CUM peregrinator poteram trieteridas ante
Quattuor, ex Brabantidos ora
Finibus aut Gallum solvens, et trans mare vectus
Oceanum, lustrare Britannos;
Ac vultus Era magna tuos aulaeque decorem
Mirari, simul Oxoniumque
Et Cantabrigiam, vestri duo lumina regni,
Visere, Pieriaeque catervae
Iunctior esse, tuasque una celebrare perenni
Commodulans testudine laudes:
Cursibus invidit nostris Fortuna locorum
Et varia et mutabilis usque,
Et temere inconstans, Casu comitata sinistro
Fratre Vicis, Proteique sorore.
Nec non insana rabie furtare Gradivus
Pectora atrox, hostilibus armis
Atque inimicitiis intestinoque tumultu
Degrassatus in omnia passim
Obstruxitque vias, aditumque occlusit ituro.
Vidimus in cinerem isse cremando
Oppidaque pagosque, et contemerata Deorum
Fana ruisse, Deosque fugatos.
Vidimus undantes profuso sanguine campos,
Immeritosque ferocibus ausis
Supplicio addictos, atram (miserabile) sortem
Et creperi discrimina belli
Civibus in cassum deflentibus. An mihi sana
Per gemitus tristesque querellas
Vulnera reddiderit dolor? an liquor udus ocellis
Nympharum qui plurimus exit
Fluminis in morem, cum femineo ululatu
Et rigido praecordia saepe
Percutiente ictu, vesanae incendia flammae
Uberibus restinxerit undis?
Iampridem elapsi metuenda pericla latronum,
Portuno sacravimus aram.
Nunc Veneto fruimur caelo, magnamque Quirini
Senensemque reliquimus urbem,
Euganeum ad colles Aponique calentia lutra
Cum POLEMO sociisque reversi:
Et modo Braiani, modo delicias Arquati
Vere novo gustare solemus.
At desiderium, quo litore longius absum
Angliaco, hoc vehementius urget
Ac coquit internas accenso corde corde medullas;
Speque animum meliore serenat,
Adfore tempus, uti cernam tua regna, tuique
Nominis, HEROINA, frequentem
Elogia et laudes, semperque manentis honorem.
O utinam Thamesinum apud amnem,
Post reparata novae paucissima cornua Lunae,
Insula me tua corpore salvo
Spectantem videat orientia lumina Solis,
Auroraeque tuam assimilantem
Divinam faciem: quid me felicius uno,
Teque foret celebratius una?
CLARIS perenni laude nepotibus
Si qua est, adepti nominis ob decus,
Avos recordandi voluptas;
Nempe tibi est, AMADINE sanguis
FERRANDE, maiorum eximiis eques
Prognate factis, cum grege liberum
Toto, Palatinique iuxta
Indigitate Comes theatri.
Hunc summa quarti gratia CAROLI
Vobis honorem, cum titulis simul
Usuque recto detulisse
Nomine Caesareo gerendum
Abhinc duobus scilicet amplius
Saeclis, sigillo et pollice proditur,
Fideque dignis ac probatis
Testibus, imperii columnis.
At non, ut istis vos frueremini
Soli, tributum Caesaris incluti
Donum; sed impertire posse
Fas aliis foret usque, vestri
Nutu favoris, munia; debito
Nimirum, ut aequum est, imperii in fidem
Illis sacramento obligatis,
Quorum alacris meruisse virtus
Existimatur praemia, non sine
Morum decoro, seu nitido virum
Splendore. Vobis quippe, vobis
Ius proprium Comites creandi
Regalis (ut res magna) Palatii,
Et privilegI viribus additis
Suprema iurisdictionis
Consilio duce conferendi
Magmenta numquam deficientia.
Vobis potestas calcar equestribus
Plantis inauratum induendi,
Nobilium et vice militares
Heroas altae stirpis in ordinem
Inaugurandi; et libera perpetim
Dandi, secundum qualitatem
Muneris officiive pacti,
Utenda iusto insignia tramite,
Ceu vera suevit nobilitas. Adhaec
Vobis facultas, aureorum
Ius, quibus est opus, annulorum
Donare; nec non municipes recepto
Ascribere albo rite Quiritium,
De more prisco civitatis.
Quin etiam, o Venetum peramplae
Urbis vetusta civis origine
FERRANDE, summo palmiferae gradu
Ornare sumpsti dignitatis,
Quos studium vigil eruditos
Fecitque claros, arsque probe dedit
Examinatos, quosque peritia
Scientiarum multiformi
Diis similes, super ipsa caeli
Convexa raptos Pegasus aliger
Invexit astris; seu Themidi saorae
Illi, aut profanae, sive longum
Paeoniis operata curis,
Aut disciplinae, quam Sophiae docet
Magistra sollers, regna capacia
Virtutis aeternare suerint,
Regna cerebrigenae Minervae.
"Non tantum in armis vis sita roboris,
"Nec sola Martis pugna duellici
" Clarabit athletam, labosve
" Dexter Achillis agens lacertos:
"Doctrina praesidium est sine milite;
"Doctrina quovis pectora fortius
" Stipat cataphracto, disertae
" Eloquio comitata linguae.
"Utrumque iungas, qui sapies, decus:
"Utrique solvit laurea debitrix.
" Hinc Imperatores sibi-met
" Deliciis pretioque doctos
"Habere non umquam immemores, viam
"Remunerandis saepe molestiis
" Ultro patefecere; non tam
" Divitis accumulante questu
"Fomentum acervos grande pecuniae,
"Cui maior hominum pars inhiat, lucri
" Spe capta (nam nusquam repleri
" Quit malesuada fames habendi)
"Quam sorte partis commodum honoribus
"Gaudente. Reges non alio modo
Tabellionum iudicumque
Constituisse leguntur actum.
Iidem manus pro lege vicarias
Adesse iussere omnibus omnium
Contractibus sollemnitatum,
Iustitio vadimonioque
Patrocinantes, nec nisi Caesarum
Fixis agentes congrua legibus.
Iidem vel incestis nothisve
Seminibus male procreato,
Vel ter nefando concubitu patris,
Auctoritatem legitimi satus
Clementer indulgent, in undam
Dedecus oppobriumque nati
"Mersare lenes. vah! pereat scelus,
"Contaminatis si quis amoribus
" Illustre nomen turpat amens,
" Progeniemque domus avitae.
"Sancire porro littera praepotens
"(Nam quid Monarchae non valeat manus?)
Permittit infami notatos
Labe potesse redintegrari;
Durisque vinclis annuit eximi
Devota morti corpora proximae,
Laesaeque maiestatis atro
Crimine dissolvisse sontes:
Servosque mutatis miseri status
Sciscit beari conditionibus,
Et liberali rite causa
Asseruisse manu redemptos,
Non abrogandis vindiciis. Item
Emancipandi pagina liberos,
Et ius adoptandi viritim
Attribuit, veniamque dandi
Minoris aevi. Sunt alia insuper
Complura vestro scita diplomate,
Ad Vuldavam quod publicatis
Regia PRAGA notis liniri
Vidit, Bohemarum caput urbium,
Late superbis conspicuum arcibus.
