PAULI MELISSI SCHEDII FRANCI MELICORUM LIBER QUARTUS.

AD ELISABETHAM ANGLIAE REGINAM.

LEGISTI numeris quas dedimus Pindaricis strophas:
Legisti Melicon tres [Orig: treis] alios libros;
Quorum primus, ELISA,
Magnorum inclita Caesarum
Et Regum atque Ducum, quos celebro, numina continet,
Alter se Comitum nomine venditat,
Illustrique caterva
Clarorum ante alios virum.
Castis virginibus tertia, nec non Heliconiis
Consecrata viget pagina feminis:
Inter quas tua virtus
Tanto splendidior nitet,
Quanto nobilius laude nova promerita es decus,
Nymphis prae reliquis sic radians, uti
Stellis endo minutis
Scintillante Venus face.
Quartus nunc sequitur cum sociis legitimo liber
Comprendens seriem temporis ordine,
Annorumque iuventae;

Ut quemque Aoniis aquis,
Non Zytho cecini, vel Bromii potibus ebrius.
Namque et Nephalie sobria sobrio
Puram e fonte bibendam
Lympham Clitorio dedit,
Suadens indolis atque ingenii vim moderarier
Leni temperie. Quae ruit impetu,
Ceu torrentibus undis
Spumas saxaque multa agens
Transalpinis Isax praecipiti volvitur agmine,
Haec oblita sui saepius obvios
Intus vena liquores
Inconsultior egerit,
Buccae quo vacuum cumque modo prompta repleverit,
Et vano strepitus obtuderit sono
Conturbatior aures:
Qualem gutture ab improbo
Anser clangit iners aerias per nebulas volans,
Cycnorum opprobrium suave canentium.
Tu REGINA susurris
Sic applaudito naeniis,
Ut non tam numeres, quam trutina, quae cano, ponderes
Vestras Ausonio carmina barbito
Divulgantia laudes,
Europaea per oppida
Non solum celebres, verum etiam (si Genius favet
Coeptis) perque Asiam, perque Libystidis
Orae tesqua, novique
Orbis multiplices plagas,
Famae praepetibus remigiis, atque adeo omnium
Vatum iudicio sic memorabiles
Cuncta in saecla futuras,

Ut faustissima posteri
Haec, queis vivere te contigerit, tempora praedicent,
Aevi participes nonnihil aurei,
Ascribentis Olympo
Te aeternis graphiis Deam.

AD HIERONYMUM WOLFIUM.

TANTIS Amores me sibi vinculis
Accopularunt, ut neque fortius
Cauti Prometheus, nec retortis
Arctius Andromede catenis
Sint alligati. num mihi Gordios
Impune nodos irresolubiles
Anceps Alexandri machaera
Discidio fragili resolvat?
Constringe VOLFI mutua valdius
Haec fibularum labra tenacium,
Hamoque circumda trilici
Brachia Amicitiae fidelis.
Annecte firmos candide circulos;
Quales Olympi Iova domestici
Nec firmiores nec tenaces
Cardinibus magis applicavit.
Hinc te per altas aetheris orbitas
Sublimis infer, Maeonio pede
Momenta natalis diei
Pandere Francigenae Melisso.
Te, quid figuris Zodiacus ferat
Obliquus, et vim noscere siderum
Fixorum, et erronum meatus,

Uranie docuit magistra.
Insomne, dices, ut caput ignei
Draconis ortu surgat, et albuli
Horospcopo sit iuncta Cycni
Cauda, via in liquida volantis:
Iuxtaque apertas Pegasus inferat
Sublimis alas; Pegasus, ardua
Qui calce rupem verberando
Aonias reseravit undas.
Dices, ut Orphei Threiciae lyrae
Stellam ministret Cypria dexteram; et
Devexa praeceps ima caeli
Occupet Oarion; sed alto
Victor triumphet Phillyrides polo,
Senex ad unguem qui citharae sciens
Praeceptor instruxit canentem
Aeaciden. Referes, ut almo
Soli Venusque et Mercurius comes
Sint inquilini Eudaemonis aedium;
Qua curvipoples limitatis
Aegoceros stabulat sub antris.
Porro minaces Falciferi manus
Canes, aristam qui prope Virginis
Exspicat: hinc Martem cruentum,
Verberaque anguinei flagelli;
Hostes professos coniugialium.
At non omittes retrogradi Iovis
Robur, potestatemque Lunae
Prosperiore loco micantis.
Tandem explicatas auguris in modum,
Divine VOLFI, sortilegi vices
Fatique Fortunaeque (quantum

Astra Deusque sinunt) recludes.
Divina fari verba tuum est: tuum est
Celsas in arces scandere. Lubricis
Utcumque nos metimur astra
Visibus, ah humiles videri.
In me supremi (sentio) numinis
Praedestinato vis agit enthea:
Verum supinato reclines
Mox eadem mihi tardat alas.
Frustra volatu Daedalon assequi
Tentaro: frustra Persea finxero.
"Frustra laborat praepeditus
" Bellerophonta sequi viator.

AD IOSEPHUM SCALIGERUM, IULII CAESARIS F. [Abbr.: FILIUM]

EN TE nunc iterum meis ocellis
Quantus quantus es, o propago Divum,
Venerande IOSEPHE, palam
Exhibuit videndum per imaginem
Somni conciliator ipse Morpheus,
Plane ut saepius antea. Ruebam
Manuum tenaci cubito
Approperans in amplexum, et in osculum
Festinus rapiebar appetitum.
Numquam pol neque te uspiam locorum,
Neque adaemulatam effigiem
Artifici intueri similamine
Contigit mihi: iuro, iuro sancte.
Unde ergo faciem tuam et staturam
Mihi conspicari licuit,

SCALIGER? unde transmissa sub has meas
Palpebras per inane, forma sese
Spectris insinuavit ipsa vivis?
Quid acumen affers Sophiae?
"Ne, sit oportet ingens amor ille, amor
"Absentem potis advocare amicum
"Divinae radio capace mentis.
Nimia illa cordis calidi
Fax, animique desiderium trahax;
Tum quae nocte dieque ventilatam
Argutatio cogitatioque
Speciem modis mirificis
Format imaginando: peridoneum
Post, artus requiete alente fessos,
Sensibusque oculisque praefigurat
Simulacra seu Pirithoi
Euryalive, seu Theseos optimi.
Sed iam crediderim satis superque
Illusisse mihi ista somniando.
Reliquum est, uti quam cupido
Lumine viderim umbram similem tui.
Per phantasmata caeca contigendam;
Contra tam cupide ipse membra aperti
Modo praebeas corporis his
Vultibus intuenda, o animae duplo
Plus quam dimidium meae. Parumper
Praestolandum erit. at manus negatas
Decimaeque pensare moras
Messis amarit una illa diecula.

AD NICOLAUM CISNERUM, TRIBUNALIS IMP. [Abbr.: IMPERATORIS] ASSESSOREM.

