimi ingenii Murciaeqve litantes asinos. Inter Collegas, qvando inprimis ii sunt indocti, avari, invidi, pigri, negligentes, madidi ac fastu turgentes Thrasones, erit unus et alter, qvi Sceptrum gerere audebunt, et solidam ac solide-Eruditis probe perspectam ac cognitam eruditionem tuam ex crassa ignorantia atqve injusta invidia spernent, imo famam tuam honoram

atqve meritam, contra Christi mandatum atqve fraternam charitatem, canum invidorum more, vetulis qvippe loqvacibus, ac dissolutis credulisqve homuncionibus saltem noti, allatrare non erubescent. Inspectores Scholae, artium, doctrinae et methodi informandi plerumque rudes atqve ignari, de doctrina tua non aliter judicabunt, ac coecus de colore. Hinc facile apud improbam atqve sceleratam plebem odium, hinc contemptus, hinc calumnia, hinc ingratitudo, hinc tandem persecutio, qvae sanguisugae nos homines de Scholis sangine privare, et cor nostrum ante tempus possunt exedere. Melius itaqve fuisset, ut saluberrimum Dnn. Consistorialium Lipsiensium, D. Lehmanni inprimis, atqve D. Lindneri, acutissimi judicii atque laudandae velificandi promptitudinis virorum, consilium arripuisses, et Moletrinae huic Plautinae Te non reddidisses proprium. Sed patienter ferendum, qvod non facile jam est mutandum. Qvi Scholis imprimis nati sunt, horum osor et rosor maximus semper est Diabolus. Si Reichenbachii, clarissimis Rappolti Wildii, Heifelii, Beckii, Fidleri atqve Listii nominibus jampridem nobilitati, Tibi erit bene, et concrediti tui discipuli etiam extranei, qvi ad Te cupidissimi doctrinae tuae hactenus, uti audivi, advolârunt qvasi, profectibus, ut firmiter spero, erunt divites, tuqve, canente Horatio, antiqvo censu ac omni prosperitate eris dives, gaudebo merito gaudium. Et retulit mihi heri L. Weissenbornius noster, has

literas Tibi traditurus, qvod, te ipso confitente, qvidam non solum e modestis atque divitibus Senatoribus, sed et opulentis Mercatoribus atqve cujusvis fortunae civibus Tibi impense faveant, Te omni honore afficiant, multaqve beneficentiae singularis documenta in Te qvotidiê ferme derivent. Qvod M. Starckius, Diaconus vigilantissimus, et magni nostri Rappolti Agnatus, inprimis etiam, qvod gratulor Tibi, faciat. Interea Tu generosus Leo non curabis mecum musculos improbulos. Gersonis, Hutteri, Lipsii, Lutheri, Pirckheimeri, Reuchlini, Gerbellii, Pacei, Noviomagi et Rhenani Epistolas MSS. ex scrinio tuo, ubi detur earum magna copia videre optem. Jani Cornarii, Cygnei, ut et Camerarii et aliorum aliqvot brevi editurus sum. Mutianus Erfordi vixit, vix in Anglia, et habeo Erasmi Rot. ad eum [gap: Greek word(s)] . Pro Oleario prorsus nulla est mihi pecunia. Destitutus omni sum. Tractatum illum non mihi, sed aliis emi, et nunc nescio qvibus, puto Götsio. Heifelium, Plaviensium Antistitem, ut et utrumqve Wildium, Lic. np. Godefredum, et M. Theophilum, qvorum hic Diaconsu; ille autem Causarum Patronus Plaviae audit clarissimus, ob amicitiam, qvam cum B. Dn. Parente illorum olim constantissime colui, meis verbis, si dabitur occasio, nî Tibi molestum, saluta. Saluta et Per Rev. M. Dasdorfium, percharum meum amicum, cui Wildiorum soror nupsit. Salutant Te omnes mei, ut et Excellentiss. D. Löscherus, Ephorus

noster Tibi faventissimus. B. vale, et Magniflco D. Georgio Franco, Medico Heidelbergensium celeberrimo, propediem me commenda. NB. D. Christophorus Francus, Kiloniensis Theologus, Noribergensis est, et olim Sexto Sen. nostro, ut scio, amicissimus, sicuti et Betulio, qvem in vivis adhuc esse spero. Dab. Cygn. d. 4. Sept. 1681.

LXIIX. Reichenbach. Clarissime VIR, SALVE!

Remitto a Magliabechio Tibi missa, non sine plurimis gratiis. Difficiliores sunt eae ob unam et alteram vocem mihi ignotam. Sed et valetudo, hoc tempestuoso aere, ingenium intendere non permittit. Velim verba ea mecum communices, qvibus indicatur Spizelium mea recte curasse. Noribergâ nihil allatum est. Qvis Lambecio successor in Bibliotheca Caesarea curanda sit futurus, simul cognoscere aveo. B. V. Scrib. raptim Cygn. d. 13. Sept. 1681.

LXIX. Reichenbach. Salve mi HEKELI!

Mitto festinans, indicata, qvam desperabam occasione Epithalamion admodum deproperatum.

Tempora dum non laeta, lue ast Mavorteque passim
Moesta, angunt mulios, Tu Tibi laeta paras,
HEKELI, Aonidum jam non nova gloria, taedas
Qvi accendis, MARIAE captus amore tuae;
Cui genitor notus SCHARSCHMIDIUS, ille virorum,
Qvos REICHENBACHIUM fert, speciale Decus:
Qvid nos? Gratamur, bona votaque solvimus: En nunc
HEKELIDAE stabili sede sedere datur.
Sit stabilis fortuna loci, sit Conjuga concors,
Mutuus amborum flagret inusque calor.
Ignorentque enses Bellonae, atrumque venenum;
Sint vegeti, annosi, sint locuplete penu:
Catera qvid voceam? Prolem superaddat Ihöva
Multiplicem his votis, comparilemqve Patri.

LXX. Reichenbach. Salutem a JESU Salutis autore! CL. Vir, Amice Carissime!

Te vivere adhuc salvum, qvod gaudeo, intelle; xi ex Excellentist. FELLERO Meo; Teqve desiderare V. Cl. Königii ad Te literas, qvas ad me illum misisse narraris. A qvo tamen ad ultimas meas 17. Maji exaratas nullum prorsus hactenus recepi responsum. Itaqve non potui non id statim tibi significare. Tu facile literas ad me Schönfelsiam curare posses, ubi in nova arce vivit Hier. Goth. Peiskerus, aut Planicium, ubi meus famulus Gabriel Seidel apud Parentem vivit, aut ad Lic. Weisenbornium ibidem agentem. Ego vero si respondere velim, vix potero aliter, qvam ut Lipsiam ad FELLERUM curem. Ex qvo ad Te scripsi, nihil Noribergâ vel aliunde ad me missum fuit. Promisisti mihi cordialia non una aeri venenato atqve pestifero adversa: fac mihi gratificeris, et me calamitosissimis et taediosissimis temporibus aliqva iis exhilares. AEdes nostrae et vicinae sunt per Dei gratiam (cui laus et honor) etiamnum salvae. Una et altera domus in nostra platea malum hoc passae sunt. Una clausa est; ex altera per tres hebdomadas, praeter puellam, nemo elatus fuit. Deus porro nos tueatur et ab oppido nostro

auferat tandem saeviens hoc flagellum. Qvod tu mecum orabis, et statum rerum vestrarum narratiunculâ expones. Nam et apud nos rumor fertur etiam vestrum oppidum militibus cinctum esse. Sed aures illi nullas praebemus. B. Vale et salve cum Tuis. Scribebam festinantissime Cygneae a. d. IV. Octobr. 1682.

LXXI. Reichenbachium Clarissime atque Praecellentissime Domine HEKELI, Amice probatissime atqve constantissime.

Cordialia tua, maxime nobis grata atqve accepta, ut et Nummum Imperialem Leopoldinum, cum sex Turdis atqve Gallina saginata, qvibus nos in hac calamitate atqve miseria nostra donare atqve exhilarare voluisti, commode accepi. Pro qvo singulari beneficio grates ago merito magnas et innumeras. Et sicuti pro nobis ardentissime oras: ita et pro Te et tuis Reichenbachensibus similiter oramus, ut tantum malum, qvo proh dolor! premimur, vos nullo tempore premat. Et lubens ego percepi, qvod rumor iste tristis de oppido vestro sit prorsus inanis ac vanus. Testimonium Graecum, Zachariae Gergano, Ithacensi, in Patria sua olim datum, idqve omnibus, doctis ac curiosis viris ob insignem ac nobilem raritatem probe se commendans, commoda hac occasione

cum aliis mecum communicatis indemne, uti videbis, remitto. Legere illud et explicare cum subscriptione magnis literis ac miris characteribus exarata non potui, ob varios nempe ductus, variasqve abbreviaturas, qvibus omnes Grammaticae Graecae, et omnia Graeca Lexica, qvotqvot ego possideo ac diligens evolvi, destituuntur. Et vix ullus erit inter sexcentos (Graece qvoqve) eruditos viros in Germania, qvi tale oraculum plane et ex voto explicare atqve interpretari poterit. Tuum erit, vel nobilissimo Königio nostro Altdorfium, vel Rechenbergio atqve Herrichenio Lipsiam, vel Stolbergio Wittebergam, vel Frischmuthio Jenam, vel Scheidio atqve Caldenbachio, utriqve tuo, Argentoratum atqve Tubingam, immo et Koebero nostro Geram atque Gebhardo Wratislaviam per fideles homines, si commodum Tibi, mittere illud, et ut lubentes explicent, peramanter petere. Hi enim inter Literaturae Graecanicae Primipilos hoc tempestate praestantissimi sunt Antesignani ac Duces. Graece qvoqve excellenter sunt docti Andreas Unglenckius atqve Joannes Wülferus, qvos Sextus Par. Noricos Demosthenes haud iniuriâ vocavit. Hos Tibi bene notos atqve faventes esse existimo. Immo Wonnam Ratisbonensem etiam Graece et Latine prae caeteris esse doctum, B. noster Bosius atqve Balduinus mihi retulerunt. Noster Balduinus cum CL. Wonna isto vivit adhuc optime, et salutat Te amanter, ut et M. David Schindlerum Ecclesiae Lignitiensis