Parum est, quod unicuique vestrum
Signiferis Aquilae birostris
Apponere alas stemmatibus licet,
Gestamen augustum, ac nitidum obviam
Praeferre Romano dynastae,
Arva per Italicas et urbes,
Ensem? parumne est, quod creperi licet
Lucta duelli pancratiove rem
Sub Marte controversam aperto
Cernere, vindicibusque plagis?
Omitto demum singula persequi,
Relate summatum o AMADI in chorum:
Quippe his recensendis ad unguem
Musa supersedeam monendo
Pervellit aurem. Cetera postmodum
Cantabis, inquit, cum [Orig: quum] Iovis alitem
Dextro volatu Paule supra
Laurigerum caput astitisse
Cernes, et aequis numinibus tuae
Illustris heros annuerit preci,
Quodcumque votis expetisces
Sponte sua tribuisse largus.
Haec illa. quin mox sub penetral novum
Stacte fragrantis suave sacarii
Ducendus, argutamque dulcis
Melpomenae citharam docendus,
Iam melle linguam tinguor, Ionica
Lustratus unda; et bacchare Delia
Frontem renodor, ne poetae
Sit melico mala lingua noxae.
MAGNE minorque fratres,
AMADINI generosissima
Stemmatis propago,
Columen futuri domus;
Ecquid in utriusque
Studium rhetoris incumbere
Pertinace cura
Teneris ab annis iuvat?
Ecquid in optimorum
Sophiae tramitibus dogmatum
Sub bono magistro
Adolescitis? Vos quidem
Sponte suapte raptos
Alacris semper honestissimas
Indoles ad artes
Stimulat, capessendaque
Utilium reperta:
Magis oestro tamen insignium
Pruriente quaedam
Documenta rerum cient
Carpere tritiorem
Ad honores, et in aulas, viam.
"Prisca namque virtus
" Generis, sereno quasi
"E speculo refulgens,
"Solita est postgenitum valdius
" Excitare quondam
" Animos. sed et non minus
"Strenua vis parentum
"Propiorumque potis masculum
" Pectus acriori
" Animare laudis face.
Ut mihi nunc amicum est,
Reminisci bene concredita
Signa Melchiori
SCHEDIO, meo patruo!
Signa, quibus ferendis
Validos saepe lacertos libens [Orig: lubens]
Praedicavit ipsa,
Rigidissimis Thracibus
Obsidium, Vienna.
Ut amicum est, reminisci insimul
Patrueliumque
Et avunculi, quem Thunes
Africa militandi
Cupidum vidit, at illos Livo,
Heu rapina saevis
Inhiata Moschis; item
Hunnusatrox in armis,
Itidem Celtica gens asperas
Trux inire pugnas.
Sed alius haec sunt loci.
Vos ego facta patrum
Atavorumque, trecentos adhinc
Evidenter annos
Bene gesta, producere
In medium nepotes
Iubeo, non sine praeconiis;
Facta digna sane
Trabe cedrina scalpier,
Nec male sentiente
Cariem, nec latitantes genus
Infidele blattas,
Tineasve rodentulas.
Aspicitisne circum
Vetere in vestibulo stantia
Liminis paterni
Simulacra, vobis uti
Ingenium polite
Acuant, et tacito numine
Vividum sequendi
Clarios choros impetum
Insinuent? vel unum
Imitari modo sit, cui sacer
Imperator olim
Meritos honores dedit
CAROLUS ille quartus;
Pol is exemplar aviti recens
Exhibet decoris,
Specimenque virtutium,
Quas animositate
Genuina sapientissimi
Quique metiuntur.
Etenim velut candidis
Oebalidum gemella
Radiis sidera purissimo
Emicant Olympo;
Ita vestra se claritas
Ex vegetis coruscans
Oculorum igniculis exserit.
Macte IANE, macte
ADRIANE virtute. sic
Itur ad astra, sic mens
Genios participat caelitum.
Eia gliscitote
Superare lauru nova
Perveterem corollam;
Heliconisque apices, alitis
Instar ocioris,
Pedibus citis tangere.
Auguror. en futurum est,
Aquilae Caesareae plausibus
Mutuis ut ambo
Pariter, nec inglorii,
Excipiantur; ambo
Vigeant, haud inopes maximae
Dignitatis, atque
Meritissimi muneris.
Eia agite o alumni
Charitum, fortiter insistite
Atticae Minervae
Latiaeque vestigiis,
Castalidumque grande
Peramatore decus, si modo
Gloriam decorum est
Sibi transere in posteros.
"NULLUM meretur nec sapientiae
"Praeconium, nec magnanimae indolis,
" Domi sedendo semper, horas
" Segnitie terere otiosas.
"Virtus in actum mascula ducier
"Ardet, sopori non nimium aut mero
" Aut luxui indulgere sueta.
" Luxus opes, sopor ille nervos,
"Bacchus Minervam perdit. Inutilis
"Ad res agendas fiat oportet, et
" Cui temulento nutat impos
" Vertice sensus, hebetque acumen;
"Et quem veternus corripuit gravis;
"Et cui medullas insidiosior
" Incessit omnino voluptas,
" Heu iuvenum capitale virus.
"Non hisce ventum est moribus Inacho,
"Eiusque delecto ordine posteris,
" Virtutis ad laudem obtinendam,
" Iustitiaeque decus parandum.
"Non hisce parta est moribus Aeaco
"Pyrrhisque magni gloria nominis;
" Non Ausonum augustis Tyrannis;
" Non Saliis: neque Godefrido,
"Bellator urbem qui Solymam addidit
"Sceptris superbis. Tum viguit tenax
" Recti cupido, non libido:
" Sobria mens, et imago honoris,
"Non ebriosi pectoris impetus
"Aut faeculentum praevaluit nefas:
" Chalybs virentem classicumque
" Non choreae, neque pluma mollis
"Pubem excitavit, fortia pectora.
Compar ut illis tu fieres viris,
Quid non secundo Marte pulchris
Es RIDESELLE periclitandum
Aggressus ausis? quod facinus tibi
Praeclarum omissum est, dum Melitensia
Contra latrones Thracas armis
Moenia, flos equitum inclutorum,
Defensitasti strenuus; et maris
Secura vestri tutaque navitis
Ultro citroque praestitisti
Aequora, non sine clade Thracum?
Qualis ferocem in Marmaricas feras
Fremens leonem vis truculentius
Armat, leonem (inquam (tremendis
Unguibus horribilique rictu;
Aut qualis urso pro subole hispido
Trux ira surgit: talis in hosticas
Flammatus ardor te catervas
Egit agetque animosiorem.