SUAVIDICUM resonis poscor melos integrare nervis,
Seros in annos posteris canendum.
Huc ades o CISNERE. lyram cape, candidumque mecum
Virente crines pampino revinctus
Natalem celebra. ter et o quater invocemus altum
Musas novenas, Gratiasque trinas,
Sobria libando Rhenensia, Franculaeve pressos
Vitis liquores, Neccharisve dona.
Cantemus pariter. viden ut bona signa dent hianti
Lauri melodo, proximaeque myrti?
Idibus Octobris Musae, mea cura, Mantuanum
Videre natum primitus Maronem.
POSTHIUS has Germersemius quoque, Gratiarum alumnus,
Ortu beato consecravit idus.
Hunc, medicum et vatem finxit catus artium magister;
Illum, poetam nemini secundum.
Ille vagum Tiberim tenuit fide Minciumque docta:
Hic (ecce!) Thenum sistit atque Maenum.
Alter curam habuit culti gregis atque ruris: alter
Curat potentum sanitatem et hortos.
Condidit aeternas chartas Maro: Posthio futuris
Aeternalibus incohata fama est.
Indelibatam Andinus sibi gloriam paravit:
Intacta laus et Posthium sequetur.
Suggere quod reliquum est, Phoebi decus o, poeticaeque
CISNERE turbae fautor arbiterque.
Ingrediens priscis rem laudibus, inclitam recenti
Virtute praeco gloriam meretur.

AD IOANNEM HAGIUM FRANCUM. DE OBITU PETRI LOTICHII SECUNDI.

IANE O SECUNDI prime sodalium;
An fama pennae verbere Noricos
Petivit agros, lugubremque
Maesta obitum tibi nuntiavit
Clari Poetae, plus oculis tuis
Subinde amati? Me prope nuntius
Funebris a Nicro huc profectus
Terrifico exanimavit ictu.
MAENUS stupescens attonito parem
Nymphaeque tristes me, velut antea,
Vix nosse prae squalore dicunt:
Usque adeo mihi luctuosus
Est pectus angor. STYRMERIAS genas
Coram videres, oraque RUGERI,
Quicum [Orig: Queicum] hospitatus sum; recenti
Utraque pallidiora cera
Iurare posses. Occidit, occidit
Haud parva nostrae gloria FRANCIAE,
Flos ille vatum cultiorum,
LOTICHIUS, Charitum voluptas,
Leposque Musarum, et nova Apollinis
Imago, nostris vix modicos dies
Ostensa terris. Sicne linquis
Triste solum, et petis astra? sicne
SECUNDE amicos deseris, et secas
"Spem curtam amicorum? heu breve et irritum

" Stamen vacillantum Dearum!
" Heu subito cita fata casu!
Venisse me, messem ante modo unicam,
Ad MYRTILETI moenia, nec tuos
Vidisse vultus, o SECUNDE;
Nec sociam tetigisse dextram?
Habere nullam abs te Schedium notam,
Nullum et charactera ingenuae manus?
Ecquis Poetarum recentum
Nunc Elegos canet, Eclogasve
Aeque elegantes? quis pedis impares
Modos Phalaeci? Cui dabitur, bono
Aequare dignam posse versu
Phyllida, Callirhoenque pulchram,
Longoque amatam tempore Claudiam?
Ut hoc praeoptet quis, tamen anxium
Frustra laborem sumet, HAGI,
Sidera ni faveant aventi
Movere plectrum. quin sciet hoc idem,
'Si promptiorem quis (sed enim boni
' Nascuntur, haud fiunt, Poetae)
Possideat Genium Secundi.

AD CONRADUM DINNERUM ACRONIANUM.

ALUMNE Musarum, decusque
Patriae, Suevaeque gentis gloria
DINNERE, Phoebi purpuratis
Clarior surgentis ortu vultibus:
Tuo faventes en honori

Candido, lucem rogamus candidam,
Quotquot Medusaeis Poetae
Rivulis lavamus affatim labra.
Plaudit tibi novem corona
Virginum, cum Gratiis decentibus.
Surgit tibi Latous heros,
Frundibus comas revinctus laureis.
Nymphae colentes uda ripae
Fertilis fruteta gaudent Maenides.
Arridet usquequaque vernis
Collibus nitens amoenum apricitas.
Spargit rubente humum roseto
TYNDARIS, miscetque lilia albula:
Funditque olentes picta florum
Mater hic [Orig: heic] et flosculos et herbulas.
Ergo nova DINNERE macte
Gloria, nostro aequa consultum duci
Ascite, praesentis diei
Terminos signes lapillo candido;
Et delibutus affluente
Gaudio laeteris exsultim licet.
Sparten adeptus es cupitam.
Postumi contingat ut custos tori
Pudica, nil minus studeto;
Quo tibi reddatur illa pulchrior
"Ornatiorque Sparta. Mundi
" Sis erus licebit, audias item
"Late tyrannus; ipsa desit
" Pectori solatium maesto ferens
"Serena coniux: hercle mundus
" Amplius nec mundus est, nec esse quit.

AD IOANNEM POSTHIUM GERMERSEMIUM.

'QUONAM ista, POSTHI, Barbaries ferox
'Nostrae occupavit Teutoniae plagas?
' Quo prava consuetudo saevos
' Inveteravit apud Cyclopas,
'Ut nil in usu sit mage, quam scyphis
'Certare, et haustus ordine Bacchicos
' Diesque noctesque integrare; et
' Nobilium iuvenum solutis
'Versantum in aulis non modo perdita
'Lymphare sumpto pectora toxico,
' Verum et frequentantem cathedras
' Gymnasiorum ubicumque coetum?
'Quocumque vertas lumina, nuspiam
'Potu vacabis. Pestis in omnibus
' Haec regnat antris angulisque,
' Sponte recepta, et amata, et ulnis
'Ambabus amplexata libentius,
'Quam vita frugi et sobria. Fluctuum
' Levere citius spumeorum,
'Prensus in undisonis procellis,
'Turbante Santonica aequora Circio;
'Quam libereris turbine adobrutus
' Bacchantum oborto, gurgitumque
' Ingluvie violentiorum.
'Probrosa labes haec, sceleris rea,
Pro liberali se mihi venditet
Virtute, POSTHI; nobilisque
Nomen Amicitiae tuendum

"Ementiatur? Mitto Academias,
"Quas ceu popinas visere publicas
"Plerosque cernis combibones:
" Mitto, licent quibus omnia, aulas
"Culpatiores. nam mihi nulla adhuc
"Censura morum credita, nec fides
" Commissa legum sanctionis.
" queis studium est veteres Poetas
"Velle aemulari, carminaque inclitis
"Iugare nervis; hos ego crebrius
"(Pro crimen!) insana furentes
"Ebrietate madere miror,
"His vulgus applausum et nova gloriae
"Praeconia addit, sint quasi nonnihil,
" Totamque tales Hippocrenen
" Imbiberint gumiae atque ventres.
"Fontes Camenarum, ubere limpidum
"Vena scatentes, iugiter irrigant
" Bonis Poetis sobriisque
" Corda animumque vigentiorem,
"Non ructuosis hisce gulonibus,
"Siccare natis dolia, et infimas
" Valenter exanclare faeces,
" Non sine pernicie iuventae.
Ne forsan horum par alicui puter,
Existimanti Teutonas ebrios
Audire ad unum omnes vel esse;
Plurima pars ut opinionem
Hanc (exterarum intellige gentium
Cives honestos) mente ita fixit, ut
Vix credat aliter: provideto
Mi Pylade, et mea vindicato

A criminosis nomina vocibus.
"Quippe ebriosos exsecror oppido, et
" Quos numquam amavi, semper odi;
"Quique odio mihi, numquam amabo.