Evangelicae V. D. Ministrum maxime vigilantem ac plur. venerabilem, qvem in occatione verbis meis qvam decentissime etiam salvere peto. Rostochii non sum notus; multo minus Kiloniae. Lochnerum Noribergensem, peracris ingenii ac solidae eruditionis virum, puto in matrimonium duxisse D. Aug. Varenii, Theologi celeberrimi, filiam desunt mihi Ejus Epithalamia. Sed D. Major, Kiloniensis Medicus, omnino est frater Eliae Majoris Wratislaviensis, qvi in Gymnasio Elisabethano Gebhardi nostri Collega est. Si Tibi Kiloniae cum Morhofio atqve Opitio intercedit fida familiaritas, hos viros praeclarissimos saluta ex me amantissime, et, si potes, eos amicos mihi concilia. Utrumqve enim sincere amo atqve magni aestimo. Opitii parva Biblia apprime mihi placent, qvoniam diversarum vocum Ebraicarum proprietas atqve [gap: Greek word(s)] in iisdem cogitate et probe sunt expressae. Nec displicet mihi Morhofii Ciconia, lepidissimum ingenium ac elimatum judicium tanti Poetae indicans. De Apotheosi apud Mythologos, qvos non paucos, ut spero, possidebis, multa passim sunt reperienda. In specie autem de ea olim disputavit Lipsiae M. Daniel Müller, Theumensis Variscus, hodie Rector Holmiae in Svecia magna laude conspicuus, et nostro Fellero ex asse amicus: An Schuhmannus, Dresdensium Senator haut imus, Schuhmanno, Senatori Gedanensi incluto, consangvinitate sit conjunctus, ex Te scire cupio D. David Klugium, Theologum et Oratorem

Hamburgensem svavissimum, cujus qvippe venerando Nomini elegantem Inscriptionem ante aliqvot annos humiliter consecrasti, non solum ob perfectam atqve praeclaram eruditionem, sed ob multas ac singulares virtutes qvoqve, qvemlibet Christianum, imprimis vero Theologum, egregie exornantes atqve clarum reddentes, unus et alter ex eruditis nostratibus hactenus etiam laudavit. Laudantur ejus filii qvoqve, qvorum unus de Jejunio JESU CHRISTI Qvadragesimali eruditum Tractatum ante aliqvot annos Witebergae adornavit. Huic magnificae Klugiorum Trigae atqve Excell. Dn. Lic. Baldovio ut officiosissimam ex me salutem impertiaris, iterum abs Te peto atqve obtestor. Baldovii Parens [gap: Greek word(s)] et meus, et heu! qvondam Zechendorfii mei fidelis, constans et exoptatus Jonathan fuit. Ideoqve ejus jucundam atqve amabilem memoriam in amplissimo relicti filii nomine, dum ero superstes, studiose colam ac pie venerabor. A Max. Rev. Dn. D. Loeschero nostro, qvi cum splendidissima familia sua salvus ac incolumis (DEO sit magna laus atque perennis gratia!) adhuc vivit, salutem plurimam ac qvaevis laeta et prospera. Vale optime et ab omni lue pestifera, oppidum nostrum gravissime vexante, immunis ac liber, et vive mei meique nominis, etiam post funera beata mea, mi HEKELI dulcissime, memor. Dabam Cygneae inter millia pericula d. 9. Nov. 1682.

LXXII. Reichenbach Clarissime Vir, Amice Carissime!

Literas, qvas Wolfius tuus, hactenus mihi ignotus, Lipsiâ recte cum Magliabechianis et tuis Epithalamiis; qvorum singulorum, si id fieri potest, unum adhuc Exemplar rogito, misit, accepisse scias. Ille, Magliabechium dico, eandem Cantilenam bis terve repetit, forte arbitrans suas non recte tradi. Dolet tamen, qvod ad potissima nihil respondit. Septimellensis Editionem urget, sed nondum integrum, etsi pollicitus, misit. Typographum magnum tuum et meum debitorem, Ebelium, oppetiisse nosti. Sic meum promissum de libris edendis ad aliqvod tempus cadet in irritum. Eum brevi, si vivo, Lipsae excudi faciam: Spondet enim Carpzovius sumptus. Verum si opusculum non dabo integrum, non facile admittent lucripetaces illi. Qvod ipsi non rescripsi, duplici de causa factum est: Primum, qvod lue apud nos grassante, de vita mea incertus et dubius fuerim hactenus, et de ea adhuc sum dubius. Nondum enim pestiferum illud malum, etsi longe mitius nobiscum agere videatur, plane desaeviit. D. Reyherum Consulem hodie extulimus cum Concione funebri, utinam non cum Civium, qvemadmodum fiebat, cum filiam efferebamus, damno! Altera est, qvod metuerim, an nostras literas suscepturi sint ex loco infecto ac famoso. Qvod si malum illud taceam, et dilatae excusationis vere me

excusem, inter mala nomina me habitum iri auguror. Differo igitur ad proximam vestram responsionem literas. Interea qvid de nostris rebus fiat, cognoscemus. Viximus sane hactenus miserrime; uti nulla Schola aperta fuit, ita nihil lucri ex Accidentibus, qvae vocant, ad nos redundavit. Proxima oppida (DEUS remuneretur!] multam pecuniam ad nos misisse sublevandis pauperibus dicuntur. Sed qvis accepit? Nos de Schola homines a nemine qvicqvam percepimus, excepto Praefecto supremo Schwartzenbergico, Dn. Christiano Cressio, qvi singulis Scholae Collegis et Ministris Ecclesiae singulos thaleros distribui fecit. DEUS remuneretur hoc Benefactori illi tam grande [gap: Greek word(s)] millecuplis modis. Dn. Zahmseilius mihi aviculas, deinde, post gratias versibus a me peractas, misit leporem. M. Thymus itidem aviculas. Sic Providentiam divinam ubiqve depraedicare habeo. Interea inclusus malo hypochondriaco et calculo eximie afflictus fui, ut vitae non solum pertaesum fuerit. Peiskerus meus Schönfelsia vasculum Butvri sex cantharorum pro argento, qvod statim solvi, misit, qvod officium magni loco beneficii duxi. Qvae beneficia sane non sunt tacenda, sed divinae Providentiae asscribenda, et ex animo depraedicanda, qvod me meosqve hactenus incolumes servavit. [gap: Greek word(s)] ; Sed fessus est calamus perscribere caetera [gap: Greek word(s)] . DEUS omnia brevi auserat, et vos bonorum Angelorum ope, ne percussor

Angelus vos et circum vicinos pariter feriat, muniat, et salvos incolumesqve diu conservet. Heri M. Dittmannus terrae mandatus fuit, D. Reyherum brevi secutus.

LXXIII. Reichenbachium. Clarissime atqve excellenter Docte DN. HEKELI, Amice et Evergeta e paucis.

Amphoram vino Neccarino plenam, eamqve gemma tua nitida atqve fulgente probe obsignatam, cum saccharo optimi generis ac ansere neutiqvam contemnendo heri Planitziô rectissime accepi. Ita novo singularis ac magni beneficii genere nos non rogatus mactasti, nosqve nunc habemus, qvo ferias CHRISTI Nata litias eo jucundiores ac alias esset factum, celebrare, ac Tui Tuaeqve dilectissimae Conjugis Mariae, a nobis decentes salutandae, memoriam, qvae nostra ex memoria nullo tempore elabetur, hilarê recolere, imo, qvod misisti, in sanitatem vestram consumere possimus. DEUS, qvi fons benignitatis est, centuplici, modo remuneretur haec bona vobis

omnia, vosqve in pace et qviete qvam diutissime conservet salvos, beatos ac telices. Status noster adhuc est miser atqve calamitosus, et pauca ob gravissimam viarum obsessionem ab exteris ad ventant, qvibus recreari legendo possem. DEUS, qvi hoc malum pestiferum ob peccata nostra gravia in nos immisit, iterum tandem avertet aliud ex gratia, nosqve misericordiae oculis indubitato aspiciet paterne. Idcirco veritati prorsus esse dissona opinor, qvae Doctissimus Erasmus de pestis venenosae origine Centur. VIII. Epist. XIII. sic profert: Astrologi (scribens) tradunt qvasdam pestes. ut animorum, ita corporum ab astris immitti, Poetae ab inferis: Homerus hujus modi perturbationum causam in Aten rejicit, nonnulli Pani Deo simile qviddam tribuunt. P. Bertii, Cosmographi Parisiensis Regii, de Aggeribus et Pontibus hactenus ad Mare exstructis Digestum novum, idqve Parisiis 1629. ap. Joan. Libert in 8 v. maj. impress. rarissimus est liber, et Historiarum profanarum diligenti scrutatoriae aeqve necessarius, ac Hermanni Hugonis de Re militari Libri, qvos mutuatos saltem per aliqvot dies pro virili perlustravi, et ex iisdem observavi, vix ullum eruditorum virorum sine horum librorum ope e Graecis Appianum. Dionem, Dionysium Halicarnasseum, Herodotum, Pausaniam, Polybium, Strabonem, Thucydidem atqve Xenophontem; e Latinis vero Caesorem, Curtium, Florum, Livium, Nepotem atqve Tacitum, commode posse interpretari. Nec undiqve est obvia

Henrici Stephani Anthologia diversorum Epigrammatum Graecor. veterum in septem Libros divisa, et ann. 1566. in fol. min. mundo papyro ac nitido typo publicata. Qvanqvam ferme omnes Libri, qvos Stephanus, AIdus, Commelinus atqve Plantini excudi jusserunt, simili modo prostant. Qvi in adornandis Actis Eruditorum Lipsiae sunt occupati, sunt inprimis excellentissimi Dnn. Professores de Facultate Philosophica, Alberti nimirum, Menkenius, Heshusius, Fellerus, Rechenbergius, Schmidius, Cyprianus, Pfauzius, Dicelius, Ernesti, et fortassis alii Viri docti plures qvos inter Carpzovium Senatorem novi. Dicunt illustrem Heroa a Seckendorff cum Freysteinio, Secretorum qvondam [gap: Greek word(s)] Leucopetraeo fidelissime merito, Membrum esse hujus Societatis eruditae primarium ac potissimum; Menkenium autem acerrimi judicii et indefessi studii virum, dirigere et in ordinem redigere, qvicqvid prelo est committendum, et publicae luci dandum: Hannekenii et Phasiani, Oratorum atqve Philologorum Gissensium Programmata olim mecum communicata perlegi studiosissime, et qvia placuêre mihi, vellem, ut illorum posem fieri particeps. Multa utilia paucis in se continent, qvae multi per plura neqveunt exprimere. Uterqve, nî fallor, B. Jo. Cunr. Dieterici, qvi Antiqvitates Biblicas neqvaqvam spernendas edidit, auditor fuit diligens. Suntne Haberkornius atqve Mislerus, Theologi celeberrimi, nec non Tabor, JCtus inclutus, atqve Tackius

Medicus, cui nupsisse filia Lotichiana dicitur, adhuc in vivis, et qvalem spartam jam exornat Nitzschius, lepidum illud ac curiosum, Fellerô judice, caput? Plura, scribere dolores calculi prohibent. B. V. HEKELI mellitissime, et omni prosperitate cum casta tua Costa aeviternum fruere. Scribeb. Cygneae d. 23. Decembr. Anno 1682.