Servata vestris insula dexteris
Feliciorem se veteri Rhodo
Cyproque si iactat; favori
Numinis attribuenda laus est.
Vos estis oblique oppositi fero
Ceu murus hosti. vos remoramini
Pernicis alas quippe fati,
Quoad fieri pote: et ingruentes
Nudo procellas undique vertici
Ingente opum vi frangere pervicax
Durat lacertus, Colchicasque
Persequitur ratibus triremes.
Dii te secundent, o MELITE ferax
Heroum, et ad classem expedientium
Sese, et triumphum ex hoste victo
Laurigerum spoliisque captis
Laete reportantum. O liceat diu
Vobis fruisci tot bona, tantaque
Magmenta consecrare Marti,
Perpete nobilitata fama!
FONTIS ut vivi liquidum fluentis
Vena, promanans penitis ab oris,
Usum in humanum scatebras perennes
Eiaculatur:
Non aquas illi Canis aestuosus
Siccat, aut frigens Caper algefactas
Congelat, ventusque fragore subter-
raneus arctat:
Illa sic nullis operum impedita
Sublicis, aut obicibus repandis,
Caesarum recto bona principumque
Gratia cursu
Tendit exsertas animare vires,
Nec propagatum sine honore munus
Sera derivare per eminentum
Saecla nepotum.
Unde quae, FERRANDE comes tribulis,
CAROLI iusta bonitate quarti
Vestra gens in perpetuum statuto
Possidet aequo,
Ceu per extentos laticum canales
Ducta, non cuivis homini, sed arte
Praedito rara, bene sed merenti
Munera confert.
Hinc sit, ut gustare tuos liquores
Si potis, iustique capax honoris,
Quisquis accessit PatavI inquilinum
Teuto Lyceum.
Te penes donum quasi humi sepultum
Haud sinis; nil invidia laboras:
Nam nec obturas latices, nec aversam
Obstruis aurem
Cynthio, totique choro sororum;
Quin nec his, quos prae reliquis alumnis
Cynthius totusque chorus sororum
Censet amandos.
En Palatinum comitem Melissum
Tu creas libens [Orig: lubens] , equitemque, qualem
Arma deposcunt ceteris Quiritum
Militiae [Orig: Militiai] .
Addis incrementa, quibus tributim
Olim adornari merito suo-pte
Semper illustres animae solebant
Urbe Latina.
Hunc et in prolem mihi nascituram
Mittis (ut rarum!) generis decorem:
Haud secus propago resex vigorem
Vitis adultae
Induit. Iam nec galeam secundam
Clathra, nec iunctae diadema gemmae,
Nec fluens vexillum agiles in alto
Dedecet auras,
Liliis conforme suis. In imo
Cycnus argutans clipeo susurras
Ruminat voces, quadrifariamque
Dividit oras.
"Euge, quam gratum est animo, laboris
"Praemium captare molestiaeque!
"Euge, quam dulce est titulorum adepta
" Laude potiri!
Hoc ob augmentum tibi quid dehinc non
Ipse debebit Genius Melissi,
Sponsor aeterno captus arrogandi
Nomine famam?
Maximis certe benefacta pensat
Gratiis condigne habitis at actis.
"Nam quid aut maius gravis auctor aut prae-
" Clarius umquam
"Edet in lucem, nisi laude dignis
"Nomen immortale viris nepotes
"Gignat in seros, celebrisque donet
" Munera famae?
QUEMnam repente factum
Me cerno? quemnam mutor in Quiritem,
Indutus chlamydem coccinam,
Bracteolis Phrygiis striatam?
Cui fulgeo monili
Splendente vinctus? cui corusco fulvum
Ensem? cui gero calcaria,
Luteolo lita circum obryzo?
En quanta Teutonum me
Stipat corona! quantus Italorum
Grex confluxit ad encomium,
Quod mihi lux hodierna sanxit!
Laeti reor Camillum
Videre talem Romuli nepotes,
Captis o GROMI Veientibus
Urbis ab obsidio decenni,
Diis patriis Lyaeum
Libantem, et aris victimas litantem.
Bellatum mihi contra feram
Barbariem, et Lapithas atroces
Quam fortiter tot annos:
Nec Arrhabonis ripa adorta solum
Scit tirocinii debitum
Pannoniis specimen sub oris,
Cum MAXIMILIANI
Armis secundi regia Alba carptim
Tentaretur, atrocissimi
Praeside capto obiter tyranni.
Antiquus ecce mos est
Notis quibusdam dexteras viriles
Exornare: sed et praeter id
Cum Telemoniade est Ulysses
Discrimen ille magnum.
"Distincta cerni rem statu graduque
" Vult natura. Senatorii
Ordinis, Hostiliique regis
Post Romulum Numamque,
Insigne latus clavus, ac rotundum
Lunati tegimen calcei:
Aureus hinc equitum Latinorum
Anellus alligator,
Vertente saeclo ferreis abusis.
Certe non secus argenteis
Milituum vetus illa primum,
Dein aureis caterva est
Donata iure fibulis. Omitto
Armillas, phaleras, bracteas,
Balteaque et meritas coronas,
Hastasque puriores,
Et cetera arma, roboris decorem, et
Virtutis dare tergum insciae.
Quid procerum referam inclutorum
Torquata colla? quidve
Si cinnianae praemia acritatis;
TRAIANIque parazonium,
Munere quo bonus ille Caesar
Suram remuneravit?
Praeclara sane et digna LUDOVICO
Istaec undecimo res fuit
Auctor, ut Ambasiana rite
Magmenta conchulati
Sancire torquis, laude posterorum
Laetus, rex animum induxerit,
Armigeris coryphaeus astans.
Stellata, rege IANO,
Secuta post turma est domus Odoenae,
Cuius diruta moles iacet.
Adde periscelidem OEDOARDI,
Qui tertius Britannas
Opes adauxit. adde chrysomallon
Illud Sequanici principis;
Vellus Iasonium PHILIPPI
Dico; eius, unde quinto
Per abnepotes lineam sequacem
Stirps materna trahit CAROLO,
Munere cuius eques crearis;
Fratrique FERDINANDO;
Quo dante, puber laurea corona
Praecinctus caput, ornatius
Ilicet Austriacum Lyceum
Feci, neque indecore;Vatesque provocans adultiores,
Divinumque genus Musicos
Caesareae decus illud aulae,
Quid ex utraque Musa
Haurire fructus navior iuventa
Posset; non dubio gestii
Edere iudicii senatu.
"Nam quidquid ars, vel ipsa
"Natura menti non pigrae sed acri
" Insevit, studiis daedalis
" Exserere hoc generosa tendit
"Virtus, amica famae,
"Hostisque probro. Quin et hac videre est
Tempestate, quibus per manus
Saepe ducum titulos equestres
Novasque dignitatum
Fas indipisci laureas; eosdem
Evectos aliis utier
Atque aliis in honore signis.