AD FONTES FRANCIAE.

LIMPIDI fontes, et amoena pulchris
Fontium rivis loca, vosque Nymphae,
Quibus [Orig: Queis] decem totos mihi nunc carendum
Amplius annos:
Ah siti vestros quoties anhela
Pressus optavi gelidos liquores,
Obviis possem quibus aridas re-
Stinguere fauces!
Iam sed heu multo magis acriusque
Tam salutares avidis petisso
Haustibus lymphas, peregrinus Hunnum
Miles in oris:
Caesarem Thracas meditantem in hostes
Arma, dum Martis studio secutus,
Igneos saevi tolerare cogor
Sideris aestus.
Quam velim molli recubare in umbra,
Qua citis STRAEON sonat uber undis,
Frundeas inter corylos, virentes
Inter et alnos!
Consitos laetis patrios viderem
Vitibus colles, Cererisque campos
Fertiles, hortosque sacros, et antrum
Fontis aviti.
Hic [Orig: Heic] ego evitans medio sub aestu

Fervidos Solis radios et ignes
Amne mersarem gelido calentes
Corporis artus.
Interim (nam vos mihi denegatur
Cernere) o fontes, o amoena pulchris
Fontium rivis loca, vosque casto
Pectore Nymphae
Millies salvete mihi. Perennes
Sint aquae vobis, viridesque semper
Populi densa corylique ripas
Frunde coronent.
"Post gravis belli varios labores,"
"Post vices duras miseramque sortem,"
"Dulce post longos meminisse casus"
" Ante malorum".

AD VICTORINUM STRIGELIUM.

QUI primus a suavitate, ceu iocans,
Gentem vocavit Suevicam
Musis amicus hic comesque Gratiis,
Carusque Cypridi fuit:
Hoc nemo quisquam nec venustius, nec est
Locutus umquam verius.
Tacebo comes, melleas, affabiles
Matrum puellas gaudia;
Quas aut Nicer formosus, aut pulcher Lycus
Nymphis creatas blandulis
Eduxit. unum te, STRIGELI candide,
Vel millium ponam loco:
Nil quippe suavius, nihil te mitius

Vidi, nihil iucundius.
Perennis instar fluminis facundia
Linguae diserta profluit,
Quod fert Hymettus melle dulci dulcior,
Imbrique puro nectaris.
Suadae medulla tu decusque gymnasI,
Tuaeque flos es Sueviae.
Quis me furorum submovens Phoebi choro
Ad arma concitat fera,
Tubas ut inter Martiumque classicum
Nudo rigescam sub Iove:
Qua flavus Istri bracchium latum Arrhabon
Subit recurvis flexibus?
Ne dulce te coram loquentem audire, ne
Vultus identidem tuos
Spectare malim, et usque perfrui invicem
Consortione mutua;
Senique pariter deditus Camerario,
Tiliae sub umbrosae comis
Sedens in herba, musicis Elystrium
Mulcere flumen cantibus.
"Frustra ah dolemus. Quod nequit mutarier
" Fatum necesse est perferam.

AD RHENUM FL. [Abbr.: FLUMEN] GERMANIAE.

RHENE, Nympharum pater, amniumque
Rex, quot Almanis dominantur oris;
Sic suas Maenus tibi, sic Mosella
Misceat undas:
Pone turgentes age pone fluctus;

Mitte conceptas violenter iras,
Meque vectoresque bonos phaselo
Devehe salvo.
Mens Agrippinis avet appulisse
Finibus, cyclique modo secundum
Litora extentam locupletis urbis
Visere molem.
Ipse fecundis gravidos racemis
Palmites, frugesque novas, et hortos
Fructibus fetos, nemorumque silvas
Carmine dicam.
Splendidas urbes quoque cum beatis
Villulis, arcesque iugis in altis,
Et iuga et valles, scatebrasque vivo
Fonte fluentes
Concinam. DRUSI veterem colossum, et
Teutoni Mavortis et AesculapI
Fana cum castris, Ubiorum et aram
Nullus omittam.
Hinc Palatinos proceres ducesque
Lesbiis pandet fidibus Thalia,
Francica regum fuerint ut olim
Stirpe creati.
Audiat voces melici Melissi
Colloquens antro genitiva Diva:
Aura tangendas resono sonore
Vreberet aures.
Te sed in primis cano, RHENE felix,
Quemque, curarum gravium levamen,
Educas ripa laticem Lyaeum
Dives utraque.
Bacchus hos montes amat, hosce colles;

Bacchus has valles colit, hasce ripas:
Bacchus hic [Orig: heic] Aram sibi consecravit
Perpete ritu.
"Subiicit versus liquor hic poetis,
"Musicis cantus. Cereris valete
"Cocta. tu vatis memor, i perenni
RHENE meatu.

AD IOAN. [Abbr.: IOANNEM] POSTHIUM.

MAGNUM iter emensi nuper ab ultimis
Bellicosorum finibus Hungarum,
Ubi prima militando
Rudimenta peregimus;
Pannonia a tergo, et Bavariae plagis,
Et Lyco pulchrae flumine Sueviae,
Nemetumque agris relictis,
Sublabente Coloniam
Cum sociis priva nave tetendimus.
Inde per munita oppida Belgicae
Iter institutum agentes,
Caeruli vada Sequanae
Contigimus, laetamque amne Lutetiam.
Hic [Orig: Heic] salutares accidit invicem,
Fideique pectorisque
Testes, iungere dexteras.
Iamque animus, POSTHI, fert Ligerim prope
Spumeum cursus vertere, et Auream
Cito patriam AUDEBERTI
FLORENTISque avibus bonis
Visere: queis vatum sacra recentium
Turba divinos pro meritis litans

Memor, ut pium est, honores
Dextra Pallade deferet.
At mala quas cornix augur ab aesculo
Dictitat voces? scaeva ea non bona est.
Viden ut ferens ab aris
Spinturnix amet assitum
Tollere carbonem? Quam metuo, brevi
Ne per adversas urbibus heu manus
Furiosa portet atrox
Mars incendia Galliae:
Ipsa ruent bello fana, ruent domus:
Occident fortes, occidet inclitus
Utriusque flos cohortis,
Multis non sine cladibus.
'Ah potius causam pacis, et otium
' Posce tranquillum turbida natio,
'Et ab inquiete turma
'Dehortare salubribus
"Consiliis regem. Nulla salus, fides
" Nulla Gradivo. Tu pete Belgium,
Et ibi morare POSTHI.
Antverpia iam tibi
Hospitium certum praeparat. Inde erit
Ut pedem Eoae Francidi creduas:
Tibi quippe destinatos
Illic MAENUS habet Lares.

