"METAS attigimus temporis ultimi,
"O REGINA. Brevi momine machina
" Perfectissima mundi
" Dissolvetur; et ignibus
"Arsuram metuet, quisquis in hoc solo
"Vitam maluerit degere perpetem,
" Quam sacraria mentis
" Illuc, unde oriens suum
"Duxit principium, dirigere in locos
"Vulcani rapidis insuperabiles
" Flammis. Aspice caeli
" Convexa; aspice siderum
"Lapsus. curriculum polliciti sumus
"Nobis pol nimio longius, ac vices
" Parcae ferre potes sunt.
" Fessis interitum omnia
"Praeportant elementa, et gemitu gravi
"Testantur subitos ponderis impetus.
" Vertentis tamen anni
" Errorem melioribus
"Emendare modis maxima Romulo
"Cura est Pontifici. Quid iuvat, orbitas
" Phoebi et menstrua Lunae
" Heu vestigia sedulis
"Observare oculis, et tamen interim
"Indirecta sequi? Scinditur undique
" In diversa popellus,
" Ignorans rationis, et
"Normae legitimae. IANE bifrons, viam
Fac rectam doceas, irremeabilem
Scrutantes seriemque
Annorum, et celerem poli
Gyrum: nam et veteris gnarus es, et novae
Aetatis. Redeant tempora Iulia
In fastos hodiernos,
Ne non aequidies, simul
Bino solstitio, certius ingruat:
Mensis quisque suis, ex memorabili
Urbis more, Calendis,
Nonis constet et Idibus [Orig: Eidibus] :
Ortus nec dubios astra habeant, neque
"Incertos obitus. Denique quos fidem
" Christi et iura professos
" Ipsum nomen ab Ethnicis
"Non uno indicio separat, invicem
"Ceu membra unanimi pectore menteque
" Iuncti simus, ad usque
" Lucis fata novissimae.
"At tu sive novi seu veteris libet
"Ritus picta sequi signa, ita vivito
" Immortalis ELISA,
" Ut quamvis tibi nemo sit
"In terra similis, sic animum tamen
"De vitae fragili consolides statu,
" Ut post pauca dierum
" Intervalla sonum tubae
"Credas Angelicae desuper auribus
"Illapsurum hominum. Talia qui cata
" Secum mente volutat;
" Faustis auspiciis novi
"Anni per superos cottidie frui
"Non istac in humo, sed Paradisiis
" Sperans optat in hortis,
" Dempto fine virentibus.
"TAM docta, et artis scita, celebrium
"Scriptorum in oris TEUTONIAE manus,
" Qualem videmus cum Pelasgos
" Tum Latios apud exstitisse,
"Queis cura texendae historiae fuit,
"Rerumque gestarum egregie et domi
" Forisque; si florens adaeque
" Praeterita viguisset olim
"Aetate: quantum res ea commodi
"Nostrae tulisset, quot bona, patriae!
" Quantis abundaremus actis!
" Quot monumenta ducum potentum
"Belloque et armis cernere, nec sine
"Plausu, liceret! quot modo proelia
" Commissa, pugnataeve pugnae
" Disposita in statione Martis,
"Aures ferirent magnanimis viris!
"Fragmenta solum, ac pleraque barbare
" Consuta nunc REUBERE restant;
" Vix quoque digna legi, nisi auctor
"Unusque et alter vel tacite insita
"Quodammodo vi pectora pertrahat,
" Fore asseverans, inter istas
" Ut paleas tenuesque glumas
"Inventa dent se grana aliquae optimae
"Frugis. Dolendum est, usque adeo suae
" Vixisse famae negligentes
" Teutoniae proceres vetustos.
'Atqui sat illis tunc erat, inclitas
'Gessisseres; ac strenua fortibus
' Ausis rudimenta, ut decebat,
' Militiae posuisse quondam,
'Laudis futurae sollicitis parum,
'Nec curiosis, post nigra funera
' Quid scriptitaretur nepoti.
' Quemque animo suus excitabat
'Honos, et ingens mentibus inditae
'Virtutis ardor, non nisi in ardua
' Scandentis, et praeclara (quoad quis
' Viveret) assidue minantis.
'Ut quisque magnam fuderat hostium
'Victor catervam, sic patriam ad dapem
' Contentus in praesens vel uno
' Saltem erat ille melo canentis.
"An non supinos arguerim, et minus
"Cautos Latinos, sicut et Atticos
" Cives; nitorem ac puritatem,
" Linguae urtiusque perire passos?
"Flos ille postquam concidit elegans
"Sermonis, et lolium immedicabile
" Insedit arvis; derepente heu
" Finitimas Aquilonis urbes
"Late occupavit Barbaries ferox,
"Hirsuta frontem, et dentibus aspera,
" Induta villosam lacernam,
" Oraque vincta gerens soloecis.
"Agrestis instar haec suis omnia
"Vastare tendens, ac ruere impetu,
" Quo non penitravit locorum?
" Quidnam age liquit atrox inausum?
"Ecquem fugit, quam turpiter ipsa-met
"Iura atque leges collutulaverit?
" Qua labe Celsi disciplinam
" Polluerit? Sophiaeque in artes
"Grassata cultas, mox etiam Iovis
"Sacrum profanans contemeraverit
" Impune? Quantum exstat malorum,
" IUSTE, notam opprobrii merentum;
"Haec sola eorum est causa. Quid attinet
"Culpare nostros? hanc satius feram
" Illuc relegandam, malum unde
" Ipsa pedem tulit, arbitreris.
"Quod corrigendum se patitur nefas,
"Non corrigamus legitime ac probe?
" Mutare si quid non valemus,
" Ferre animo decet illud aequo.
ARTIS Paeoniae scite et Hyantiae
POSTHI, tuque catae Iustitiae MODI
Inculpate sacerdos,
Vatum lumina dulcium:
Ecquonam exsequias carmine funebres,
Ecquae iusta piis Manibus optimi
MELLERI rear ambos
Persolvisse, madentibus
In praesens oculis? Cernitis, ut suis
Nil quidquam lacrimis [Orig: lacrumis] heu GULIELMIUS
Demat? nil sibi parcat,
Manans irriguis aquis,
Vel salsum Thetidis quae superent liquorem,
Ob fatum socii non reducis? Mihi
Pol rorantia largo
Fletu lumina adhuc rubent:
Nec cesso madidis PALMERIUM genis,
Phoebi delicium, et Pieridum decus,
Solis plangere in antris,
Illiusque abitum queri.