Te Caesarum potentum
Regumque versatum arduis in aulis,
A primis adolescentiae
Curriculis, GROMI; te subinde
Legatione functum
Multas per oras, teque dimicatis
Et terra et pelago proeliis
Fortem animi, teretisque palmae,
Quis nescit? unde Caesar
Remunerare debito labores
Non ingratus honorario,
Te gregis ipse sui merentem
Scripsit, pedumque talis
Auro coruscum iussit applicari
Calcar, strenuitatis tuae
Indicium, gladiique cinctum.
Id quod ratum atque firmum
HENRICUS alter ille, Galliarum
Regnator, habet ultro, memor
Ingenii validique Martis.
Idem ipse contributor
Iam canus in me grandiore natu
Ornando facis, ac te exhibes
Dulcis adoroalae ministrum,
Inserviens honori
Pompaeque, nullum mussitanti in aevum
Collatos AMADINA manu
In Schedium, Schediique prolem,
Cui noctiluca nondum
Maturat horas, munerum maniplos.
Quis me laetior est? quid mihi
Gratius, o veterane miles,
Acceptiusve, quam te,
Quem scita rerum per tot obviarum
Annos experientissimum
Cognitio diuturna fecit,
Coram meis videre
Anteambulonem gressibus, sarisa
Nixum Palladia? quo modo
Se pater ipse tulit Quirinus,
Aut armiger Quirini,
Reddente iura civibus Latinis
Ipso-met, Tyriae splendide
Conspicuo trabeae nitore.
At mensa iam vocat nos;
Iam porriguntur melle saccharoque
Cretaeo lita condimina,
Libaque Mosopiis placentis
Electiora: iamque
Cratere pleno, Gnossium meracum
Exspumante, salutarier
Appeto. prosit utrique; prosit
Et tertio bibenti;
Prosit tribunis, ceterisque nostri
Actus nomine praesentibus.
Cernis, ut huic nitide sereno
Sol faverit diei,
Obscuriore nubium fugato
Velo? cernis, ut acto die
Hesperus irradians amoenum
Claros vibret capillos,
Dissaviator purioris aethrae?
Sed iam te nimium forsitan
Detineo GROMI garriendo,
Manumque de papyro
Nugace tolli nesciam fatigo
Frustra. frustra, age, ne sis tamen
Tu quoque; polliciti reum me
Spera dehinc, ut orsus
Laudum retextos incohem tuarum,
Successu modo me prospero
Invida non spoliabit Ate.
Ne, si cani mereturQuisquam decenter, tu cani mereris;
Ut pulchre memori gratia
Stent veteris monumenta facti.
PRIVABORNE iterum luminibus tuis,
Musarum et Charitum o IMMANUEL decus;
Quem per tot reducem taedia mensium
Cum desiderio anxio
Mansi? Non Veneti stagna tibi maris,
Non urbs Euganeis proxima collibus,
Nec thermarum Aponi vivida sulphura
Lentas iniicient moras;
Quando te Genius Larque Piquigniae
Arcis, te revocant Sumonis uvidi
Nymphae; te genitrix, optima feminarum
Aulae ad munia principum;
Cui Regina sui mascula debitum
Commisit regimen corporis et status,
Navarraeus amor. Fallimur, an domum
Salvus cum repedaveris,
Incesset tibi mox ardor inaestuans
Lustrandae cupido protenus Angliae?
Non me tam celebris Candia, non Cyprus,
non Phaeacia divitis
Hortis Alcinoi regia traxerit
Visendi studio; quam rapior volens
Londinum, ad solii fulcra Britannici,
Puris quae Thamesis lavit
Altor gratus aquis: hiv [Orig: heic] ubi mitium
Regnatrix populorum arbitrio sui
Leges consilii sancit idoneas
Heroina, Deum genus;
Quam nec dedecuit nosse reconditas
Artes, nec piguit lactea rhetorum
Graecorum Latiis reddere vocibus
Verso scripta probe stylo.
Summo nata loco promovet altius
Virtutis meritum strenua: sed neque
Doctrinae pretium deminuit manus
Tantae celsa viraginis,
Nec vestigia detrudit ad infima,
Quos fors inferior invidet arduis.
"Magnos magna decent. at mediocribus
" Rebus laus sua non abest.
Tu, qui non generis sanguine proximi,
Sed virtute magis nitier, ad patris
Exemplum, properas; rectius optima
Quaeque intelligere es sagax
ALLI. Macte igitur, macte tuis bonis,
Et donis animi: dumque vigorem alit
Aetas purpureum; vincere te stude
Ipsum, et Francigenas tuos,
Qua re cumque potes, quo calor ingenI
"Aut industria fert. Non minor est labos
"Acquirenda bono digerere ordine.
" Quam possessa tuerier.
"VIDES, ut aura obryzi,
"Indaeque gemmae lucidi colores,
" Et quidquid sapit exoticum,
" In pretium cadat auctionis.
"Merx unaquaeque tanti,
"REINOLDE, quanti censet aestimator.
" Illic vilius, hic [Orig: heic] carius
" Venditur aut emitur cylindrus.
"At principum monetas
"Neque esse constat unius valoris,
" Nec formae similes unius:
" Par quota quaeque ducum est imago?
"Diversa ubique rerum,
"Diversa ubique nominum potestas.
" Sic passim tituolos impares,
" Dissimilesque per universum
"Invitus experiris
"Gradus. An obscurum est, Britanna si quos
Illustres Academia vult
Afficere ante alios honore;
His artium magistri
Donare nomen erudita suerit?
Sicut laus ea nuperrime
Helvetio iuveni tributa est,
Cui celsa saxa gentem
Produnt vetustam. Quid, quod et magistri
Doctoresque salutarier,
Nil adeo erubuisse nostris
Annalibus leguntur
Ex principali stirpe procreati?
HENRICUM loquar octavum item
Signa magisterii tulisse
In Angliae Lyceo;
Heres ELISA cui relicta regni.
FRANCISCUS quoque rex Galliae,
Plurima cui merito bonarum
Renata litterarum
Debet seges, quid ille? nonne ab ipso
BAIARDO, minor ac si foret,
Sese equitem voluit creari,
Post Marte concitatam
Pugnam, reclivis fronte sub MELIGNAE;
Ornamenta simul splendida
Magnificae sibi dignitatis
Gavisus exhiberi
Gestanda? Nonne et Teutonum dynastae
Auratum Solymis inclutis
Et gladium et petiere calcar?
"Quorsum ista? maximi pol
"Fecere, quae iam vix pili putantur.
" Pulchrum cuique suum scilicet:
" Strenuitas sua cuique cordi est.