P. S. Speciatim Vos salutat chara mea Uxor, et pro transmisso munere debitas mecum gratias agit.

LXXIV. Reichenbach/ HekeLIDae noVVs ô CVrrat faVstIssIMVs annVs! Oro ego: sors persta prospere porro rata!

Qvo Voto, etsi brevi, ut felicem hunc Annum auspiceris, initium ad Te scribendi mihi sumere placuit, mi Carissime. Idem et ut, post tantum malorum pelagus emensum, nobis contingat tandem, mecum DEO supplex fies. Mihi etsi periculi a DEI flagello per DEI gratiam cum meis. exsorti; molestiae tamen et damno non fuit exiguo commerciorum illa prohibitio, obsessioque viarum. Qvid faciamus? Feramus supernam hanc castigationem, et emendemus vitam, ut laetiore posthae

fruamur tempore. Exemplaria Heilbronnerianae Epistolae, abs Te olim heîc editae, qvae â me rogas: diu enim haberi non potuerunt, et ego superiori anno Exempla pro Amicis qvaesivi, sed frustranea opera. Ebelium peste sublatum nosti, reor. Vidua superest cum filio majore natu, qvi tamen abest jam. Henr. Septimellensis ad typos descriptus est, sed nondum Notae. Utinam Magliabechius alterum ejus libellum de Virtutibus mitteret, ut una excuderetur, unoqve titulo; qvo mihi in Notis opus est maximê. Exscribetur typis, DEO dante, statim atqve ego absolvero, Lipsiae, curante Carpzovio, qvi promisit. Solatio fuit per elapsum huunc Annum, qvod Dresdâ, Gerâ literas, et libellos nonnunqvam acceperim, qvibus a solitaria vita taedium aliqva excussi. Accepissem longe plura, si per obsessores viarum et avarissimos tabellarios licuisset, damnum qvod feci hoc anno 50. thaleros facile excedit. Multum pecuniae ex oppidis vicinis huc missa fuit, de qva nos de Schola homines ne [gap: Greek word(s)] qvidem accepimus, excepto, qvod Ampliss. Dn. Hahnius, argenti nonnihil peculiariter ad me misit. Lues, DEI beneficio, remisit plurimum. Et sunt, qvi suas aedes recolunt. Qvid Tu inter im egeris, et qvid novi hinc inde acceperis, vellem longissimis me literis doceres, meqve exhilarares. Qvem ad Maglia bechium addidi his literis fasciculum, velim per Wolfium tuum cui has cum Sal. Plur. tradas, in Italiam dirigas. Unicum Exemplar Carminis Peiskeriani in

tuas Nuptias rogo. M. Jacobius Ossitio misit hanc schedam, qvam vides, ut Tecum communicarem. Salutat Te plurimum, et qvid rerum geras, ex me qvaerit. B. V. et a me meaqve cum Tua Costa carissima salve. Dabam Cygn. d. 14. Jan. 1683. qvo suspiramus!

LXXV. Reichenbachium. VIR Nobilis et Clarissime, Amice fidelissime atque aestimatissime.

Licet praesentia tua omnino grata, tot facta nos aliqvando invisendi spe frustranea, hactenus frui non potuerim; tamen laetor vehemens, qvod constans mihi faves, et iterum iterumqve muneribus chartaceis bellariisqve dulcissimis benignus me exhilaras. Et sicuti pro his beneficiis cum uxore, filio et filia magnas Tibi et Mariae tuae percharae ago habeoqve gratias: ita et tuus, dum vixero, magnus, non tamen ingratus, qvemadmodum typographus Ebelius, debitor manebo, cujus nomen qvidem ex Tabb. Creditorum tuorum vix expungere poteris. Si scivissem, qvod Tibi hactenus ad nos veniendi nullum datum fuisset otium, ad Te jampridem voluissem scribere, qvoniam ab Excell. L. Fellero nostro nunc certior sum factus, qvod Rectoratum Scholae Trivialis Reichenbachensis,

cui summa cum laude et non sine gloria nominis tui, jampridem laudati ac clari, semper praefuisti, cum Pro Rectoratu et Eloqventiae professione Illustris Scholae Provincialis Schwarzburgicae; qvae est Rudolstadii, sis commutaturus. Provide, qvid facis, vide, et fistulae dulce canenti aüres non statim praebe. Mundi perversissimi atqve falsissimi blanditiae multos incautos qvoditie inescant. Nec inter verba millia, qvae magni atqve pollentes Patroni corruptissimo ac pessimo hoc seculo nobis dare solent, vix tria. vel decem vera sunt. Adulatio atqve veneratio qva tanto honore indignos atqve viles homines tanti viri saepissime excipiunt, longe freqventior ac major est ipsâ promotione ac omnibus beneficiis. Qvarumlibet rerum statum, praesertim scholasticum, mutare velle, maxime est proclive; mutare in melius pleruraque difficillimum. In Scylam incides, qvi Charybdim vitare vis. Qvi procul a Jove, hunc procul esse a fulmine reor. Et valde sum dubius, qvin salarium largissime Tibi promissum fortunam tuam meliorem qveat reddere; inprimis si illud qvemadmodum multis in locis saepissime proh! confieri solet, sexcentis lacrymis Tibi esset emendicandum, totqve maledictis; qvae collectores turpis lucri cupidi saepenumero evomunt, accipiendum. Reichenbachium a divitiis nomen vere habens, etiam Te ditare potest, si anima tuae atque aeternae saluti qvam omnibus mundanis gazis atqve vanitatibus praeferendam nosti,

sit utile ac commodum. Accidentia enim, ut vulgo appellamus, ipsis tuis concivibus affirmantius, ibidem ferme qvoditie permulta sint et egregie larga, salarium tuum futurum cum omnibus forte Accidentibus longissime superantia. Et melius est absolute regere, qvam conregere et imprudenter regi. Dicis unum et alterum e Collegis tuis Tibi esse invidum, qvi bonum illud, qvod solidâ Doctrinâ ac temperatâ disciplinâ tui in DEI gloriam ac Reipublicae literariae emolumentum ac commodum es promoturus, qvotidie sunt impedituri, et sic Te et nomen Tuum clarum mendaciis atque calumniis, a qvibus nemo et nihil est tutum apud homunculos nullius teruncii ac pretii immerito perstringunt. Hi certe nihil proficient mendaciis ac calumniis suis; etiamsi audacter ut communiter ferunt, aliqvid semper inhaereat. Catuli sunt, qvi latrant saltem, et rarentissime mordere, qvamvis velint, possunt. A Molossis Tibi cavendum, qvi in Regum atque Magnatum domibus libera liter atqve opipare educantur. Hi rarentissime latrant qvidem, clanculum vero atque inopinanter non sine magno dolore mordent, et famam insontium, qvos odêre, crudeliter discerpere atqve dilaniare student. Sed fiat hoc in negotio DOMINI voluntas, qvae et tua erit, et, crede mihi, mea sit. Propempticum mittam, qvando eris cum DEO abituriens. Sed qvid Tibi consuluit illustris Seckendorffius, Heros prudentissimus, longeqve inposterum prospiciens, qvem in hac re forte consuluisti?

Rectoratum Stadensem ab Excell. M. Joh. Weissio, Prosessore Gissensium amplissimo, Tibi serio, ut ipse legi, oblatum recusare non debuisses. Isti non sine magna gloria per multos annos praefuit magnificus vir, Diecmannus hodie Superintendens Ducatuum Bremensis atqve Verdensis Generalis Regius Svecicus. An autem Doctorali axiomate is sit insignitus, cum ignaris ignoro. Is uti, Hamburgensibus illum commendantibus, vir sit consummata eruditione ac multâ virtute mansvctudine inprimis atqve modestia praeditus: ita Te successorem suum non serviliter, ut saepe amat fieri, tracta verit, sed in omni necessitate paterne Te adjuverit. Tales enim viri, qvi diu in Scholis latuêre, norunt optime, qvae mala saepe iniqve premunt miseros de schola homines. Et esset optandum, ut qvilibet Scholae Inspector prius in pulvere per aliqvot tempus scholastico se volutasset, anteqvam altius surgeret, tunc scirent optime, qvibus iniqvissimis Fatis Praeceptores persaepe expositi essent. Ast experientia nunqvam fallax nos docuit, qvod multi, qvi e Schola in Ministerium Ecclesiasticum sunt vocati, sui ordinis osores proh! extiterint. Si Patavium Patini tui consilio in Octavii Ferrarii cathedram subvehendus Te contulisses, imprudenter egisses, et extra conscientiae periculum ac persecutionis gravissimae tela non fuisses. Et recte Te deterruit nobilissimus D. Schroeckius, Augustinus, magni Parenttis ex asse haeres, cujus nitidam eruditionem atqve

velificandi promptitudinem in curandis nostris in Italiam literis, Spizelius noster candidus aeqve qvam Tu, mi candide HEKELI, laudavit. Hunc Virum vitâ longaevâ in publicos usus ac omni observantiâ dignum, ut cum Spizelio Müllero atqve Magno, Theologis et Philologis piis et praestantibus ex me peramanter atqve officiose salutes, qvantum possum, peto. Interea dolet mihi maxime, qvod abitum e vicinia paras, qvi Te Vicinum fincerum atqve oportunum, sicuti hactenus per integros sedecim annos Te habui Amicum vere candidum, usqve ad ultimum vitae meae halitum habere sum arbitratus. Peto et hoc unum, ut, qvocunqve loco vixeris, mei meorumqve, qvi semper Te colent, ac nunqvam tui immemores erunt, optime memineris. Meibomio atqve Niemeiero, Academiae Juliae decoribus insignibus, salutem asscribo decentem. B. V. et res tuas prospere gere. Dab. Cygn. d. 3. Aug. 1683.