AD GEORGIUM BUCHANANUM SCOTUM.

TE sive chordas Pindaricae lyrae, aut
Horatianum tendere barbiton

Miratur Euterpe, canoram
Scita movere chelyn sororum;
Seu te Maronis grandisona tuba
Laudes canendo caelicolae patris
Stupet triumphantem, gravesque [Orig: graveisque]
Maeonidae numeros tonantem:
Palmam, virorum praemia fortium
Contentiosis digna laboribus,
Concedat ultro iam necesse est
Emerito tibi, BUCHANANE.
Quam VIDA docti lumina saeculi
Vicit poetas carminibus piis;
Tam plectra VIDAE ceterosque
Tam potis es superare vates.
Quod si Camenis inferior tuis
Est nostra Clio, debilis assequi
Sublimitates, verticosi
Cui minitant iuga celsa Pindi;
Musae memento dona bifariam
Divisa. nam me multiplici sono
Natura pangendos ab arte
Harmonica docuit canores.
His Rhenus, his et perstrepit Ister; his
Et Albis, his et tu reboas Sala:
Hos Maenus audit, Nicrus audit:
Hos et amant mea cura Nymphae.
Compacta virtus fortior in tua
Exsistit una. tu decus orbis es,
Vatumque princeps, BUCHANANE, et
Sol SCOTIAE, genitalis orae.
Certare Soli sidera nulla sint
Ausura, quamvis splendida maxime;

Nedum verecundae Melissus
Franciados nigricans ocellus.

AD FRANCISCUM PORTUM ET THEODORUM CYSSAM.

"ANNUAM quisquis revolutionem
"Siderum, cursusque notat perennes
"Solis, et Lunae vaga menstruali
" Cornua motu:
"Tempus ut metis eat ordinata
"Lege praescriptis, vicibusque certis
"Mutui norint et hiems et aestas
" Foedera pacti:
"Nonne divinum sapientis aequum est
"Mentis admiretur opus, simulque
"Cogitet,quam sit brevis imminuti
" Terminus aevi?
"Vita casuro similis ligustro,
"Vita labentis fugit instar undae:
"Mors rapax, horam properans, ahena
" Falce propinquat.
Dum tamen leti memor affuturi
Rite natalem celebrabo lucem,
Debitor vitae, Iove quam volente
Caelitus hausi:
Huc ades quaeso Theodore CYSSA,
Tristibusque aegris animum solutus,
Mitte commisso tibi mitte paullum
Pro grege curas.
Tuque non frontem tetricam Catonis
More, sed vultus hilares resumens

PORTE, Graiorum tragicum severos
Linque cothurnos.
'Haud quidem vobis dubia est parata
'Cena, frugali sed opima victu:
'Multa si deerunt, tamen acquiescet
'Aequa voluntas.

AD HIERONYMUM WOLFIUM.

HIEMS recedit algida;
Ver appropinquat, ora
Dulci tepore proferens,
Optata floribusque
Volucribusque blandulis:
Et tu severe VOLFI
Nondum senectae pondere
Eo gravatus usque,
Ut occubantem tristibus
Mors obruat tenebris;
Vitale lumen nuntias
Iam iamque deserendum?
Quin vive, vive, donicum
Tuo prius Melisso
Incidat Atropi manus
Abrupta fila, cumque
Filis colum. Non, non tibi
Umbras nigras timendum
Atrasve Tartari domos;
Convexa sed Tonantis
Rotatili volumina
Speres videre motu
Post fata. Ceterum prius

Quam te locet supremo
Perennis immortalitas
Caelo; fac o bibendos
Fontes olori des meo,
Quos Pegasi refodit
Subcalcitrantis ungula;
Iisdemque, dum nitet ver,
Iunonias riges rosas.
Sic te meus volatu
Pernice sevectum CYCNUS
In alta (qua fluente
Iter renidet lacteum
Liquore) tollat astra:
Sic usque lirino comae
Tibi fragrent inunctae.

AD PERUM ENOCUM.

SI certamina Marte singulari
PETRE vis inire mecum;
Fac congrediare, quandocumque
Tibi collibebit.
Utrumcumque probaris eligendum,
Neque velitationes
Leves, neque dimicationum
Gravium recusem
Pugnam. sed vereor, Latina ne non
Satis apta Gallicanis
Sint arma. pares utrumque sane
Melius decerent
Instructus. tamen experire quidquid
Potes, aleaque iacta

Sortis geminae, reduplicatas
Age prome vires:
Nervos tende, manus pedesque firma,
Animosque semigraecos
Fortis simula, quibus resistas
Equiti Latino.
Ut bis, ter, PETRE Celticis ovatu
Potiare victor armis:
Plures mihi Teutona arma tandem
Parient triumphos.

AD IOAN. [Abbr.: IOANNEM] CRATONEM CRAFTHEMIUM.

AMABO, mi dulcis CRATO,
Cur insignia nolim
Mea decorari carmine,
Aut praeconia nostro
Doctissimorum saeculo
Acceptare virorum?
Si Ferdinandus Caroli
Frater Caesaris, et iam
Tum Caesar ipse, laurea
Me donare corona
Equestribusque censuit
Clarae nobilitatis
Insignibus, dignum sua
Maiestate futurum
Opus; probante Caesaris
Mentem consiliumque
Toto senatu iudicium:
Non est quod sibi turpe

Quisquam putet, vel se et suis
Indignum, celebrare
Cycnum meum cum liliis,
Munus Caesaris ingens.
Ferunt Alexandrum ducem
A solo nisi pingi
Apelle, et a solo nisi
Lysippo sua fingi
Simulacra noluisse: sic
(Nam Cres me quoque Portus
Regem poetarum facit)
Non haec lilia cuivis,
Nec hic olor meus volo
Describatur; at illis
Solum viris, qui temporis
Nostri sunt decus. Inter
Hos cum [Orig: quum] locarim te CRATO,
Aegre ferre videris:
Quod dum facis, non iam meo
Adversaris honori,
Tuis sed obstas laudibus.
"Nam ponique legique
"Doctissimos inter viros,
" Certe maxima laus est.

AD OBERTUM GIPHANIUM IC. [Abbr.: ?]