"Tu, qualecumque et ipsi
"Virtute partum strenuo tuemur
" Conatu decus, o ne malis
" Arbiter auspiciis amabo
"Interpretare. Nescis,
"Nescis, quid aevo spondeat futuro
" Aether, quodve sequenti vehat
" Luce dies revoluta fatum.
"Oblitus an Iehova est
"Arcana, quorum pervetusta Graii
" Oracli meminit dignitas,
" Et meminere piae Sibyllae?
"Romanus Imperator
"Cera fideli muniat diploma;
" Vix dici pote, quantum mei
" Feneris amplificarit auctus.
"Dum calcar addit heros,
"Heros et addit robur atque vires.
" Vires illicium sentiunt;
" Illicio vegetatur ardor.
"Innatus ardor audet
"Tentare famam; fama laudem apisci;
" Laus se vincere: se vincere
" Cuncta trophaea sibi triumphat.
"At nemo puber umquam
"Rerum feretur attigisse summam,
" Virtutis nisi fastigia
" Scanderit a teneris gradatim.
UTRAMQUE doctum Palladia in schola
Linguam, et scientem naviter artium
Sublimiorum, quae beare
Corda polo genuina callent,
BRUTUM saluto. qui licet extimis
In Sarmatarum limitibus, procul
Ab Hadrianae separatus
Illecebris agat Amphitrites,
Iucundioris non tamen immemor
Nunc creditur mi colloquii fore,
Quod ad vadosi regna Maeni
Comiter in STEPHANI taberna,
Praesente ibidem tum CAMERARIO,
Sermone grato texere amavimus:
Cum Teutonas exsul per oras
Finibus Allobrogum relictis
Ad subiugatos BATTORIDAE tuus
Se, BRUTE, cursus ferret Iazygas:
Qua pisculento fetus amne
Lambit humum patriam Tibiscus.
Multas ab illo tempore me plagas
Seu causa Fati, seu variabilis
Fortuna casus, inquietis
Ambitibus peragrare adegit,
Salutis incertum. haud secus aequoris
Sulcans arenas navita lubricus
Iactatur undosis procellis,
Vi furialis Apeliotae.
Hos inter errorum et creperae fugae
Fluctus vaganti nil mihi suavius,
Quam sempiternum vatis ultro
ANGELII meruisse amorem;
Tarpeia cum [Orig: quom] me sub Capitolii
Saxo viderent limina consulum
Fastos, et antiquo paratu
Nobile marmor, imaginesque
Vetustiorum quaerere Caesarum,
Ex Marte partis non sine laureis.
Quid ille? nequaquam profecto
Erubuit mihi credidisse
Recens suorum nata poematum
Typisque nondum scripta volumina.
Idem reversuros ab Urbe
Franciacum poplites in orbem
Pereleganti munere carminis
Est prosecutus: munere, publicis
Quod exstat exstabitque libris
Semper ad innumeros nepotes.
At tu, POLONI regia cui patet
Herois, auctor magne, quid exigis?
Quae condis, aeternis (ut aequum est)
Digna lini monumenta cedris?
Rex bellicosus materiem suae
Virtutis amplam, non sine fomite
Sui celebrandi ministrat
Vatibus historicisque doctis.
Idem eruditus iudicat aptius
Prudentiusque, e re quid, et ad status
Sit publici non obfuturum
Emolumenta, bonasque leges.
Audita nobis cor fodiunt ducis
Praeclara tanti dictaque factaque:
Cur non et istic Marte duro
Visa geri feriunt ocellos?
Longe sed absum. certe ego Pindari
Vel Dithyrambos, vel numeros graves
Molirer Alcaei, minaxve
Stesichori genus aemulari;
Nihil moratus, queis ferar avius
Pennis in altas aetheris orbitas,
Novum Melissaei daturus
Nominis elogium profundo.
"Alma triumphus laudis adorea
"Ridere gestit, perpetuam et sitim
" Accendit in fibris alumno
" Pota avido semel Hippocrene.
Atqui futurum rebor, ut unus et
Alter perennem dehinc aquilex novae
Vestiget undae forte venam:
Quam nisi reppererit palato
Gratis placendam; pol tamen, inquiet,
Hic celsa celsis gesta poematis
Aequare sumpsit, rege quondam
BATTORIO, domitore Moschum.
BELLAM et pudicam, dotis et uberem
Cur non amico Musa MONAUIO
Optemus, integroque vitae
(Scis etenim) scelerisque puro:
Unde elegantum pignora liberum
Producat horti, laetifico satu
Repullulantis, dulce fenus,
Augificans genus atque sexum?
"Mites genuntur mitibus; et probo
"A patre natus, fert ab avo nepos
" Laudem; nec incesti pudicam
" Coniugii parit ulcus Aeglen.
SUSANNA adesdum. iam datus annulus;
Iam dextra dextrae iuncta, fideque ius
Pactum est. adesdum, et luculente
Fac nova nupta novo marito
Permissa dones gaudia. nunc tener
Amplexus ambos legitime decet;
Nunc et columbatim vibratis
Basiolis locus et cachinnis,
Et quae volenti deliciae placent.
Ut implicata claviculi manu
Circum, maritatae racemis
Palmes onustus adhaeret ulmo,
Et separari non amat invicem:
Sic delicati brachia coniugis
SUSANNA, Nympharum Viadri
Mitis alumna, suis lacertis
Innectit urgens, a genialium
Castis voluptatum illecebris procul
" Ignara divelli.sed ipsum
" Hocce licet, licuitque semper,
"Et post licebit. Mutuus hoc amor,
"Hoc insitorum causa Cupidinum, et
" Natura demum suadet ipsa,
" Se subolemque bene educandam
"Servare pernix. Ut mihi nunc foret
Melli, vocatorum agmina civium,
Quos PRESLA nutrit, teque coram
Elysiasque nurus tueri!
Fortassis hospes non ego (ut arbitror)
Ingratus essem. sed procul absumus
Vestris MONAUI segregati
Finibus, Hadriacae propinqui
Actae, reclivem qua viridi sinum
Obducta musco terra sub insulis
Humescit, alternoque conchae
Murice summa salis lacunant.
Tecum eruditum CORASII caput,
Tecum et sagaci fronte RHEDINGERUM
Habes; quibus nec cariores
Ulla tulit, nec amiciores
Aetas sodales ulla feret. Via est
Picena testis, testis et Umbria;
Albusque Nar, Thybrisque flavus,
Oenotriaeque vadosus amnis:
Quibus relictis cum valedicerent,
Raptum abstulerunt me mihi, nec palam
Non involatum iure privo
Hunc Genium sibi vindicarunt.
Quin carmen amborum Ausoniis modis
Attemperatum legerit aureus
Hymen,tuarum nuptiarum
Sponsor; an ambigerem, MONAUI?