Hylen ah quoties Norida vocibus
Compello querulis! ah quoties sono
Lugubri cava pulso
Pegnessi vada caeruli!
Aut tu silva nigris abietibus virens,
Silvestresque Deae, reddite mi precor
Cultum reddite vatem;
Queicum saepius integros
Contrivisse dies haud nimium fuit,
Et rerum variarum innumerabiles
Expendisse figuras:
Aut Pegnesse meum mihi
Redde o PALMERIUM; redde mihi meum
MELLERUM; ingenio cui prope neminem
Indagare licebit
Posthac aut similem aut parem.
Nymphae vos memores estis adhuc; adhuc
Vos estis memores utraque ripa; vos
Flavae denique arenae,
Quas calcavimus hospitas,
Non quitis tacite non reminiscier,
Quo candore animi; queis studiis simul
Coniuncti fuerimus
Cultores Clarii gregis.
Cur suavi careo pectore? cur nihil
Praeter colloquium me penes est eo
Vivo, o Parca, relictum?
Doctae cur egeo manus?
Sic desiderium flebile ruminor
Absentis: sed enim sollicitus virum
Frustra luce reposco,
Frustra nocte reflagito.
Is vix Sequanicos liquerat angulos,
Rheno cum [Orig: quum] propior redditus, in tuum
ARGENTINA Tribossa
Se fessus gremium intulit.
Tum (nec longa mora est) Atropos hospiti
Vitalem immerito dissicit heu glomum;
Ceu falx mite virentis
Truncat Parthenii caput.
Heu quantum occubuit praesidium novem
"Musis! quale decus! Frigida quem semel
" Vitae pausa secuta est,
" Numquam in has rediet plagas.
At tu funeream succine naeniam
POSTHI, quam numeros Maenus ad Orthios
Factam ediscat; et udos
Te cantantem Elegos, MODI,
Auscultans Halius Cocchar in humidas
Solvatur lacrimas. Sentiat hos recens
Umbra in sede piorum,
Gratumque officium probet.
[transcriber: the text has 'GULIELMUIM', which, obviously, must be a misprint for 'GULIELMIUM']
EX QUO sacrati filium Apollinis
MELLERUM acerbo lanificae Deae
Fato nocentes sustulere, ex
Invidiaque odioque palmae,
Quam consequendam ex artibus entheis
Atque elegantis fetibus ingenI
Restare cognorant, nisi olli
Forfice praepropera scidissent
Abrupta vitae flamina: te bono
Iam litterarum gaudeo vindicem
Sollerte successisse dextra,
Ingeniique alacris vigore,
O GULIELMI, nobile Teutonae
Decus Lubecae. Non modo tu libros
Vertes Pelasgos diligenter
In Latiae genuina linguae,
Novosque apricans in bene consitis
Leges Dionae puriter hortulis,
Apis Matinae more, flores:
Verum etiam studio irremisso
PLAUTI vetustas, qua pote, fabulas
Terso nitori restitues, locis
Opem ferendo IANE mancis;
Tum mutilis Ciceronis alti
Scripta heu lacunis plena resarcies,
Fretus sagacis viribus indolis,
Industriaque intentiore:
Quam reliqui quoque ceterorum
Auctorum oborti per vitia obvia
Naevi obligato vulnere sentient.
"Quid dente obunco non vetustas
" Rodere amat cariosa? quid non
"Annosa turpat tristibus aevitas
"Referta mendis? Macte vicaria
Virtute, doctrinaeque multae
Congerie, o vitium resector.
Ut falce ramos demit inutiles,
Feracioresque inserit annuus
Frundator, et segnes recidit
Sirpicula reseces colonus:
Sic tu frequentum sphalmata codicum
Truncare, et errorem innumerum stylo
Auferre correctore tendens,
Aequius ac melius reponis.
Robigo per te rancida tollitur,
Quae paginam exest: per te itidem rudis
Squales, scabresque inculta limam
Asperitate abeunte sentit.
Duris salebris induitur nova
Cultura, ruri mundities decens.
Hunc tute campum litterarum
Assidue irpicibus fatigas.
Per te novali iam neque cardui
Surgunt, neque horrens ruscus, et hispidi
Vepres; neque hirsutis rubetis
Pullulat aegra seges per hortos.
Tu copiosae per dociles agros
Frugis repertor, non sterilem sinis
Regnare lappam caricemve,
Non filicem, aut paliuron hirtum;
Ac si qua porro de genere hoc lues
Arva occupavit Romula. Fallor, an
Te pestis Averruncum iniquae
SCALIGER indigetabit, ille
Europae ocellus SCALIGER, incluti [Orig: incliti]
Propago IulI Caesaris, ortum habens
Ab urbe Verona indirempto
Ordine, principibusque claris?
"O me beatum ter quater, huius in
"Aetatis aurum qui satus incidi,
" Cernoque florentes ubique
" Gentium Apollineos alumnos!
Quos inter augens tu tibi maximam
Iam comparasti laudis adoream,
Insignis EUMOLPI, tuumque
Nomen in Aonidum perenni
Templo sacrasti. Iam Genius viget
Perpes, laborum laetus erilium,
Spernaxque livoris. Quid ultra,
Dii Genio dare habent fruendum?
"NON in divitiis uberioribus
"Vita hominum, fluxis aut opibus, sita est
" HOMAGI; sed in modesta
" Quae deceant ratione agendi.
"Virtuti pretium prae reliquis magis
"Nobile debetur. Ne tibi sit Midam
" Aliquem beatiorem, aut
" Ducere Croesum opulentiorem,
"Ut sumunt operam lucrificabilem,
"Millia ni centum possidet aureum,
" Vel eo amplius. Quid ergo,
" Cui minor est modicis facultas
"Aut fortuna bonis, se petulantius
"Praetumido Pluto iactitet ebrium?
" Sapere illud est, honesta
" Posse modum mediocritate
"Servare, atque sua sorte per omnia
"Vivere contentum, nec nihili auream
" Facere eruditionem,
" Innumeros superantem acervos
"Gazarum Arabiae, et divitis Indiae.
"Ne, locupletatum se sciat oppido,
" Et opime inauguratum,
" Cui pretiosa adeo supellex
"Ubertim nitidarum affluit artium,
"Ipsaque divinae quem sapientiae
" Opulentat amplior dos,
" Ante alias prior expetenda.