LXXVI. Reichenbachium. Praecellens et Clarissime DN. HEKELI, Amice singularis.

Mitto jam Carmen [gap: Greek word(s)] , illubens qvidem et non sine lacrymis vere innumeris; toto tamen pectore, fudi. Optassem enim, ut in vicinia apud nos mansisses, qvo in summa ac summo taedio varioqve morbo plena senectute

mea, vel compellatione tua grata, vel literis tuis semper mihi acceptis me nonnunqvam recreare atqve exhilarare potuisses. Qvo longius a me abis, eo rarius ad me scribes, qvi hactenus vicinus ob assiduos atqve pul verulentos, uti scripsisti, labores tuos Scholasticos, qvibus duplicatis atqve concatenatis nunc demum eris expositus, literis tuis rarenter me dignatus es. Demandata enim Tibi eloqventiae Professio, qvae Orationes cogitato ac studiose in venire, simili modo disponere, accurateqve emendare postulat, credas velim, efficiet, ut vix coenare atqve dormire potueris; cum primis si Programmata de curiosis, jucundis, lepidis atqve utilibus materiis diligenter, purê, limate et prolixê, ut hactenus fecisti laudabiliter, scribes. Qvod ego nunqvam, etiam junior, facere potuissem, etiamsi annis singulis sexcentos aureos mihi qvis voluisset solvere qvoniam tale studium, qvod cum Historico utilissimum ac maxime arduum inter humaniora atqve politiora esse opinor, totum hominem ab omnibus aliis taediosis studiis, Scholasticis inprimis, liberum atqve immunem. reqvirit. Sed qvomodo qvaeso, mi HEKELI mellitissime a laboribus Scholasticis poteris esse immunis, qvando Pro Rectoratu, assiduis qvippe atqve undiqve alias insolitis laboribus, uti Catalogus Lectionum publicarum et privatarum Tecum communicatus affirmat, plenissimo una sungi Tibi erit necessum? DEUS adsit Tibi immensa sua gratia, viresqve largiatur validas, ne laboribus

nimiis, licet hactenus fueris alacer et vegetus, ante tempus succumbas. Interea vade bonis avibus, et ante tuum abitum diligenter cura, ut per tuum Godofr. Wolfium, bonae indolis atque aperti animi adolescentem, vel per Paulum Kalbskopffium, five Rosenlecherum, Mercatores Reichenbachenses modestos et literatis apprime faventes, mutuum literarum nostrarum commercium ex voto promoveatur, fiamqve propediem certior, qvomodo illustri Seckendorfio, cujus os pium et doctum basiare aveo, mutatio tua placuit. Epistolas MSS. ob antiqvitatem partim et raritatem partim ob elegantiam atqve doctrinam, lectori inprimis erudito ac candido praeclare se commendantes, Agricolae np. Isleb. Aldi, Oth. Becmanni, Calixti Par. Capitonis, Joann. Crellii, Croci, Geieri ad Bulaeum, Friderici et Jo. Friderici. Elector. Sax. Gerbellii, Gerhardi Par. Graueri, Eobani et Joannis Hessorum, Casp. Hofmanni, Hubmeieri, Justi Jonae. Kirchmanni, Lipsii, Lutheri, Melanchthonis, Mellerstadii, Menzeri Par. Caroli Miltizii, Mosellani, Pacei, Parei Fil. Peutingeri, Mich. Piccarti, Pirckhaymeri, Pontani, Rhenani, Rofini, Ruperti, Abrah. Schönbergii, Sayleri, Selnecceri, Soneri, Wigandi, Spanheimii, Stabii, Stifelii, Venatoris. alio cumqve plurium, qvas Te possidere omnino novi, Tuqve tales gazas jure mecum maximi facis, lubens libensqve videre voluissem, si commodo tuo id fieri potuisset. Verum qvia ob multas causas, qvas protulisti, hactenus fieri non potuit,

acqviesco excusatione tua et benevolo, qvo in me es, animo, et ut hunc semper mihi serves, peto. Qvas olim mecum perlegendas communicasti, easqve a Jo. Arndtio, Gregor. Bruckeu/ Bugenhagio, Franc. Burgarto, Carolo Gustavo, Sveciae Rege, Ulr. Hutteno, Frid. Monavio, Andr. Osiandro, Melch. ab Ossen, Axelii Oxenstirnii, Palladio, Pappo. Petr. Piscatore, Sim. Pistoride, Georg. Rakoci, Principe Transsylvaniae, Rorario, Rosenbachio, Sigismundo Augusto, Rege Poloniae, Oth. Sperlingio, Adolf. Vorstio, Steph. Wildio et Joann. de Witt summa cum cura scriptas, indemnes, ut scis, remisi, et ex omnibus, qvod tantorum Heroum atqve Virorum [gap: Greek word(s)] careo, literarum ductus feliciter sum imitatus, modo ut habeam qvo, si opus, dignoscere qveam veras literas a supposititiis, qvae saepe pro veris circumferuntur. Tuae omni fide omnino sunt dignae, qvod omnes adhuc vel ipsis sigillis, vel certis atqve manifestis illorum vestigiis, ubi sigilla desunt, sunt exornatae. Sed concludendum. Nam ad Hannkium, et Pomarium, viros qvos nosti, clarissimos nobisqve amicissimos hodie qvoqve sunt scribendae Vratislaviam literae. B. Vale et M. Schindlero Lignitiensi nostro, qvem Balduinus de novo qvoqve eximie laudavit, ex me amanter saluta. Imo saluta etiam verbis nostris charissimam tuam Conjugem, MARIAM, et valete itetum iterumqve ex voto. Dab. Cygn. d. 8. Octobr. Ann. 1683.

Qvo vicino ego vix fruitus, discedere, Amice,
Tristor Te a nobis longius, HEKELIDE.
Causae lues fuerat, commercia nostra repellens,
Dira lues, studiis valde inimica bonis.
Tam procul ex animo, vetus est, abscedere amorem,
Qvantum oculis: de Te haud mens mea sperat idem.
Hinc memor usqve mei fatis proficiscere faustis,
Chare, Rudolphopolin, sic moderante DEO,
Atqve orna Spartae, qvam nactus es, orsa novellae!
Sic major famae laus erit inde Tuae.

LXXVII. Rudelstadt. CL. VIR, Amice Amatissime!

Ad humanissimas tuas qvod non respondi, tribues partim invaletudini meae, qvae studia mea diu remorata est ac suspendit, partim impedimentis tam domesticis ac privatis, qvam publicis. Nunc ut ad Te has darem, amor tui hoc imprimis imperavit, licet jam vix meus sim. Te hactenus ter gravissime aegrotasse, tristans intellexi. Causa imbecillitatis tuae sunt forte labores innumeri, ut et aer nubilis ac crassus, qvi circa loca montosa persaepe exoriri, peregrinosqve plerumqve infestare solet. Ut salvus inposterum valeas et vegetus, candide precor et voveo. Septimellensis Textus

tandem excusus est. Misi Magliabechio, ut cum MStis aliis conferri curet. Id ubi factum fuerit, statim et Notas cum Septimelli Iconismo jam in aes inciso et descriptione ex literis D. Cinelli addam, et sic integrum publicabo Opusculum; mittamque et iis, qvibus responsum diu adhuc debeo. Viginti sex chartas sua manu scriptas misit mihi cum aliis hinc inde nuper et olim editis libris, ut vix legere vacet mihi. Pollicebatur nuper qvidam mihi Exemplar libelli mei de amissis Radicibus, qvod tibi donaturus fuissem: sed nondum praestitit. Expecto adhuc dum promissum. Pedum dolores tumoresqve nondum plane abscesserunt; et vexat jam denuo me calculus. Treuneri nomen mihi hactenus incognitum fuit. Docebis de eo plura. Wittio per Te scribam, (nam aliam occasionem vix novi) ubi meus Henricus absolutus fuerit; qvem interea amice et observanter a me salutabis. ROMANUS noster fuit, qvi qvatriduo me junior erat. Ejus ecce Tibi Epicedia, a me raptim, cum non optime tum valerem, scriptum. Memorabilia Europae (*Ulmensia) valde desidero. Qvid novi mugineris, fac sciam. Clariss. Rectorem a me salvere jube. Ad ejus literas responsum parabo, qvamprimum licuerit. Tua ad Virgilium perplacent Mitte plura. B. V. Dab. Cygn. d. 18. Jun. 1684.

LXXIIX. Rudelstadt. VIR Clarissime atqve Literatissime, Fautor et Amice aestimatissime atqve mellitissime.

Qvae de B. Treunero, utpote cujus frater Theodoricus, in Franconia Ecclesiae Ephorus sit maxine laudabilis, mihi retulisti, notatu probe digna sunt. Et vellem, ut ad eum Bosii, Frischmuthii, Thomasii et Schraderorum Helmstadiensium literas, qvarum Tu jam possessores, describendas possem accipere, ut et de novo Camerarii atqve Gruteri omnes, qvas olim mecum communicasti. Nuper Generosus Seckendorfius, D. Gottero referente, maxime commendavit Altenburgi scrinium tuum insignibus Antiqvitatibus et plusqvam sexcentis rarissimis atqve pretiosissimis Epistolis MSSt. refertum, qvod ante tuum abitum e Variscia lubentissime, ac unqvam qvippiam perlustrare voluissem, si tempus et senium meum triste atqve obliviosum id voluissent permittere. Ex eo saltem schedulis nonnullis, qvaeso, Amice, me dones, qvas parvi forte ac flocci habes. Qvamvis noverim, talia omnia (etiam minutissima) Tibi aeqve, qvam mihi, pergrata et accepta esse. Jobii Cachomili de primorum Fratrum Litigio internecinio Elegia [gap: Greek word(s)] egregie placet. Librum Tibi gratum atqve perutilem, qvo carere possem, cum ea lubenter essem commutaturus, si tua fieret voluntate et commodo. Alias ramittam. Jam remitto cum annexis Politiam literariam Angeli

Decembrii, Mediolanensis Oratoris clarissimi, et qvidem cum magna atqve decente gratia et sine ullo, uti videbis, damno, imo et sine ulla macula. Gauderem, crede, gaudium, si possessorem hujus libri aurei me esses constituturus. Lubens pro eo, licet jam Eruditorum pauperrimus sim, sol verem vel tres nummos aureos, vel sex Joachimicos diversae sortis atqve speciei, qvos dilectus socer tuus Scharschmidius per Reichenbachenses mercatores tui causa adhuc omnia omnino cupientes, tuto Tibi transmittat, ne supprimatur pecunia, vel in alienas atqve rapaces manus incidat. Delector enim hoc libro non solum ob insignem, qva se commendat, raritatem, jucunditatem atqve utilitatem, sed etiam qvod Vossius Par. ipsam Politiam literariam; Scaliger autem, etiam Parens Egesippum atqve Plutarchi Moralia, imo et Eusebii aliorumqve Chronicon eruditissima atqve elegantissima manu sua undiqve eximie notarunt. Et ego vix Decembrio possem carere, qvando Zechendorfianum Gymnasium Notis atqve Animadversionibus aliqvando illustrarem. Pro Godofredi Weberi, Rectoris Berolinensis clarissimi, Miltiade atqve Programmate Rodigastiano magno aeo habeoqve gratis. Mihi utrumqve non displicet, et scire vellem, an caeteri Imperatores a jam laudato Webero, cui, si Tibi notus, ut et Rodigastio, officia mea ac studia candide qvaeso, offeras, simili modo essent publicati. Profecto esset Opus, qvod labores et lucubrationes Buchneri, Hildebrandi, Loccenii,

Reyheri, imo et ipsius [gap: Greek word(s)] qvondam Bosii mei, qvod omnibus aliis alias merito praeferendum arbitror, caeterorumqve omnium, qvi in Nepotem studiose qvoqve sunt commentati, ob singularem et probe excogitatam dispositionem, accuratamqve omnium observationum elaborationem longissime superaret. In Marchia vix ulli sum notus, excepto meo Becmanno, qvi Francofurti ad Viadrum Geographiam atque amoeniora publice profitetur studia. Lithio Oratori prorsus sum ignotus, ut et summo Strykio, qvem Tecum laudat tota Literatorum cohors. Culcitra pro Culcita invenitur apud Diomed. p. 313. qvae proprie est stragula plumis, tomento, vel simili molli materia farta, qvasi dicas culcata, qvia inculcatur. Dicimus et Culcitulam atqve Culcitellam. Donatus ponit in Paradigmatibus Verborum amantote, docentote, leguntote, audiundote, ferundote, suntote: proinde ac si idem sint cum usitatis amanto, docento, legunto, etc, Non autem reperies tale Imperativi Verbum apud Ciceronem, non apud Livium, non apud Plautum, non in toto Pandectarum Opere. Architrenius editus est Parisiis 1517. vel 1518. An Osiander atqve Wölflinus, Theologi illi Svevici cordati et conspicui, ut et Lauterbachius atqve Pregitzerus, JCti summi, adhuc sunt in vivis, noster Weisenbornius amanter Te salutans anxie scire desiderat. Qvid spei tandem de impetrandis Bibliothecis, Veneta np. ac Patavina, Tomasini impressis, neutiqvam, ut jam demum,

diligenter perlectis apographis, cum commodo meo experior, spernendis atqve rejiciendis? Haec ad tuas charas valde occupatus et multa cura atqve vigilia lassus. Vale, mi HEKELI, et salve a nobis cum Tua. Cygneae d. 3. August. 1684.

