PSALMI ALIQUOT MELISSO INTERPRETE.

PSALMUS I.

1. FELICITATES quis numeret viri,
Quem pes nec infert consilio impium.
Nec improborum calle sistit.
Nec cathedra locat histrionum?
2. Quin immo IOVAE lex animo illius
Summa est voluptas. Nulla dies abit,
Nox nulla; quin mens ruminando
Adsidue meditetur illam.
3. Hunc comparandum dixeris arbori,
Ad rivulorum rite toros satae,
Fructum ferenti tempore apto, et
Deciduis metuenti in algu
Comis videri. Quidquid et is facit,
Facit secundo numine. 4. Non ita
Gens perditorum; sed volucris
Gluma velut, paleaeve pulvis,
Cui dissipandae dant operam Noti.
5. Quapropter haud in iudicio impia
Faex illa consistet, neque olim
Plebs scelerum rea criminumque
Coetu in proborum congrege compotem
Locum tenebit. 6. Namque potissimum

Viam bonorum IOVA curat;
Sed peritura via est malorum.

PSALMUS II.

1. UT quid tumultu fervido stultae ruunt
Tot nationum saecla conatu irrito?
2. Reges quid orbis se arrigunt
Hostile coniurati, et optimatium
Consilia tendunt insimul
Contra IEHOVAM et eius unctum pessima?
3. Rumpamus, aiunt, vincula
Istorum, et a cervice densa funium
Adempta iactemus solo.
4. Caelicola risu, Dominus hos ludibrio
Sannaque postica excipit.
5. Tandem et tyrannos increpabit percitus
Ira, flagransque sic eos
Furore perturbabit: 6. Ego vero meum
Regem in Sionis verticem,
Sionis, inquam, sanctitatis qui meae
Mons est, inunctum chrismate
Inauguravi. 7. Num silebo? quin ego
Narrabo decretum DEI,
Ita me alloquuti: Filius carus mihi es,
Hodie ipse te genui pater.
8. Me posce. gentes faxo iure tibi dehinc,
Me dante, sint hereditas,

Finesque terrae sint tibi possessio.
9. Tu proinde virga ferrea
Istosce confringes, velutque fictile
Vas dissipatos conteres.
10. Sapite ergo Reges o, et erudimini
Terrae supini iudices.
11. Servite IOVAE cum timore debito,
Et cum tremore territi
Prae gaudio exsultate. 12. Suaviamine
Natum, ut fideles subditi,
Ne forsan indignetur, et media in via
Pereatis, ira tantulum
Illius incensa. BEati ter quater,
Quicumque confidunt ei.

PSALMUS VIII.

2. IEHOVA, noster Domine, tot rerum potens;
Tuum hoc ut admirabile et praenobile est
In universo nomen orbe;
Super alta vasti qui poli cacumina
Tuae extulisti decora magnificentiae!
3. Tu vel per infantum ora muta
Lactentiumque, propter adversarios
Oggannientes, robur ac potentiam
Fundasque confirmasque talem;
Ut hostem et ultorem retundas acriter
Coerceasque, vindicandi percitos
Furore diro. 4. Quippe caelos,

Opus tuorum Here digitorum, cum frequens
Collustro, per gyrum rotatos mobilem;
Cum Lunam eodem specto vultu
Numquam micantem, siderumque errantium
Vias, et astra fixa caelo, et ordine
Disposta per te, et arte mira:
5. Mortalis ecquid homo est, ut eius sis memor?
Aut homine cretus, inquo, ut cures eum?
6. Atqui creasti primus illum
Paullo minorem Diis Vel ipsis Angelis;
Tantoque honore, et dignitate et gloria
Tanta perornatum dedisti,
7. Ut eum tuarum super opera manuum inclita
Constitueris herum et administrum, cunctaque
Eiusce pedibus supposiris:
8. Non pecora solum quaequae, tam maiora, quam
Minora, nempe oves bovesque; sed quoque
Feras agrestes bestiasque.
9. Aves in uvido volantes aethere,
Piscesque in umido natantes aequore, et
Quicquid marinas sulcat undas.
10. IEHOVA, noster Domine, tot rerum potens;
Tuum hoc ut admirabile et praenobile est
In universo nomen orbe!

PSALMUS XXIII.