Tu praeter illos, instar et omnium
Sentis amici DUDITHII labra
Tam culta, tam fecunda, tamque
Nectareo lita rore; qui te
Metris venustis concelebrarit, ac
Tuam Dionen. cetera patrii
Canent olores. pauca mi sat
Est humili sonuisse plectro.
"SAXOSAM Meliten, aut Lilybeium
"Montem, et Pelori Trinacrii iuga,
" Cum verticoso prominentis
" In pelagum scopulo Pachyni,
"Si non vidi ego; si nec male fumidam
"Aetnam, et Cyclopum fulfureos specus,
" Scyllamve latrantem Molossis,
" Vorticibusque avidis Charybdim:
"At terra et pelago triste periculum
"Fugi. necessum non erat ingredi
" Hamata piratarum atrocum
" Brachia, non Calabros latrones.
"Thraces heu quoties volturii ratem, et
"Vextorem inermum cum rate, et omnibus
" Cepere gazis! heu quot ultro
" Et quoties cecidere caesi!
"Multo tutius est, in patrio sinu
"Lustrare pictos luminibus vagis
" Mundos, et auctorum bonorum
" Historias iterare priscas;
"Nunc hos, nunc alios ordine debito
"Raptim legendo, sed neque inutiles
" Hinc inde carpendo, laborum
" Praemia pensiculata, fructus:
Quales ingenio SCALIGER entheo, et
Diviniori pectore LIPSIUS
Promit, salutares fruentum
Usque bonis studiorum in usus.
"Ceu nave socias mellilegarum apum
"Vides catervas ambrosium thymi
" Libare succum baccharisque,
" Non sine floridulo anetho.
"Praedatricum operi grex inhiat volans
"Furuncularum. gustus opum gulam
" Proritat, et ceram innocentem
" Semper amant vigiles lucernae.
Nos iam curriculum paene (quis autumet?)
Praedestinatum absolvimus impigri:
Viae tametsi fessus hauddum,
Nil magis o MARIVORDA, porro
In votis habeo, quam regionibus
Clarae videndis annua Graeciae
Donare momenta, atque mores
Indigenum bene nosse et urbes.
Cives ah utinam non Othomannicus
Hausisset ensis, nec Mahometicae
Profanus olim fascinasset
Corda superstitionis error:
Melli res ut erat, nave per Hadriam
Vehi quietum, perque tot insulas
Portusque secessusque Graios
Oppida cum populis tueri!
Atqui tempus erit (vaticinor) neque
Abesse longinquum auguro, cum [Orig: quum] novus
Regnator Europae, Deum vi,
Ionio mare transfretato,
Excisi veteres imperii domos
Fascesque fractos Threicio iugo
Redintegrabit, ferreumque
In meliora reducet aevum.
Leges ille pias scilicet a Deo
Datus theatris condet, et hostico
Aedes profanatas furore,
Aedituosque ruet nefandos.
Suspirat venientem Isthmia faux ducem;
Exspectat altis hunc Marathonius
Campus decorandum trophaeis;
Spe laciunt hilares Athenae.
Felix, cui dabitur scandere nobilem
Parnassum, et evantem hoc duce liberum
Festi Cithaeronis receptum,
Atque sacras Heliconis arces!
Qui fontes biberint, unde novem Deae
Cum fratre potant, praeside fontium;
Feliciores aestimandi, et
Terque quaterque beatiores.
O (nam stella micans Cassiopae novi
Praenuntiavit regis idoneos
Ortus) secundis auspicantem
Ominibus sua bella dexter
Pugnando sequitor, quisquis ad ardua
Rerum atque virtutum ilicet applicas
Mentem, supinatimque ducta
Brachia tollis ovans in altum.
Hinc, hinc perpetuae laudis adoream
Sperare fas est. Mox age Bosphori
Saevo tyranno, fortis heros,
Incute fronte metum propinqua.
Te Bellona, soror Martis alacrior
Ducat per hostes, te bona Faustitas
Beetque fortunetque: tecum et
Signa acie rata sospitentur,
Tecum et Franciacae milite copiae
Salvo triumphent, non sine numinis
Favore. sic o sic iuvabit
Barbaricas peragrare terras.
ASTRAEA legum recta iubentium
Patrona, caeli sidus inhospitans;
Tuque o medendi carminisque
Auctor Apollo, favete coeptis.
Coeptis favete, et numine dextero
Paeana dulcem commodulamini:
Sic iura semper firma constent;
Sit medicina chelysque salva.
En CHRISTIANO, quem Neomarchiae
Tulere montis moenia Regii,
Vatique FRANCISCO, sagacis
Hippolyti meritas alumno
Antiquus aulae Caesareae comes
Confert tiaras; dans nova cassidis
Magmenta, gestandaeque in aevum
Nobilitatis honora signa.
Utrumque dignum duplice praemio
Remunerari scilicet arguunt
Virtusque doctrinaeque pondus;
Cui rata consiliis probatis
Corona Nervarum atque Trebatium,
Chirone cum docto et Podaliriis
Assentit. O ulvose RORIX
Cornua tolle, senique Thomae
Haec candidati laeta refer patri,
Seu, rerum habenas dum regit arduas,
Alto in Senatu considenti,
Sive domi vigiles agenti
Sub corde curas, in patriae bonum
Intentiores. tuque adeo celer
VIADRE, seu mavis vocari
Odera; io mere pisculentae
Stagnator undae, non sine congrege
VARTA, repandis plaude age brachiis.
Sollemne CUSTRINI triumphet
Urbs, validis operosa muris.
Vox laeta Manes Hippolyti ciat,
Manesque materni indigetes avi
Naumanis, HILDENSAEME. Fratrum
Coetus ovans Genium frequentet,
Libo et placentis dum facit annuis,
Partaeque laudi et mutua gloriae
Reponit hostimenta gratus.
Fallor, an et GROMIDIS fenestram
Quae Laurus ornat, carmine nobilis
Nostrum duorum, iam tibi vinciet
Frontem beata frunde? Laetor,
Laetor ego, et niveam lapillis
Signare lucem gestio candidis.
O par meorum dulce sodalium,
O quae repens nos separatis
Dividet hora viis, amici?
Excelsa Romae vos Capitolia
Visetis, exin Parthenopes iuga:
Me Celta rursus, me paluster
In sua regna vocat Batavus.
Hinc insulares spero Britanniae
Portus et urbes, atque viraginem
Videre ELISAM; cui neque illa
Par era, quae Tyriis in oris
Regnavit, at nec pulchra Semiramis;
Neque illa, summae quae sapientiae
Consulta, tostis a Sabaeis
Sponte adiit Salomona regem.
"Quo Fata ducunt, quisque sequamur, ac
"Bonique et aequi, prospera seu mala
" Fuant, necesse est consulamus,
" Dum reduces stata meta sistat.