LXXIX. Rudolstadium. CL. V. JOHANNI-FRIDERICO HEKELIO, S. P. D. Christianus Daumius.

Ad Tuas qvae Sextia respondit, hîc capis heri allata. Memorabilia Ulmensia expecto promissa parcens inqvisitioni ulteriori simul et qvae ad Virgilium promittis. Famulo tuo (Danieli Arnoldo) significabis, me reperisse Distichon in Zuberi nonnulla Poemata Dan. Arnoldi, P. L. Plur. Rev. et Clariss. Wittio mittes Exemplar [gap: Greek word(s)] Hieronymianae, nam Dialogi de Trinitate nullum mihi jam superest integrum Exemplum. Illa Hübnerus a Typographo redempta tandem inter Segestria retulisse dicitur. Poenitet me unqvam aliqvid typis subjecisse. Alterum D. Söffingio trades, qvi concionem funebrem dono gratissimo misit, Vivant omneshi, et valeant. Singulis et Septimellensis Textummitto. Reliqva ubi excusa fuerint, superadditurus. Notas cum Praefatione ut conficiam et edam, exspecto Variantias aliorum

MStorum toties promissas. Sed miror, cum tamen Exemplaria per Burgerum missa acceperit, cur praeter mille gratias per Burgerum dictas, Variarum nihil mittat. At in Bürgerianis se fasciculum jam misisse, et mihi egisse gratias: Sed Burgerus eum se accepisse negat. Tractatum de nupera Solari eclipsi Guilie Imini per eum missam accepi. Prius Epistolam Norisii Consularem et qvartam partem Bibliothecae volantis. --- Tertiâm nondum vidi. Misi ad Spizelium per Magnif. Fellerum grandem fasciculum ipsi curandum. Sed nescio, qvum Fellerus ardenti febri per mensem hactenus decubuerit, an id factum sit. Vomini valet Homines. D. Reyheri Concio funebris non est excusa, nec excudetur. De Radd. amissis libello nondum potitus fui. Ob de bilitatem membrorum desideratam plagulam describere non potui, et vides senio manum vacillare, nec boni qvid etiam ad typos parare. Si alterius manu, et meâ elegantiori id posces fieri, prompte Tibi mos geretur. Epistola CLL. VV. ad typos nondum descripsi omnes. Lente omnia mea procedunt. KL. Sept. vesperi ex Museo descendens, alterâ manu lychnum tenens, alterâ libros, decidi de penultimo Scalarum gradu, frontemqve tribus laesilocis; et parum abfuit, qvin aut dextrum oculum, aut tempus contuderim. Servatori Summo ob conservationem sit laus dicta. Sic iterum octiduum studiis meis periit. Literas ad (Joann.) Schellerum vide ut cures, qvi fasciculum nescio an a Te an alio, cui

D. Söfingii concio, Schwimmeri Dispp. et Wittii Programma, qvibus plur. Sal. nuncupatis, inerat, ancillae meae affirmaverat, se cras reversurum qvem tamen reversum non vidi, nec scio, qvis fuerit. B. Vale et Salve dab. Cygneae postridie KL. Octobr. 1682.

LXXX. Rudolstadium. VIR Amplissime, atqve Celeberrime, Amice exoptatissime.

Sextiae misi responsum tuum forte ingratum, qvia 70. crucigeros pro Stobaeo, qvi inter Libros ad Te olim missos (ita me Christus amet) non fuit reperiendus, alias certo, ut semper omnia, eum Tibi misissem, jure non vis solvere, multo minus es soluturus 30. crucigeros pro Epigrammatibus Graecorum in 8v. a Scaligero eleganter versis, qvoniam ea, sicuti prius, qvam Tu vidisti, vidi, octo plagulis carent. Qvod prius in Catalogo indicare debuisset nostra Sextia anteqvam libros misisset, et pecuniam hoc pacto postulasset injuriâ. Qvis enim inter prudentes, qvaeso, HEKELI amantissime, libros mutilos ac mancos qvales duabus vicibus etiam ab ea, qvod mihi adhuc aegre est, olim tres accepi, et postulatum pretium proiis, defectum non statim observans, solvi, pro integris atqve indemnibus esset accepturus, et magno pretio redempturus; cum portorium aurigae nostro dandum saepe, ut nosti, etiam est magnum

ac maxime iniqvum. A tali taediosa librorum emptione hactenus sum deterritus, qvi communi morti propior, qvam vitae magis longaevae vicinus, Interea Sextia, cui triginta crucigeros residuos cum remisso Bielis libro, qvod eum ipse habes, qvam primum dabitur occasio, lubenter mitti curabo, omnino potest acqviescere, qvae et Maritus ejus, amicus noster communis, plus qvam ducentos florenos pro libris non semper ex voto compactis, elegantibus ac mundis per aliqvot annos a nobis rite acceperunt. Excellentissimus Fellerus noster resalutans laudat tuum studium atqve laborem, qvem in Cluverii Geographiam adhuc impendis, asseveratqve, se lubenter. Te juturum aut re, aut opera, aut consilio, si ei esset possibile. Idem Fellerus scribit, incomparabilem atqve excellenter modestum Praschium, etiam nobis faventem, ante aliqvot septimanas ex Ratisbona Lipsiam scripsisse, Adlerum, AEschingerum, Brosemannum, Grunewaldum, Kerscherum, Königsmannum, Krannöstium Seniorem atqve Lenzium, viros de Re literaria aeqve, ac publica gloriose meritos, pie, ac placide esse mortuos; vivere autem adhuc Jesaiam Feischelium, qvi solide sit doctus atqve candidissimus vir, ut et Jo. Leonh. Pauerum, rerum militarium, qvaeqve ad commune Publicum inprimis spectant, gnarissimum atqve exercitatissimum. Proximos autem atqve conjunctissimos sibi se jam habere Collegas Rupertum Schorerum, Gottlieb Wildium, Joh. Ludovicum

Donauerum, Jonam Paulum Sebaldum, et Jo. Jacob von Bergen/ viros qvavis virtute, polita eruditione ac innumeris meritis undiqve illustres ac claros. Georgium autem Elspergerum atqve Jo. Jacob. Fuchsium, nec non Joh. Albertum Steiningerum Consiliarios Reipublicae esse fideles et omni laude conspicuos. An autem Theologo et V. D. Praecones Evangelici maxime vigilantes cordati, Gruberus nempe, Widerus, Rüdius, Donauerus, Wonna, Zimmermannus, Balduinus, Mühlbergerus, Langius, Janus, Frenzelius, Pfaffreuterus, Saccus, atqve Eckenbergerus Ratisbonae omnes adhuc sint superstites, neqve noster Fellerus, neqve ego affirmare neqvimus. Hoc verum esse credas, qvod [gap: Greek word(s)] et vere DEO nobisqve charus Gottlieb Balduinus ex hac Ecclesia militante in aeternam triumphantem superiori anno non sine luctu multorum ex gratia sit translatus. Et haec est causa, qvod hactenus Ratisbonâ nil literarum accepimus. Utinam possem cum nostro Balduino qvoqve jam inter coelites degere! Omni labore, omni cura, omni odio, omni contemptu, omni miseria, omni calamitate, omni taedio, qvae me qvotidie premunt, ex voto liberarer. Ora pro me sene misero et Mundi fastidioso, mi HEKELI charissime, ardenter et qvotidie, ut mox beate dissolverer, et in atqve cum JESU nostro viverem. Ego vicissim pro Te diligens orabo, ut qvam diutissime, salvus et incolumis Literaturae et omnibus Bonis, qvi Te amant, prosis.

Qvis Ratisbonae sit Nierembergerus, me latet, nec novi, an junior Ursinus ibi sit promotus. Natu autem majorem etiamnum Gymnasii Poetici Rectorem strenue agere constat. Albertus Portner a Theuren, Literatorum Patronus et ipse literatissimus, jampridem Consiliarius Aulae Imperialis Vindobonae rite est constitutus. Spero eum cum Jona Schrimpffio Parente adhuc vivere atqve valere optime. Noribergae, ut melius, qvam ego, nosti, clarent inter Eqvestris Ordinis atqve Senatus nobilioris viros Behaimii, Dörreri, Füreri, Geuderi, Grundherri, Halleri, Harsdörferi, Holzschuheri, Imhofii, Kressii, Löffelholzii, Nüzelii, Paumgartneri, Pfinzingii, Poemeri, Rieteri, Schlüsselfelderi, Tucheri, Welseri atqve plures alii. E Gedanensibus Senatoribus incluti sunt Hevelius et Schuhmannus. E Literatis vero Schelwigius, Hoppius, Schulzius, Falco, Rosteuscherus, Titius atqve Bücherus. Botsaccum jampridem pie denatum arbitror. Reliqvit Bartoldum filium paterna vestigia ex asse legentem; Ulmenses Rothii in Holzschwang ac Baldingeri cum Veielio nostro; porro Nerolingani Gundel fingeri ac Haakii, nec non Svinfurtenses Fehrii, Praetorii, Hoefelii, Bauschii, Meltzeri, Heunischii, Bargeri atqve Crameri Tibi probe noti sunt. Ad caetera alio tempore, qvae ad Geographiam Politicam, rem qvippe utilissimam spectant. Naudaeus natus est anno hujus Seculi primo 4. Non. Febr. denatus autem ao. 53. d. 29. Julii. Seckendorfium nunc

adornare Historiam Lutheranismi dicunt. Qvot et qvales Epistolas MSS. cum Ejus Generositate nuper communicasti? Pro Memorabilibus Europae Ulmensibus debitas ago gratias, remuneraturus aliqvando commodo tempere, inprimis si qvid mihi erit, qvod Tibi delectamento esset. Libellum hunc nullus desiderassem, nî mentio mei atqve Bibliothacae meae in eo esset facta. Qvid spei de Decembrio, Rutgersii, et aliis a me desideratis libris istis, qvos tumulo vicinus licet; tamen lubens certo solverem! Pro Haereseologia Henric-Petrina B. Barthio dedi tres thaleros. Non Te poeniteat hunc librum rarum et utilem Te emisse, et qvidem viliore pretio, qvam ego meum. Generosus Schultzius mihi est ignotus, et ego ipsi. Ejus virtutes heroicas atqve felicissimam venam Poeticam, tersamqve Latinitatem Lipsienses Philologi optime commendant. Bene vale, Amice e paucis, et Claudio Arrhenio tuo, Sveonum immortali decori, me candidê commenda, atqve saluta ex me decenter Italos nostros, Magliabechium atque Norisium. Dab. Cygneae inter compellantium atqve alloqventium tumultus d. 29. Martii Anno 1685.