1. MEUS est IEHOVA pastor;
Nec egebo, nec carebo
Ope, commodisque vite.

2. Ut recubem quippe facit
Gramimneo in vireto,
Cupide allicitque labra
Ad aquae fluenta lenis.
3. Animum ille dat refectum,
Meque adeo iustitiae
Tramite ductitatum
Ob herile nomen, ingens
Et honore et aequitate,
Vetat uspiam evagari.
4. Ipse licet plena metus
Per loca, et antra dirae
Nigra mortis ambularem;
Mala nulla pol timerem:
Quia tute IOVA mecum es.
Suffugium grande mihi
Virga tua est pedumque.
5. Tabulam insuper dapalem
Nitide instruis parasque
Mihi, ad hostium meorum
Intuitus. Unguine dein
Balsamei liquoris
Tibi cura delibutum
Caput hocce reddere; exin
Pateram hanc inebriare
Vitigeno rore. 6. Quoad
Vixero, me sequetur
Utique expetita semper
Bonitas benignitasque;
Et ego incolam IEHOVAE
Tecta domus, longa inibi
Tempora agens dierum.

PSALMUS XLV.

QUALIS scatebras vivida limpidas
Eructat antro vena recondito,
Aut qualis ebullit crepantes
Ignea fervidiore flamma
Spumas aheno: 2. tale quid eggerit [Reg: egerit]
Mens prurienti pectore; sed bonum
Quod elegansque et laude dignum.
Rex mihi carmen erit melosque
Satis diserto. Lingua mea stilum
Velocis aequet prompta notarii.
3. Mortalium si pulchra visu
Pignera contueare natos,
Nae tute longe es pulchrior omnibus.
Perfusa dulcis nectare gratiae
Tibi venustae adfabilesque
Reddiderunt Charites labella:
Non ergo IOVA in perpetuum tibi
Favere nescit et benedicere.
4. Succinge, succinge acer Heros
Ense femur, tibi gloriamque
Decusque posthac qui pariat, bene
Rebus gerendis. 5. Atque ita prospere
Equester aurigansve sessor
Invehere, hac gravitate fretus,
Ob veritatis commoda publica, et
Mansuetioris iustitiae augmina.

En dextra pollens res docebit
Te tua mirifice stupendas!
6. Tuis sagittis ecquid acutius?
Has cerno ferri pectus in hostium
Regis, catervatimque sub te
Iam populos cadere eviratos.
7. Durans in omnes est solium tuum
Perennitates, o DEUS arbiter.
Sceptra aequitatis quisnam amabo
Sceptra tui neget esse regni?
8. Antiquius nil iustitia tibi est;
Nam vere amas hanc. Impietate nil
Mage exsecrandum; namque vere
Prosequere istam odioque et ira.
Quapropter et te laetifico DEUS
Olivo inungens, ille DEUS tuus,
Inauguravit prae tuorum
Conspicuum socium corona.
9. O vestium quae grata fragrantia,
Eburnei intra saepta palatii!
Stacten odoratamque myrrham
Et casiam redolent amoenam.
Voluptuoso talium aromatum
Nidore nares exhilarant tuas.
10. Regum inclitorum nonne natae in
Deliciis tibi sunt? at uxor
Ad dexteram adstat, fulgida praemodum
Ophirio auro. 11. Heus age filia,
Attolle ocellos, arrige aures.
Tradita sit tua gens oportet
Oblivioni, cum Lare patrio.
12. Exinde formae captus erit tuae

Amore Rex ultro: tametsi
Est Dominus tuus. ergo temet [(reading uncertain: print blurred)]
Demitte curvans cum reverentia
Olli [Reg: Illi] exhibenda: 13. Quandoquidem ipsius
Tuam quoque o Regina frontem
Muneribus Tyros alta, nec non
Ditissimi inter tot populos, sibi
Et demereri, et prout decet, ambient
Placare. 14. Totus splendor ecce
Contigit interiora natae
Regis; decorem nec modo purpurae
Segmenta, et aurum Barbaricum foris
Tam rarus ostentat paratus.
15. Vestibus in Phrygiis acuque
Pictis tibi, o Rex, Nympha potissimum
Adducta fulget. pone viragines,
Nymphes amicae, consequentes
Ante tuos oculos modeste
Sistuntur. 16. Illas non nisi gaudia.
Laetique ovatus, atque hilares chori,
Palatium intrantes puellas
Regificum comitant decenter.
17. Vicem parentum postmodo filios
Supplere cernes. hoc quoque principes
In universo clarus orbe
Constitues. 18. Memor ipse in omne
Aetatis aevum nominis ut tui
Narrabo famam; sic faciam, te uti
In saeculorum aeternitates
Concelebrent populi frequentes.

PSALMUS LXXXIII.