"Hinc (ut nostra tulit semper opinio,
"Conveniens rectis sensibus) admodum
" Facili gradu venitur
" Ad nova amicitiae parandae
"Inter consimiles foedera mutuo
"Percutiendum, unamque ex geminis domum
" Faciundum, amore sancto
" Legitimis coeunte tedis.
"Natas nobilium nobilis ambiat,
"Patriciam ducat civis honestior:
" Legat institricem avarus
" Institor, et famulam minister.
Tu doctis, HOMAGI, cura sororibus;
Cui pater ipsis-met carus et antea
Fuit, audivitque praetor
Delicianus, amans honesti:
Thomam FABRICIUM, non sine prosperis
Auspiciis, nactus consocerum es modo,
Qui et ipse litteratus
Ecce cluet, patriaeque consul,
Nec non (ingenuum quod teres arguit)
Musicus haud contemnendus: ut interim
Mihi temperem Pelasgae
Prodere notitiam loquellae.
Huius rara viri filia dum tuo
CHRISTOPHORO nubit, numine sic Dei
Statuente, cuius aequa
Lance hominum stata ponderantur
Fata, et consilio subiacet unius
Coniugem amborum: non tibi gratuler
Soceroque filioque?
Atque adeo niveae REBECCAE,
Affinique manu, quantulacumque erit,
Vel tenui sortis praedita munere?
Equidem haud puto invidebunt
Tigna superba potentiorum
Hanc vobis gracili carmine gloriam,
Laude lacessitam nominis incluti [Orig: incliti] ,
Etiam omne (livor absit)
Post mihi perpetuandam in aevum.
"Non solum procerum florida verticem
"Cingere amat laurus: verum etiam boni
" Popularium bonorum
" Quondam hederas meruere nati.
"DIVERSA vitae negotia inter
"Et studia et mores, queis capimur, MODI,
" Haec grata cura est, posse doctis
" Naviter invigilare Musis,
"Rerumque causas originemque
"Elicere abstrusam; et nunc penitrare se
" In caelum, et astrorum meatus
" Mente animi; modo subter undas
"Terraeque centrum, modo extima ultra
"Caelicolum altorum templa reducere
" Sensus profundos, praesciaeque
" Fatidica ratione Sortis
"Arcana rimari; et intimarum
"Notitiam rerum prorsus apiscier.
Tu quid laboratae Minervae
Ingenio, aut operosiore
Molire conamine? In sacrati
Vertice Parnassi non puto somnias
FRANCISCE, nec condormientem
Endymiona sopore lento
In Latmii montis aemularis
Culminibus: Lynceis verum oculis pigri
Sollers veterni vela et umbras
Discutis, et nebulas volantes
Circum occupati labore magno
Palladii tectum numinis entheum.
Sic atra nubium notharum
Sol radiis fugat actuosis.
Tu lumen auctoribus vetustis
Ecce recens praefers, ac veteri novam
Splendoris allucere tendis
Rite facem Latiae loquellae:
Quali tibi anteisse claret acer
LIPSIUS, arguti praeditus ingenI
Acumine, orae (quantacumque est)
Belgiacae geniale sidus.
"Atqui quiete otioque abundas;
"Corda serenari queis liquido autumem,
" Rixae forensis litiumque
" Et strepitus vidua insolentis.
"ULLA si parabili
" Mortalibus cor afficit voluptas
" Gaudio, et Libentias
" Omnes fruisci Gratiasque donat:
"Veris hocce proprium est,
" Apriciori flore pullulantis.
' Vere nil amoenius
' Naturae comptrix elegantiusve
'Protulisse creditur,
' Opes tot inter divitesque cultus.
' Arbores regerminant;
' Herbae virescunt; pampinosque gemmae
'Hinc et inde trusitant,
' Ridente Baccho: spem dat amplioris
' Messis altior Ceres.
' Gaudent Napaeae parturire prata,
'Verna prata, et hortulos
' Extra urbem et intra. Personans Aedon
' Voce rumpit aera,
' Nullo dierum feriata, nulla
'Feriata noctium.
' Alauda gyro se rotans in aethra
' Crispulas amabili
' Melo vibrissat cantitationes:
'Scitulasque Acanthidos
' Minurrientis ore flexilingui
' Senticeta fistulas
' Mirantur ipsa. Solis ardor, ardor
Solis ille pristinus
Amore Daphnes inclutae [Orig: inclitae] puellae
Rursus integrascere
Visus. Calorem pulcher entheatum
Sentit ipse Phosphorus;
Tam mane, sudo mane, quam sereno
Vespere, ignea flagrans
Cupidinum vi. Taure tu micantem
(Ut solet) protervius
Ocellum in Europae obvios ocellos
Flecte, flecte quo libet:
SUSANNA sannae ne tibi esto, molli
Delicatior rosa, et
Coma tenella candidi ligustri.
Nescin hancce virginem
Desponsam in ulnas GOTFRIDI mariti
Alite haud mala dari?
Sic cana virtus optimi parentis
Matre cum piissima,
Soteropegae quos tenent renatae,
Suasit: idque numine
Dextro approbatum sancta matrimonI
Ius Fides habet ratum.
Quin ipse fauste lucidas pudicus
Ventilat faces Hymen:
Aspirat aura lenior FavonI.
Huc adeste, quos sacra
Vox copulavit. Praeviam Dionen
Planiore semita
Sequi memento sponsa: tuque Amori
Tam bono comes duci
Morem gere ultro GOTFRIDE, eque casto
Carpe flosculos sinu.
Tibi, tibi ver hoc novum auspicata
Luce siderum nitet,
Tuaeque nuptae. Si bene ominatur
Grex iugalium oscinum;
Felice teda coniugem peribis.
Ergo age Herculis modo
Virile sexus LIMMERUM propaga:
Macte; nec caduciter
Succumbe, cum [Orig: quum] te primulas ciebit
Sustinere gymnadas
Amans Cytheris mutui duelli.
Ut pater senex, anus
Ut mater hilari parvulos nepotes
Lumine intuebitur,
Nutrice mamma pendulos, racemorum
Instar, e domestica
Exhuberantum vite! Sola restat
Finis haec parentibus
Aevo solutis, haec quies senectae.
SCHECCI, retrusis in Sophiae viis
Versate multum, atque in penitralium
Secreta naturae Minerva
Et comite et duce, non inerti
Deducte cura: tune etiam mei
Felicitatem (sic HELICONIUS
Non erubescit praedicare)
Et Genii ingeniique laudas
Amasque, nullo promeriti licet
Pellectus oestro? tune reconditas
In mentis hoc artes recessu
Plus aliis, o acute, sentis?