DORMIO; sed meum cor
Semper HAENZELI vigilat. mens cata somnulentum
Excitare veternum,
Fata ruminat abdita,
Consilio potenti
Caelitis firmata Dei. Quis tua fortis heros,
Facta pangere digne
Possit, aut generis tui
Condere glorioso
Ore per fastos memores stemma? nites, ut albis
Lucifer radiis, ab
Usque Memnonia domo
Hesperium ad cubile
Vectus: illustratque solum Mars tuus ille puris
Candefactus ab armis,
Qualiter rutila faces
Luce micant Olympo
Splendidae. Te constituent ecce novum monarcham
Consenentis in orbis
Astra duplicibus plagis.
Te metuent Eoi
Principes, atque occidui: te Boreas et Auster
Obstupescet. Io dux,
Magne dux age maximos
Ex domitis triumphos
Hostibus, servaque vices in statione firmas.
Militat tibi Mavors
Ipse; militat et poli
Sors utriusque. Fractas
Cerno iam ruptasque acies, et populata castra;
Urbiumque labores
Ac metus, in Hymettiae
Gaudia tuta versos
Pacis. Euphrates mediis aridus in fluentis
Se requirere visus,
Ut paretur iter novis
Regibus. Eia natos
Rite, natorumque genus rite creans dynastas
Orbis; hosce Magogos,
Hasce plebis hirudines
Exige victor, inque
Aureum corrupta reduc tempora mitis aevum.
Perge, perge; vir esto.
Quanta copia et aclydum
Hic [Orig: Heic] iacet, et dolonum
Et cateiarum, veruumque insuper hosticorum!
O quies, o amoenum
Otium; quis erit tuis
Usque bonis fruisci
Dignus, IGNOTI gremio sub ducis? Una bello
Instat, altera paci
Satrapae manus integri.
Isque caput corona
Cinctus ex auro solido, purpureisque gemmis;
Ad tuenda piorum
Agmina, auxilio Dei
Se fore iurat acrem
Vindicem. Felix regio, quae tulit hoc in auras
Pectus! at mage felix,
Signa qui ducis optimi
Fixerit, et trophaea!
Spem fove hanc mecum vigili pectore dormiendo:
Si quid huius et olim
Fiet, esto mei memor
Vaticinantis, atque
Posteros HENRICE mone, prospera sobriorum
Saepe non caruisse
Fine somnia debito.
'PROCUL remotas a patrio solo
'Terras, et urbes visere plurimas
' Primis ab annis, DOUSA, curae
' Mi fuit, et creperas senecti
'Cognoscere aevi sollicito vices
"Casu ruentis. Quem iuvet heu domi
" Sedere segnem, nesciumque in
" Tam variis quid agatur oris?
"Fastidiosae lenta solent morae
"Momenta curis exitialibus
" Exesse torpentes medullas:
" Atque animi tenuat vigorem
"Iners veternus; quo nihil uspiam
"Nocentius, nil perditius pigras
" Culpatur insedisse mentes,
" Et stupido caput obruisse
"Fumo: cavernis qualis ab humidis
"Vaporat olim, cum silices aqua
" Frigente perfusos caloris
" Stridere vis peniti coegit
"Contraria urgens. sed quid in exteris
Consumpse privas res Academiis
Prodest, et orbem tot per annos
Sole alio peragrasse tostum?
Quid usque virtutem, et pretiosius
Virtute nomen, non sine gloria,
Nave requisivisse, et altas
Pieridum penitrasse in arces?
Quid fluxa vitae tempora puriter
Egisse, et obsceno a grege turpium
Semper meretricum pudicos
Abstinuisse oculos manusque:
Si regna frigent caelibis hic [Orig: heic] tori,
Et destinatam coniugii in fidem
Fatum puellam quiquelustri
Sortilegum spatio retardat?
Si nullus errorum est modus, et meum
Dempto fatigant fine graves equum
Calcarium ictus? cumque metae
Sperat ovans aliquem attigisse
Evicta per discrimina terminum,
Praesto est labori mox alius labor:
Ceu prona Phoebeos iugales
Continuo rapit aura cursu.
Ollis quietem Temporis invident
Flagella, tortos dantis ad impetum
Sonos, et aurigantis hornorum
Arbitrio celeri dierum.
Ac pol labantem prociduis statim
Fessum videres poplitibus, nisi
Natura nervum firmiorem
Aethereisque parem indidisset.
Europa nostrae conscia tum fugae
Tum sortis; I nunc, atque Asiam pete
Festinus, inquit, Africamque.
Forsan in Americae, quod optas,
Plagis repertum sera dabit Venus:
Ubi inquilinum scilicet incola
Virago praestolatur, ardens
Prorsus amore tui virago.
Haec illa. at illi non ego credulus.
Laxane sulcarem Oceanum trabe?
Tot hercle pertaesum est viarum.
'Se sibi quisquis amat marinae'
'Demersum in undae quaerere gurgite,'
'Se credat Austris naufragus imbricis'.
Satis pericli est, me bis Istri
Damna subisse, semelque Rheni.
At tu clientum DOUSA Cupidinum
Tutela praesens, eia age, de mea
Si quid ROSINA, de fideli
Si quid inaudiveris Rosina;
Amabo te, fac (si mereor) sciam.
Nam tute fando quidpiam, ut arbitror,
Fatale percepsti, sagacis
Consilio monitus Minervae,
Cum sanctiori te superum domo,
Lectum in senatum, non homini datis
Inferret alis; ac futuri
Praeteritique per omne prudens
Nepos Atlantis coram ibi callidos
Praesagiorum versiculos libro
Sensim ex Sibyllino retectos
Panderet, Uranie magistra
Oraculorum interprete. Mysticos
Probe explicatos si numeros dabis,
Quanta cor aerumnale reddes
Laetitia mihi delibutum!
QUO se proripuit, MODI,
MARIVORDA vester ille;
Brugensis Marivorda vester ille, flos
Iuvenum eruditiorum?
Liquit in PatavI sinu
Gemitus sui sodalis:
Ne quisquam quid inaudivit,
An adhuc agat Cremonae
Ad fluentisonas Padi
Genio trahente ripas;
An vero reditum suam
Properarit ad Melaenam.
Ubicumque morabitur
Marivorda vester ille;
Nostro nomine plurimum
Age salveat, meosque
Meo nomine plurimum
Iubeat bonos amicos
Salvere, et sibi rem bene
Gerere ad bicorne Rheni
Flumen: praecipue quibus
Vada Belgici plagaeque
Scaldis hospitium danunt,
Typographicumque praelum
Immortalibus annuit
Fieri, edito sub auras
Fetu divitis ingenI.
Veneror coloque amoque
Tam doctas animas, MODI,
Adeoque plane adoro.
Nam cui non cata Lipsii
Acies, vigorque Dousae, et
Canteri vigilantia
Animum excitet supinum?