LXXXI. Rudelstadt. VIR Praecellentissime atque Celeberrime, Fautor et Amice exoptatissime atqve mellitissime!

clarissimos viros, qvos in Opere tuo Geographico dignissime laudare posses. Scito itaqve Hamburgi inter caeteros olim claruisse Comenium, Corfinium, Fogelium, Kirstenium, Mauritium, (Joh.) Müllerum, (Philipp.) Nicolai, Waltherum atqve Westermannum. Hodie autem ibidem, praeter nostrum Placcium et Dav. Klugium Tuum venerandum cum ejusdem filus, clarere Ankelmannum, Capellum, Edzardi, Haccium, Horbium, Lemmermannum, Lütkensium. Schultenium, Schulzios, Schaffshausenium, Uffelmannum et Wincklerum. Bremae famâ sunt insignes Gerhardus et Henricus Meyeri. Hic Consul est persplendidus, et Rei nummariae peritissimus; Ille autem illustris Gymnasii Rector Magnificus perpetuus. L. Mislerum, Gissensem, hodie Stadae Gymnasti Rectorem strenue atqve laudabiliter agere, non ita pridem Fellerus mihi retulit. Gryphis waldiae ego non sum notus. Scio autem, ibidem jam inter claros vivere Balthasarem et Henningium Theologos; Mascovium JCtum, Clemasium Medicum; Rosenovium, Loverwizium et Saalbachium Philosophos et Philologos. Freibergae vivunt adhuc omnino salvi et incolumes illustris Heros a Schönberg atqve Röberus tuus. Imo et Beyerus, Rabnerus atqve Liebius, qvi puritatis Latinae maxime studiosi sunt, et forte Tibi notissimi. Johannis a Feldens, JCti atqve Polyhistoris vere incomparabilis, Methodum atqve scientiam Interpretandi non solum in genere omnes

Orationes, sed et in specie Leges Romanas de qva scripsisti, perlustrandam etiam accepi. Placent mihi in primis ea, qvae ad illustrandam atqve probandam Latinitatem, Rhetoricesqve Praecepta commode applicanda spectant. Si publicae luci hic ut ilis liber aliqvando exponetur, omnino emam, et diligenter perlegam eum. Multa in hoc libro reperio qvibus Gymnasium Zechendorfianum auctius et splendidius, adjectis meis Observationibus, qvarum minime paucae sunt, aliqvando exornare possum. Mox qvoqve in lucem prodibit celeberrimi atqve modestissimi Praschii Lingvae Latinae Organon, de qvo judicium tuum et Praschio, et Fellero, imo et mihi neutiqvam displicuit. Illustris iste Praschius nobis per Fellerum promittis jussit exempla, qvando erit impressus liber, qvi laboribus meis. qvos in augendo ac revidendo Zechendorfii Gymnasio per plures annos impendi, et adhuc nonnunqvam, si qvid otioli (qvod tamen fit rarenter) commode possum surripere, diligens impendo, omnino erit utilis. Eum jam etiam adernare Dissertationem de L L. Latinâ et Germanica, Lipsiae fama et rumor est. An ita res se habeat, tempus nos docebit. L. Waltheri, Ephori Curiensis, Concionis funebris nondum sum factus particeps, alias misissem eam. Ejus Successor est Nobilis Francus a Waldeck dictus, cujus eruditio atqve morum svavitas a multis Variscis laudatur. Supremus Praefecturae Curiensis Satrapa est illustrissimus Comes a Ronoy et Biberstein,

eleganter est dictus, magisqve certe, qvam primo intuitu qvivis capiat. In homine enim avaro mens pugnat pectori, curisqve rerum coacervandarum contra suum intellectum, vitaeqve suae necessitatem et aestimationem homo vexatur. Qvaerit id avarus, qvod jam dum possidere se novit, neqve utitur tamen, cum splendidioris usus gratia comparaverit, pugnatqve videns sciensqve secum velut cum jam defuncto, dum intermoritur iis rebus, qvas ad vitam meliorem compara verat. Inimico igitur pectore Curis suis mentem indulget, odio se habens, ut delectet. Ab hac stultitia innumerae inter qvaerendum, tenendum, abutendum atqve amittendum Curae nascuntur ex Curis, nec adest homini, qvod intra manus est. Semper enim illud qvaeritur, qvod extra potestatem est, idqve ultra potius censetur, qvod citra curam est, ne infelici de suo labore tormenta desint. Conf. Barthius ad Claudian. 1099. b. An Osiander atqve Wölssinus, Theologi illi Svevici cordati et conspicui ut et Lauterbachius Par. atqve Pregitzerus, JCti summi, adhuc sunt in vivis, noster Weissenbornius amanter Te salutans anxie scire desiderat. Qvid spei tandem de impetrandis Bibliothecis, Veneta nempe ac Patavina Tomasini, impressis, iisqve neutiqvam, uti jam demum, diligenter

perlectis apographis, cum commodo meo experior, spernendis atqve rejiciendis? Nil novi est mihi, qvod scribere possem, qvam qvod Wolfg. Ferberus, Praefectus Plaviensis gravissimus, nostri Doct. Ferberi frater non ita pridem, die 2. videlicet superioris mensis Junii, duas amantissimas filias, mediam et natu minorem, unam viduam, alteram virginem, felicissime una elocavit, qvarum prior, vidua nimirum Fischeria, D. Georg. Melchiori Widemanno, Medico Plaviensium experientissimo; altera vero Christiano Wilhelmo Grajo, Secretario Ducali Saxonico Isenacensi intimo, sunt nuptae. Hoc Exemplum sine Exemplo esse opinor, si illustres et principali axiomate exornatas personas sum excepturus. M. Dav. Schindleri, Ecclesiae Lignitiensis Marianae Pastoris vigilantissimi, literas a me otiosiore expectes. Amo hunc virum solide doctum et candidum vehemens, et aestimo eum, persvade Tibi, haud parvi. Si ad eum scribam, venerabilem Ejus Claritatem ex Te salutabo. Si cum Joh. Andr. Smidio, Philosopho Jenensi eximio, colis amicitiam, illi me, qvaeso, commenda. Curiosa et polita sunt, qvae hic vir clari nominis in publica cathedra hactenus ventilavit. Vale optimê mi HEKELI, et salve millies cum Tua a me atqve Mea. Dab. Cygneae d. 13. Julii Anno 1685.

LXXXII. Rudolphopolin. S. et O. Clarissime et Carissime DN. HEKELI, Fautor et Amice magne et nunqvam reconciliate.

Te saepenumero graviter aegrotare, et corporis imbecillis tui constitutioni atqve valetudini ob concatenatos atqve labores scholasticos, qvibus nos ambo proh! sumus damnati, ex voto non consulere posse, illubens intellexi. DEUS, qvi animae et corporis oprimus est Medicus, ex gratia largiri velit, ut in posterum optima atqve prosperrima uti possis semper valetudine. Ego hactenus gravissime qvoqve laboravi capite, et incredibiliter sum vexatus calculi doloribus, ita ut saepissime optaverim, placide dissolvi, et cum Christo, a cujus dulcissimo nomine nomen meum nactus sum, vivere. Hi sunt fructus, qvos sert labor scholasticus, nempe plerumque uti adversa valetudine sive ut Gregorius Bersmannus ex ipsa experientia edoctus jamdudum apposite sic cecinit:

Gratia rara, labor certus, cum pulvere paedor,
Praemia sunt hujus certa magisterii.

Sed patienter ferre nos oportet, qvod in mortalitate hacce difficulter est mutandum. Chirographum Ebelii Typographi Tibi remitto, qvoniam ab ejus haeredibus, triti furfuris atqve nullius fidei homuncionibus, nec tuum, nec meum debitum hactenus exigere non potui. Wo nicht viel/ oder gar nichts ist/ da hat eibst der Römische Reyser das Recht verlohren. Ita fit, ut qvando talibus sociis in summa necessitate sub venimus auxilio, idem sit

ac si pecuniam nostram abjecissemus, vel perdidissemus. Remitto etiam non sine decenti gratiarum actione Annotata tua in Nepotem, Curtium et Ciceronis Orationem Philipp. V. ut et pro Archia Poeta. Placent omnia optime mihi aeqve qvam ista, qvae ad Virgilii Lib. IV. Georgicor. studiose ac nervose auditoribus tuis praelegisti. Ut famulus tuus Arnoldus in describendis lectionibus singulis sit diligens, fac cures, qvaeso. mi HEKELI, eumqve amanter ex me salutes. Desidero non solum Philologiam, sed et Phraseologiam atqve Gnomologiam, utramqve propriis et rei convenientibus titulis in margine exornatam. Nec erunt mihi ingratae imitationes, qvas, qvolibet capite absoluto, publice in calamum dictitas. Uteris methodo docendi maxime singulari, perspicua, polita atqve utili, qvali nemo hactenus, qvantum scio, vix sit usus. Laudandus es in hoc inprimis, qvod in Virgilianis Tuis, prelosonge dignissimis, nihil ex veterum atqve recentiorum. Ascensii videlicet, Servii, Taubmanni, Meyenii ac de La Cerda Commentariis, ut multi solent, et aliena pro suis insolenter venditant, exscribis, sed omnia ex diversissimis atqve rarentissimis Autoribus studiosissime colligis, collecta omnia fidelissime citas, eaqve, praemissa unius et alterius vocis harmoniâ Virgilianâ, sic ordinas et dirigis, ut et Eruditorum optimus ex arduo labore tuo delectationem ac commodum qveat capere. Haec candida ac vera mea censura est, qvam Momus ipse non potest

improbare. Perge igitur tali modo, et catulos ex incidia Te allatrantes non cura. Eris mihi et omnibus Bonis magnus Apollo. Qvaesivisti nuper, jocanus forte, qvid Bonus Vir sit? Respondetur: Est homo bonae frugi, justus, innocens, aptus, fortis, strenuus, magnanimus, oportunus, candidus, parcus et non liberalis atqve dissolutus, licet non sit literatus, astutus atqve callidus, sicuti potes hoc discere ex nunqvam satis depraedicando Angelo Decembrio tuo, qvem si ad alium transferes, et me ejus possessorem proprium non constitues, injurius eris in ipsius Literaturae autoritatem atqve eminentiam. Alias vocabuli Boni significationes optme discernuntur, qvando officii additur demonstratio: ut Bonus in palaestra, in jaciendis telis et sagittis, in Musicis, in capiendis feris, etc. Ectypus Nummi imperatorii aurei. Joh. Cratonis a Craftheim honoribus cusi, qvem Jo. Fridericus Nicolai, Philolopus praestantissimus et undiqve clarissimus Lüneburgô qvondam Tibi misit. omni veneratione omnino est dignus, et bene custodiendus. Nonnullos raros Nummos, multasqve Epistolas a diversis, inprimis autem a Te ad me humanissime perscriptas, jampridem mihi proh! est suffuratus meus qvidam infidelis famulus. Sic unum et alterum cum viris doctis literarum commercium mutilum ac mancum, qvod mihi adhuc est aegre, est redditum. Fasciculum clarissimo Viro. M. Joh. Müllero, Philologo insigni, inscriptum fideliter Altenburgum curabo, ut et eos qvos ad Carpzovium, Schmidium, Seebischium,