Amo vicissim iudicii tui
Sinceritatem. sed nimium, cave,
Nobis (quod ultro praemonemus)
Attribuas. Mora nostra quamquam
In elegantum pegmate carminum
Usque occupata est; namque potissimas
Verbis struices ac geramus:
At vereor tamen, ut vetustas
Res aemulari sim sat idoneus,
Novisque fulgorem addere debitum;
Tam luculente et tam polite
Cum [Orig: Quum] niteat vetus illa vatum
"Structura.verum quo minus arduum
"Quid moliaris, pondere virium
" Probe ante consulto; quis ausum
" Iure aliquo prohibere possit?
Regum est, ad astra educere grandium
Molem laborum vasta palatia,
Arcesque non unis minantes
Caelitibus. mediocris instar
Ego architecti, non sine Daedalo,
Parvi sacelli condere fornices
Aggressus; ad quos, consecrata
Perpetuis IACOBE saeclis,
Suspensa amicorum incluta [Orig: inclita] nomina
Post fata vivavnt ultima: nil magis
Pol allaboro, quam quod aequum
AedificI specimen quadratis
Adorno pilis, illud ut arcuum
Clausis superne vel cuneum angulis
Ne lapset, incumbis solutis
Parietibusve; sed usque firmo
Duret coagmento, et laterum bases
Stent irretortae: nec tholus insuper
Nutet, nec adnixu gementes
Robora deficiant Atlantas.
Illud quotannis Phoebus, et agminis
Chorus noveni, non sine Pallade,
Precor frequentet; laureisque
Frundibus aureolisque sertis
Innexus ordo timpora Musicus
Paeana cantet. Tu simul hic [Orig: heic] tuum
Audire nomen ni recusas,
Baccare cinge virente frontem.
LYTTICHI, fratrum grege doctiorum
Macte, et artorum [Orig: arctorum] in numerum recepte
Pridem amicorum: quid habebo vestris
Scribere dignum
Auribus? quodnam rogo delicatis
Nobilis FUCHSI specimen Camenis
Venditem? cuius tua cura quondam
Pignora cultis
Litteris instruxit, et optimarum
Artium fontes liquidos recludens,
Cereae aetati documenta primis
Tradidit orsis.
Tu quidem mansura putas in annos
Nostra longinquos. utinam manerent
Plusculum saecli, neque tam perirent
Labe senectae,
Quam faba extrema sata agelli in ora:
Perpetes ausim tibi polliceri
Carminis luces, inibique carae
Nomina nuptae
Insimul comprensa, futuro ab aevo
Saepe lectum iri. Tua dulcis ANNA,
ANNA, quaestori face nuptiali
Perbreve tempus
Antea quae Roeschelio iugata
Vixit, et iam nunc thalamum secundo
Tecum init; priscos sibi Reiseleutros
Sanguine iunctos
Proximo numquam poterit negare.
SUABACUS verax, ditioque tota
SUABACO vicina genus peraeque
Laudat avitum.
Te sed in primis IOACHIMA VALLIS,
Et tuos fratres patrios alumnos
Iactat, argenti solidique dives
Vena metalli.
Quaque MONS ANNAEUS in astra celsum
Verticem tollit, Dryadum recessus;
Conscios sane indigenas adepti
Constat honoris
De perhumana sibi gratulari
Stirpe: quod non solum animum geratis
Candidum, verique adeo tenacem,
Sed quoque Musas
Atque Musaei studii colatis
Numen in tantum; prope nemo vatum
Ut Deas, pulchrumque ducem Dearum
Aut amet aeque,
Aut colat maiore fide. Quid ultra?
Non tuos mirer digitos GEORGI?
Organi docto quoties pererrans
Pollice nervos,
Excitas suaves modulos; vel ipsis
Qui Deis caeli dape gratiores
Accidant multo, et roseo beati
Nectaris haustu:
Ne novum terris Linon arbitramur
Tum revixisse, aut Thamyrae melodi
Spiritum, aut Amphionium canorem,
Timotheive
Mobilem audiri strepitum canentis.
Unica hac si tu celeber clueres
Dote, nec virtute alia Minervae
Praeditus esses;
Maxima pol laude fores ferendus,
Ac merereris modulatam ob artem
Inseri celso, pare cum venusta,
Clarus Olympo.
"QUOS Hippocrenes sitis bibendae
"Urit, ad hanc omni, qua pote, conciti
" Feruntur oestro. nil palato
" Prae Claria sapit Hippocrene.
Hac ipse (nam sentio) parumper
Ebrius, ad cantus nescio quos lyrae
Aspiro, et ingens ore quiddam
Hiscere posse humili, mihi ipse
Persuadeo, credulus Thaliae.
Tute animi fidens, haud timide MODI
Maiora conaris, nec uno
Plena satur lavis ora fonte.
Iam te latebrosa Nympha MAENI,
Liber et adiuncto cum Lare POSTHII
Miratur, haud potum, sed usque
Sobrium, et assiduae lucernae
Affixum: item te Dryas prope antra
COCCIA miratur, non sine Oreadum
Choro decenti, qua superbas
STYRMERIUS tenet usquequaque
Apollo sedes, et elegantem
Congeriem doctorum in pluteis locat
Mille et trecentorum librorum
Amplius. Hic [Orig: Heic] benefacta Franci
Laudas ERASMI, illiusque cantas
Laetus iter priscorum arva per Ausonum,
Et regna Celtarum; suosque
Incolumem reditum ad Penates.
Natalis horam annuam diei
Carmine festivo dum celebrare amas;
Tibique et illi se favore
Insinuat Genius benigno.
Haec inter oblitus haud es ipsum
FRANCIADOS culto dicere principem
Versu, peroptatum Camenis
Praesidiumque decusque, nullo
Tacendum ab aevo: neque es merentes
Immemor ECHTEROS sidereis poli
Aequare flammis. Pan quid autem,
Maenala Franciacis viretis
Mutasse dictus? quid ipse Daphnis?
Quid Beroe, nullo tacta Cupidine?
Neaera quorsus? Luciaeque
Effigies quid, Amorque sanctus?
Haec cuncta vivent, MODI poeta,
Tuque in eis vives, ut mea, qua flagro,
PALLANTIA aeternum libellis
Nomen habebit inauguratis.
Matura enim scripta vestra, quae non
Insubide luci dat stylus, oppido
Concinnus, aetatem necesse est
Ipsa ferant diuturniorem.