IMPROVISA Ducum fata cadentium,
Insontesque animas immerito truci
Letatas nece flentem
Multis non sine questulus,

Cur OBERTE iubes luctisonam chelyn
Me suspendere? cur parcere lacrimis?
Non me caute Niphates,
Nec Tauri iuga saxea,
Horrens nec genuit vertice Caucasus;
Sed mater, Salici filia fluminis,
Quae Germanida Francen
Agnoscit patriae sinum.
Heu! plenos oculis fudimus uvidis
Fontes, tot scatebris largiter uberes,
Ut te MAENE fluentis
Exundantibus auxerint.
Mirans alluviem Rhenus et impetum
Horret: Neccharicae Naiades stupent,
Et quas ripa Mosellae
Tristes [Orig: Tristeis] elicit alveo
"Nymphas. Haud erit, ut mens hilari ioco
"Frontem maestitiae nubibus obsitam
" Exporrecta serenet:
" Vultum fingere Protei est.
"Laetos laeta iuvant. cur aloe favos,
"Cur absinthia (vah!) loton amaricent!
Dic FALCONIS habenti
Nomen, Cecropiis fides
Aptet carminibus, tam citharae sciens,
Ipsae Maeoniae quam bene virgines.
Quo dicente, GIPHANI,
Dulcis gaudia lectuli;
Ad caelum lepido sponsa vocabitur
Versu, suave animae delicium tuae:
Totam se quia gaudet
Consecrare Talassio.

Mater tediferum dia Cupidinum,
Trino dispositis ordine Gratiis,
Myrtataeque Napaeae
Ductabunt agiles [Orig: agileis] choros.
Applaudet Dryadum gyrus amabilis,
Et quanta est iuvenum turba procantium:
Ipse expers Hymenaei
Abstrusos recolam specus,
Deplorans miserae funera Galliae.
Nam nec nobilium me fieri puto
Vatum, nec mea cedris
Insculpent metra posteri.
At vobis subolem sufficiat novam
Heredem patrii Cypria nominis:
'Forsan me sine prole
'Sors vult luctibus immori.
"Ut CHRISTO placitum, sic volupe est mihi,
"Pressum cura licet tundat acerbior.
" Illo dulce volente est
" Vitae claudere terminum.

AD HUGONEM DONELLUM IC. [Abbr.: ?]

"RERUM universi daedalus artifex,
"Cum [Orig: Quum] ceterorum gens animantium
" Demissa terram spectet imam,
" Os homini dedit elevatum
"DONELLE. Rectos hinc oculos iubet
"Illum, sequaces luminis, arduam
" Fidenter arrectos in aethram
" Tollere caelicolae parentis.
"Mortalium pars ah quota lucidas

"Sphaerae petissit stelliferae vias?
" Plures sequendi proniores
" Triste chaos Stygiamve lamam.
"Tellure fibras ipse quidem satas
Compagis in te coproreae geris;
Mentem propagatam superne
Spiritus ad superos reducit.
Idem soporis nocte pigerrimi
Clarae fugata sidere lampadis,
Spissis ab umbrarum tenebris
Me residem vigil excitavit,
Dias aperturum aetheris orbitas;
Praegestientes queis animae piae
Vehantur, ad sedes beatas
Uranie duce destinatae.
"Astraea iusti propositi tenax
"Solam relictam Spem viduae modo
" Orbaeve pupillae revisens,
" Cardine lapsa poli supremo
"Ius, aequitatem, consilium, fidem
"Secum faventi numine rettulit:
" Regnis gubernandis forensi
" Cum trutina Themis alma praesto est.
"Sanctas Iehovae quis modo filias
"Suspectat, ut par est? quis amabiles
" Divas honorat? quis receptis
" Hospitium sociale praebet?
"Supiniores ad bona ceu sumus
"Tutanda, prisci quam fuerant avi;
" Sic nequiores invenimur
" Ad mala quaeque (nefas) patrandum.
"Virtutis altae degeneres patrum,

"DONELLE, fraudem fraude, dolis dolos,
" Et criminosis probra probris,
" Et scelere scelus aggeramus:
"Quondam bimembres sic, genus impium,
"Montem feruntur monte, iugis iuga
" Imposta moliti Gigantes
" Accumulare, Iovem perosi.
"Binis Cyclopum turba sororibus
"Genas cruentis, et laceris comas,
" Non lumen exorbare tantum est
" Ausa furens, animam sed ipsam.
Germana tellus exsilii memor,
Nec plurimarum nescia caedium,
Amanter extorres benigno
Auxilio iuvat indigentes [Orig: indigenteis] .
In te recumbens Spes, HUGO, firmiter
Fiduciam non exiguam fovet,
Astraeam [Orig: Astraean] assertam patrono
Atque Themin fore vindicatam.
Macte ergo votis: assere vindicans
Exterminatas. Te mihi praemio
Illae remactassint, ut inter
Astra recens oriaris astrum.

AD OBERTUM GIPHANIUM.

ATTICAS noctes nimis arcta furvis
Iam diu sub Cimmeriwn tenebris
Arcta detentas rigido, GIPHANI,
Carcere clausit.
Credulam frustra per opinionem
Foveram spes, ambiguas futuri:

Liberas frustra fore destinaram
Compede vinctas.
Qualis, astrorum duce noctiluca
Menstruos gyrante globos, eburna
Futilis parens fore somniorum
Ludit imago:
Haud secus vanis taciti involucri
Hactenus mentes avidas figuris
Noctium Phoebo gravis Atticarum
Umbra fefellit.
Non eas Aristophanis lucernae,
Non eas pernox oleum Cleanthis,
Non eas priva pote luce quisquam
Reddere claras.
Allaborandum fuit, expetitum
Ne iubar fixis radiis abesset,
Cuius obscurae nitor atra nubis
Vela fugaret.
Ecce praelustris face luminosa
Blanditer fulget tibi viva Lampas,
Invidae Lethes metuens Avernis
Stinguier undis:
Lampas, Aurorae similis rubenti,
Ut serenati referans Olympi
Limen, Eoos micat ante Solis
Pulchra iugales.
Illa nimirum thalamis pudicis
Defuit, qua tute carens, carere et
Nos coegisti tot Agellianis
Noctibus annos.
Lucubra cum Luce tua GYPHANI;
Roscidum liba mel, apicularum

Rore tam praestans mage, quam liquenti
Sacchara mulso.
Hanc dehinc Zonas cupide solutam,
Carceris longi forulis reclusis,
Ire cernemus gravidae solutum
Vincula capsae.
Protinus nuptaeque tibique laetum
Hunc favens Lucina diem videndi
Copiam, nobisque tuis, precamur
Rite ministret.
Unico partu simul Atticarum
Noctium dici pater atque prolis
Masculae condignus (io!) merebis,
Non sine plausu.

AD IOAN. [Abbr.: IOANNEM] LAUTERBACHIUM P.L. [Abbr.: ?]

SUAVIAM tuam suavissimam,
Suaviam tuam dulcissimam,
Suaviam tuam castissimam
Pro salute nuntiata
Suaviarer uno suavio,
Oscularer obvio osculo,
Basiarem amico basio;
Mos sed ista, lex sed ista
Improbat vetatque: nec licent
Quae libent. nec hercle tu sinis;
Quin nec ipsa, ut id sinas, sinit.
Musa factitet necesse est.
Si negabis hoc Musae meae,
Si negabit hoc et Suavia;
Quod negas, et uxor quod negat,

Ipse factites oportet.
Ergo quo poeta suavior,
Quo poeta IANE es dulcior
Castiorque; eo tu suaviis
Osculisque basiisque
Suaviare suavioribus,
Osculare dulcioribus,
Basiaque castioribus
Pro salute nuntiata
Suaviam tuam castissimam
Suaviam tuam dulcissimam,
Suaviam tuam suavissimam.
Hoc erit satis Melisso.

