QUantum damni ex Parentum vitiis redundare soleat in liberos, et civitatem ipsam, experientiâ docemur. Non tantùm enim exempla Parentum scandalosa liberis nocent, sed et ipsorum negligentia in educatione maximè, et publicè perniciosa est. Et hîc verum est illud Poëtae:
Omne animi vitium tantò conspectius in se
Crimen habet, quantò maior, qui peccat habetur.
Quis verò in familiâ maior, quàm Pater, utpote Rex ac Dominus familiae? Operae pretium nobis visum est, in hoc libello communiora Parentum peccata et vitia, Lectori breviter proponere, et quàm periculosa ea sint Parentibus ipsis, filiis, atque Rei publicae ostendere. Faxit Deus, ut ex lectione huius Scripti aliqua in Rem publicam utilitas redundet.