Macte esto virtute! iam coronam
Ipse tibi spondet Phoebus idoneam
Vivacis ex decore lauri,
Sive oleae, viridisve myrti.
Ex te (quod o utile et bonum sit)
Maxima quamvis est urbs alias, tamen
Grandescere hinc porro paternae
Occipient, tua vita, BRYGAE.
TILIA novum maritum
Philyreiae Camenae
Cingite. nam tilias virentes,
Tiliaeque florem
Quo nihil fragrantius,
Ut amavit ille semper;
Ita dignus hac capillos
Nectier, ante alios Diones
Et Adoniorum
Flosculos Cupidinum.
Tibi LIPSIS invidere
Tiliaceam corollam
Oderit, ad riguas Elystri
Sita iugis undas;
LIPSIS illa Misniae
Pretiosior smaragdus,
Et ocellus oppidorum,
Quotquot Atlantiaden benignum
Charitumque blandam
Gratiam experimini.
Tibi nemo iuniorum
SALMUTHE mensis huius
Delicias, et honesta festi
Ioca, nuptiali
Delibuta nectare,
Temerare; nemo temptet
Aliquid toro sinistri
Inserere, aut male nominatis
Onerata verbis
Fascinare limina.
Hera quin vocata nuptae
Zygia exhibere honorem
Talem amet, ut niveis rotundum
Manibus per orbem
Spargat alba Lilia,
Tumidissimis (ut aiunt)
Generata de mamillis,
Lacte mero per humum profuso;
Ubi destinata
Parvuli Herculis labra
Sator aetheris solique
Admosset entheatis
Coniugis uberibus, perennes
Bibitura succos,
Queis liquet Deos geni.
CATHARINA ades pudica, et
Prece caelites adora:
Qui tibi (quid dubitas?) in urbem
Patriam reductum,
Matre adhuc superstite,
Caput hocce sospitarunt,
Et ab ingruente quondam
Naufragio, rapidaque venti
Rabie furentis,
Per Ligusticum mare,
Per et alta dorsa Tusci
Pelagi, metum inter ac spem,
Incolumem Latio stiterunt.
Ut opimiores
Posset ille ab utili
Studio referre fructus;
Sibi monte Pessulano
Digrediundum, et in Italorum
Medicum Lycea
Maxime celebria
Statuit pedem inferendum:
Tulit unde non minorem,
Quam nitida e regione Gallum,
Titulum ac decorem,
Laudis incitabulum.
Age nunc adepte quidquid
Et erat super domandum
Viribus ingenii capacis,
Vigilique cura,
Quidquid et propagini
Modo deerat educandae;
Ita te geras, GEORGI
Maenigenis oriunde Francis,
Ut ab omnium uno
Ore rarus audias:
Neque enim maligna saecli
Patiere te (quod omen
Scaevum in aquas abeat profundas)
Sibi mancipatum
Vindicet protervitas.
"Bene res habet. Modestus
"Animus, decensque candor
"Non nisi quae merito probentur
" Agit: et decorum est,
" Hac senere gloria.
O IANE, ni te plus oculis meis
Amem, atque in ipso pectore gestitem;
Non Phoebum et illustres Camenas
Amplius experiar benignas.
Mite et verecundum ingenium tibi est,
Suavisque sermo, qualis Apollinis
Decere cultores; fidesque
Rara animi, placidique mores.
Thalia culti carminis addidit
Usum, et venustas Zeuxis imaginum
In te profectus, sive Apelles,
Pingere posse dedit figuras.
Ne quasque faustae commemorem indolis
Dotes; vel ipsa EMBLEMATA sint satis
Opinor exemplo futura,
Artificis monumenta dextrae
Perenne in aevum, nec minus ingenI
Sollertioris signa, per entheos
Deducta naturae recessus,
Et Sophiae locupletis artes.
Haec ipsa pulchris si LEPIDI tui
Poesis ornat versibus, o bonum
Factum! sed ambarum sororum
NICOLEAE mihi LOIDISque
Intexta si sint nomina, id optimo
Quin sit secundatum auspice, quis neget?
"Laurum meretur teste Phoebo
" Clarum opus, Aoniusque vates.
Tu proinde Musis care, et Apollini
Dilecte, posthac percelebrem, Comes
Quem do Palatinus, POETAE
O titulum gere LAUREATI.
QUID me Poetarum istiusce temporis
Et Musicorum principem
Vocare sumis? istiusce temporis,
Quo cuncta sic vigescere
Cernuntur, in tantumque honorem litterae
Passim bonae efflorescere;
Ut quotquot usquequaque perdocti viri
Germaniae illustrant scholas,
Quot inclutarum [Orig: inclitarum] vividum exornant chorum
Musarum, et artes vindicant:
Tot nominare MELCHIOR Reges queas,
Tot nominare Caesares.
Ad me quod attinere visum est; sic habe
Priscos quidem aemularier
Tentare me, sed assequi vix tantulum
Potesse. Pone me tamen
O LEUCORINE, pone me inter Barbaros,
At non ut omnem Barbarum:
Fortasse, caecos inter ut luscus, tibi
Rex eminere censear.
An principatum, praeter hunc, mihi arroges
Alieno ab arrogantia?
"LIBERTATIS amans, ac fidei tenax
"Semper IUSTE fui. quae duo si mihi
" Quisquam demere certet;
" Certet non modo sanguinem,
"In quo vita sita est, verum etiam Iovis
"Incrementum animam demere. Me quidem
" (Stat sententia) ad usque
" Extremum iuvet halitum
"Nil mutare; bonas sive malas ferat
"Sortes ambiguae lubrica frons Deae,
" Dispensantis iniquis
" Caecas arbitriis vices.
Tali me siquidem pectore praeditum
Cognosti, melicam dum chelyn increpans
Te sermone morarer
Apto, grandeque Principis
Laudarem facinus, pro patriae focis
Ultro Teutonicum proque fide caput
Obiectantis acutis
Circumquaque periculis.
Gaudebam (neque adhuc in tacito sinu
Tempestiva redux occulo gaudia)
Heroa esse repertum,
Qui se sponte tyrannidi
Opponens, famulum belligera manu
Nostris excuteret servitii iugum
A cervicibus. Ipsum
Bifrontem, arctaque cardinum, et
Postes cum supero limine et infero
Testes laudo, adeoque ipsa Penatium
Inculpata tuorum
O frater penitralia;
Adversus patriam non nisi quod pium est
Sensisse hunc animum, nec nisi idoneum
Recto voce profatas
Has fauces. Age si sciens
Fallo, dispeream; aut me Xenius gravi
Mactet supplicio Iuppiter, et malam
In rem saevus adaxit.