2. O DEUS, ne mussitato, neve ita obsurdescito,
Neu quiescito Potens.
3. En tumultuantur infandum et fremunt hostes tui!
En et osores tui
Efferunt caput superbum! 4. Callide contra tuum
Heu popellum sunt technas
Machinati, et actitarunt vafra consilia invicem
In latebricolas tuos.
5. Agite, deleamus istos, inquiunt, ne gens siet
Amplius, neu cui dehinc
Nomen Israelis ultra memoriae infixum haereat.
6. Cuncta enim uno animo simul
Castra, conspiratione facta et icto foedere,
Te petunt; 7. hostilia
Castra Idumes, et nepotium Ismaelis trux furor
Moabique, Agarenaque
Stirps: 8. Gebalque et dirus Ammon, proeliique Amalex amans:
Hinc Philistaei, et Tyri
Municeps. 9. Nec Assur atrox hinc abest, armorum eis
Parte coniunctissimus,
Prosatis Loto lacerti robore auxilium ferens.
10. His fac, ut Madianiis,
Utque Sisarae, ut Iabini propter amnem Cisonis;
11. Qui prope Endoris dati
Rura pessum, et putrefacti stercoraverunt humum.
12. Tracta eorum principes,
Sicut Orebum atque Sebum: tracta eorum omnes duces,
Ut Zeban et Salmunan.

13. Quippe secum dictitarunt: Occupemus o sibi
Quisque divinas DEI
Mansiones. 14. Utere illis, ceu rota volubili,
Mi DEUS, stipula aut levi,
Hinc et inde iactitata praepetis flatu Noti.
15. Qualiter lucum vorax
Ingruens comburit ignis, flammaque incendit iuga;
16. Sic eos raptim tua
DOMINE tempestate vexa persequens, ac turbinis
Territa tui impetu.
17. Vah! nefando reple eorum vulta [Reg: vultus] dedecore et probro,
Ut requiratur tuum
Iova nomen. 18. Erubescant prae pudore, sintque plus
Plusque post perterriti:
Contumelioso ad extremum obruti hinc opprobrio
Pessum eant turpissime.
19. Hoc modo ut passim patescat, cognitissimumque sit
Omnibus, quod tute, cui
Nomen ut IEHOVA soli est, sic et unicus clues
Toto in orbe Altissimus.

PSALMUS CXXVIII.

1. O TER beatum, quisquis amabili
Timore pectus corripitur DEI,
Nec defatigatur frequentes
Currere rite vias IEHOVAE!
2. Industriarum te manuum labor
Ditabit, almo commodus esui,
O une felicissimorum:
Prosperitas tibi summa cedet.

3. Desponsa taedis uxor, erit ferax,
Ceu vitis uber palmite gemmeo;
Quae fructuosis plena botris
Cingit herile domus lacunar.
Tenella carorum agmina pignorum,
Tamquam novella Pallade termites,
Laetante cingunt orbe pulchram
Mellifluae tabulae coronam.
4. En! nonne tantis vir metuens DEI
Repletur ample commoditatibus?
5. Felicitabit te IEHOVA
(Quisquis es) ex adyto Sionis.
Florentis ingens tu Solymae decus
Bonis abundans omnibus adfatim
Spectabis, effeto sub aevo
Quam tibi vita diu manebit.
6. Tu filiorum postmodo filios
Cernes, secunda sorte propaginem
Cernes, ut aeternata pax haec
Postgenitos beet Israelis.
PSALLMUS CXXXVI.
AD IOVAM laudandum vatis exhortatio. Divina potentia, et in Hebraeos benignitas, ex Aegypto in terram sanctam adductos.
1. CELEBRATE Iovam laudibus,
Reapse enim omnino est bonus:
Nam DEI clementia
Durat omne in saeculum.
2. Celebrate consentanea
Deum deorum gloria:

Nam DEI clementia
Durat omne in saeculum.
3. Celebrate Dominum aequissimum.
Dominorum honore debito:
Nam DEI clementia
Durat omne in saeculum.
4. Qui solus ipse maxima
Miracula in mundo patrat:
Nam DEI clementia
Durat omne in saeculum.
5. Qui fecit orbicos sagax
Mira arte caelorum globos:
Nam DEI clementia
Durat omne in saeculum
6. Qui dorsa terrae caerulas
Extendit ample super aquas:
Nam DEI clementia
Durat omne in saeculum.
7. Qui condidit clarissima
Duo magna mundi lumina:
Nam DEI clementia
Durat omne in saeculum.
8. Solem nitenti lampade
Praeesse iussum lucibus:
Nam DEI clementia
Durat omne in saeculum.
9. Lunam atque ceteras faces
Praeesse iussas noctibus:
Nam DEI clementia
Durat omne in saeculum.
10. Qui strage primitium omne trux
Adfecit Aegypti impiae:

Nam DEI clementia
Durat omne in saeculum.
11. Et Israelis posteros
Eduxit e medio illius:
Nam DEI clementia
Durat omne in saeculum.
12. Potente nimirum manu, et
Porrecto in altum brachio:
Nam DEI clementia
Durat omne in saeculum.
13. Qui sector in partes duas
Tethyn rubentem diffidit:
Nam DEI clementia
Durat omne in saeculum.
14. Mediamque per freti viam
Traiecit Isaci genus:
Nam DEI clementia
Durat omne in saeculum.
15. Et in mare algosum impulit
Pharaona et eius copias:
Nam DEI clementia
Durat omne in saeculum.
16. Qui transquiete per loca
Deserta deduxit suos:
Nam DEI clementia
Durat omne in saeculum.
17. Qui feriit ingentes premens
Magnis tyrannos cladibus:
Nam DEI clementia
Durat omne in saeculum.
18. Qui colla nobilissima
Regum necata olim dedit:

Nam DEI clementia
Durat omne in saeculum.
19. Seona regem, fortia
Qui sceptra Amorrhaeum tulit:
Nam DEI clementia
Durat omne in saeculum.
20. Grandique mole corporis
Ogum, caput Basanidos:
Nam DEI clementia
Durat omne in saeculum.
21. Terrasque eorum regnaque
Heredio nostris dedit:
Nam DEI clementia
Durat omne in saeculum.
22. Heredio haec (inquam) suis
Servis Iacobidis dedit:
Nam DEI clementia
Durat omne in saeculum.
23. Qui, cum foret serpendum humi
Miseris, memor nostri fuit:
Nam DEi clementia
Durat omne in saeculum.
24. Nostrisque nos digne adserens
Eripuit adversariis:
Nam DEI clementia
Durat omne in saeculum.
25. Qui victum et alimentum omnibus
Praebet benigne animalibus:
Nam DEI clementia
Durat omne in saeculum.
26. Fortem ergo caelorum DEUM
Celebrate summis laudibus.

Nam DEI clementia
Durat omne in saeculum.

PSALMUS CXXXVII.

1. MAESTI sedentes ad Babylonidum
Ripas aquarum, fudimus uberes
Cadentium imbres lacrimarum,
Davidicae memores Sionis.
2. Stirpes saligni, quos ea plurimos
Uliginosis nutrit humus toris,
Ramos onusti forte nostris
Pensilibus citharis, querelas
Et eiulatus turpiter exulum
Sensere. 3. Tum queis [Reg: quibus] gaudio ovantibus
Abduxe captivos Hebraeos
Dulce erat, at miseris molestum
Valde, supra quam sit pote dicier,
Ob luctum acerbum. nos modulaminis
Iucunditatem flagitarunt.
Eia agite incinitote nobis
Sioniorum quid modulatuum.
4. Quonam ore, quanam fronte aliquod melos
Iovanum in ora cantitare
Hac alienigenum sciamus?
5. Oblivioni si mihi traderis,
Quondam vigentum flos Solyme urbium;
Hanc dexteram oblitam canendi
Experiar fidibus sonoris.

6. Lingua haec palato tristis adhaereat,
Nisi et recorder sponte tui, et meae
Caput supremum praeter omnes
Laetitiae Solymen adorem.
7. Nefas Idumaeum o reminiscere
IOVA ultor, illo quod Solymes die,
Vastate, vastate eruendo
Omnia, qua libitum est, ad usque
Fundamina urbis; non veriti sient.
Acclamitando farier. 8. Heus tamen
Immane devastanda rursus
O Babylon scelerata: Felix,
Qui talionis reddere praemia
Tibi est paratus, qualia praeferox
In saeviendo et dira nobis
Non sine clade ieris repensum.
9. Felix, tenellos qui tua pignera
Natos prehensos, more solens tuo,
Allidet exsperso cerebro
Ad rigidae fera saxa cautis

PSALMUS CXLVI.

1. ANIME mi lauda IEHOVAM.
2. Laudabo IOVAM, vivere dum datur:
DEOque cantabo meo,
Quam diis futurus heic [Reg: hic] sum.
3. Nolite niti principibus, neque
Ex homine nato; quem penes

Nulla pol salus. 4. Is hercls
Cum spiritum efflat, inque suam redit
Humum cadaver; illius
Bella quamvis cogitata
Momento eodem dispereunt simul.
5. Felix abunde, cui DEUS
Fortis ille Iacobidarum
Potenter auxilio est, itidemque cui
Spes reposita est certissima
In DEO suo IEHOVA:
6. Qui non Olympum tantum, et humum, et mare;
Sed vero in his quaecumque sunt,
Condidit sapiente nutu;
Qui servat almam perpetuo fidem.
7. Qui IOVA ius iniuria
Reddit adfectis; cibumque
Famelicis dat, vinclaque compedum
Dissolvis arcta cruribus.
8. IOVA caecos lumine auctos
Illustrat. idem pondere sarcinae
Incurva corpora erigit:
Idem amat iustos. 9. Tuetur
Idem peregrinum obvius advenam:
Viduas et orbos patribus
Sublevat statuminatque.
Sed impiorum destinat et viam et
Pravum institutum evertere.
10. IOVA regnum sempiternum
Tenebit: ingens ille tuus, Sion,
Ab aevo in aevum aliud DEUS.