AD IANUM IACOBUM BOISSARDUM, VESONTINUM.

ANTIQUITATES, quas perampla Romuli
In urbe miramur, tua
BOISSARDE pridem dextera, haud gravi sine
Labore pictas, tam diu
Latere privis ecquid ah in scriniis;
Ecquid tot annis obsitas
Senere perfers? ede tandem, amabo te,
Et has tuosque Caesares
Spirante factos e metallo vividos.
"Prodesse nati, plurimis
"Prosimus, haud amiculis solummodo.
Non Imperator hic recens
(Ut liberalis est) vetustis cesserit
Pensans labores Regibus.
Auro coronet ille, iustis praemiis,

Tuam remunerans manum:
Lauro decoras ipse (namque hac dignus es)
Tibi renodabo comas.
Addam corymbos myrteasque bacculas;
Auctorque posteris ero,
Laudes ut aeternante versus hos tuo
Scalpant honori in marmore.
VATI-QUE PICTORI-QUE SOLLERTISSIMO,
MUSIS AMICO ET GRATIIS,
PERENNE BOISSARDO SUPERSTITI, DATUM
VIX QUALE CONSTAT MORTUIS,
MERCEDIS ERGO COLLOCANDUM MARMOR HOC
AETERNA FAMA CENSUIT.

AD IOACHIMUM CAMERARIUM PABEPERGENSEM.

"LAUDIBUS merces alii Sabaeas
"Aut Erythraeos celebrent lapillos,
"Quidquid et mittunt pretiosioris
" Seres et Indi.
"Hi Phrygum mirentur opes, at illis
"Aureae mentes hilarent arenae,
"Quas Tagus Gangesve suo beati
" Flumine volvunt.
"Scilicet cordi mihi sunt eruntque,
"Quam diu terris mea vita duret,
"Rara Thesauri monumenta Graeci,
" Gaza perennis.

Bis, ter, o lucem IOACHIME faustam,
Tale qua primum STEPHANI Minerva
Mente complexum dare cogitavit
Provida donum!
At diem multo cano faustiorem,
Quo cothurnatis dedit ecce magnas
Has opes Musis Academiarum
Usque fruendas.
Illius (seu lux foret orta, seu nox)
Queislibet prodesse simul studentis
Nec manus nec mens opera, nec ullo
Victa labore est:
Donec indagata modo hic [Orig: heic] , modo illic,
Mille Graiorum loca pervagando,
Quaeque lustrarit radio sagaci
Florida Tempe.
Unde selectos genuinum ad unguem
Surculos, stirpesque feraciores,
Et seri plantas dociles, ad istos
Transtulit usus.
Ceu vigil navis [Orig: gnavis] operatus agris,
Arborum nata serie, colonus
Educaturas bona ponit almas
Cretica vites:
Aut Aristaeos veluti per hortos
Chloris, herbarum studiosa cultrix,
Areis parcit nisi fructuosum
Condere semen.
Sic nec hic [Orig: heic] lappae tribulive surgunt;
Non filix aut ruscus iners, et aspri
Pullulant vepres, sterilis nec usquam

Regnat avena.
Cardui runcata seges. videre est
Hic [Orig: Heic] nihil senti, lolio resecto:
Ulla nec caulem scit originemve
Barbara radix:
Si qua laus taetra caruisse labe;
Si decus nullis scatuisse mendis,
Qualium libros prope constat omnes [Orig: omneis]
Esse refertos.
Tute quod cernens, IOACHIME, nosti
Millibus longe melius trecentis,
Attice doctis simul et Latine,
Arte magistra.
Ecquis ah, tantas quibus auctor hasce
Consecrat gazas, minus esse gratus
"Certet? ut par est, sua non negentur
" Praemia doctis.

AD SEBASTIANUM SCHEFFERUM.

QUAM diu tuam
Agnellulam
SCHEFFERE deseres,
Expositam rabidis luporum
Dentibus? velut
Ocelluli
Pupilla lucida
Tegmine protegitur reducto:
Non secus tibi
Carissimam
(Ni forsan oderis)

Debueras manibus tueri
Pastor impigris.
Sed hanc puto
Curae parentium,
Dum redeas, bene credidisti.
Quin recurre, quin
Retro vola,
Et cum misellula
Turturis instar agente vitam
Solitariam,
Ingratiis
Osorum et hostium
Laetus ini thalamum iugalem.
Namque te suum
ESTRE manet
Pudica comparem,
Sub tiliae viridante ramo:
Qua canens, piis
Musis sacer,
STRASBURGUS invidas
Carmine sistit aquas Elystri.
Det tibi Deus,
Quod expetis:
Idemque det tuae,
Ipsa quod ante alias meretur
Virgines. Satis
In exteris
Moratus es locis:
I, patriam pede vise fausto.

IN NUPTIAS STEPHANI NEUDORFERI NORIBERGENSIS.

"SI QUIS venustam coniugem vir nactus est,
" Et dote casta divitem;
"Huic margaritas et lapillos Indicos,
" Rubrique baccas aequoris
"Praeferre nolim, nec Midae magnas opes,
" Gazasve Croesi Lydias.
"Talis benigne dexteri solo Dei
" Donatur uxor munere
"Deum verenti. quippe casus haud eam
" Nec fortuita sors dabit.
"Certe supremus omnium multa viro
" Orandus est pater prece,
"Quicumque fidam vult apisci coniugem,
" Pudore casto praeditam.
O te beatum ter quaterque et amplius
STEPHANE, sacratarum decus
Legum; pudico quem BEATRIX pectore,
Fidelis et decens tori
Consors, amoris aestuantem mutuo
Flagrans maritum diligit
Igni; nec (unum praeter) ullos discupit
Lusus Dionae noscere.
Aetatis haec in flore, vitis in modum
Plenis racemis turgidae,
Fecunda similem compari prolem suo
Progignat, aucta fetibus.
Quales in auras hortus educit ferax
Novos olivae termites;

Mensam coronent pulchra lecti pignora,
Mater decore ornet domum.
Lis saeva, turpis ira, et acre iurgium
Procul fugata hinc exulent.
Pax mitis, aequa mens, soror Concordiae
Regnent timore liberae;
Timore vano, qui sinistri vel mali
Quid suspicetur perperam.
Auras Cytheris entheas afflet, meros
Spirent amores Gratiae.
Adversitatum si tamen quid obstrepat,
Quas fert procellosus Notus,
Alisve rigidis Eurus, has lenes statim
Remolliant Favonii.
Tranquilliore sic amantes Cypriam
Sistatis in portu ratem.

AD PETRUM RONSARDUM VINDOCINUM.