Cui Lernutia suavitas,
Variusque Giselini
Non mentem afficiat lepos,
Neque raptum adurat ardor
Cor Vulcanius? Haec dum ego
Meditorque ruminorque,
Pertaesum Italiae est. Brevi
Alemanniae revisam
Fines. hoc volui, Vale,
Et ama tuorum amantem.
COLLES aprico palmite consitos
Ad pura amoeni flumina Neccharis,
Qua fons salutari fluento
Irrigat imperii sodalem
Perennis urbem; dum memorabili
Cantare versu ruminor, et loci
Beatioris sospitalem
Mane novo Genium saluto,
Absente quamvis corpore: ter quater
Felicem oportet te merito vocem
O LAUTREBACHI; qui nitentes
Aonia redimitus usque
Lauru capillos, sub nemore herbido
Nunc Christianae te citharae modis
Diurnus oblectas, fidique
Ausoniam chelyn Alemannae
Componis, auctor carminis enthei;
Nunc et quieto laetior otio
Pulchris in hortorum viretis
Deliciare, tuamque laudans
Non invenusto pectine SVAVIAM,
Nymphis propinquis invidiam creas
Haud paenitendam. Te canentem
Ad numeros modulata verba
Mirantur ipsae Neccharides Deae,
Mirantur ALTI culmen Oreades
LUCI incolentes, cum Napaeis,
Cumque hilari Dryadum caterva.
Te nemo non vatum ecce recentium,
Queis sancta cordi Psaltria, Teutono
In orbe novit: nemo in urbe
Non veneratur, amat, colitque
Summatum, et imi de populi grege.
Nec quisquam Alastor advena Baltico
Movere de glaeso [Orig: glesso] tibi audet
Exstimulante furore litem.
Securus aevum degis, amans Dei.
Cui dedicandos [transcriber: erroneously, two 'dd' in 'dedicanddos'], fare age, principi
Credam tot annorum labores?
Tene dehinc via LUDOVICI
Praeclaram in aulam ducet idonea,
Cui Virtebergen Tecciaque arva avus
Paterque liquit possidenda?
Doctus enim est pol et eruditus,
Et liberali munificus manu;
Nec non amator nobilium artium
Cluet Minervae, quaeque sacris
Dia reperta dedit Poetis
Callere Riphaei pater Orphei,
Silvas trahentis, celsaque montium
Acumina, ad vocale plectrum,
Threiciaeque lyrae sonores:
Quos tu novella dum fide temperas,
Scitus sacrorum, IANE; Heliconides
Templo in Deorum consecrarunt
Aureolam citharam merenti.
VIRGINIS spicam gravida refertam
Fruge, Sextiles [Orig: Sextileis] referentis Idus [Orig: eidus] ,
Ecce dum puri radiosa torrent
Lumina Phoebi;
Post graves aevi dubii labores
VOLFII cano senio gravati
Quarta natalem videt atque sexa-
gesima messis.
Vix foret tantum sibi polliceri
Ausus extentae spatium senectae;
Vix eo duci stata credidisset
Momina posse,
Calculi mordace dolore pressus,
Inque se tortos male fractus artus.
"Ut genus perfert hominum malis ob-"
" noxia terga."
Nunc satis vixisse sibi superque
Iudicans, libris quibus incubabat
Rite perfectis, et ad umbilicum
Non sine summa
Laude perductis, poplite expedito
Se viae accingit, FABRICI, terendae
Omnibus, quicumque brevem caduci
Carpimus auram.
Quod nisi caelebs iuvenem senemque
Lectus excepset, vigilesque totum
Improbis immersum operis lucernae
Nocte silente
Prorsus insomnem studio occupassent;
quei tot e Graiis monumenta chartis
Urbe donasset Latia, stylumque
Teuto bilinguem
In scholas traduxet iners Suevas?
"O labos, invicte labos; quid, acri"
"Perfica adiutrice, tibi molestum est"
" Aut grave? quid non"
"Elaborato graphice expolitum"
"Destinas fini? quid inabsolutum"
"Linquis? aut cuiae tua dextra limae"
" Parcere suevit?"
"Ad capessendum varium laborem"
"Scilicet nati sumus. hic minores,"
"Ille maiores onerum ingruentum"
" Sustinet ultro"
"Sarcinas. est cui mediocre tantum"
"Pondus incumbit tolerare. quosdam"
"Otii perdit neque liberalis"
" Nec sat honesti"
"Torpor, et socors animi veternus."
At Deae, Phoebi comites, volentem
FABRICI tranquilla sequi beatae
Commoda vitae,
Me iubent (assint utinamque vires)
Acta Francorum proavita regum
Dicere, et res non humili graves in-
cludere torno.
"Conditor tantis numeris quid optem
"Mi dari, doctum nisi et eruditum
"Principem; cui tam placeant recentis
" Carmina Musae,
"Quam viris prisci placuere saecli?
"Sed iacent artes, iacet ipsa Pallas
"Spreta cum Musis; nec amat potentum
" Aula poetas.
QUO quo rapit te fervida vis animi
HILDENSAEME? age-dum, non radio tibi
Sollerte descripsisse terras
Sat fuerat, regionibusque
Et insularum portubus artifices
Designasse typos; quin etiam polum
Utrumque felici dioptra
Aetheriosque globos pererrans,
In tam remotas te penitrare vias
Molirere sagax? Ecce Platonici
Iam Pandochei nexiones
PROMNITIUS mihi comprehensas
Tenet fideli pectore, easque tenet
SALGASTUS veteri nobilis a domo.
Edisne maturas in auras,
An latebris sepelire mavis
Conscripta dextro quae tibi sunt Genio?
"Edis nempe, neque his laevus (uti solent"
"Plerique) praelivore blattas"
" Aut tineas alis invidendas."
Te STURMIANAE vox lita melle mero
Suadae commonuit: tu bene providus
Pares monenti. nam quis usquam
Tam capiti neget erudito
Obtemperare, et canitiem nivei
Amplecti senis? ut qui sapientius
Quam Zoilorum iudicare
Turba furens, meliusque multo
De rebus ipsis elicienda bona
Vestigare oculis atque animo queat,
Complura longo doctus usu, et
Pluribus experiens ab annis.
O qui tot astrorum, et variabilium
Ambagum facili lubrica tramite
Aequare calles, totque vasto
Conciliare plagas in orbe;
FRANCISCE dic, queis (sic mihi Phoebus eris)
Insistant poplites hice recessibus,
Ubi det inventam, atque demum
Fixa RHODEN mihi meta iungat.
Aut ipse mundi memet in avia duc
Tecum, conspicui verticis alite:
Nam Daedaleis spero in aethram
Remigiis fore sublevatum.
Hinc conspicatus fertilis Eutopiae
Fines, corda gravi libera pondere
RHODES peroptato reponam
Endo sinu, requiem potitus.