Verum istoc precor hostibus
Nostris sit potius, fas violantibus,
Quod sanctum esse iubet pensior aequitas.
Contra, numen amicum
Tu mecum experiare, qui
Musas hospitio munifico meas
Accepsti, et residem plus nimio moram
Aequa mente tulisti.
Idcirco Clariae Deae,
Quoad vivam, meriti haud immemores, mihi
REUBERUM celebri nomine concinent,
Aeternoque rependent
Dignas munere gratias.
"SIC constitutum est inter homunculos,
"Qui lucis usum carpimus irritae,
" Speremus ut RIBISCE rebus
" Cottidie meliora lapsis:
"Nec vota remur vana. sed in dies
"Peiora certant deterioribus,
" Ateque et infelix Enyo
" Congeriem duplicat malorum.
"Confusionem respice temporum,
"Et obligatas religionibus
" Mentes, et obscurata passim
" Fana superstitionis umbra.
"Quam discrepamus moribus invicem!
"Crudele quantum pectora sanguinem
" Haurire fervent! In quibus vis
" Regnat atrox domibus tyrannis.
"Quid multiformem perfidiam loquar?
"Quid fraudis astus et varios dolos?
" Quid monstra? quid saevum Gradivum,
" Aut furias memorem Gradivi?
"Parum relictum caedis erat truci
"Gallorum in ora, et limite Belgico:
" Diris amicum est Rhenum ad amnem
" Finitima regione tristes
"Produxe motus. Ut bene victitat,
"Tranquilla quem pax orbis in angulo
" Latere tuto, nec latronum
" Insidias sinit experiri
"Periculosas; nec nece territat
"Horrendus ensis, non minus imbibens
" Fusum innocentis quamde sontis
" (Grande nefas) animae cruorem!
"Horae sed instant fata novissimae,
"Summumque nobis accelerant diem:
" Mirumne, si diro furori
" Eumenides fera frena laxant?
O MODI, non est Genius locorum
Unus atque idem. sed idem Poetas
Numen ad certos agit incitata
Mente furores.
Impetum nemo potis est ruentum
Frangere, aut strictis rapidum alligare
Vinculis, postquam calet entheato
Pectore fervor.
Nascimur vates, alimurque vivis
Siderum flammis. Inhibere currus
Solis auratos temere ecquis ausit?
Ecquis Eoo
Tentet iniectare moram, aut Phlegonti?
Mittar ut Moschum rigidas in oras,
Aut iter carpam glacialis ultra
Aequoris undas,
Ultimae vel me vada falsa Thules
Hospitem acceptent: tamen orta mecum
Usque naturae propriae necesse est
Semina secter.
Hanc lyram, has artes (memini) decoras
Prorsus abiecturus eram, Themistos
Legibus iurique operam forensi
Pollicitatus.
Iamque me plenis mare per profundum
Ire plorabat Galatea velis,
Circii flatu. sed ubi relinqui
Seque Deasque
Praesides quondam studii sacrati
Cerneret Phoebus: quid inepte coeptas?
Inquit. invitane nihil Minerva
Non facere audes?
Sicne te primis docuere ab annis
Iussa suasoris veneranda Flacci?
Non vides, quanto pelagus periclo
Fluctibus undans
Nare ames? ne Scylla tibi et Charybdis
Otium turbent, rabidaeque Syrtes.
Noster es, nostrumque dehinc futurum
Spondeo Musis.
Sic ait, tangitque oculos. Ab illo
Tempore ardentem magis has in artes
Causa naturae, ratioque fati
Provida fecit.
Tu quoque invisos scopulos perosus
Barbarum, FRANCISCE, quietiores
Provocans Musas, tetricis valere ex
Tempore iussis,
Ludis; et seu te PABEPERGA amoeno
Detinet clivo, viridesque PYRGI,
Sive COMBERGI trifido frequentas
Calle recessus;
Nunc opus vivax Elegos recentans,
Nunc Maronaeum genus aut LucretI
Aemulans, horarum obitus perenni
Carmine fallis.
Nympha Rhegnessis tibi praebet aurem:
Proximant Maeni superi inferique
Accolae, nec non sinuosus arto [Orig: arcto]
Gurgite Cocchar.
Quippe tres amnes sibi promereri
Unius STYRMERIADAE favorem
Gestiunt, digno tua prosequentis
Carmina dono.
Me Palaecome putat esse quiddam,
Suspicit Noris, peramica fautrix
Omnibus, quotquot Clarias laborant
Scandere in arces.
Nil tamen magni cano: sed cicada
Quale paupertina sibi fritinnit,
Aethera et Solem medium fatigans;
Tale minutim
Carmen exili modulamur ore,
Et Poetastris similes putamur.
"Ast in hoc spretus placeo mihi ipse,
" Grande quod ultro
"Sorte contentus modica potentum
"Limen evito. Satis est, ubi olim
"Me trium mirata legat nepotum
" Serior aetas.
'NUSQUAM locorum vivere dulcius
'Fore aio, CRUSI, quam vel Achaiae
' In urbium ex cultis viretis,
' Vel maris Ionii per actam:
'Tutis liceret si modo in exteras
'Contendere oras hospitibus. Sed heu
' Sed hostis atrox Christiani
' Nominis, e Stygii lacunis
'Excitus Orci, vi superum, loca
'Longe atque late (proh dolor!) Hellados
' Impune grassans occupavit:
' Nec modo in ulteriora regna
'Sceptrum Otthomannum intrusit, et obvias
'Quascumque gentes depopulatus est,
' Deditque ferro pessum et igni;
' Verum etiam magis ac magis iam
'Nunc praedo nostrae Teutoniae imminet.
'Sic vultur uncis impiger unguibus,
' Rostroque inexpleto prehensum
' Lancinat alituum minorum
'Gregem, aut inertum quadrupedum genus
'Imbelle raptat, dilaniare amans
' Modo has, modo illas. sic cruentans
' Caulam ovium lupus immerentum
'Grassator audax, nil veritus canum
'Custodiam, adverso irruit impetu,
' Faucesque praemorsit misellis
Dente fero, horribilique rictu
'Evisceravit vellera. Queis age
'Queis nunc Athenis, qua Lacedaemone
' Aut qua Corintho, queisve Thebis
' Parca dabit mihi commorari,
'Ne culta priscae nomina Graeciae
'Mandasse dignis non memorer cedris,
' Gestasque res et clara facta
' Historiamque locis in ipsis
'Notasse veram, non sine testibus?