NON Galla tantum, scita gravis soni,
Te patriorum litora fluminum,
RONSARDE, clarae personantem
Pectinibus citharae stupescunt:
MAENUS refusis Franciacus vadis,
Me musico, odas cornibus ad tuas
Sollerter elatis serenam
Attonita bibit aure vocem.
Ipsos videres Tubaron et Salim
Maeno influentes, hunc pede dextero,
Illum sinistro, vitrearum
Sistere curriculum sororum.

Sic ad sonores Ismariae fidis
Hebrum reflexis amne ferunt aquis
Stetisse, miratosque voces
Strymona Threiciumque Nestum
Symphoniarum. Quam fuerant prius
Nymphae poetas indigenae sacros
Et Celtin Huttenumque, et ipsum
Lotichium quoque prosecutae
Philtris amantes; tam philotesiis
Te demereri dulcibus extera
Quamvis in ora procreatum,
Francigenam tamen, usque quaerunt:
Matuta pulchro seu rubra Phosphoro,
Seu Vesperugo Solis equis comes,
Lucem diebus, noctibusve
Invehat umbriferas tenebras.
Tuum cavarum margine vallium,
Et frundeorum vertice collium
Nomen susurrantes, adurunt
Tura tibi, tibi vota solvunt.
Te praeter omnes, inclute [Orig: inclite] , principem
Solum poetarum indigitant: ad haec
Patrem Camenarum fatentur;
Stirpis et Hectoreae architectum
Gaudens salutat FRANCIA nobilis,
Secura clausis Hercynii iugii
Silvis: honorem saltuosus
Pinifer ingeminat triumphi.
Quid multa? cantor Franca per oppida
Oblivionem carminibus tuis
Defendo, Germanos docere
Callidus insolitum canorem.

Non usitatis dum ferimur viis
PriscI sequentum tramitis orbitas,
Vestigiorum me recentum
Indiciis iuvat immorari.
Tecum perennis iam Genii PETRE
Pleno, futurum est, plenus ut ipse-met
Fortassis aeternem per aevum
Teutonicum fidicen Camenam.

AD NATHANEM CHYTRAEUM MENZINGIUM.

MELLE et nectare dulcioribus
Respondisse nostris litteris,
Tui fratris Epistula Austrium ad
Quendam rarior prae se tulit,
Mi CHYTRAEE, thalassini lacus
Cum [Orig: Quom] forem propinquus accola;
Hic [Orig: heic] ubi Rhodanus Valesiis
Limphas congregans vallibus
Restagnante celerrimus ruit
Vado. sed cupitis me frui
Responsis hodierna adhuc vetat
Hora, felle longe amarior;
Hora, alumine multo acerbior;
Hora, bile virulentior.
Ergo tute-met entheis sacrum
NATHAN dotibus cor incitus,
Aut frater tuus ille grandior,
Qui roseta carpitis mera
Cultos Varniadum per hortulos;
Aut ambo simul rependite

Vices, aut potius remittite
Exemplum papyri perditae:
Dum me Neccharicis Sionios
Hymnos accinentem ripulis
MYRTILLETUS amoena detinet
Palatina propter culmina.
Ni fiat, mihi creditote, quae
Mel et nectar esse remini,
Vobis tam cito dulcitudinem
Amissura, desituraque
Alvearia sive Hymettios
Favos, seu placentas Atticas,
Seu thymum redolere; quam cito
Versum iri, CHYTRAEE, inaudies
Ob desideriorum anhelitus
Et suspirium frequentiam,
Liquescentem animam ipsius meam
In salsas amaritudines.

AD IOANNEM HORTINUM.

HORTINE pulchri consitor hortuli,
Talassionum flos iuvenilium;
Quasnam corollas nuptiales,
Quae tibi serta parat capillos
Vinctura, cordis fibra tui trahax
Iahel, puellarum eximium decus?
Ecquem geremus fronte ramum
Participes nemoris sodales?
Baccata silvae filia Cypriae
Castis honori est myrtus amantibus:
Murtum Dionaeis Cupido

Coniugibus sacrat osculandam.
Exoticorum vos vice termitum
Herbas fragrantes nectite virgines.
Vernis amictum me sub antris
Timpora rore velim marino
Aut Nerviorum stella MASURIUS,
Aut BUCHANANUS lux Scotiae queat
Spectare, Veronaeque ocellus
SCALIGERO patre procreatus.
Succincta suras, nuda sinum, Dea
Subter beatis Arabiae iugis
Acclinis illibata quondam
Tura legens LIBANOTIS ibat.
Manabat udo ros pede vitreus:
Salubris afflans aura Favonii
Mulcebat herbarum comantum
Summa, levi tremefacta caule.
Hanc irretorto lumine Capripes
Vix conspicatus, fervidior calet
Flammis inardescentis Aetnae;
Fervidiorque focis Cyclopum.
Prendenda Nymphe diffugit ocior
Euro: citatis insequitur furens
Plantis petitor: seminati
Estur humo pia mica turis.
Enata post hinc est fruticis seges,
Puris virentis semper odoribus,
Seu bruma sive aestas recurrat;
Virgineamque notam tenentis.
Salve perenni germine praenitens
Radix, vigescentum aemula frundium
Cedri: ter o salve quaterque,

Suavior arboribus Cytheres.
En hortulorum te CEVALERIAS
Cultrix amoenis inseret areis,
E semigermanis Britannis
Ad vada glauca redux Lemanni.
Non te nives, non horrificum gelu
Laedet, nec aver tristibus Africus
Immane dum stridet procellis,
Nec grave flamen Apeliotae.
Nec supplicabis, cum sities, Iovi,
Torrente prati gramina Sirio:
Quippe est suapte sponte Iuno
Irriguum appluitura nimbum.
Protuberatis mille decentius
Gemmante praegnas cortice surculis
Vestibit apricos, nec absque
Deliciis, tua virga campos:
Sero creatis unde nepotibus
Utroque longum sospite, gestiant
HORTINUS et formosa IAHEL
Texere perpetuas coronas.

AD CHRISTIANUM EGENOLPHUM.

INFERIAS, EGENOLPHE, Christianas
Manibus emeritis tui parentis
Persoluturus manibus profanis,
Spe sine si lacrimas cies profusas,
"Grande puta scelus et nefas. Litandum
"Mente purgata domino IEHOVAE.
Cetera turba, quibus cor atque mentem

Taetra superstitio voraginosos
Inter errores male fascinavit,
Praecipitem pariter ruunt ad Orcum
Aethera tu nitidum, pios alentem
Caelites, fixis oculis tuendo,
Linque solo grave corpus expiandum
Per cineres; tibi conscius salutis,
Nescius sanctos violare Manes.
Umbra beata loci capax quieti est.
O anima optima, quae pie emerendo
Abrahae felice sinu quiescit.

AD IO. [Abbr.: IOHANNEM] BAPTISTAM HAINZELIUM, SEPTEMVIRUM AUGUSTANUM.