Kühnium atqve Egenolphum Dresdam destinâsti. Interea Tumeas ad illustrem Magliabechium nostrum datas rite qvoqve, ut semper facis, Florentiam curabis, et salutabis Spizelium, cujus in nos candor atqve velificandi promptitudo prorsus est singularis. Müllerus tuus hodie Altenburgensibus est summis in deliciis, et qvidem ob Orationes funebres, qvas, ut olim summe Rev. Mich. Christianus Ludovici atqve Caspar Neumannus, pvorum posterior nunc Vratislaviae verbi divini praeco est excellenter doctus, facundus atqve svavis, summo cum applausu haud infreqventer habet. Geigerum Altdorfii pie esse denatum, indubito noveris. Ejus successor, ut ajunt, erit D. Felix Spitzius, Ronnenburgensis Osterlandus, Erhardi Weigelii, Mathematici Jenensis undique clari et celebris, gener dilectissimus, et hactenus Ducalis Saxonicus Praefectus Alstedtensis gravissimus, vir Juris Civilis ac Publici gnarissimus, cujus B. Parens, qvi Ludo literario Ronneburgi laudabiliter praefuit, valde mihi, cum Gerae in aedibus Richterianis ex animi sententia viverem, amicus fuit et favitor. Huic viro nobili ac claro tantos honores meritissimo gratulor. Nobiliss. noster Koenigius, antiqvi pectoris senex adhuc est salvus, incolumis ac vegetus, et res suas peragendas strenue agit. Miratur magnopere, qvod a Te nullas hactenus literas accepit. Interim amanter Te jussit salutari. Vellem, ut habere possem omnes disputationes, qvae a Bosio, Frischmuthio, Sagittario, Schmidio, Schubarto ac Slevogtio Fil.

Jenae sunt impressae. Raro ad noc venit, qvi tales res, qvibus ego apprime delector, vendit. Caeterum obnixe a Te peto, ut mihi non succenseas, qvod Tibi maturius non respondi. Ad scribendas enim literas Latinas nunc senio confectus, multisqve morbis expositus, crede, sum pigerrimus, ut etiam ad alia, qvae prelo paranda olim sum meditatus, et jam nonnunqvam meditor. Gratissimum mihi erit, si in posterum semper ad me Germanice scribes, sicuti ago ad Te. B. Vale et Salve plurimum cum Tua et CL. Schwimmero, cui jampridem respondi. Cygneae d. 19. April. Anno 1686.

Coronidis loco annectere placuit Epistolam Consolatoriam ad Exc. Dn. L. FELLERUM, Profess. Publ. Lips. et Bibliothecar. ut et t. t. Rect. Magn. scripta De Beato CHRISTIAN. DAUMII obitu a JO. FRIDR. HEKELIO. JESUS! MAGNIFICE DN. RECTOR, PATRONE VETUS AC FAUTOR CONSTANTISSIME,

Qvem corpore non valemus recordatione teneamus. Et cum qvo loqvi non possumus, de eô loqvi nunqvam

desinamus. Sunt verba S. HIERONYMI, Bibliorum Latinorum Interpretis felicissimi, scripta ad HELIODORUM Eremitam, cum NEPOTIANUM, recens creatum et postridie Romae interfectum Imperatorem, insigni esset dignatus Epitaphiô. Qvae verba ornatissima gravissimaqve TIBI, FELLERE MAGNIFICE ATque EXCELLENTISSIME, sic reddidisti propria, ut Nobilissimi atqve Celeberrimi VIRI, CHRISTIANI DAUMII, Concivis atqve Praeceptoris Tui longe desideratissimi, utpote qvô cum, sic disponente DEO, per literas ulterius loqvi non potes, MEMORIAM ac FAMAM, ipsa aeternitate dignam, Elegiâ Tuâ publicâ, eâqve numerosâ ac nitide compositâ, ab interitu tristans vindicaveris. Ut autem hoc Christianae Charitatis filialisqve Observantiae opus intemerata Pietas, dum Mundi hujus systema stabit, sat praedicare nesciet: sic summi hujus VIRI Memoria semper erit haud ima TUA gloria, dum plene ac plane in TE, TIBI et mihi qvod gratulor, est relictuum, qvod DAUMIUS divinô in ingeniô suô olim tenebat reconditum. Accuratissima variarum Rerum atqve Linguarum cognitio, politissimaqve antiqvae Poeseos elegantia ac incredibilis Studii Critici subtilitas atqve sublimitas, qvâ DAUMIUS noster qvondam erat egregie exornatus, nunc penes TE haerebit, nec ullus in amplissimô venerandae Antiqvitatis Chorô ac Forô locus exstabit insignior, qvi TIBI dictu ac explicatu sit et videatur difficilis. Et hôc modô DAUMIUS noster non prorsus est amissus,

sed saltem praemissus, et qvidem in illam Academiam, ubi cum Evergetis, Praeceptoribus, Fautoribus et Amicis suis veteribus, Caspare Alexandrô nempe, Christophorô Arnoldô, Baltasare atqve Gottliebiô Balduinis, Caspare Barthiô, Sigis mundô Betuliô, Johanne Behemô, Jo. Andreâ Bosiô, Augustô Buchnerô, Christophorô Bulaeô, Josephô Clauderô, Sen. Georgiô Crauserô, Jo. Mich. Dilherrô. Joanne Fidlerô, Martinô Fogeliô, Christ. Fried. Frankensteiniô. Joanne Frischmuthiô, Joanne Gebhardô, Jo. Fried. Gronoviô, Jo. Henr. Haenerô, Jo. Ludovicô Hartmannô, Tobiâ Hausckoniô, Nicolao Heinsiô, Benedictô Hopfferô, Fridericô Kettnerô, Jo. Petrô Lotichiô, Jo. Sebastianô Mitternachtiô, Gottfriedô Oleariô Fridericô Rappoltô, Thomâ Reinesiô, Andreâ Rivinô, Joanne Schellerô, Sen. Joanne Sextô, Jo. Georg. Styrzeliô, Joanne Theiliô, Jacobô Thomasiô, AEgidiô Wildio, Joanne Zechendorfiô, pluribusqve Viris excellenter doctis ac literatis aliis, utpote cum qvibus heîc EI haud poenitendum literarum erat commericum, non opus habet ulteriore meditatione, lucubratione ac indefessô studiô. Versatur enim, ut verbis AUGUSTINI, Viri ingeniô acerrimi ac cujusvis Literaturae non leviter periti, utar, nunc inter Civeîs (upernos ac choros Angelorum hymnidicos, ubi a triste hujus peregrinationis labore redeuntium dulcis est solennitas, sine fine festivitas, sine labo aeternitas, ac sine nube serenitas. Qvanta autem sint in Coelis gaudia eminentissimis Angelorum choris interesse, cum beatissimis Spiritibus Conditoris gloriae assistere,

praesentem DEI cultum cernere, incircumscriptum Lumen videre, nullô Mortis metu atqve tremore affici, ac munere perpetuae incorruptionis laetari, nullam lingvam id dicere, nullumqve intellectum id capere posse, cum GREGORIO, multiplici eruditione vere praestante Episcopô, neqvaqvam vane arbitror. Si qvotidie, inqvit JOANNES CHRYSOSTOMUS, totius Terrarum Orbis. THEODORETO judice, eximius qvondam Doctor, oporteret nos tormenta perferre; si ipsam Gehennam parvô tempore tolerare pro eô, ut CHRISTUM videre possemus in gloriâ venientem, Ejusque Sanctorum associari numero; non erit dignum pariratione omne, qvod triste est, modo fugere, vel aversari, ut tanti Boni, tantaque gloriae participes haberemur. Et hôc aeternô gaudiô Angelorumqve consortiô non fruitur noster DAUMIUS propter insignem, qvâ erat instructus, Scientiam atqve Eruditionem, sed beatus est, ut cum AUGUSTINO denuo loqvar, propter solum CHRISTUM, qvi Passione ac Morte suâ vitam aeternam nobis, acquisivit. Nunc omnium mortalium Redemptor ipse, CHRISTUS JESUS, pulverem omnem Scholasticum, cordi imprimis ac animo vehementer noxium, a corpore suô, qvod magis honestis laboribus, qvam foedis voluptatibus, heîc consumendum putavit, omneîsqve lacrymas ab oculis suis omnipotente dextrâ suâ ex gratiâ abstergit, vivitque is in illâ beatitudine, ubi, CASSIODORO, multarum rerum autore. loqvente, sine aliqvô taediô manebit semper aeternitas. Ferreus itaqve

esset iste homuncio, et omni humanitate atqve misericordiâ exutus, qvi candidissimo Pectori indefessisqve studiis heîc prorsus fracto SENI isti hanc qvietem et recreationem esset invisurus. Summum enim Bonum summum laborem seqvi debere, ex LACTANTIO, lacteô, hoc est, disertissimô svavissimôqve ore Theologô, Eruditis notum esse firmiter mihi persvadeo. Qvae JO. LUDOVICUS PRASCHIUS, Ratisbonensium SCAEVOLA atqve Bojorum TIBULLUS, ut et GEORGIUS DANIEL MORHOFIUS, Kilonienfium TULLIUS atqve Cimbrorum MARO, cum utrôqve STüBELIO, JOANNE nimirum JACOBO et ANDREA, Viris Apolineis et propterea Musis ipsis amoenioribus associandis, in efficacissimum TUI solatium ob beatissimum incomparabilis DAUMII nostri obitum rite cecinerunt, mihi placent optime. Nec displicet illud Jambicum Melos, qvod CASPAR FIDLERUS, Rochlicensium Olor minime raucus, non solum nostro DAUMIO, sed et FRIDERICO HILDEBRANDO, Rectori Martisburgico incredibiliter merito, utpote qvi TIBI, MAGNIFICE FELLERE, ac mihi qvoqve maxime amicus fuit, moestus decantavit. Nec dubito qvin praeter GEORGIUM MATTHIAM KOENIGIUM, Altdorfinorum VALLAM ac Noricorum SUIDAM, qvem DAUMIUS noster, cum adhuc in vivis esset, constantem ac fidum suum ORESTEM qvi et meus DAMON est, meritissimo nuncupabat, plureis inter Literatos exstiterint, qvi tanti VIRI Famam ac maxima in Rempublicam literariam