'Ne quicquam aventes talia fortibus
' Inquirere ausis, atque coram
' Oppida cum populo intueri,
'Deterret eheu triste periculum:
'Thracum Tyrannus nec patitur ferox,
' Humaniores ut per artes
' Tigrides Odrysiae imbuantur,
'Assuetae in armis quaerere gloriam, et
"Cruore tinctis aclidibus. Domi
" Sedetur ergo, totque tractus
" Cum fluviis, Asiaeque pictae
"Errore tuto per varium ambitum
"Lustrantur: et seu tempe Heliconia
" Imaginamur, sive Pindi
" Culmina, vel minitantem acuto
"Parnassum Olympo stare biverticem;
"Seu nunc Ilissi Cecropias aquas,
" Nunc Hippocrenen somniamus,
" Castaliive liquoris undas:
"Felicis aevi tempora laudibus
"Tollam necesse est, quo viguit fides
" Sincera, maiestasque honosque
" Constitit imperio Eoo;
"Nec non et almarum entheus artium
"Splendor refulsit, iam penitus (nefas)
" Fuscatus obscuris tenebris,
" Cimmeriisque sepultus umbris.
"Quid? absque libris esset idoneis,
"Ex queis vetustae fax Sapientiae
" Elucet: o quanta Camenis
" Utilitate foret carendum!
Exstincta linguae lumina Ionicae,
Caliginosis obruta noctibus,
Tu reddis aurae, clare CRUSI;
Reliquiasque atavum Pelasgum
Scituque digna abscondita Teutonum
Refers in orbem. Quae licet omnia
Iucunda lectu Christianis
Sint minime, quod ad hostem amarum
Resque occupatas pertinet; attamen
Ob posterorum saecula, cognitu
Insuave ne speres futurum,
Quidquid in historiae maniplos
Multa aggregavit laude vigil labor,
Messoris instar, torrida mergitum
Recolligentis, frugibusque
Horrea triticeis replentis.
Non his in athlis lumina pascitet
Germana pubes cum senioribus?
Non mentem abunde his institutis
Exsaturetur, Apitiasque
Pergraecitantum pontificum dapes
Reiectet his prae deliciis meris?
Sic nempe vivamus nepotes,
Ingluvie licita gulosi:
Vivamus, inquam, et quisque tuos libros
More heluonis luxuriosius
Voremus. Ecquaenam appetitum
Esca animi potior satullet?
DIONYSIAM puellam
Thalamo tuo iugandum
SITTARTE cantatura Musa,
Cui nomen est amabile,
Et amoribus iuventae
Peridoneum canendis;
Non Atticarum Achaidumve,
Nec Romularum virginum
Modulamina et sonores
Sibi poscit emulandos:
Sed Belgicarum, Sequanaeque
Nympharum amoena cantica,
Variabilesque voces;
Quibus ad choros vicissim
Festiva ducendos caterva
Sub Hesperi aspectum utitur,
Ubi sicca ridet aestas,
Rutilantiusque noctes
Splendent, sereno lapsae Olympo,
Stellaeque flammantes micant.
Memini, ac quidem libenter
Memini, recens in oris
Cum forte vestris hospes essem,
Quali voluptatis favo
Animum mihi irrigatum
Satiaverint Napaeae,
Quali medulla suavitatis
Aures mihi repleverint.
Ades huc canora turba,
Ades; et novo marito
Novaeque nuptae cantitato
Novum ad novi fulcrum tori
Hymenaeon. Inde cunctas
Veneres, Cupidinesque
Salesque cum iocis venustis,
Omnesque Gratias simul
Memora; Deosque cunctos,
Quibus ignis iste cordi;
Deasque cunctas, queis iugalis
Probatur in primis fides.
Nihil hic [Orig: heic] inauspicatum,
Nihil hic [Orig: heic] sit ominosum;
Postquam CAVELLATAE pudicae
Iam matrimonium est ratum.
Amet hic suam maritam,
Amet haec suum maritum:
Gignantque lecti pignera ex se
Fraterculos, sororculas.
Habeant bene ac beate,
Videantque se renasci,
In filiabus ipsa mater,
In filiis ipsis pater.
"STANTI in superno vertice montium, et
"Rerum intuenti lumine flammeo
" Subiecta, nativasque formas,
" Obvia cuncta velut patescunt,
"Quae copiosus Daedalea manu
"Mundi architectus condidit in bonum
" Commune: sic per templa mentis
" Enthea dispatianti in arvis
"Campisque latis Historiae novae
"Priscaeve, nil non fit manifestius,
" Quod scire fas est liberalis
" Indolis ingeniique pectus.
"Haec nempe testis provida temporum est,
"Lux veritatis, nuntia praepetis
" Aevi, recordandique facti
" Tamquam anima, atque magistra vitae.
"Exempla nos ex hoc speculo undique
"Desumpta miris erudiunt modis,
" Et ad capessendum laborem
" Ex stimulant animos, amore
"Virtutis: unde et quid fugias habes,
"Et quid sequaris. Te vigili assitum,
Dilecte REINECCI, lucernae
Hoc studium sibi mancipavit
Totum, Cleanthis more. Quid uspiam est,
Latere quod te possit? In abdita
Momenta rerum temporumque
Sic penitras, ut et illa in auras
Et publicum usum promere, muneris
Tui esse ducas. Iamque, operae tuae
Conamen, in lucem recentem
It CHRONICON Solymaeon; in quo
Se comprehensos (aspice) gestiunt
Manes Guelphi: principe quo genus
Claros Atestinum nepotes
Saxonicae in regionis oras
Cum laude summa transtulit, et ducum
Porro propagem sevit, ab incluta [Orig: inclita]
Brunonis urbe, et urbe Lunae
Nomina cum titulis gerentem.
Quid praedicem, quae tu bonus aurea
Vulgaris auctor scripta prius; quibus
Applausit exsultans Lyceum
Marchiacum, Viaderque flavus?
Aut quos dehinc te post Academia
Libros videbit IULIA publicis
Mandare prelis; non modo uni,
Sed (quod aves) mage profuturos
Saeclis trecentis? Macte animi bonis,
REINERE. Iam nunc se tibi Principum
Commendat ortus ceterorum,
Et subolis genitalis annus,
Classes in aptas distribuendus, ac
Concinniori, quam prius, ordini
Reddendus, argutos refulgens
Per numeros, memoresque fastos.