TAM dulce, tamque suave, tamque iucundum
Filius ille tuus scribit Epistolium
HENRICUS ad me; Gratiis
Quod Atticis leporibusque Musaeis
Plenum, et cui nihil ipsis in Amoribus est
Aeque refertum amoribus:
Ut huic Minervae temperare non possim,
Nobilis HAENZELI; quin nova carmina, quin
Versus novos illa, et novas
Extrudat artes; queis vetusta, cum vestris
Icta mihi Laribus, foedera amicitiae
Firmata constent publice.
Namque in recenti memoria recordantem,
Qualibus (humanus sicut es) alloquiis
Conviva abiverim satur;
Plus afficit me cogitatio vivax,

Tinnula quam duplici nablia versa manu.
Tantum valet vis insita!
Huic excitatae rursus addidit robur
Cecropio nati littera tincta sale,
Et comitate plurima:
Qua delibutum reddidit mihi pectus
Largiter, humectans ut solet imber humum
Ardente Sole torridam;
Pulcherrimaque matre pulchrior mentem
Filia tum subiit nubilis EUPHROSYNE
Ascripta Musarum choro
Iampridem, et insigni puella donata
Carmine, quod ferro firmius et chalybe
Durabit ipso perpetim.
Puella, dico, cui vel omnium una omnes
Invideant nuruum Sueviadum puerae,
Perennis ob famae decus.
Sed gloria applaudo mihi ipse. collaudet
VOLFIUS orator maximus, et Latii
Graiique sermonis sciens.
Dictabit idem, fonte quo vel assensus,
Mutua vel pietas, votaque sancta fluant,
Iudex amicorum optimus.
Ad me quod attinet, stat (en manum!) sanctas
Aeternare per arrhas in amore ratam
Vestrate cum domo fidem.
"Rara est fides aetatis huius. hacpropter
"Deligere ante iuvat, quam (puto) diligere,
"Amare quod quis ambiat.

AD VENEREM. Cum Io. [Abbr.: Iohannes] Hainrichus Hainzelius uxorem esset ducturus.

MATER venusti pulchra Cupidinis,
Nutrix amorum; si dare quae peto
Spondebis, haud pro me quidem ipso
Dona, sed ingenuo sodale:
Tibi sacellum qua libet [Orig: lubet] aureum,
Sculptis dicabo cum laquearibus,
In quo triumphabunda prisco
More tuae stet imago formae,
Curru duabus vecta volucribus,
Quondam Caystri fluminis incolis.
Ambit NITHARTAEA puellam
Gente satam meus ille Theseus,
Decus Suevorum, HAENZELIDES. Eam
Fac impetratu des facilem viro,
Musis amicam Gratiisque,
Non sine consilio parentum.
Aequum est, ut utrimque irrevocabilis
Praesto voluntas, mutuus et pari
Consensus assit Diva nutu,
Omnia legitimeque fiant.
Postquam illa fidi coniugis in manum
Convenerit, spem ne subolis nega.
Nascatur heres matre feta,
Indolis ingeniique patris
Aevique morum nempe simillimus.
Nascatur exin, deliciae tuae,

Formosa VERONILLA, rubras
Tincta genas, oculis nigellis,
Et crine flavo: fax iuvenilium
Futura flammarum, et iecur haud procis
Tostura paucis. Haecce nostrae
Summa precis, licitique voti est.
Sponso roganti tu Dea tu velim
Plura his petitis largiter annuas:
Nam dignus est, quem continenter
Multiplici cumules honore.

AD CLAUDIUM MAILLARDUM AURELIANUM.

SICCINE cum monstris in aperto (lugubre) campo
Semineces iterare duelli
Pugnas? siccine
Debacchantis oportuit
Oenomanis furiasque pati, saevamque Pyrenei
Vim dirasque minas, et atrocis
Incussum metus
Horrorem quasi Panicum?
Quid spolia ablatae memorem crudelia praedae
Ingenuis? quos regia, clarum
Natos principum,
Nec tutos via praestitit;
Uranium cum Nassobiis, genus antiquorum
Semideum; veterique nepotes
Cretos Bergide,
Burenumque iuvenculum.
Dextra magistratus venit imploranda supremi;
Quae facinus nisi puniat istud,

Ultorem reis
O promittite posteri.
At cave tu MAILLARDE, patens ne rus vel inermem
Postmodo te culpet, vel inertem
" Damnet. Crapulae
" (Eheu) omnia plena sunt.
"Circe etiamnum homines transformes mutat in ursos:
" Induit hic porci, ille leonis
" Mores. Ebrius
" Numquam est dissimilis sui.

AD SIMONEM STENIUM.

CARMINA me saturum tua lectitare
STENI iubebas serio:
Sed tribus ante manus in avariores
Festina signis venerant,
Quam mihi prandioli Sapientialis
Ieiunus accessus foret.
Esuriens, veluti leo, devoravi
Et litteras et carmina:
Ventriculo saties tamen hinc replendo
Non ulla compescit famem.
Post iterum atque iterum bene ruminatis
Et litteris et versibus;
Tanta sitis mihi guttur inaestuando
Accendit, ut nec Tantali
Tanta sit, ERIDANUM sitientis amnem;
Nec Hippocrene, quamlibet
Uber aquis, potis ipsa levare flammam.
Transmitte quaeso crebrius
Ambrosiaeque tuae, SIMO, nectarisque

Succos salutares, quibus
(Omnis abesto mihi mora) degulatis
Satuller atque recreer,
Quod nisi sufficiant avido palato,
Aequo petenti largius,
Congerat ipse, rei memor ampliandae,
Omne huc penum SYLBURGIUS:
Promus et esse velit potius, monebis,
Quam condus Attici favi;
Cuius amore tenemur, amore cuius
absentis infremens apum
Bombilat anniculus populus mearum,
Rauco susurrans murmure.
Proin fac, ut ambo famique sitique nostrae
Sitis resedendae pares;
Carmina quo saturi mea lectitare
STENI vicissim gestias.
Sic bene convenient (mihi crede) lector
Ieiunus, et scriptor satur.

AD IACOBUM KIMEDONGIUM.

CUSTOS meorum crastine turturum,
Nymphas petentis Cocchidas, et salis
Urbem Suevi, proximamque,
Quae renovata supra stat, arcem;
Salve, et piarum curam age sedulus
Altor volucrum: quas ego suavius
Amplector hercle exosculorque,
Quam Venus alma suas columbas.
Apes Matinae vix ita sertulae

Flores amabunt, vix casiam aut crocum
Thymumve, cerinthaeque gramen;
Unde avidae bona mella sugant,
Cerisque figant. Quis rogo turtures
Servare sancti coniugii fidem
Binumque propagare fetum
Foedere perdocuit marito?
Ut mutuo ardens alter in alterum
Amore flagrat! Discite coniuges
Prudenter exemplo fideli
Plumigerum genus aemulari:
Et tu beatae transige cum tuo
Aequaeva vitae tempora corculo.
Porro et beanto me ROSINAE
Consimiles, IACOBE, tedae.
"Discors ad aequum differitas solet
"Res subruendo perdere maximas:
"Concors voluntas servat urbes,
"Servat item requieta gentes.