Merita decenti elogiô exornabunt. Qvos inter inprimis erunt Valentin. Alberti, Paulus Bosius, Georg. Arnold. Bürger, Samuel Benedictus et Fridericus Benedictus Carpzovii, Fratres, Christoph. Cellarius, Jo. Augustinus Egenolfus, Christianus Funccius, Jo. Georg. Graevius, Georgius Reichard. Hammer, Christophorus Hendreich, Georg Caspar Kirchmaierus, Jo Fridr. Koeberus Caspar Loescherus, Jobus Ludolfus Ludolf. Georg. Lündenius. Anton. Magliabechius, Heinr. Meibomius, Dan Gviliel Mollerus, Jo. et Jo. Gotifr. Olearii, Fratres, Jo. Peiskerus, Jo. Praetorius, Adam Rechenbergius, Jo. Reiskius, Jo. Christoph. Rumetschius, Caspar Sagittarius, Balthasar Fridr. Salzmannus, Jo. Scheller, Jun. Bernhard. Schmid. Georg. Schubartus, Conr. Sam. Schurzfleischius, Jo. Seebisch, Jo. Philipp. Slevogt, Theoph. Spizelius, Elias Veielius, Jo Christoph. Wagenseilius, Christian. Weisius, David Winter, Henn. Witte atque Matth. Zimmermannus. Hi enim summum DAUMIUM nostrum partim, ut probe scio, aestimârunt plurimi, partim etiam Amicitiam, qvae omni Amicitiâ Scholasticâ, alias certissima atqve constantissimâ, videtur mihi multo certior, longeque constantior, cum EODEM ex voto coluêre literariam. Benevolâ atque amicâ recordatione qvoqve heîc DAUMII Manes plus vice venerabuntur simplici Justus Soeffingius, Abusverus Fritschius atqve Joh. Michael Schwimmerus, Viri pie ac solide docti et literato Orbi jampridem haud ignoti. Ego B. nostro DAUMIO perpetuae memoriae ergo multae doctrinae, multique beneficii ac candidae amicitiae memor debens ponere volui seqvens EPITAPHIUM.

HEIC. PLACIDE. DORMIT. CHRISTIANUS. DAUMIUS Ao. CHR. M. DC. XII. DIE XXIX. MARTII. CYGNEAE. HONESTIS. PARENTIB. NATUS DENATUS. AUTEM. D. XV. DEC. A. LXXXVII. EJUSD. SEC. QVEM. VERITAS. AC. OMNES. PII. QVI. NORUNT. EUM VIVAM. OMNIGENAE. SCIENTIAE. BIBLIOTHECAM INFALLIBILE. ERUDITORUM. ORACULUM SINGULARE. GERMANORUM. MIRACULUM NOBILISSIMUM. EXTERORUM. DELICIUM DULCISSIMUM. JUVENTUTIS. PHOEBEAE. SOLATIUM AC RARENTISSIMUM. PIETATIS. PATENTIAE. HUMANITATIS ATQ. CANDORIS. EXEMPLUM AEQVISSIME. NUNCUPARUNT RESURRECTURUS JESU. DUCE. AC. ANGELIS. COMITIB. IN. SEMPITERNA. GLORIA QVANDO OMNIS. SCIENTIA. HEIC. PRORSUS. INTERIBIT. AC. EVANESCIT. UMBRAE. INSTAR.

In JESU vale optime MUSARUM OPTIMUM NOBLILIORUM CORCULUM, et Res TUAS pro more gere feliciter! Dat. Rudolfopoli d. IX. Junii A. CHR. M. DC. LXXXIIX.

CHRISTIANI DAUMII EPISTOLAE LATINAE AD JO. FRIDERICUM HEKELIUM.

I. Altenburgum. (Upereudaimonei=n !

II. Altenburgum. S. P.

III. Lipsiam. Clarissime atqve Praestantissime DN. HEKELI, Fautor amicissime.

IV. Lipsiam.

V. Lipsiam. Clarissime atqve Doctissime DN. HEKELI, Amice opertunissime.

VI. Lipsiam. Eruditissime atqve Praestantissime HEKELI, Fautor et Amice oculissime.

VII. Lipsiam.

VIII. Lipsiam. Eximie, Praestantissime atque Doctissime DN. HEKELI, Fautor et Amice plur. colende.

IX. Lipsiam. amantissime DN. HEKELI, Fautor magne ac candide.

X. Altdorfium.

XI. Altdorfium. Ta\ a)gaqa\ a(/panta !

XII. Altenburgum. [gap: Greek word(s)]

XIII. Altenburgum. S. P. Clarissime Dn. HEKELI, Amice plurimum colende!

XIV. Altenburgum. Salve Praestantissime DN. HEKELI, Amice pl. dilecte!

XV. Altenburgum. S. P. Praestantisime Dn. HEKELI, Amice pl. dilecte!

XVI. Lipsiam. Salutem et Officia! Clarissime et honoratissime Dn. HEKELI, Amice honoratissime.

XVII. Altenburgum. S.

XVIII. Altenburgum. CL. Dn. HEKELI, Fautor et Amice plur. colende!

XIX. Altenburgum. Salutem Plurimam. Clarissime HEKELI, Amice svavissime!

XX. Glaucha. Salutem plurimam! Mi praestantissime Dn. HEKELI.

XXI. Glaucha. Salutem plurimam! Micarissime DN. HEKELI!

XXII. Glauchaviam. JESUM et ab ipso Feliciss. Novum ANNUM!

XXIII. Chemnicium. Sal. plurimam!

XXIV. Chemnicium. CL. DN. HEKELI, Amice amatissime.

XXV. Chemnitz. Clarissime. Dn. HEKELI, Amice amatissime!

XXVI. Chemnicium. S. P. Mi Carissime HEKELI!

XXVII. Chemnitium. S. P. Mi Carissime Dn. HEKELI.

XXIIX. Chemnitium. CL. mi Dn. HEKELI, Salve plurimum!

XXIX. Chemnitz. Mi HEKELI.

XXX. Chemnitium. P. S. Mi amatissime Dn. HEKELI.

XXXI. Chemnitium. Salve, mi amatissime!

XXXII. Chemnitz. CL. et Amicissime DN. HEKELI.

XXXIII. Chemnicium. Eu)dia/gein !

XXXIV. Chemnicium. PaX et MVLta saLVs per Laeto DetVr ô anno!

XXXV. Chemnitium. Ei)rh/nh kai\ plouqugi/eian !

XXXVI. Glaucham S. P.

XXXVII. Glaucham. Salutem et Officia! CL. atque Literatissime Dn. HEKELI.

XXXIIX. Glaucham, Amicissime Dn. HEKELI!

XXXIX. Glauchaviam. S. P. Amicissime Dn. HEKELI,

XL. Glauchaviam. JESUM Sub anni felicissime a Te transigendi Exordio!

XLI. Glauchaviam, (Upereudaimonei=n ! Mi amatissime HEKELI!

XLII. Glaucham. Ta\ pa/nta ka/llista. CL. DN. HEKELI, Amice sincerrime.

XLIII. Glauchaviam. Plurimam Salutem!

XLIV. Glauchaviam. Clariss. et Cariss. Dn. HEKELI.

XLV. Glauchaviam. Clarissime et Carissime DN. HEKELI!

XLVI. Glaucham. CL. Dn. HEKELI.

XLVII. Glauchaviam. Clariss. et Carissime Dn HEKELI!

XLVIII. Glaucham. Clariss. et Praestantissime Dn. HEKELI, Amice mellitissime.

XLIX. Glaucham. Clarissime et Carissime Dn. HEKELI!

L. Dresdam. Amicissime Dn. HEKELI.

LI. Dresdam. Praestantissime et Amicissime Dn. HEKELI.

LII. Dresdam. Clarissime Dn. HEKELI!

LIII. Dresdam. Se sIstat, toto et VIgeat paX InCLVta MVndo! Carissime HEKELI.

LIV. Dresdam. Salutem et Felicitatem a DEO! Clarissime atqve amantissime Dn. HEKELI, Fautor et Amice singularis!

LV. Clariss. HEKELI, Amice carissime!

LVI. Dresdam. CL. VIRO JOH. FRID. HEKELIO.

page 94, image: s094 S. P. D. Christianus Daumius.

LVII. Dresdam. Clarissime et Amatissime Dn. HEKELI!

LVIII. Dresdam. Clarissime DN. HEKELI, Amice integerrime.

LIX. Dresdam Amicissime Dn. HEKELI.

LX. Dresdam.

LXI. Dresdam. Salutem a Salutis fonte! CL. HEKELI.

LXII. Dresdam. Clarissime et Carissime Dn. HEKELI.

LXIII. Dresdam. Salve, mi HEKELI!

LXIV. Dresdam. CL. HEKELI Salve!

LXV. Glaucham. JESUM fidelissimum animae et corporis Medicum!

LXVI. Glaucham P. S. Mi Carissime Dn. HEKELI.

LXVII. Reichenbachium Clarissime atqve Celeberrime Dn. HEKELI, Fautor et Amice certissime.

LXIIX. Reichenbach. Clarissime VIR, SALVE!

LXIX. Reichenbach. Salve mi HEKELI!

LXX. Reichenbach. Salutem a JESU Salutis autore! CL. Vir, Amice Carissime!

LXXI. Reichenbachium Clarissime atque Praecellentissime Domine HEKELI, Amice probatissime atqve constantissime.

LXXII. Reichenbach Clarissime Vir, Amice Carissime!

LXXIII. Reichenbachium. Clarissime atqve excellenter Docte DN. HEKELI, Amice et Evergeta e paucis.

LXXIV. Reichenbach/ HekeLIDae noVVs ô CVrrat faVstIssIMVs annVs! Oro ego: sors persta prospere porro rata!

LXXV. Reichenbachium. VIR Nobilis et Clarissime, Amice fidelissime atque aestimatissime.

LXXVI. Reichenbachium. Praecellens et Clarissime DN. HEKELI, Amice singularis.

LXXVII. Rudelstadt. CL. VIR, Amice Amatissime!

LXXIIX. Rudelstadt. VIR Clarissime atqve Literatissime, Fautor et Amice aestimatissime atqve mellitissime.

page 94, image: s094
S. P. D. Christianus Daumius.