"O si meae quis tam cuperet lyrae,
"Nec concinendis laudibus impari,
" Nec forsan imbelli, tetrarcha
" Rexve potens, celeberque Achilles:
"Sudore quanto qualia quantaque
"Abstrusa rerum emergere niterer,
" Molemque suscepti laboris
" Non humeris tolerare iniquis!
"Sed rarus isto-c tempore fautor est
"Musarum, et artarum [Orig: arctarum] "ingenia premit
" Opum supellex. hinc dynastis
" Fama minor, minor et Poetis.
"FELICITATIS pars, CRATO, maxima est,
"Stratis quietis in patria mori,
" Partasque fortunas adulto
" Linquere post sua fata nato.
Iam fine laeta te superum manet
Conclave: iam te regia caelitum
Stellata praestolatur. Hic [Orig: Heic] tu
Seu maneas, abeasve civis
Supremo Olympi debitus ordini,
Seu more prisco pectora candidum
Mutatus in cycnum, beati
Flumina pura colas Phisonis,
Aut entheatos lacteolae viae
Petas liquores: te patrii Lares
Honore mactabunt; Viadrus
Suspiciet, referetque BRESLA.
Aulae potentum nec modo Caesarum
Regumque, florens quos tulit Austria,
Te sempiternis praedicabunt
Muneribus; sed et inclutarum [Orig: inclitarum]
Cortina Phoebi praesidis artium
Responsa quondam de meritis tuis
Dabit roganti vera, teque
Persimilem veterum, paremque
Sophis vetustis indigetabit, et
Extollet inter caelicolum choros
Supra beatas eminentem
Elysiis animas in hortis.
Nos (si quid istaec carmina polleant)
Cum fecerimus te similem Deo
Vates, et immortale nomen
Aeoniis titulosque templis
Inscripserimus: thure litabitur
Umbris Sabaeo. Filius audiet
Patri superstes consecrantum
Vota, animumque pium probabit,
Vocesque dignas, tuque adeo e poli
Tuos amicos vertice fulgido
Grandaevus aspectabis, atque
Participes fieri bonorum
Optabis aeterni ad solium Iovis,
Splendens smaragdo partim et iaspide,
Partim pyropo sardioque,
Nobilibusque aliis lapillis.
Atqui profecto iam videor tuos
Videre vultus, o CRATO, post quater
Senos senatores sedentes,
Aureolis nitidos coronis:
Qua flamma septem spirituum faces
Efflat flagrantes; quaque animalia
Bis bina TER-SANCTUM vocando
Ingeminant sine fine plausum.
Signatus o frontem inveniar typo
Sancti ministri, teque sequar stola
Candente velatum, et fideli
Palmea dona manu gerentem!
IULILLE mi Caesarcule,
Puelle matris scitulae
Primum Silesii poli
Sub axe in auras edite
Ad fluenta Viadri:
O cresce cresce parvule,
Patris voluptas et lepor,
Vigens tenella aetatula,
Praebensque signa acuminis
Non sine indole rara.
Ut pulcher horti flosculus
Colore candidissimo
Propinquiores herbulas
Pudore suffundit, pari
Haud honore nitentes;
Aut qualis aura Phosphori
Cum [Orig: Quum] mane se exserit novo,
Viciniores stellulas
Praestinguit ardentissimis
Solis aemula flammis:
Sic tu coaevorum gregem
Candore fidi pectoris
IULILLE vinces; et viris
Virtute claris splendida
Eminentior ibis.
Flos urbium Silesiae
Te Presla demirabitur:
Te diliget Constantia
Ocellus Acronii lacus,
Caelum ubi pater hausit;
Pater Camenis deditus;
Ipsisque amatus Gratiis:
Astraea quem leges sacras
Et iura docuit, et bonis
Evidentibus auxit:
Cui praeter Atticae sonum
Linguae, Latina trita ita est,
Primos ut aequet Ausonas,
Queis purus eloquentiae
Rivus imbuit ora.
Ad haec Iberum et Gallicum
Sermonem, et Italum, teres
Sic et rotundus exprimit,
Illis ut in regionibus
Natus esse putetur.
Quid, quod sonoris cantibus
Cum [Orig: QUUM] perstrepit symphonia,
Pars audit ille eius chori,
Melosque vibrans tinnula
Voce dulce fritinnit?
Quapropter exemplo patris
Incumbe in haec adultior
Studia, et laborum grandium
"Assuesce. Nil mortalibus
" Arduum est, modo tentes.
Te CAESAR ille Iulius
Dictator ad laudem excitet;
Vel nomine aequo SCALIGER:
Hic dulcium tuba artium,
Ille bucina Martis.
Fortuna te felicitet;
Genius secundet; sospitet
Salus, pusille IANIPOR.
Sic perge. iam te fama, iam
Te manet nova laurus.
"OBLIVIONI qui veteres dare
"Amat sodales, illum ego lividam
" Bibisse Lethen, et cicutas
" Cum blitea dape miscuisse
"Rea-pse tester. Quae tibi me dedit
Primum videndum culta Bononia,
Quae deinde grato iunxit usu
Urbs PatavI BADEHORNE utrumque;
Nos vindicabunt a fatuae Deae
Stupore, famam notaque pectora
Oblitterantis, candidaeque
Tesseram amicitiae receptam
Stulte abnegantis. Vin tibi, quas loquor,
Vocum ratarum iam velut arbitrum
Fratrem SIGISMUNDUM reponam,
Lipsiaci synedrI dicasten?
Atqui involutam nominis in tui
Errore telam haud texet araneus;
Nec taetra robigo, metalli
Pernicies alioqui inertis,
Arrodet icti foederis auream
Lamnam; aut honoris purpureum decus
Obater obscurabit umquam
Nube nigra tenebrisve amictus.
Tu comis ore, et moribus integer,
Rebusque constans; tu gener audies
Amorque PEIFERI, Poetas
Et studia ista favore magno
Ut prosequentis, sic celeberrima
AUGUSTI in aula Saxonis omnibus
Iuvantis, ut par est, modisque et
Viribus. O liceat recoctum
Tantisper aevum ducere, ut illius
Laudes, et altum nomen in ultimi
Late patentes orbis oras,
Pegaseis speciosus alis
Eques, decoro carmine porrigam:
Tu victus albae remigiis avis,
Quae sacra Phoebo est, oscitantes
Antipodes BADEHORNE reddes.